Oblahii Kɛ Oblayei, Nyɛhalaa Akɛ Nyɛbaasɔmɔ Yehowa
Oblahii Kɛ Oblayei, Nyɛhalaa Akɛ Nyɛbaasɔmɔ Yehowa
“Ŋmɛnɛ gbi nɛɛ nyɛkɔa mɔ ni nyɛaasɔmɔ.”—YOSHUA 24:15.
1, 2. Mɛɛ baptisimɔ ni ejaaa yaa nɔ yɛ Kristendom sɔlemɔi lɛ amli?
BENI eshwɛ fioo ni afi 100 Ŋ.B. afii lɛ baaba naagbee lɛ, niŋmalɔ ko ni atsɛ́ɔ lɛ Tertullian ŋma akɛ: “Nyɛhaa [gbekɛbii lɛ] alea Kristo dani amɛtsɔmɔ Kristofoi.” Eŋma sane nɛɛ ni ekɛwie eshi abifabii abaptisimɔ ní no mli lɛ eehé shi yɛ Kristofoi hemɔkɛyeli kwalɔi ni hi shi yɛ egbii lɛ amli lɛ ateŋ lɛ. Augustine ni eji Sɔlemɔ lɛ Onukpa lɛ ekpɛlɛɛɛ nɔ ni Tertullian wie lɛ kɛ nɔ ni Biblia lɛ kɛɔ lɛ nɔ, ni ekɛɛ akɛ baptisimɔ jieɔ esha ni akɛfɔ́ wɔ lɛ kɛjɛɔ wɔhe, ni ákɛ kɛ́ abaptisiii abifao ko ni egbo lɛ, abaashɛ lɛ awo hɛl la mli. Susumɔ nɛɛ ha abifabii ní abaptisiɔ amɛ yɛ amɛfɔmɔ sɛɛ nɔŋŋ lɛ gbɛ eshwã waa.
2 Kristendom jamɔi wuji lɛ ateŋ babaoo kã he amɛbaptisiɔ abifabii. Kɛfata he lɛ, maji ni akɛɛ amɛji Kristofoi amaji lɛ anɔyelɔi kɛ jamɔŋ hiɛnyiɛlɔi lɛ kɛ nɔnyɛɛ baptisi “wɔŋjalɔi” ní amɛye amɛnɔ kunim lɛ, ni eji nifeemɔ ko ni tee nɔ yɛ yinɔi fɛɛ ni eho lɛ amli. Ni kɛlɛ, ebɛ Biblia lɛ mli he ko he ko ákɛ abaptisi abifabii loo ákɛ akɛ nɔnyɛɛ abaptisi mɛi ni edara lɛ.
Ŋmɛnɛ, Esa akɛ Mɔ Fɛɛ Mɔ Diɛŋtsɛ Akpɛ Eyiŋ akɛ Ebaajɔɔ Ehe Nɔ
3, 4. Mɛni baanyɛ aye abua bii ní amɛfɔlɔi ejɔɔ amɛhe nɔ lɛ koni amɛ hu amɛjɛ amɛsuɔmɔ mli amɛjɔɔ amɛhe nɔ?
3 Biblia lɛ tsɔɔ akɛ Nyɔŋmɔ buɔ bii ni amɛfɔlɔi lɛ ateŋ mɔ kome kɛkɛ po ji Kristofonyo anɔkwafo lɛ ákɛ amɛhe tse. (1 Korintobii 7:14) Ani no haa bii ni tamɔ nakai lɛ batsɔmɔɔ tsuji ni amɛjɔɔ amɛhe nɔ amɛha Yehowa? Dabi. Shi kɛlɛ, bii ní fɔlɔi ni ji Kristofoi ni amɛjɔɔ amɛhe nɔ amɛha Yehowa lɛ tsɔseɔ amɛ lɛ anine shɛɔ tsɔsemɔ ni baanyɛ aye abua amɛ koni amɛ diɛŋtsɛ amɛjɔɔ amɛhe nɔ amɛha Yehowa. Nilelɔ Maŋtsɛ Salomo ŋma akɛ: “Mibi, ye otsɛ kitã lɛ nɔ, ni kaashɛ onyɛ mla lɛ ofɔ̃! . . . Kɛ́ onyiɛ lɛ, eeetsɔ̃ɔo gbɛ; kɛ́ okã shi owɔ̀ lɛ, eeebu ohe, ni kɛ́ ohiɛ tsɛ̃ lɛ, ekɛo aaagba sane. Ejaakɛ kitã lɛ, kane ni, ni mla lɛ, la ni, ni tsɔsemɔ kãmɔi lɛ, wala gbɛ ni.”—Abɛi 6:20-23.
