“Mɔ Ni Buɔ Kamɔ Lɛ, Ehiɛ Tɛ̃ɔ”

ABƐI 23:12 lɛ kɛɔ akɛ: “Okɛ otsui afɔ̃ tsɔsemɔ nɔ, ni okɛ otoii hu afɔ̃ nilee wiemɔi anɔ.” Nɔ ni fata wiemɔ ni ji “tsɔsemɔ” loo jeŋba he tsɔsemɔ ni akɛtsu nii yɛ ŋmalɛ nɛɛ mli lɛ he ji mɔ diɛŋtsɛ he tsɔsemɔ kɛ kãmɔ ni wɔnine shɛɔ nɔ kɛjɛɔ mɛi krokomɛi aŋɔɔ lɛ. Tsɔsemɔ ni tamɔ nɛkɛ lɛ biɔ ni ale nɔ̃ tsakemɔ ni esa akɛ afee kɛ gbɛ ni abaatsɔ nɔ atsu he nii. Enɛ hewɔ lɛ, “nilee wiemɔi” ni jɛ he ko ni anyɛɔ akɛhe fɔ̃ɔ nɔ lɛ ahe hiaa waa kɛha tsɔsemɔ.

Biblia mli wolo ni ji Abɛi lɛ ji nilee wiemɔi ajɛɛhe ko ni sa jogbaŋŋ diɛŋtsɛ. Aŋmala wolo nɛɛ mli abɛi lɛ “ní akɛle nii kɛ tsɔsemɔ, . . . ní akɛna tsɔsemɔ ni tsɔɔ mɔ nilee, kɛ jalɛ kɛ kojomɔ kɛ nɔ ni ja gbɛ.” (Abɛi 1:1-3) Eji nilee gbɛ akɛ ‘wɔɔbo’ emli wiemɔi lɛ ‘atoi.’ Abɛi yitso 15 lɛ kɛ gbɛtsɔɔmɔ ni anyɛɔ akɛhe fɔ̃ɔ nɔ haa yɛ bɔ ni aaafee aye mlifu nɔ, gbɛ nɔ ni aaatsɔ akɛ lilɛi lɛ atsu nii, kɛ bɔ ni aaafee aha mɛi aná nilee lɛ he. Nyɛhaa wɔsusua yitso nɛɛ mli kukuji lɛ ekomɛi ahe wɔkwɛa.

Mɛni “Kuɔ Mlila Naa”?

Beni Maŋtsɛ Salomo ni hi shi yɛ blema Israel lɛ tsɔɔ bɔ ni wiemɔi ni awieɔ lɛ baanyɛ atee mlifu loo mlila shi, loo eku naa lɛ mli lɛ, ekɛɛ akɛ: “Naajɔlɛ hetoo kuɔ mlila naa; shi wiemɔ ní wa teeɔ mlifu shi.” (Abɛi 15:1) “Mlifu” ji wiemɔ ko ni akɛtsuɔ nii kɛtsɔɔ henumɔ ko ni naa wa ni ajieɔ lɛ kpo, loo nifeemɔ ni akɛtsɔɔ nɔ ko ni anyaaa he. Atsɔɔ “Mlila” shishi akɛ “eji mlifu henumɔ ko ni naa wa ní ekudɔmɔ wa waa.” Mɛɛ gbɛ nɔ abɛ nɛɛ baanyɛ aye abua wɔ koni wɔnyɛ wɔba mɔ kroko mlifu shi, ní yɛ nakai beaŋ nɔŋŋ lɛ wɔkudɔ wɔ diɛŋtsɛ wɔnɔ lɛ hu?

