Saramɔ ko ni Ha Afee Tsakemɔ

“M IHE tswa shi waa akɛ mawie ‘bɔfoi’ enyɔ ni Nyɔŋmɔ tsu amɛ miŋɔɔ lɛ he sane matsɔɔ miweku lɛ.” Nɛkɛ ji bɔ ni nuu ko ni Yehowa Odasefoi oblayei enyɔ yasara lɛ lɛ ŋma. Nuu lɛ ŋa ni eye afii 45 lɛ gbo yɛ otsii fioo ni tsɔ oblayei lɛ asaramɔ lɛ hiɛ lɛ mli. Enɛ ha ehao waa diɛŋtsɛ. Ebii ni edara lɛ shɛje emii, shi kɛlɛ he ni amɛyɔɔ lɛ kɛ lɛ teŋ jɛkɛ. Enanemɛi kɛ ekutsoŋbii lɛ ateŋ mɔ ko kwraa ebasaraaa lɛ.

Beni oblayei enyɔ lɛ yasara nuu lɛ, ekɛɛ amɛ akɛ: “Mikɛ Nyɔŋmɔ ewieee.” Shi kɛlɛ, oblayei lɛ jie mlihilɛ kpo amɛtsɔɔ lɛ ni amɛha lɛ dɛhiɛmɔ wolo ni ajɛ Biblia lɛ mli aŋma ni yitso ji Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? Ekane wolo lɛ nakai gbɛkɛ lɛ nɔŋŋ ni no shɛje emii.

Be fioo ko sɛɛ lɛ, oblayei Kristofoi enyɔ lɛ ku amɛsɛɛ amɛtee nuu lɛ ŋɔɔ. Akɛni amɛyɔse akɛ ewerɛ eho ehe yɛ klɛŋklɛŋ saramɔ lɛ mli hewɔ lɛ, amɛtee koni amɛyakwɛ akɛ eyɛ jogbaŋŋ lo. Sɛɛ mli lɛ nuu lɛ ŋma akɛ: “Minaa kpɛ mihe akɛ gbɔi enyɔ ní mileee amɛ kwraa lɛ susuɔ mihe ni amɛyɛ mihilɛ-kɛhamɔ he miishɛɛ.” Biblia lɛ mli saji ni oblayei lɛ kɛ lɛ gba lɛ wo lɛ hewalɛ. Oblayei lɛ kɛɛ lɛ akɛ amɛbaaku amɛsɛɛ kɛba ekoŋŋ. Nuu lɛ ná miishɛɛ ni enɛ tsirɛ lɛ ni eŋmala wiemɔi ni yɔɔ yiteŋ gbɛ nɛɛ yɛ wolo ko ni eŋma kɛmaje Yehowa Odasefoi ni yɔɔ he ni eyɔɔ lɛ mli.

Dani nuu lɛ aaafã kɛyahi he ko ni bɛŋkɛ ebii lɛ ateŋ mɔ kome lɛ, etee Kristofoi akpee ni Yehowa Odasefoi feɔ lɛ eko ni ekɛ oblayei lɛ ateŋ mɔ kome weku tara shi kɛye nii. Eŋma akɛ: “Miishi he ni miyɔɔ lɛ, shi kɛlɛ mihiɛ kpaŋ nakai oblayei enyɔ lɛ kɛ nyɛsɔlemɔ lɛ nɔ kɔkɔɔkɔ, ni masɔle maha amɛ kɛ nyɛsɔlemɔ lɛ daa. Hɛɛ, agbɛnɛ misɔleɔ—misɔleɔ waa diɛŋtsɛ. Mifee tsakemɔ kwraa. Nakai oblayei enyɔ lɛ tsu gbɛfaŋnɔ ni sa kadimɔ waa yɛ enɛ mli, ni mada amɛ shi be fɛɛ be.”