4 Kɛ́ oblahii kɛ oblayei jɛ amɛsuɔmɔ mli amɛkɛ gbɛtsɔɔmɔi ni amɛfɔlɔi ni ji Kristofoi lɛ kɛhaa amɛ lɛ tsu nii lɛ, ebaanyɛ ebu amɛhe. Salomo wie hu akɛ: “Bi nilelɔ haa etsɛ náa miishɛɛ; shi bi kwashia lɛ, ehaa enyɛ tsui yeɔ.” “Bo lɛ, bo toi, mibi, ní ole nii, ni oha otsui anyiɛ gbɛ lɛ nɔ tɛ̃ɛ.” (Abɛi 10:1; 23:19) Hɛɛ, ákɛ oblahii kɛ oblayei lɛ, kɛ́ nyɛbaaná tsɔsemɔ ni nyɛfɔlɔi kɛhaa nyɛ lɛ he sɛɛ lɛ, no lɛ esa akɛ nyɛjɛ nyɛsuɔmɔ mli nyɛkɛ gbɛtsɔɔmɔi atsu nii, nyɛbo ŋaawoo toi, ni nyɛkpɛlɛ tsɔsemɔ. Eyɛ mli akɛ afɔ́ɔɔ nyɛ akɛ nilelɔi moŋ, shi nyɛbaanyɛ ‘nyɛle nii’ ni nyɛjɛ nyɛsuɔmɔ mli nyɛnyiɛ “wala gbɛ” lɛ nɔ.
Mɛni Ji Ŋaawoo?
5. Mɛɛ ŋaa Paulo wo bii kɛ tsɛmɛi?
5 Bɔfo Paulo ŋma akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuntsɔ lɛ mli; ejaakɛ enɛ ja. ‘Wo otsɛ kɛ onyɛ,’ no ji klɛŋklɛŋ kitã ni hiɛ shiwoo akɛ: ‘koni ahi ahao, ni otsɛ yɛ shikpɔŋ lɛ nɔ.’ Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] lɛ tsɔsemɔ kɛ ŋaawoo lɛ mli.”—Efesobii 6:1-4.
6, 7. Ákɛ aaatsɔse bii yɛ ‘Yehowa tsɔsemɔ kɛ ŋaawoo mli’ lɛ biɔ ni afee mɛni, ni mɛni hewɔ enɛ feemɔ etsɔɔɔ akɛ fɔlɔi lɛ miiná amɛbii lɛ anɔ hewalɛ bɔ ni esaaa lɛ?
6 Kɛ́ fɔlɔi Kristofoi tsɔse amɛbii lɛ yɛ ‘Yehowa tsɔsemɔ kɛ ŋaawoo mli’ lɛ, ani no tsɔɔ akɛ amɛnáa amɛbii lɛ anɔ hewalɛ bɔ ni esaaa? Dabi. Kɛ́ fɔlɔi tsɔɔ amɛbii lɛ nibii ni amɛsusuɔ akɛ eja ní baaha amɛbii lɛ aba amɛjeŋ jogbaŋŋ lɛ, ani abaanyɛ awie ashi nɔ ni fɔlɔi lɛ feɔ lɛ akɛ ehiii? Mɛi ni heee yeee akɛ Nyɔŋmɔ yɛ lɛ tsɔɔ amɛbii lɛ akɛ Nyɔŋmɔ bɛ, ni awieee ashiii amɛ akɛ esaaa akɛ amɛfeɔ nakai. Roma Katolikbii nuɔ he akɛ eji amɛsɔ̃ akɛ amɛtsɔse amɛbii lɛ yɛ Katolik hemɔkɛyeli lɛ mli, ni efɔɔɔ kaa akɛ ooonu ni aawie aashi amɛ yɛ mɔdɛŋ ni amɛbɔɔ akɛ amɛaafee nakai lɛ hewɔ. Nakai nɔŋŋ hu esaaa akɛ awieɔ ashiɔ Yehowa Odasefoi akɛ amɛmiikudɔ amɛbii lɛ ajwɛŋmɔ kɛ́ amɛmiitsɔse amɛbii lɛ koni amɛná Yehowa susumɔ yɛ shishijee anɔkwalei kɛ jeŋba he shishitoo mlai ahe lɛ.