Wiemɔi ni wawai ní teeɔ dɔlɛ shi lɛ baanyɛ aha shihilɛ ko ni ehiii lɛ mli awo wu. Nɔ ni tamɔɔɔ nakai lɛ, bei pii lɛ naajɔlɛ hetoo kuɔ mlifu naa. Kɛlɛ, jeee be fɛɛ be eyɔɔ mlɛo ákɛ aaaha mɔ ko ni mli efu lɛ naajɔlɛ hetoo. Shi kɛlɛ, kɛ́ wɔbɔ mɔdɛŋ koni wɔnu nɔ ni ha mɔ lɛ mli efu lɛ shishi lɛ, no baaye abua wɔ koni wɔnyɛ wɔha lɛ naajɔlɛ hetoo. Biblia lɛ kɛɔ akɛ: “Gbɔmɔ ni yɔɔ jwɛŋmɔ lɛ, emli fũuu mra, ni ehiɛ ni ekuɔ efɔ̃ɔ nɔtɔmɔ nɔ lɛ, ehiɛnyam ni.” (Abɛi 19:11) Ani eeenyɛ eba lɛ akɛ aŋkro ko ni mli efu lɛ mli efu yɛ nɔmimaa ni ebɛ hewɔ aloo eji mɔ ko ni miitao ni agbala jwɛŋmɔ kɛba enɔ? Ekolɛ jeee nɔ ko ni wɔfee loo wɔkɛɛ lɛ ji nɔ diɛŋtsɛ ni eha emli efu lɛ. Kɛ́ shiatsɛ ko kɛ mlifu kpee wɔ yɛ Kristofoi ashiɛmɔ nitsumɔ lɛ mli lɛ, ani ejeee anɔkwale  akɛ bei pii lɛ enɛ baa lɛ nakai akɛni awie wɔhemɔkɛyelii lɛ ahe amale wiemɔi atsɔɔ lɛ loo ená wɔhe susumɔi komɛi ni ejaaa lɛ hewɔ? Ani esa akɛ wɔŋɔ nakai mlifu ní shiatsɛ lɛ jie lɛ kpo lɛ akɛ ekɛmiitutua wɔ, ní wɔkɛ wiemɔi ni wa ajie lɛ naa? Kɛ́ wɔleee nɔ̃ pɔtɛɛ ni eha mɔ ko mli efu ni wɔkɛ wiemɔi ni wawai ni teeɔ dɔlɛ shi jie lɛ naa lɛ, belɛ no tsɔɔ akɛ ehe miihia ni wɔtsɔse wɔhe. Esa akɛ wɔtsi wɔhe kɛjɛ sane naajiemɔ ni tamɔ nakai lɛ he.

Ŋaa ní awoɔ wɔ akɛ wɔkɛ naajɔlɛ ajie sane naa lɛ hu he hiaa waa yɛ wɔ diɛŋtsɛ wɔ mlifu ni wɔɔkudɔ lɛ gbɛfaŋ. Wɔbaanyɛ wɔkɛ ŋaawoo nɛɛ atsu nii kɛtsɔ wɔhenumɔi akpo ni wɔɔjie yɛ gbɛ̀i ni haŋ mɔ ni boɔ wɔ toi lɛ mli afu lɛ nɔ. Yɛ nɔ najiaŋ ni wɔkɛ wiemɔi ni wawai loo heguɔgbee wiemɔi aaatsu nii beni wɔkɛ wɔweku lɛ mli bii shãraa lɛ, ebaafee nɔ ni hi moŋ akɛ wɔɔbɔ mɔdɛŋ ni wɔjie wɔhenumɔi akpo yɛ naajɔlɛ gbɛ nɔ. Kɛ́ akɛ mlilawoo wiemɔi wie ashi mɔ ko lɛ, bei pii lɛ ehaa mɔ lɛ hu jieɔ naa kɛ mlilawoo wiemɔi. Naajɔlɛ mli ní wɔɔjɛ wɔjie wɔhenumɔi akpo wɔtsɔɔ mɔ ko lɛ haaa enu he akɛ wɔmiifolɔ enaa, ni no baatsirɛ lɛ koni efee tsakemɔi.

