Sanebimɔi ni Jɛ Kanelɔi Adɛŋ

Mɛni haa “jeŋmaji lɛ fɛɛ anii ni jara wa lɛ” baa “shĩa” ni ji anɔkwa jamɔhe lɛ?—Hagai 2:7.

Yehowa tsɔ gbalɔ Hagai nɔ egba akɛ: “Mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shĩa nɛɛ obɔ̃.” (Hagai 2:7) Ani “jeŋmaji lɛ fɛɛ” ni ahosoɔ lɛ miiha ‘amɛnii ni jara wa’ ni ji aŋkroaŋkroi ni hiɛ tsuijurɔ lɛ miimɔ anɔkwa jamɔ mli? Hetoo lɛ ji dabi.

Susumɔ nɔ ni hosoɔ jeŋmaji lɛ, kɛ nɔ ni jɛɔ amɛ hosomɔ lɛ mli kɛbaa lɛ he okwɛ. Biblia lɛ kɛɛ ‘jeŋmaji lɛ miifee hoo, ni majimaji lɛ hu miijwɛŋ yaka nii.’ (Lala 2:1) “Yaka nii” ni ‘amɛjwɛŋɔ’ loo amɛsusuɔ he lɛ ji mɔdɛŋ ni amɛbɔɔ akɛ amɛaaha amɛnɔyelii lɛ ahi shi daa lɛ. Nɔ ko hosooo amɛ tamɔ kɛ́ amɛna ni aata amɛnɔyelii lɛ ahe.

Nyɔŋmɔ Maŋtsɛyeli ni ato ama shi lɛ he sane ni Yehowa Odasefoi jajeɔ yɛ jeŋ fɛɛ lɛ ebafee nɔ ko ni miiwo jeŋmaji lɛ ahe gbeyei yɛ gbɛ ni tamɔ nakai pɛpɛɛpɛ nɔ. Yɛ anɔkwale mli lɛ, Nyɔŋmɔ Mesia Maŋtsɛyeli ni enɔ maŋtsɛ ji Yesu Kristo lɛ ‘baajwara adesai amaŋtsɛyelii nɛɛ fɛɛ wɔtsɔwɔtsɔ, ni eekpata amɛhiɛ.’ (Daniel 2:44) Kojomɔ ni fata wɔshiɛmɔ nitsumɔ lɛ he lɛ miihoso jeŋmaji lɛ. (Yesaia 61:2) Ni bɔ ni shiɛmɔ nitsumɔ lɛ yaa hiɛ ní emli lɛɛɔ lɛ eha hosomɔ nɛɛ mli ewa. Hosomɔ ni agba afɔ̃ shi yɛ Hagai 2:7 lɛ feɔ mɛni he okadi?

Hagai 2:6 lɛ kaneɔ akɛ: “Bɔ ni Yehowa Zebaot kɛɛ nɛ: Eshwɛ be, be kukuoo kɛkɛ, ni mahoso ŋwɛi kɛ shikpɔŋ, kɛ ŋshɔ kɛ shikpɔŋ gbiŋ.” Beni bɔfo Paulo tsɛ́ɔ ŋmalɛ nɛɛ yisɛɛ lɛ, eŋma akɛ: “Ewo shi ekɛɛ: ‘Eshwɛ shikome ni mahoso, jeee shikpɔŋ lɛ kɛkɛ, shi ŋwɛi hu.’ Shi nɔ ni ekɛɛ: ‘eshwɛ shikome’ lɛ, ekɛtsɔɔ faŋŋ akɛ, nii ni ahosoɔ lɛ aaatsake, ejaakɛ nii ni afee ni, koni nii ni hosoŋ [Maŋtsɛyeli] lɛ ahi shi.” (Hebribii 12:26, 27) Hɛɛ, abaakpata nibii agbɛjianɔtoo nɛɛ hiɛ, ni akɛ jeŋ hee ni Nyɔŋmɔ bɔɔ lɛ baaye najiaŋ.

Jeee jeŋmaji lɛ ahosomɔ lɛ ni haa mɛi ni hiɛ tsuijurɔ lɛ kɛ amɛhe woɔ anɔkwa jamɔ mli. Nyɔŋmɔ Maŋtsɛyeli ni ato ama shi lɛ he sane ní ashiɛɔ yɛ jeŋ fɛɛ lɛ ni hosoɔ jeŋmaji lɛ, ni no nɔŋŋ ji nɔ ni gbalaa amɛ kɛbɛŋkɛɔ Yehowa ni amɛjáa lɛ lɛ. “Naanɔ sanekpakpa” ní ajajeɔ lɛ gbalaa aŋkroaŋkroi ni hiɛ tsuijurɔ lɛ, ni amɛbajáa anɔkwa Nyɔŋmɔ lɛ.—Kpojiemɔ 14:6, 7.

Maŋtsɛyeli shɛɛ sane lɛ ji fɔbuu kojomɔ kɛ yiwalaheremɔ nɔ̃. (Yesaia 61:1, 2) Shɛɛ sane ní ajajeɔ yɛ jeŋ fɛɛ lɛ tsuɔ nibii enyɔ ahe nii, ni nomɛi ji: klɛŋklɛŋ lɛ, ehosoɔ jeŋmaji lɛ, ni nɔ ni ji enyɔ lɛ, amɛnibii ni jara wa lɛ baa kɛwoɔ Yehowa hiɛ nyam.