Wala Shihilɛ He Sane

Tsuishiŋmɛɛ Haa Anáa Miishɛɛ

TAAKƐ MÁRIO ROCHA DE SOUZA GBA

“Etamɔ nɔ ni Owula Rocha yi nyɛŋ aná wala yɛ opireshɛn ni abaafee lɛ lɛ mli.” Aaafee afii 20 kɛjɛ beni datrɛfonyo ko wie wiemɔi ni jeɔ mɔ nijiaŋ wui nɛɛ fɛɛ sɛɛ lɛ, mikã he miyɛ wala mli ni miisɔmɔ lolo akɛ Yehowa Odasefoi abe-fɛɛ shiɛlɔ. Mɛni eye ebua mi ni miŋmɛ mitsui shi yɛ afii nɛɛ fɛɛ amli?

BENI miji gbekɛ lɛ, no mli lɛ mitsuɔ nii yɛ okwaayeli nitsumɔ ko ni bɛŋkɛ Santo Estêvão, ni ji akrowa ko ni yɔɔ Bahia maŋ ni yɔɔ Brazil kooyi-bokagbɛ lɛ mli lɛ mli. Beni miye afii kpawo lɛ, mibɔi Ataa wamɔ yɛ okwaayeli nitsumɔ mli. Gbi fɛɛ gbi kɛ́ mikpa skul lɛ, ehaa mi nitsumɔ. Be ko sɛɛ lɛ, kɛ́ Ataa miiya eyatsu nii yɛ Salvador ni ji maŋ lɛ maŋtiase lɛ mli lɛ, eshĩɔ mi be fɛɛ be koni makwɛ nitsumɔ lɛ nɔ.

Wɔbɛ sarawa hewalɛ, paipi, loo nibii ni haa shihilɛ feɔ mlɛo ŋmɛnɛŋmɛnɛ lɛ, ni kɛlɛ wɔyɛ miishɛɛ. Mishĩɔ saaŋɔi loo mikɛ tso shwɛmɔ nibii ni mi kɛ minanemɛi lɛ efee lɛ tamɔ lɔle lɛ shwɛɔ. Mikpãa obɛntɛŋ yɛ jamɔŋ ajabeŋ srɔtoi hu amli. Misɔmɔ akɛ gbekɛ nuu ni láa yɛ maŋ lɛŋ sɔlemɔ lɛ mli lálɔi akuu lɛ mli, ni mina wolo ko ni gbɛi ji História Sagrada (Yinɔsane Krɔŋŋ) lɛ yɛ jɛmɛ, ni wolo nɛɛ  ha miná he miishɛɛ akɛ male nɔ ni yɔɔ Biblia lɛ mli.

Yɛ afi 1932 beni miye afii 20 lɛ, nuhɔmɔ ko ni naa wa ni sɛɛ tsɛ ba Brazil kooyi-bokagbɛ. Akɛni wɔtsinai lɛ gboi ni nibii ni wɔdũ lɛ hu fite hewɔ lɛ, mifã kɛtee Salvador, ni miyaná nitsumɔ yɛ jɛmɛ akɛ tsɔne kudɔlɔ. Sɛɛ mli lɛ, mihai shĩa ni miha miweku lɛ fã ni amɛkɛ mi bahi shi. Yɛ afi 1944 lɛ, Ataa gbo, ni mikome too mikwɛ Awo kɛ minyɛmimɛi yei kpaanyɔ kɛ hii etɛ lɛ.