‘Nilelɔi Alilɛi Wieɔ Wiemɔi ni Ŋɔɔ’

Wɔ diɛŋtsɛ wɔhe ni wɔɔtsɔse lɛ náa bɔ ni wɔwieɔ wɔhaa kɛ agbɛnɛ hu nɔ ni wɔkɛɔ lɛ nɔ hewalɛ. Salomo kɛɛ akɛ: “Nilelɔi alilɛi wieɔ nilee wiemɔi ni ŋɔɔ; shi buului asane jɛɔ kwashiai adaaŋ.” (Abɛi 15:2) Kɛ́ wɔná shwelɛ akɛ wɔbaaye wɔbua mɛi krokomɛi ní wɔkɛ amɛ gba Nyɔŋmɔ yiŋtoi kɛ nibii kpakpai ni ekɛduro wɔ lɛ ahe sane lɛ, ani jeee “nilee wiemɔi ni ŋɔɔ” wɔwieɔ lɛ? Mɔ ni ji kwashia efeee enɛ ejaakɛ ebɛ nilee.

Dani Salomo aaaya nɔ ekɛ ŋaawoo krokomɛi aha lolo yɛ lilɛi lɛ kɛ nitsumɔ he lɛ, ewie nɔ ko ni haa asusuɔ nii ahe kɛyaa shɔŋŋ ní yɔɔ srɔto kwraa yɛ sane ni kɔɔ lilɛi lɛ he lɛ he. “Yehowa hiŋmɛii yɛ he fɛɛ he, ni ekwɛɔ mɛi fɔji kɛ mɛi kpakpai fɛɛ.” (Abɛi 15:3) Wɔmli baanyɛ afili wɔ yɛ wiemɔ nɛɛ he ejaakɛ amaa nɔ mi ahaa wɔ akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.” (2 Kronika 16:9) Kɛ́ wɔmiifee nɔ̃ kpakpa lɛ Nyɔŋmɔ le. Enaa mɛi ni feɔ nifɔji anii lɛ hu, ni ebaaha amɛbu amɛhe akɔntaa amɛha lɛ.

Salomo tee nɔ ema nɔ mi akɛ sɛɛnamɔ yɛ lilɛi lɛ ni akɛaatsu nii yɛ naajɔlɛ gbɛ nɔ lɛ he, ni ekɛɛ akɛ: “Naajɔlɛ lilɛi lɛ, walatso ni; shi kutumpɔo nɔ̃ lɛ, tsuiŋdɔlɛ ni.” (Abɛi 15:4) Wiemɔ ni ji “walatso” ni akɛtsu nii yɛ biɛ lɛ baanyɛ atsɔɔ sui ni tsaa mɔ ní woɔ mɔ hewalɛ. (Kpojiemɔ 22:2) Naajɔlɛ wiemɔ ni nilelɔ kɛtsuɔ nii lɛ haa mɛi ni nuɔ lɛ atsui nyɔɔ amɛmli. Ekanyaa sui kpakpai ni amɛyɔɔ lɛ. Nɔ ni tamɔɔɔ nakai lɛ, apasa lilɛi loo lilɛi ni jeɔ gbɛ ewieɔ nibii gbohii lɛ kumɔɔ mɛi ni nuɔ lɛ atsui.

Tsɔsemɔ Nɔ ní Aaakpɛlɛ kɛ ‘Nilee ní Aaagbɛ Ashwã’

Maŋtsɛ nilelɔ lɛ tsa ewiemɔ lɛ nɔ akɛ: “Buulu gbeɔ etsɛ tsɔsemɔ he guɔ; shi mɔ ni buɔ kamɔ lɛ, ehiɛ tɛ̃ɔ.” (Abɛi 15:5) Kɛ́ akɛ kamɔ haaa lɛ, te aaafee tɛŋŋ ni mɔ ko ‘aaabu kamɔ’? Ŋmalɛ nɛɛ tsɔɔ akɛ esa ákɛ akɛ tsɔsemɔ ni akɛjajeɔ mɔ lɛ aha, kɛ́ ehe miihia ni afee nakai. Yɛ weku lɛ mli lɛ, eji fɔlɔi lɛ—titri lɛ tsɛ lɛ—agbɛnaa nii akɛ amɛkɛ tsɔsemɔ aha, ni eji sɔ̃ ni kã gbekɛ lɛ hu nɔ akɛ ekpɛlɛ tsɔsemɔ nɔ. (Efesobii 6:1-3) Kɛlɛ, Yehowa tsuji fɛɛ anine shɛɔ tsɔsemɔ nɔ yɛ gbɛ ko nɔ. Hebribii 12:6 lɛ kɛɔ akɛ: “Mɔ ni Nuŋtsɔ [Yehowa, NW] sumɔɔ lɛ, lɛ etsɔseɔ, ni eyiɔ bi fɛɛ bi ní eŋɔfeɔ enɔ̃ lɛ.” Bɔ ni wɔkpɛlɛɔ tsɔsemɔ nɔ wɔhaa lɛ tsɔɔ kɛji akɛ wɔji nilelɔi loo kwashiai.