7 Wiemɔ komekomei ashishitsɔɔmɔ wolo ko ni wieɔ Biblia lɛ he (Theological Dictionary of the New Testament) lɛ tsɔɔ akɛ, shishijee Hela wiemɔ ni atsɔɔ shishi akɛ “ŋaawoo” yɛ Efesobii 6:4 lɛ kɔɔ nɔ ko ni afeɔ “koni akɛjaje mɔ jwɛŋmɔ, akɛjaje tɔmɔ, kɛ agbɛnɛ hu koni akɛha susumɔ kpakpa ni ahiɛ yɛ Nyɔŋmɔ he lɛ aya hiɛ” lɛ he. Ni kɛ́ tipɛŋfoi anɔnyɛɛ, ni ji shwelɛ ni mɔ náa akɛ eeefee nɔ ni sa etipɛŋfoi lɛ ahiɛ lɛ, ha oblanyo loo oblayoo ko kpoo tsɔsemɔ ni efɔlɔi kɛhaa lɛ lɛ hu? Namɔ abaanyɛ akɛɛ akɛ eená gbekɛ lɛ nɔ hewalɛ yɛ gbɛfɔŋ nɔ—efɔlɔi aloo etipɛŋfoi lɛ? Kɛ́ etipɛŋfoi lɛ miinyɛ enɔ koni ekɛ ehe awo tsofai ni akɛtsuɔ nii yɛ gbɛ fɔŋ nɔ, dãanumɔ shɛii, loo jeŋba shara mli, ní efɔlɔi lɛ bɔ mɔdɛŋ koni amɛjaje ejwɛŋmɔ, ní amɛye amɛbua lɛ ni ena osharai ni yɔɔ nakai nifeemɔi lɛ amli lɛ, ani esa akɛ awie ashi fɔlɔi lɛ akɛ nɔ ni amɛfeɔ lɛ ehiii?
8. Mɛni afee ‘kɛtsɔ̃’ Timoteo ‘yiŋ ni ebatsɔ heyelilɔ’?
8 Bɔfo Paulo ŋma kɛyaha oblanyo Timoteo akɛ: “Hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ole mɔ naa ni okase yɛ. Ni ogbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ.” (2 Timoteo 3:14, 15) Timoteo nyɛ kɛ enaa kɛ Ŋmalɛ Krɔŋkrɔŋ lɛ mli nilee tswa hemɔkɛyeli ni eyɔɔ yɛ Nyɔŋmɔ mli lɛ amɛma shi kɛjɛ egbekɛbiiashi tɔ̃ɔ. (Bɔfoi lɛ Asaji 16:1; 2 Timoteo 1:5) Sɛɛ mli beni Timoteo nyɛ kɛ enaa batsɔmɔ Kristofoi lɛ, amɛnyɛɛɛ enɔ akɛ etsɔ heyelilɔ, shi moŋ amɛkɛ niiahesusumɔ ni mli kã shi faŋŋ ni damɔ Ŋmalɛ mli nilee nɔ ‘tsɔ̃ eyiŋ’ ni efee nakai.
Yehowa Eha Bo Hegbɛ Koni Ohala Nɔ ni Osumɔɔ
9. (a) Yehowa wo ebɔɔ nii lɛ ahiɛ nyam yɛ mɛɛ gbɛ nɔ, ni mɛni hewɔ? (b) Te Nyɔŋmɔ Bi koome lɛ kɛ nihalamɔ mli heyeli ni eyɔɔ lɛ tsu nii eha tɛŋŋ?