 Kulɛ Tsɔne Kudɔlɔ Ji Mi, Shi No Sɛɛ lɛ Mibatsɔ Sanekpakpa Jajelɔ

Beni mibashɛ Salvador lɛ, nibii ni mifee klɛŋklɛŋ lɛ ateŋ ekome ji akɛ mihé Biblia. Beni mikɛ afii fioo komɛi tee Baptist sɔlemɔ lɛ sɛɛ lɛ, mikɛ Durval ní lɛ hu eji tsɔne kudɔlɔ lɛ bɔi naanyo bɔɔ. Bei pii lɛ, mikɛ Durval gbaa Biblia lɛ he saji babaoo. Gbi ko lɛ, eha mi wolo bibioo ko ni yitso ji Where Are the Dead? * Eyɛ mli akɛ no mli lɛ miheɔ miyeɔ akɛ adesai yɛ susuma ko ni gbooo moŋ, shi miná he miishɛɛ akɛ makane Biblia ŋmalɛi ni atsɛ́ yisɛɛ yɛ wolo bibioo lɛ mli lɛ. Minaa kpɛ mihe akɛ Biblia lɛ ma nɔ mi akɛ susuma ni feɔ esha lɛ gboɔ.—Ezekiel 18:4.

Beni Durval na bɔ ni miyɔɔ he miishɛɛ ha lɛ, ebi koni Antônio Andrade ni eji Yehowa Odasefoi abe-fɛɛ sɔɔlɔ lɛ abasara mi yɛ shĩa. Beni Antônio basara mi nɔ ni ji shii etɛ nɔ lɛ, efɔ̃ mi nine koni mifata ehe ni wɔyashiɛ Biblia mli tsɔɔmɔi lɛ wɔtsɔɔ mɛi krokomɛi. Beni ewie yɛ klɛŋklɛŋ shinaai enyɔ lɛ anaa sɛɛ lɛ, ekɛɛ mi akɛ, “Agbɛnɛ, eshɛ onɔ.” Mitsui fã waa, shi nɔ ni ha miná miishɛɛ ji akɛ weku ko bo mi toi jogbaŋŋ ni amɛhé woji enyɔ ni mikɛha amɛ lɛ. Kɛbashi ŋmɛnɛ lɛ, mináa miishɛɛ ni fa babaoo tamɔ nɛkɛ kɛ́ mikɛ mɔ ko ni yɔɔ Biblia mli anɔkwale lɛ he miishɛɛ kpe lɛ.

Yɛ April 19, 1943 ni ji gbi ni akɛye Kristo gbele lɛ he gbi jurɔ yɛ nakai afi lɛ nɔ lɛ, abaptisi mi yɛ Atlantik Ŋshɔ ni bɛŋkɛ Salvador lɛ mli. Akɛni abɛ Kristofoi hii ni yɔɔ niiashikpamɔ hewɔ lɛ, ahala mi koni maye mabua Odasefoi akuu ni kpeɔ yɛ Nyɛminuu Andrade shĩa lɛ ni yɔɔ gbɛjegbɛi leleooi ni jɛɔ Salvador maŋtiase lɛ gɔŋ nɔ gbɛ kɛyaa ejɔɔ mli gbɛ lɛ ateŋ ekome nɔ lɛ.

Mra Be Mli Shitee-Kɛwoo

Mɛi babaoo sumɔɔɔ wɔ-Kristofoi anitsumɔ lɛ beni awuɔ Jeŋ Ta II (afi 1939-1945) lɛ. Maŋ onukpai lɛ ekomɛi susu akɛ shikpálɔi ni jɛ Amerika ji wɔ akɛni wɔwoji lɛ ateŋ babaoo jɛ United States lɛ hewɔ. Enɛ hewɔ lɛ, efɔɔ kaa akɛ amɔmɔɔ wɔ ni ataa wɔdaŋ. Kɛ Odasefonyo ko jɛɛɛ shiɛmɔ ebaaa lɛ, wɔmuɔ sane naa akɛ awo lɛ tsuŋ, ni wɔyaa polisifoi anitsumɔhe lɛ ni wɔyabiɔ koni ajie lɛ.