Salomo tee nɔ ewie srɔtofeemɔ kroko hu he, ni ekɛɛ akɛ: “Nilelɔi anaabu gbɛɔ nilee shwãa; shi kwashiai atsui lɛ, efiii shi.” (Abɛi 15:7) Nilee ni wɔɔha mɛi krokomɛi aná lɛ tamɔ dumɔwui ashwãmɔ. Yɛ blema beaŋ lɛ, okwaafonyo duuu edumɔwui lɛ fɛɛ yɛ he kome too lɛ nɔŋŋ. Yɛ no najiaŋ lɛ, eshwãa dumɔwui lɛ fiofio kɛyashi beni eeeshwã ewo ŋmɔ lɛ mli fɛɛ. Nakai nɔŋŋ eji yɛ nilee ni aaaha mɛi aná lɛ hu gbɛfaŋ. Ákɛ nɔkwɛmɔnɔ lɛ, ebafeŋ nɔ ni nilee yɔɔ mli akɛ  kɛ́ wɔkɛ mɔ ko kpe yɛ shiɛmɔ nitsumɔ lɛ mli lɛ, wɔbaawie nɔ fɛɛ nɔ kwraa ni wɔle yɛ Biblia lɛ mli lɛ he wɔtsɔɔ nakai mɔ lɛ yɛ be kome too lɛ nɔŋŋ mli. Yɛ no najiaŋ lɛ, nilelɔ tsɔseɔ ehe yɛ wiemɔ mli. ‘Egbɛɔ’ nilee lɛ eshwãa fiofio yɛ be mli ni emaa Biblia mli anɔkwale kome pɛ nɔ mi yɛ be kome mli ní eyaa nɔ ekɛ ekrokomɛi fataa he yɛ sɛɛ mli lɛ, ni esusuɔ bɔ ni etoibolɔ lɛ kpɛlɛɔ anɔkwale lɛ nɔ ehaa lɛ hu he. Yesu Kristo ni ji wɔ-Nɔkwɛmɔnɔ lɛ fee nakai beni ekɛ Samaria yoo ko gbaa sane lɛ.—Yohane 4:7-26.

Nilee ní aaaha mɛi aná lɛ biɔ ni awie wiemɔi ní tswaa mɔ emaa shi ni sɛɛnamɔ hu yɔɔ he. Ebiɔ ni ajwɛŋ nii anɔ dani anyɛ awie wiemɔi ni tsɔɔ mɔ nii ni woɔ mɔ hewalɛ. No hewɔ lɛ, “jalɔ tsui jwɛŋɔ hetoohamɔ he.” (Abɛi 15:28) Belɛ kwɛ bɔ ni ehe hiaa waa akɛ wɔɔha wɔwiemɔi atamɔ nugbɔ ni nɛɔ blɛoo kɛfɔɔ shikpɔŋ ní he baa sɛɛnamɔ lɛ, shi jeee tamɔ nu afua ni asumɔɔɔ ni loɔ nɔ fɛɛ nɔ ni yɔɔ egbɛ nɔ kɛyaa lɛ!