9 Kulɛ, Yehowa baanyɛ afee ebɔɔ nii lɛ tamɔ tsɔnei ní ato amɛhe gbɛjianɔ koni amɛfee esuɔmɔnaa nii pɛ, shi jeee nɔ kroko. Yɛ no najiaŋ lɛ, ewo amɛhiɛ nyam kɛtsɔ nihalamɔ mli heyeli ni ekɛha amɛ lɛ nɔ. Wɔ-Nyɔŋmɔ lɛ sumɔɔ koni mɛi ajɛ amɛsuɔmɔ mli amɛsɔmɔ lɛ. Emii shɛɔ ehe waa kɛ́ ebɔɔnii ni ji onukpai kɛ gbekɛbii bluublu lɛ jɛ amɛsuɔmɔ mli amɛsɔmɔ lɛ lɛ. Mɔ ni fee suɔmɔ mli ní ajɛɔ akɛ heshibaa feɔ Nyɔŋmɔ suɔmɔnaa nii he nɔkwɛmɔnɔ ni fe fɛɛ ji Yehowa Bi koome lɛ, mɔ ni E-wie yɛ ehe akɛ: “Mɔ nɛɛ ji misuɔmɔ bi ní mináa ehe tsui lɛ.” (Mateo 3:17) Kromɔ Bi nɛɛ kɛɛ e-Tsɛ akɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii ni omla lɛ yɛ mitsui mli.”—Lala 40:9; Hebribii 10:9, 10.
10. Mɛni ji nɔdaamɔnɔ ni haa Yehowa kpɛlɛɔ sɔɔmɔ ní akɛhaa lɛ lɛ nɔ?
10 Yehowa miikpa gbɛ akɛ mɛi ni sɔmɔɔ lɛ yɛ e-Bi lɛ gbɛtsɔɔmɔ shishi lɛ baajie heshibaa ni tamɔ nakai nɔŋŋ kpo yɛ E-suɔmɔnaa nifeemɔ mli. Lalatsɛ lɛ lá yɛ gbalɛ naa akɛ: “Omaŋ lɛ aaaba yɛ ota gbi lɛ nɔ, yɛ amɛsuɔmɔ naa, yɛ hewulamɔ krɔŋkrɔŋ mli; oblahii asafo lɛ baa tamɔ bɔ́ jɛɔ jetsɛremɔ musuŋ lɛ.” (Lala 110:3) Yehowa gbɛjianɔtoo muu lɛ fɛɛ, ni fã yɛ ŋwɛi ni fã hu yɔɔ shikpɔŋ lɛ nɔ lɛ jɛɔ amɛsuɔmɔ mli amɛkɛ heshibaa feɔ Nyɔŋmɔ suɔmɔnaa nii.
11. Mɛɛ nihalamɔ yɔɔ kɛha oblahii kɛ oblayei ni fɔlɔi ni ejɔɔ amɛhe nɔ tsɔseɔ amɛ lɛ?
11 No hewɔ lɛ, oblahii kɛ oblayei, nyɛnaa nyɛlea akɛ nyɛfɔlɔi loo Kristofoi asafoŋ onukpai ni yɔɔ asafo lɛ mli lɛ enyɛŋ nyɛnɔ koni nyɛha abaptisi nyɛ. Esa akɛ nyɛ diɛŋtsɛ nyɛhala akɛ nyɛbaasɔmɔ Yehowa. Yoshua ni hi shi yɛ blema lɛ kɛɛ Israelbii lɛ akɛ: ‘Nyɛjiea nyɛyitsoŋ nyɛsɔmɔa Yehowa yɛ anɔkwale mli. Ŋmɛnɛ gbi nɛɛ nyɛkɔa mɔ ni nyɛaasɔmɔ.’ (Yoshua 24:14-22) Yɛ nakai gbɛ nɔ nɔŋŋ lɛ, esa akɛ nyɛ diɛŋtsɛ nyɛhala akɛ nyɛbaajɔɔ nyɛhe nɔ nyɛha Yehowa, ni nyɛkɛ nyɛhe aha kwraa kɛha esuɔmɔnaa nifeemɔ.