Yɛ August 1943 lɛ, Adolphe Messmer ni eji Odasefonyo ni jɛ Germany lɛ bashɛ Salvador koni eye ebua kɛto wɔklɛŋklɛŋ kpokpaa nɔ kpee lɛ he gbɛjianɔ. Beni maŋ onukpai lɛ kpɛlɛ koni wɔfee kpee lɛ, akɛ maŋshiɛmɔ ni ji “Hejɔlɛ yɛ Jeŋ Hee lɛ Mli” lɛ he adafitswai wo maŋ lɛŋ adafitswaa woji amli, ni akɛ woji ni akɛtswaa he adafi lɛ kpɛtɛ shwapoi asamfɛji anaa kɛ tsɔnei ahe. Shi yɛ kpee lɛ gbi ni ji enyɔ lɛ nɔ lɛ, polisifonyo ko bakɛɛ wɔ akɛ afo gbɛ ni aŋmɛ wɔ akɛ wɔfee kpee lɛ mli. No mli lɛ Salvador osɔfonukpa lɛ nyɛ polisifoi anukpa lɛ nɔ koni ekaha wɔfee kpee lɛ. Shi yɛ April nyɔŋ ni nyiɛ sɛɛ lɛ mli lɛ, aŋmɛ wɔ gbɛ koni wɔha maŋshiɛmɔ ni atswa he adafi lɛ.

Oti ni Esa akɛ Matiu Sɛɛ

Yɛ afi 1946 lɛ, afɔ̃ mi nine koni maya Maji ni Yɔɔ Miishɛɛ Teokrase Kpee ni afee yɛ São Paulo maŋtiase lɛ mli lɛ. Meele ko ní woɔ jatsu kudɔlɔnukpa ni yɔɔ Salvador lɛ ŋmɛ wɔteŋ mɛi komɛi  agbɛ koni wɔta emeele lɛ mli kɛfã gbɛ lɛ, eyɛ mli moŋ akɛ wɔnáaa gbɛ yɛ tsu ni awɔɔ mli lɛ mli. Yɛ ahum ni wɔkɛkpe ni ha wɔ fɛɛ wɔhe ye lɛ fɛɛ sɛɛ lɛ, wɔyakpeleke yɛ Rio de Janeiro shweshweeshwe beni wɔye gbii ejwɛ yɛ ŋshɔ lɛ hiɛ lɛ. Odasefoi ni yɔɔ Rio maŋ lɛ mli lɛ here wɔ hiɛmɛɛ kɛba amɛshĩai amli koni wɔbajɔɔ wɔhe gbii fioo komɛi dani wɔtá oketeke mli kɛtsá wɔgbɛfãa lɛ nɔ. Kuu fioo ko ni hiɛ mamai ni aŋmala wiemɔi ni ji “Wɔmiihere Nyɛ Atuu Yehowa Odasefoi” yɛ mli lɛ bakpee wɔ beni oketeke ni wɔtá mli lɛ yashɛ São Paulo lɛ.

Beni wɔku wɔsɛɛ kɛtee Salvador etsɛɛɛ lɛ, mikɛ Harry Black ni eji maŋsɛɛ shiɛlɔ ni jɛ United States lɛ gba sane akɛ miisumɔ ni matsɔ gbɛgbalɔ, taakɛ atsɛ́ɔ Yehowa Odasefoi abe-fɛɛ sɔɔlɔi lɛ. Harry kai mi akɛ, weku mli gbɛnaa nii kã minɔ, ni ewo mi ŋaa koni mato mitsui shi. Yɛ naagbee lɛ, beni shɛɔ June 1952 lɛ, minyɛmimɛi hii kɛ yei lɛ diɛŋtsɛ nyɛɔ amɛkwɛɔ amɛhe, ni no hewɔ lɛ aha mi nitsumɔ koni miyasɔmɔ akɛ gbɛgbalɔ yɛ asafo bibioo ko ni yɔɔ Ilhéus maŋ lɛ mli lɛ mli, ni jɛmɛ kɛ Salvador ŋshɔ lɛ naa jɛkɛmɔ ji kilomitai 210.

