Ní Aaashɛ Gbekɛ Tsui He

ANI edɔ po pɛŋ akɛ ona ni gbekɛ ko kɛ shwɛmɔ nibii ni afee lɛ tamɔ tawuu nibii miishwɛ? Nifeemɔi ni tamɔ nɛkɛ egbɛ eshwa babaoo yɛ gbekɛbii bibii po ateŋ, ejaakɛ hiɛtserɛjiemɔi ni yaa nɔ yɛ je lɛŋ lɛ mli eyi obɔ kɛ awuiyeli nifeemɔi. Te ooofee tɛŋŋ oye obua gbekɛ ko ni ekɛ nibii ni jeee awuiyeli nibii ashwɛ moŋ fe nɔ ni ekɛ nibii ni afee lɛ tamɔ tawuu nibii ashwɛ? Waltraud ni eji Yehowa Odasefoi amaŋsɛɛ shiɛlɔ ni kɛ be babaoo esɔmɔ yɛ Afrika lɛ tsɔ gbɛ ko nɔ eye ebua gbekɛ nuu ko ni efee nakai pɛpɛɛpɛ.

Akɛni aawu ta yɛ maŋ ni Waltraud yɔɔ mli lɛ mli hewɔ lɛ, ehe bahia ni eshi nakai maŋ lɛ mli koni eyahi maŋ kroko nɔ yɛ Afrika. Ekɛ yoo ko ní ebinuu eye afii enumɔ lɛ bɔi Biblia lɛ kasemɔ yɛ jɛmɛ. Be fɛɛ be ni eeeya yoo lɛ ŋɔɔ lɛ, enaa ni gbekɛ nuu lɛ kɛ rɔba tu bibioo ko miishwɛ, ni no pɛ ji shwɛmɔ nɔ̃ ni gbekɛ lɛ yɔɔ. Waltraud enako ni gbekɛ lɛ etá tu lɛ pɛŋ, shi be fɛɛ be lɛ gbekɛ lɛ gbeleɔ tu lɛ ni eŋaa naa ní enáaa hiɛ kwraa, tamɔ nɔ ni eeshika tu lɛ.

Waltraud kɛɛ gbekɛ nuu lɛ akɛ: “Werner, ani ole nɔ hewɔ ni miyɔɔ nyɛmaŋ nɛɛ mli lɛ? Tawuu hewɔ—ehe bahia ni mashi mimaŋ koni mikɛjo hii awuiyelɔi ni kɛ tui ni tamɔ onɔ̃ nɛɛ tswiaa mɛi lɛ anaa foi. Ani osusuɔ akɛ tutswaa ni tamɔ nakai lɛ hi?”

Werner fee enii mɔbɔmɔbɔ kɛto he eha lɛ akɛ: “Dabi, tutswaa ni tamɔ nakai lɛ ehiii.”

Waltraud kɛɛ akɛ: “Nɔ ni owie lɛ ja jogbaŋŋ.” No sɛɛ lɛ ebi akɛ: “Ani ole nɔ hewɔ ni mibasaraa bo kɛ omami daa otsi lɛ? Nɔ hewɔ ji akɛ Yehowa Odasefoi miisumɔ ni amɛye amɛbua mɛi krokomɛi koni amɛkɛ Nyɔŋmɔ kɛ amɛkutsoŋbii ahi shi yɛ toiŋjɔlɛ mli.” Akɛni Werner mami kpɛlɛ nɔ eha Waltraud hewɔ lɛ, Waltraud kɛɛ Werner akɛ: “Kɛ okɛ otu lɛ ha mi lɛ, mashɛ mafɔ̃, ni mabɔ mɔdɛŋ ni maha bo shwɛmɔ nɔ̃ ko ni afee lɛ tamɔ lɔle kɛ eshishi tai ejwɛ.”

Werner kɛ eshwɛmɔ nɔ̃ ni afee lɛ tamɔ tu lɛ ha lɛ. Ehe bahia ni emɛ otsii ejwɛ, shi kɛlɛ akɛ eshwɛmɔ nɔ̃ hee lɛ ba—tso shwɛmɔ nɔ̃ ko ni afee lɛ tamɔ lɔle, ni efee ehiɛ ŋmɔlɔŋmɔlɔ waa kɛhé.

Ani otaoɔ be ni okɛ obii lɛ gbaa sane, ni obɔɔ mɔdɛŋ koni oshɛ amɛtsui he bɔni afee ni no aha amɛshɛrɛ shwɛmɔ nibii ni afee amɛ tamɔ tawuu nibii lɛ amɛshwie? Kɛ nakai ni lɛ, belɛ ootsɔɔ amɛ nɔ ko ni he baaba sɛɛnamɔ kɛha amɛ, amɛwala gbii abɔ fɛɛ.