Tsu Sɔ̃ ni Kã Onɔ lɛ He Nii
12. (a) Eyɛ mli akɛ fɔlɔi baanyɛ atsɔse amɛbii moŋ, shi mɛni amɛnyɛŋ amɛfee amɛha amɛ? (b) Yɛ Yehowa hiɛ lɛ, mɛɛ be sɔ̃ bakãa oblanyo loo oblayoo fioo ko nɔ yɛ nɔ ni ehalaa akɛ abaafee lɛ he?
12 Be ko baashɛ ní nyɛ gbekɛbii lɛ, nyɛfɔlɔi lɛ anɔkwayeli efeŋ hebuu nɔ̃ kɛhaŋ nyɛ dɔŋŋ. (1 Korintobii 7:14) Kaselɔ Yakobo ŋma akɛ: “Mɔ ni le ekpakpafeemɔ ni efeee lɛ, esha ji no ha lɛ.” (Yakobo 4:17) Fɔlɔi nyɛŋ asɔmɔ Nyɔŋmɔ amɛha amɛbii, ni nakai nɔŋŋ hu bii nyɛŋ asɔmɔ Nyɔŋmɔ amɛha amɛfɔlɔi. (Ezekiel 18:20) Ani okase Yehowa kɛ eyiŋtoi lɛ ahe nii? Ani oda bɔ ni sa, bɔ ni baanyɛ aha onu nibii ni okase lɛ ashishi ní oje shishi ooná okɛ Yehowa teŋ wekukpãa? Belɛ, ani nilee bɛ mli akɛ aaamu sane naa akɛ Nyɔŋmɔ buɔ bo akɛ oji mɔ ni eshɛ he ni obaanyɛ okpɛ oyiŋ akɛ obaasɔmɔ lɛ?
13. Mɛɛ saji esa akɛ oblahii kɛ oblayei ni abaptisiko amɛ lɛ abi amɛhe?
13 Ani oji oblanyo loo oblayoo fioo ní abaptisiko bo ní ofɔlɔi jáa Nyɔŋmɔ, ni oyaa Kristofoi akpeei, ni okɛ ohe woɔ Maŋtsɛyeli sanekpakpa lɛ shiɛmɔ mli po? Kɛ́ nakai lɛ, okɛ anɔkwayeli abi ohe akɛ: ‘Mɛni hewɔ mifeɔ nakai lɛ? Ani miyaa kpeei, ni mikɛ mihe woɔ shiɛmɔ nitsumɔ lɛ mli akɛni mifɔlɔi miikpa gbɛ akɛ mafee nakai lɛ hewɔ, aloo mifeɔ nakai akɛni miisumɔ ni masa Yehowa hiɛ hewɔ?’ Ani oyoo “Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ”?—Romabii 12:2.
Mɛni Hewɔ Otsiɔ Baptisimɔ Otoɔ?