Mlihilɛ Nifeemɔ

Yɛ afi ni nyiɛ sɛɛ lɛ mli lɛ, aha miyatsu nii yɛ Jequié ni ji maŋ wulu ko ni yɔɔ kpokpaa lɛ nɔ ni Odasefoi bɛ jɛmɛ lɛ. Mɔ klɛŋklɛŋ ni mitee eŋɔɔ ji osɔfo ni yɔɔ maŋ lɛ mli lɛ. Etsɔɔ mli akɛ, maŋ lɛ enɔ̃ ni, ni ekɛɛ mi akɛ mikashiɛ yɛ jɛmɛ. Ebɔ esɔlemɔ lɛ mli bii kɔkɔ akɛ “amale gbalɔ” ko eba maŋ lɛ mli, ni ehala mɛi komɛi yɛ maŋ lɛŋ koni amɛkpá minifeemɔi ashi. Yɛ enɛ fɛɛ sɛɛ lɛ, mikɛ nɔ ni fa fe Biblia woji 90 ha nakai gbi lɛ, ni mije Biblia mli nikasemɔi ejwɛ shishi. Afii enyɔ sɛɛ lɛ, ama Maŋtsɛyeli Asa yɛ Jequié, ni aná Odasefoi 36! Ŋmɛnɛ ayɛ asafoi kpaanyɔ yɛ Jequié, ni Odasefoi aaafee 700 yɛ jɛmɛ.

Mihi tsu bibioo ko ni mihai yɛ Jequié maŋ lɛ klotia lɛ mli yɛ klɛŋklɛŋ nyɔji fioo ni mikɛhi jɛmɛ lɛ mli. No sɛɛ lɛ, mikɛ Miguel Vaz de Oliveira, ni eji gbɔiatoohei ni yɔɔ fɛo fe fɛɛ yɛ Jequié lɛ ateŋ ekome nɔtsɛ lɛ kpe, ni egbɔiatoohe lɛ gbɛi ji Hotel Sudoeste. Miguel kpɛlɛ koni mikɛ lɛ afee Biblia mli nikasemɔ, ni ekɛɛ mifã kɛbahi tsũ ko mli yɛ egbɔiatoohe lɛ. Sɛɛ mli lɛ, Miguel kɛ eŋa batsɔmɔ Odasefoi.

Nɔ̃ kroko hu ni mikaiɔ akɛ eha miná miishɛɛ waa yɛ Jequié lɛ kɔɔ Luiz Cotrim ni eji nɔtsamɔ skul tsɔɔlɔ ni mikɛ lɛ kase Biblia lɛ he. Luiz kɛ ehe ha koni eye ebua mi ni makase Portugal wiemɔ jogbaŋŋ ni male akɔntaabuu hu waa. Akɛni mitee skul kɛyashi klas 6 pɛ hewɔ lɛ, mikpɛlɛ nɔ amrɔ nɔŋŋ. Nakai nii ni Luiz tsɔɔ mi beni mikɛ lɛ egbe Biblia mli nikasemɔ lɛ naa daa otsi lɛ ye ebua mi koni manyɛ matsu sɔɔmɔ hegbɛi krokomɛi ni etsɛɛɛ ni akɛha mi yɛ Yehowa asafo lɛ mli lɛ he nii.

Shihilɛ Hee ko ni Wa ni Mikɛkpe

Yɛ afi 1956 lɛ, minine shɛ ninefɔ̃ɔ wolo ko nɔ akɛ miba wɔnitsumɔhe nine lɛ, ní no mli lɛ eyɔɔ Rio de Janeiro maŋtiase lɛ mli lɛ, koni atsɔse mi ni matsɔ kpokpaa nɔkwɛlɔ, taakɛ atsɛ́ɔ Yehowa Odasefoi sɔɔlɔi gbɛfalɔi lɛ. Akɛ nɔ ni fa fioo fe nyɔŋ kome tsɔse mi kɛ mɛi krokomɛi kpaanyɔ hu. Beni nikasemɔ lɛ baa naagbee lɛ, aha mi nitsumɔ yɛ São Paulo, ni enɛ ha miyiŋ fee mi kɔshikɔshi. Mibi mihe akɛ: ‘Ákɛ mɔ diŋ lɛ, mɛni miyaa miyafee yɛ Italybii sɔŋŋ ni yɔɔ jɛmɛ lɛ ateŋ? Ani amɛbaahere mi hiɛmɛɛ?’ *