‘Krɔŋkrɔŋ yɛ Jeŋba Mli’

Yɛ anɔkwale mli lɛ, eji nilee gbɛ akɛ wɔɔgbɛ Yehowa he nilee kɛ eyiŋtoo lɛ wɔshwã, ni wɔkɛ ‘naabui ayibii lɛ’ ni ji “yijiemɔ afɔle” lɛ aha lɛ. (Hebribii 13:15) Shi kɛ́ Yehowa baakpɛlɛ afɔleshaa ni tamɔ nɛkɛ nɔ lɛ, no lɛ esa akɛ wɔfee ‘krɔŋkrɔŋ yɛ wɔjeŋba fɛɛ mli.’ (1 Petro 1:14-16) Salomo kɛ abɛi srɔtoi enyɔ ni kɛ amɛhe kpãaa gbee tsu nii yɛ sane nɛɛ mli koni ekɛgbala wɔjwɛŋmɔ kɛba anɔkwa sane ni he hiaa waa nɛɛ nɔ. Ekɛɛ akɛ: “Mɛi fɔji afɔle lɛ, Yehowa miihi; shi jalɔi asɔlemɔ lɛ, enáa he miishɛɛ. Gbɔmɔ fɔŋ gbɛ lɛ, Yehowa miihi; shi mɔ ni nyiɛɔ jalɛ sɛɛ lɛ, esumɔɔ lɛ.”—Abɛi 15:8, 9.

Te mɛi ni jeɔ wala gbɛ lɛ nɔ nyiɛmɔ lɛ buɔ kãmɔ amɛhaa tɛŋŋ, ni mɛni baajɛ nakai feemɔ mli kɛbaha amɛ? (Mateo 7:13, 14) “Tsɔsemɔ ni mli wa kã shi ha mɔ ni jeɔ gbɛ lɛ nɔ lɛ, shi mɔ ni nyɛ̃ɔ kamɔ lɛ, eeegbo.” (Abɛi 15:10) Yɛ nɔ najiaŋ ni mɛi ni ekɔ gbɛ fɔŋ ko lɛ ateŋ mɛi komɛi aaakpɛlɛ ŋaawoo ni mɛi ni akɛ gbɛnaa nii ahe nitsumɔ ewo amɛdɛŋ yɛ Kristofoi asafo lɛ mli lɛ kɛhaa lɛ nɔ lɛ, amɛhalaa moŋ akɛ amɛaashi jalɛ gbɛ lɛ nɔ. Kwɛ bɔ ni nilee bɛ enɛ mli kwraa ha!

Ni kɛ́ mɔ ko kwaa efeɔ enii tamɔ mɔ ni kpɛlɛɔ kãmɔ nɔ, shi yɛ anɔkwale mli lɛ enyɛ̃ɔ kãmɔ hu? Nilee bɛ enɛ feemɔ hu mli. Israel maŋtsɛ lɛ kɛɛ akɛ: “Gbohiiaje kɛ hiɛkpatamɔbu lɛ po naa kã yɛ Yehowa hiɛ, aahu ni gbɔmɛi abii atsuii!” (Abɛi 15:11) Yɛ mfonirifeemɔŋ lɛ, nɔ ko nɔ ko bɛ ni yɔɔ shɔŋŋ diɛŋtsɛ kɛjɛ Nyɔŋmɔ hiɛkalɔ lɛ hiɛ fe Sheol, ni ji gbohiiaje lɛ. Shi no po naa kã yɛ ehiɛ. Ele mɛi fɛɛ ni yɔɔ jɛmɛ lɛ, ele amɛsu kɛ baŋ, ni ebaanyɛ etée amɛ fɛɛ shi. (Lala 139:8; Yohane 5:28, 29) Kwɛ bɔ ni ewaaa kwraa kɛha  Yehowa akɛ eeele nɔ ni yɔɔ adesai atsuii amli! Bɔfo Paulo ŋma akɛ: “Nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) Abaanyɛ akɛ kwa ni akwaa afeɔ nɔ ko lɛ alaka adesai shi jeee Nyɔŋmɔ.

Kɛ́ mɔ ko kpoo tsɔsemɔ lɛ, etsɔɔ akɛ jeee kãmɔ lɛ pɛ kɛkɛ enyɛ̃ɔ lɛ, shi moŋ ebuuu mɛi ni kɛ nakai tsɔsemɔ lɛ haa lɛ lɛ hu. Salomo kɛɛ akɛ: ‘Hefɛoyelɔ yɔɔ nɛɛ, esumɔɔɔ mɔ ni kãa lɛ.’ Salomo tsĩ susumɔ kroko ni tamɔ no nɔŋŋ tã ekɛfee sane lɛ faŋŋ akɛ: “Eyaaa nilelɔi aŋɔɔ hu.” (Abɛi 15:12) Kwɛ bɔ ni hiɛnɔkamɔ ni yɔɔ akɛ nakai mɔ lɛ aaajaje egbɛ̀i lɛ faaa kwraa ha!