14. Mɛɛ Biblia mli nɔkwɛmɔnii haa wɔnaa akɛ esaaa akɛ atsiɔ baptisimɔ atoɔ yɛ gbɛ ni esaaa nɔ?
14 Beni sanekpakpajajelɔ Filipo ha Etiopianyo lɛ le akɛ Yesu ji Mesia lɛ sɛɛ nɔŋŋ lɛ, nuu lɛ bi lɛ akɛ: “Mɛni tsĩɔ mibaptisimɔ gbɛ?” Ŋmalɛi lɛ ahe nilee ni fa bɔ ni sa ni Etiopianyo lɛ yɔɔ lɛ ha eyɔse akɛ esaaa akɛ eshashaoɔ shi akɛ eeeha ale akɛ kɛjɛ nakai ŋmɛlɛtswaa lɛ nɔ kɛyaa lɛ, ebaafata Kristofoi asafo lɛ he kɛsɔmɔ Yehowa, ni enɛ ni efee lɛ ha emii shɛ ehe jogbaŋŋ. (Bɔfoi lɛ Asaji 8:26-39) Nakai nɔŋŋ hu yoo ko ni atsɛ́ɔ lɛ Lidia ní agbele etsui naa “akɛ ebo nii ni Paulo wieɔ lɛ toi” lɛ ha “abaptisi” lɛ kɛ ewe lɛ amrɔ nɔŋŋ. (Bɔfoi lɛ Asaji 16:14, 15) Gboklɛfoi akwɛlɔ ko ni hi Filipi lɛ hu bo Paulo kɛ Sila toi beni “amɛjaje Nuŋtsɔ [Yehowa] lɛ wiemɔ amɛtsɔɔ lɛ” lɛ, ni “abaptisi lɛ kɛ ewe lɛ bii fɛɛ amrɔ lɛ nɔŋŋ.” (Bɔfoi lɛ Asaji 16:25-34) No hewɔ lɛ, kɛ́ oyɛ shishijee nilee ni kɔɔ Yehowa kɛ eyiŋtoi lɛ ahe, ni yɛ anɔkwale mli lɛ, oosumɔ ni ofee esuɔmɔnaa nii, ni awieɔ ohe sane kpakpa yɛ asafo lɛ mli, ni asaŋ oyaa kpeei daa ni okɛ ohe woɔ Maŋtsɛyeli sanekpakpa shiɛmɔ lɛ mli lɛ, no lɛ mɛni hewɔ otsiɔ obaptisimɔ otoɔ?—Mateo 28:19, 20.
15, 16. (a) Mɛɛ susumɔ ni ejaaa baanyɛ aha oblahii kɛ oblayei komɛi ashashao shi akɛ amɛaaha abaptisi amɛ? (b) Henɔjɔɔmɔ kɛ baptisimɔ baanyɛ abu oblahii kɛ oblayei ahe yɛ mɛɛ gbɛ nɔ?
15 Ani oshashaoɔ shi akɛ oooha abaptisi bo yɛ gbeyei ni osheɔ akɛ kɛ́ otsu nifeemɔ ni he hiaa nɛɛ he nii ní ekolɛ okɛ ohe yawo efɔŋfeemɔ ko mli lɛ, abaabi bo he sane lɛ hewɔ? Kɛ́ nakai ni lɛ, no lɛ susumɔ sane nɛɛ he okwɛ: Ani gbeyei ni osheɔ akɛ ekolɛ wɔsɛɛ lɛ okɛ tsɔne baayaná oshãra hewɔ lɛ, oyabiŋ ni ahã bo tsɔne kudɔmɔ gbɛŋmɛɛ wolo? Ekã shi faŋŋ akɛ ofeŋ nakai! Nakai nɔŋŋ esaaa akɛ oshashaoɔ shi akɛ oooha abaptisi bo kɛji oshɛɔ taomɔnii lɛ ahe. Yɛ anɔkwale mli lɛ, kɛ́ ojɔɔ owala nɔ diɛŋtsɛ oha Yehowa, ní okpɛlɛ nɔ akɛ obaafee esuɔmɔnaa nii lɛ, no lɛ enɛ baawaje bo koni ofee nɔ fɛɛ nɔ ni ooonyɛ kɛtsi ohe kɛjɛ efɔŋfeemɔ he. (Filipibii 4:13) Oblahii kɛ oblayei, nyɛfainɛ nyɛkasusua akɛ kɛ́ nyɛtsi nyɛbaptisimɔ nyɛto lɛ, no baaha nyɛkabu nyɛnifeemɔi ahe akɔntaa. Kɛ́ oda kɛshɛ mɔ ni baanyɛ akpɛ eyiŋ lɛ, no lɛ obaabu onifeemɔi ahe akɔntaa oha Yehowa, ekɔɔɔ he eko kɛji abaptisi bo loo abaptisiko bo.—Romabii 14:11, 12.