Na ni mina akɛ nanemɛi Odasefoi kɛ mɛi ni yɔɔ wiemɔ lɛ he miishɛɛ eyi Maŋtsɛyeli Asa lɛ nɔ obɔ yɛ klɛŋklɛŋ asafo ni miyasara yɛ Santo Amaro kpokpaa wulu lɛ nɔ lɛ womi hewalɛ. Nɔ  ni kɔne miyiŋ akɛ gbeyeishemɔi ni miná lɛ ejaaa ji akɛ asafo lɛ mli mɛi 97 lɛ fɛɛ kɛ mi tee shiɛmɔ yɛ nakai otsi lɛ naagbee lɛ. Nɔ ni mikɛɛ yɛ miyiŋ ji akɛ, ‘Minyɛmimɛi diɛŋtsɛ ji amɛ.’ Naanyobɔɔ su ni nakai nyɛmimɛi hii kɛ yei ni misumɔɔ amɛ lɛ jie lɛ kpo lɛ ji nɔ ni ha miná ekãa koni mafĩ shi yɛ gbɛfaa sɔɔmɔ nitsumɔ lɛ mli.

Tejii, Okpɔŋɔi, kɛ Plewai

Naagbai wuji ni nɔkwɛlɔi gbɛfalɔi kɛkpe yɛ mra be mli lɛ ateŋ ekome ji gbɛ ni amɛfãa kakadaŋŋ koni amɛyasara asafoi kɛ Odasefoi akui bibii ni yɔɔ akrowai lɛ amli lɛ. Yɛ akrowai nɛɛ amli lɛ, maŋbii agbɛfãa tsɔji bɛ shweshweeshwe loo eko bɛ kwraa, ni gbɛjegbɛi lɛ ateŋ babaoo yɛ fintɔŋŋ ni amɛnɔ ehiii.

Kpokpai komɛi tsu naagba nɛɛ he nii kɛtsɔ teji loo okpɔŋɔ ni amɛhé amɛha kpokpaa nɔkwɛlɔ lɛ koni eta lɛ nɔ. Daa Ju lɛ, mikɛ okpɔŋɔ nɔtamɔ nɔ̃ lɛ fɔ̃ɔ okpɔŋɔ loo teji lɛ nɔ, mifimɔɔ minibii lɛ ni mitoɔ mishwieɔ okpɔŋɔ loo teji lɛ nɔ, ni no sɛɛ lɛ mikɛ aaafee ŋmɛlɛtswai 12 taa kɛyaa asafo ni tsa nɔ lɛ mli. Odasefoi ni yɔɔ Santa Fé do Sul maŋ lɛ mli lɛ yɛ teji ko ni atsɛ́ɔ lɛ Dourado (Goldie), ni ele gbɛ ni atsɔɔ nɔ kɛyaa hei ni nikasemɔ kui ni yɔɔ akrowa lɛ mli lɛ yɔɔ. Kɛ́ wɔshɛ okwaafoi lɛ agbói lɛ anaa lɛ, Dourado wáa edamɔɔ shi ni emɛɔ dioo koni magbele agbói lɛ. Kɛ́ migbe saramɔ lɛ naa lɛ, mi kɛ Dourado tsáa nɔ kɛyaa he ni kuu kroko lɛ kpeɔ yɛ lɛ.