Ná Jwɛŋmɔ ni Ja

Salomo abɛi etɛ ni nyiɛ sɛɛ lɛ wieɔ “tsui” lɛ he. Maŋtsɛ nilelɔ lɛ tsɔɔ hewalɛ ni wɔhenumɔi náa yɛ wɔhiɛ sú nɔ, ni ekɛɛ akɛ: “Miishɛɛ tsui haa mɔ tseɔ ehiɛ; shi tsuiŋdɔlɛ haa mɔ feɔ gblinĩi.”—Abɛi 15:13.

Mɛni baanyɛ ekɛ tsuiŋdɔlɛ aba? Biblia lɛ kɛɔ akɛ: “Gbɔmɔ tsui mli ŋkɔmɔyeli haa edɔɔ kɔmɔɔ.” (Abɛi 12:25) Mɛɛ gbɛ nɔ wɔɔtsɔ koni wɔkaha shihilɛ mli naagbai miiye wɔnɔ? Yɛ nɔ najiaŋ ni wɔɔya nɔ wɔsusu shihilɛ mli naagbai ni ekolɛ wɔnyɛŋ he nɔ ko kwraa wɔfee lɛ ahe be fɛɛ be lɛ, wɔbaanyɛ wɔsusu mumɔŋ jɔɔmɔi babaoo ni Yehowa kɛduro wɔ amrɔ nɛɛ kɛ nɔ ni ebaafee eha wɔ yɛ wɔsɛɛ be mli lɛ ahe. Enɛ baaha wɔbɛŋkɛ lɛ kpaakpa. Hɛɛ, “miishɛɛ Nyɔŋmɔ lɛ” ni wɔɔbɛŋkɛ lɛ lɛ baaha wɔtsuii ni yeɔ awerɛho lɛ anyã.—1 Timoteo 1:11, NW.

Kɛfata he lɛ, shɛɛ sane ni yɔɔ Biblia lɛ mli lɛ shɛjeɔ mɔ mii waa ni ehaa mɔ tsui nyɔɔ emli jogbaŋŋ. Lalatsɛ lɛ wie akɛ mɔ ni “Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ” lɛ baaná miishɛɛ. (Lala 1:1, 2) Kɛji wɔkɛ shihilɛ ko ni haa mɔ nuɔ tsuiŋdɔlɛ he kpe po lɛ, Biblia lɛ ni wɔɔkane, kɛ nɔ ni ekɛɔ lɛ nɔ ní wɔɔjwɛŋ lɛ baawo wɔ hewalɛ. Shiɛmɔ nitsumɔ lɛ ni wɔ-Nyɔŋmɔ lɛ kɛwo wɔdɛŋ lɛ hu baanyɛ aye abua wɔ. Amaa nɔ mi ahaa wɔ akɛ “mɛi ni kɛ yaafonui dũɔ nii lɛ, amɛkɛ nyamɔ aaakpa.”—Lala 126:5.