16 Odasefoi babaoo ni yɔɔ jeŋ fɛɛ lɛ nuɔ he akɛ baptisimɔ ní amɛha abaptisi amɛ beni amɛji oblahii kɛ oblayei lɛ ye ebua amɛ waa diɛŋtsɛ. Ákɛ nɔkwɛmɔnɔ lɛ, susumɔ Odasefonyo ko ni eye afii 23 ní yɔɔ Europa Anaigbɛ maji lɛ eko mli lɛ he okwɛ. Etsɔɔ mli akɛ, ha ni eha abaptisi lɛ beni eye afii 13 lɛ wo lɛ hewalɛ koni eha ehiɛ ahi ehe nɔ jogbaŋŋ bɔni afee ni “oblahiiaŋ sɛɛdii lɛ” akaná enɔ hewalɛ. (2 Timoteo 2:22) Beni eji oblanyo fioo lɛ, ekpɛ eyiŋ akɛ ekɛ ehe baawo be fɛɛ sɔɔmɔ lɛ mli. Ŋmɛnɛ lɛ, ekɛ miishɛɛ miisɔmɔ yɛ Yehowa Odasefoi anitsumɔhe niji lɛ ekome mli. Oblahii kɛ oblayei fɛɛ ní bo hu ofata he ní halaa akɛ amɛbaasɔmɔ Yehowa lɛ anine baashɛ jɔɔmɔi babaoo nɔ wɔsɛɛ.
17. Mɛɛ nifeemɔi amli ehe hiaa ni wɔyoo nii ni ji ‘Yehowa suɔmɔnaa nii lɛ’?
17 Kɛ́ wɔjɔɔ wɔhe nɔ ní abaptisi wɔ lɛ, no tsɔɔ akɛ kɛjɛ no nɔ kɛyaa lɛ, wɔbaakwɛ koni wɔfee Yehowa suɔmɔnaa nii yɛ wɔshihilɛ mli nifeemɔi fɛɛ amli. Ní wɔɔhi shi yɛ wɔhenɔjɔɔmɔ lɛ naa lɛ baabi ni ‘wɔkɛ wɔbe atsu nii jogbaŋŋ.’ Mɛɛ gbɛ nɔ wɔɔtsɔ wɔfee enɛ? Kɛtsɔ bei ni kulɛ wɔkɛaatiu nibii ni he ehiaaa asɛɛ lɛ ní wɔkɛaatsu nii kɛkase Biblia lɛ kɛ hiɛdɔɔ, ni wɔya kpeei daa, ni asaŋ wɔkɛ wɔhe awo “maŋtsɛyeli lɛ he sanekpakpa” shiɛmɔ lɛ mli jogbaŋŋ kɛmɔ shi lɛ nɔ. (Efesobii 5:15, 16; Mateo 24:14) Wɔhe nɔ ní wɔjɔɔ wɔha Yehowa kɛ bɔ ni wɔshweɔ akɛ wɔɔfee esuɔmɔnaa nii lɛ náa nibii fɛɛ ni wɔfeɔ yɛ wɔshihilɛ mli tamɔ hiɛtserɛjiemɔ, niyeli kɛ ninumɔ, kɛ nɔ̃ lalai atoi ni wɔboɔ lɛ anɔ hewalɛ yɛ gbɛ ni sa nɔ. Mɛni hewɔ ohalaaa hiɛtserɛjiemɔ ni baaha omii ashɛ ohe kɛya naanɔ? Odasefoi oblahii kɛ oblayei akpei abɔ ni yɔɔ miishɛɛ lɛ kɛɔ akɛ, nibii kpakpai babaoo yɛ ní obaanyɛ okɛjie ohiɛtserɛ, ní yɛ nakai beaŋ nɔŋŋ lɛ, ofee ‘Yehowa suɔmɔnaa nii.’—Efesobii 5:17-19.