Akɛni anyɛɛɛ akɛ he afɔ̃ nibii ni atsɔɔ nɔ akɛ mɛi gbaa sane hu nɔ hewɔ lɛ, ehaa kpokpaa lɛ nɔ nitsumɔ feɔ nɔ ni wa waa. Ákɛ nɔkwɛmɔnɔ lɛ, ehe bahiaa ni matá lɛlɛ mli kɛfo Araguaia Faa lɛ, kɛkɛ lɛ mitá okpɔŋɔ lɛ nɔ kilomitai 25 kɛtsɔ koo lɛ mli bɔni afee ni mayasara Odasefoi akuu bibioo ko ni kpeɔ yɛ okwaafoi ashihilɛ he ko ni yɔɔ Mato Grosso State lɛ mli. Be ko lɛ, miŋma wolo kɛmaje kuu nɛɛ koni mikɛtswa amɛ misaramɔ lɛ he adafi, shi ekã shi faŋŋ akɛ amɛ nine shɛɛɛ wolo lɛ nɔ, ejaakɛ beni mifo faa lɛ, mɔ ko mɔ ko bɛ jɛmɛ ni miimɛ mi. No mli lɛ, etsɛŋ ni jeŋ baabɔi namɔ, no hewɔ lɛ, mishi mijatsu lɛ miha niyelihe bibioo ko nɔtsɛ koni ekwɛ nɔ eha mi, ni minyiɛ kɛtee beni mihiɛ midɛhiɛmɔ baagi lɛ.

Etsɛɛɛ ni duŋ wo. Beni mitɛrɛtɛrɛɔ yɛ duŋ lɛ mli lɛ, plewa ko hũ. Minu akɛ plewa baanyɛ awó ehe nɔ ni ekɛ eniji ni yɔɔ hewalɛ waa lɛ agbe gbɔmɔ. No hewɔ lɛ, be fɛɛ be ni manu gbɛɛmɔ ko yɛ koo lɛ mli lɛ, minyiɛɔ blɛoo ni mihiɛɔ midɛhiɛmɔ baagi lɛ yɛ mihiɛgbɛ kɛbuɔ mihe. Beni minyiɛ ŋmɛlɛtswai babaoo lɛ, miyashɛ faa bibioo ko he. Mihe ni eyabaaa nii lɛ, akɛni duŋ ewo hewɔ lɛ, minaaa ákɛ akɛ dade kpãa kɛ ehe ŋmeiŋmei efo afabaŋ yɛ faa lɛ sɛɛ. Mibɔ mɔdɛŋ mitu faa bibioo lɛ kɛyaje afagbɛ, kɛkɛ ni miyayi afabaŋ lɛ nɔ, ni ehe ŋmei lɛ folɔ mi!

Yɛ naagbee lɛ, miyashɛ okwaafoi ashihilɛhe lɛ, kɛkɛ ni gbeei bɔi bolɔmɔ kɛ miwoo. Efɔɔ kaa akɛ too julɔi bajuɔ nyɔɔŋ, no hewɔ lɛ, beni agbele shinaa lɛ, mikɛ oyaiyeli tsɔɔ mɔ ni miji. Mitadei ni etserɛtserɛi ni lá ekpa mli fɛɛ lɛ ha mifee  tamɔ mɔ ko ni nii yɔɔ mɔbɔ, shi nyɛmimɛi lɛ ná miishɛɛ akɛ amɛna mi.

Yɛ shihilɛi ni mli wawai nɛɛ fɛɛ sɛɛ lɛ, nakai gbii lɛ bafee miishɛɛ gbii kɛha mi. Okpɔŋɔ ni mitáa kɛ nyiɛmɔ ni minyiɛɔ kɛfoɔ gbɛ kakadaŋŋ lɛ, ní bei komɛi lɛ mijɔɔ mihe yɛ tsei lɛ ashishi, ní miboɔ loofɔji alalai atoi, kɛ osɔi ni minaa ni amɛbafoloɔ gbɛ ni mitsɔɔ nɔ ni mɛi efɔɔɔ nɔ tsɔmɔ lɛ mli kɛhoɔ lɛ haa mináa miishɛɛ waa. Nɔ kroko hu ni ha miná miishɛɛ lɛ ji le ni mile akɛ mɛi ná misaramɔi lɛ ahe sɛɛ waa diɛŋtsɛ lɛ. Mɛi babaoo ŋma mi wolo kɛjie hiɛsɔɔ kpo amɛtsɔɔ mi. Mɛi krokomɛi hu daa mi shi kɛ́ wɔkpe yɛ kpeei ashishi lɛ. Kwɛ miishɛɛ ni miná beni mina akɛ mɛi nyɛ amɛye amɛnaagbai anɔ ni amɛtee hiɛ yɛ mumɔŋ!