Salomo kɛɛ akɛ: “Mɔ ni kɔɔ sane sɛɛ lɛ, etsui taoɔ nilee sɛɛgbɛ; shi kwashiai adaa kɛ buulufeemɔ lɛɔ ehe.” (Abɛi 15:14) Abɛ nɛɛ gbalaa wɔjwɛŋmɔ kɛyaa srɔtofeemɔ ni mli kã shi faŋŋ ni yɔɔ ŋaawoo ni nilelɔ kɛhaa lɛ kɛ ŋaawoo ni kwashia kɛhaa lɛ teŋ lɛ nɔ. Dani mɔ ni kɔɔ sane sɛɛ lɛ kɛ ŋaawoo ko baaha lɛ etaoɔ nilee sɛɛgbɛ. Eboɔ sane lɛ toi jogbaŋŋ, ni ekwɛɔ akɛ enu anɔkwalei lɛ ashishi jogbaŋŋ. Ekpaa Ŋmalɛi lɛ amli etaoɔ mlai kɛ shishitoo mlai ni abaanyɛ akɛtsu shihilɛ lɛ he nii. Ekɛ ŋaawoo ni ekɛhaa lɛ damɔɔ Nyɔŋmɔ Wiemɔ lɛ nɔ diɛŋtsɛ. Shi kwashia gbaaa ehe naa etaooo anɔkwalei ni kɔɔ shihilɛ lɛ he lɛ amli, ni ewieɔ nɔ fɛɛ nɔ kɛkɛ ni esusuuu he. No hewɔ lɛ, kɛ́ wɔmiitao ŋaawoo lɛ ebaafee nɔ ni nilee yɔɔ mli akɛ wɔbaaya mɛi ni edara yɛ mumɔŋ ni yɔɔ nilee lɛ aŋɔɔ fe nɔ ni wɔɔya mɛi ni ekolɛ amɛbaakɛɛ wɔ nɔ ni wɔtaoɔ akɛ wɔnu lɛ aŋɔɔ. Kwɛ bɔ ni ehi jogbaŋŋ akɛ wɔɔná ‘gbɔmɛi ateŋ nikeenii’ yɛ Kristofoi asafo lɛ mli, mɛi ni ‘taoɔ nilee’ dani amɛkɛ ŋaawoo haa lɛ!—Efesobii 4:8.

Abɛ ni nyiɛ sɛɛ lɛ wie sɛɛnamɔ ni nɔ bɛ ni jɛɔ jwɛŋmɔ ni ja ni aaaná lɛ mli kɛbaa lɛ he. Israel maŋtsɛ lɛ kɛɛ akɛ: “Nɔnalɔ gbii fɛɛ lɛ, gbii fɔji sɔŋŋ ni; shi mɔ ni tsui enyɔ emli lɛ, daa nɛɛ eeye gbi jurɔ.” (Abɛi 15:15) Jɔɔmɔi kɛ amanehului yɛ shihilɛ fɛɛ shihilɛ mli, ni miishɛɛ kɛ yaafonui hu yɛ mli. Kɛ́ wɔgbala wɔjwɛŋmɔ kɛtee emli naagbai lɛ pɛ anɔ lɛ, ebaaha awerɛhoyeli aye wɔsusumɔi anɔ kwraa, ni enɛ baaha wɔgbii ni eshwɛ lɛ fɛɛ afee nɔ ni miishɛɛ kɛ hiɛnɔkamɔ bɛ mli. Shi kɛ́ wɔha jɔɔmɔi ni wɔnine shɛɔ nɔ kɛ hiɛnɔkamɔ ni Nyɔŋmɔ kɛha wɔ lɛ fee nibii titrii ni wɔjwɛŋɔ nɔ lɛ, no lɛ nibii ni haa mɔ haoɔ yɛ shihilɛ mli lɛ baafee nɔ ni he ehiaaa tsɔ, ni wɔbaaná mligbɛ miishɛɛ. Jwɛŋmɔ ni ja ni wɔɔná lɛ baaha wɔye ‘gbi jurɔ daa nɛɛ.’

Belɛ, bɔ fɛɛ bɔ ni fee lɛ, nyɛhaa wɔbua tsɔsemɔ akɛ nɔ ko ni he hiaa waa diɛŋtsɛ. Eba akɛ wɔɔha tsɔsemɔ aná wɔhenumɔi, wɔwiemɔi, wɔnifeemɔi, kɛ agbɛnɛ hu bɔ ni wɔsusuɔ nii ahe wɔhaa lɛ anɔ hewalɛ.

[Mfoniri ni yɔɔ baafa 13]

“Naajɔlɛ hetoo kũɔ mlila naa”

[Mfoniri ni yɔɔ baafa 15]

Eji fɔlɔi agbɛnaa nii akɛ amɛkɛ tsɔsemɔ aha

[Mfoniri ni yɔɔ baafa 15]

“Nilelɔi anaabu gbɛɔ nilee shwãa”