“Wɔkɛ Nyɛ Aaatee”
18. Mɛɛ sane esa akɛ oblahii kɛ oblayei abi amɛ diɛŋtsɛ amɛhe?
18 Kɛjɛ afi 1513 D.Ŋ.B. kɛyashi Pentekoste afi 33 Ŋ.B. lɛ, no mli lɛ Yehowa yɛ mɛi ni eto amɛhe gbɛjianɔ yɛ shikpɔŋ lɛ nɔ ní ehala amɛ koni amɛjá lɛ ní amɛye ehe odase. (Yesaia 43:12) Afɔ́ oblahii kɛ oblayei bibii ni ji Israelbii lɛ akɛ nakai maŋ lɛ mli bii. Kɛjɛ Pentekoste gbi lɛ nɔ kɛbaa nɛɛ, Yehowa ená “maŋ” hee yɛ shikpɔŋ lɛ nɔ, ni no ji mumɔŋ Israel, ni ji ‘maŋ ko ni ehala kɛha egbɛi lɛ.’ (1 Petro 2:9, 10; Bɔfoi lɛ Asaji 15:14; Galatabii 6:16) Bɔfo Paulo tsɔɔ akɛ Kristo etsuu “lɛ diɛŋtsɛ emaŋ krɔŋŋ ní hiɛ dɔɔ nitsumɔi kpakpai ahe lɛ” he eha ehe. (Tito 2:14) Ákɛ oblahii kɛ oblayei lɛ, nyɛyɛ hegbɛ akɛ nyɛ diɛŋtsɛ nyɛtao nakai maŋ lɛ. Ŋmɛnɛ, namɛi ji “jeŋmaŋ ni ja ní yeɔ anɔkwa,” ní hiɔ shi yɛ Biblia shishitoo mlai anaa, ní sɔmɔɔ ákɛ Odasefoi anɔkwafoi kɛha Yehowa, ní jajeɔ akɛ e-Maŋtsɛyeli lɛ ji adesai ahiɛnɔkamɔ kome pɛ lɛ? (Yesaia 26:2-4) Susumɔ Kristendom sɔlemɔi lɛ kɛ jamɔi krokomɛi lɛ ahe, ní okɛ amɛjeŋba ato nɔ ni Biblia lɛ taoɔ yɛ Nyɔŋmɔ anɔkwa tsuji ahe lɛ he okwɛ.
19. Mɛni mɛi akpekpei abɔ ni yɔɔ jeŋ fɛɛ lɛ ekpɛlɛ nɔ?
19 Mɛi akpekpei abɔ ni yɔɔ jeŋ fɛɛ ní oblahii kɛ oblayei babaoo fata he lɛ kpɛlɛɔ nɔ akɛ Yehowa Odasefoi ateŋ shwɛɛnii ni afɔ amɛ mu lɛ ji nakai “jeŋmaŋ ni ja” lɛ. Amɛkɛɔ mumɔŋ Israelbii nɛɛ akɛ: “Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zakaria 8:23) Yɛ anɔkwale mli lɛ, eji wɔsɔlemɔ kɛ wɔhiɛnɔkamɔ akɛ nyɛ mɛi ni nyɛji oblahii kɛ oblayei lɛ baakpɛ nyɛyiŋ akɛ nyɛbaafata Nyɔŋmɔ webii lɛ ahe, ni nyɛtsɔ no feemɔ nɔ ‘nyɛkɔ wala’—naanɔ wala yɛ Yehowa jeŋ hee lɛ mli.—5 Mose 30:15-20; 2 Petro 3:11-13.
Emlitĩi
• Ákɛ akɛ ŋaawoo aaaha lɛ biɔ ni afee mɛni?
• Mɛɛ sɔɔmɔ saa Yehowa hiɛ?
• Mɛɛ nihalamɔ yɔɔ kɛha oblahii kɛ oblayei fɛɛ ni fɔlɔi ni ejɔɔ amɛhe nɔ tsɔseɔ amɛ lɛ?
• Mɛni hewɔ esaaa akɛ atsiɔ baptisimɔ atoɔ yɛ gbɛ ni esaaa nɔ lɛ?
[Nikasemɔ lɛ he Sanebimɔi]
[Mfonirii ni yɔɔ baafa 26]
Namɔ toi obaabo?
[Mfoniri ni yɔɔ baafa 28]
Henɔjɔɔmɔ kɛ baptisimɔ baanyɛ abu ohe yɛ mɛɛ gbɛ nɔ?
[Mfoniri ni yɔɔ baafa 29]
Mɛni tsĩɔ obaptisimɔ gbɛ?