Nikasemɔ Ni Kɔɔ Henɔwomɔ kɛ Heshibaa He

SANE ko ni tee nɔ yɛ Maŋtsɛ David wala beaŋ lɛ maa srɔtofeemɔ agbo ni yɔɔ heshibaa diɛŋtsɛ kɛ henɔwomɔ teŋ lɛ nɔ mi. Sane nɛɛ ba mli beni David ye Yerusalem nɔ kunim ní ekɛ jɛmɛ fee emaŋtiase lɛ. Akɛni David buɔ Yehowa akɛ lɛ ji Israel nɔ Maŋtsɛ diɛŋtsɛ hewɔ lɛ, eto gbɛjianɔ koni ayawo Adeka ní feɔ amɛteŋ ni Nyɔŋmɔ yɔɔ lɛ he mfoniri lɛ kɛba maŋtiase lɛ. Nifeemɔ nɛɛ he hiaa David aahu akɛ beni enyiɛ osɔfoi ni hiɛ Adeka lɛ asɛɛ lɛ, ekɛ miishɛɛ ni ená lɛ eteee. Mɛi ni yɔɔ Yerusalem lɛ na amɛmaŋtsɛ lɛ “miijo ni eehuru” “kɛ ehewalɛ fɛɛ.”—1 Kronika 15:15, 16, 29; 2 Samuel 6:11-16.

Shi Mikal ni ji David ŋa lɛ kɛ ehe wooo joo kɛ nyamɔ lɛ mli. Eyabu samfɛlɛ naa ekwɛ nɔ ni yaa nɔ lɛ, ni nɔ najiaŋ ni eeená gbɛ nɔ ni David tsɔɔ ejieɔ Yehowa yi lɛ he miishɛɛ lɛ, efeee nakai, shi moŋ “egbe ehe guɔ yɛ etsui mli.” (2 Samuel 6:16) Mɛni ha Mikal fee nakai? Ekã shi faŋŋ akɛ eyabu ehe fe nine akɛni eji Saul ni ji Israel klɛŋklɛŋ maŋtsɛ lɛ biyoo kɛ agbɛnɛ hu, akɛni no mli lɛ eji Israel maŋtsɛ ni ji enyɔ lɛ ŋa lɛ hewɔ. Ekolɛ enu he akɛ kulɛ esaaa akɛ ewu ni ji maŋtsɛ lɛ baa shi ni ekɛ mɛi ni abuuu amɛ lɛ feɔ ekome kɛnyaa. Ehe nɔ ní ewoɔ nɛɛ je kpo yɛ wiemɔi ni ekɛkpee David beni eku esɛɛ kɛba shĩa lɛ mli. Ekɛ hefɛoyeli kɛɛ lɛ akɛ: “Aso nyam pam Israel maŋtsɛ lɛ wo ehiɛ ŋmɛnɛ nɛɛ akɛ ejie ehebo ŋmɛnɛ yɛ etsuji lɛ aweyei lɛ ahiɛ, tamɔ yakagbɔmɛi lɛ eko jieɔ ehe nɛɛ!”—2 Samuel 6:20.

Te David fee enii yɛ wiemɔi ni akɛshi lɛ lɛ he eha tɛŋŋ? David kã Mikal hiɛ akɛ Yehowa ekpoo etsɛ Saul ni ehala lɛ yɛ enajiaŋ. David kɛfata he akɛ: “Mibafee mihe humi fe nɛkɛ tete ni mibuŋ mihe akɛ mɔ ko, ni weyei lɛ ni okɛɔ lɛ, amɛ moŋ amɛaawo mihiɛ nyam!”—2 Samuel 6:21, 22.

Hɛɛ, David tswa efai shi akɛ ebaaya nɔ esɔmɔ Yehowa yɛ heshibaa mli. Su nɛɛ ní David jie lɛ kpo lɛ haa wɔnaa nɔ hewɔ ni Yehowa wie ehe akɛ “nuu ni [e]yɔɔ ehe tsui” lɛ. (Bɔfoi lɛ Asaji 13:22; 1 Samuel 13:14) Yɛ anɔkwale mli lɛ, David kase Yehowa Nyɔŋmɔ diɛŋtsɛ—mɔ ni fee heshibaa he nɔkwɛmɔnɔ ni fe fɛɛ lɛ. Naakpɛɛ sane ji akɛ, Hebri feemɔ wiemɔ kometoo ni akɛtsɔɔ bɔ ni Yehowa buɔ adesai ehaa lɛ nɔŋŋ mli ajie wiemɔ ni David kɛ Mikal wie ni ji “mibafee mihe humi” lɛ kɛjɛ. Eyɛ mli akɛ Yehowa ji Mɔ ni nɔ kwɔ fe fɛɛ yɛ je lɛŋ moŋ, shi Lala 113:6, 7 wieɔ ehe akɛ “[e]maa ehiɛ shi [mɔ ko ni hiɛ gbɛnaa ni asaŋ eje agbo ní baa ehe shi kɛ́ ekɛ mɛi ni ehiɛɛɛ gbɛnaa ko miiye] ni ekwɛɔ nii ni yɔɔ ŋwɛi kɛ shikpɔŋ lɛ nɔ fɛɛ . . . Eteeɔ humi shi kɛjɛɔ sũ mli, ni ewoɔ ohiafo nɔ kɛjɛɔ tumu nɔ.”

Akɛni Yehowa baa ehe shi hewɔ lɛ, ebɛ naakpɛɛ akɛ enyɛ̃ɔ henɔwolɔi “[a]hewoo hiŋmɛii” lɛ. (Abɛi 6:16, 17) Akɛni Mikal jie su gbonyo ni tamɔ nɛkɛ kpo, ni ebuuu maŋtsɛ ni Nyɔŋmɔ ehala lɛ lɛ hewɔ lɛ, ahaaa efɔ́ eha David. Enáaa bi kɛyashi egbo. Kwɛ nikasemɔ wulu ni enɛ ji kɛha wɔ! Esa akɛ mɛi fɛɛ ni sumɔɔ akɛ amɛná Nyɔŋmɔ hiɛ duromɔ lɛ abo ŋmalɛ ni kɛɔ akɛ: “Nyɛbaa nyɛhe shi nyɛhaa nyɛhe ni nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ” lɛ toi.—1 Petro 5:5.