Miná Yelikɛbualɔ Agbɛnɛ

Yɛ nakai afii lɛ amli lɛ, bei pii lɛ mikome too mifeɔ nɔ fɛɛ nɔ yɛ gbɛfaa nitsumɔ lɛ mli, ni no ha mibale akɛ esa akɛ maŋɔ mihiɛ mafɔ̃ Yehowa nɔ akɛ “mitɛsaa kɛ mimɔ̃ɔ.” (Lala 18:3) Kɛfata he lɛ, miyɔse akɛ oshija ni miji lɛ ha mitsu Maŋtsɛyeli nibii lɛ ahe nii ni nɔ ko nɔ ko gbálaaa mijwɛŋmɔ.

Shi yɛ afi 1978 lɛ, mikɛ nyɛmi yoo gbɛgbalɔ ko ni atsɛ́ɔ lɛ Júlia Takahashi lɛ kpe. Eŋmɛɛ nitsumɔ ni nyɔmɔwoo babaoo yɔɔ mli ni etsuɔ yɛ helatsamɔhe wulu ko ni yɔɔ São Paulo akɛ helatsɛmɛi akwɛlɔ lɛ he bɔni afee ni esɔmɔ yɛ he ni Maŋtsɛyeli shiɛlɔi ahe hiaa waa yɛ lɛ. Kristofoi onukpai ni le lɛ lɛ jie eyi waa yɛ mumɔŋ sui kɛ nyɛmɔi ni ejieɔ lɛ kpo akɛ gbɛgbalɔ lɛ hewɔ. Taakɛ ooonyɛ ofee he mfoniri yɛ ojwɛŋmɔ mli lɛ, miyiŋ ni mikpɛ akɛ mabote gbalashihilɛ mli beni mihi shi afii babaoo lɛ ha mɛi komɛi anaa kpɛ amɛhe. Minaanyo ko ni sumɔɔ misane waa lɛ heee enɛ eyeee, ni ewo mi shi akɛ kɛ́ mibote gbalashihilɛ mli lɛɛlɛŋ lɛ, ebaaha mi tsina nuu wulu ni tsiimɔ ji kilogram 270. Wɔgbe nakai tsina nuu lɛ ni aye yɛ wɔyookpeemɔ he okpɔlɔŋmɛɛ lɛ shishi yɛ July 1, 1978.

Miŋmɛ Mitsui Shi yɛ Helai ni Miye lɛ Fɛɛ Sɛɛ

Júlia fataa mihe yɛ gbɛfaa nitsumɔ lɛ mli, ni yɛ afii kpaanyɔ ni nyiɛ sɛɛ kɛba lɛ mli lɛ, efataa mihe kɛyasaraa asafoi ni yɔɔ Brazil wuoyigbɛ kɛ wuoyi-bokagbɛ lɛ. Miná tsui hela yɛ nakai beaŋ. Shii enyɔ sɔŋŋ beni mikɛ shiatsɛmɛi wieɔ yɛ shiɛmɔ nitsumɔ lɛ mli lɛ, nɔ̃ nyɔ minɔ. Yɛ minaagbai nɛɛ ahewɔ lɛ, wɔkpɛlɛ nɔ akɛ wɔbaayatsu nii akɛ gbɛgbalɔi krɛdɛɛi yɛ Birigüi yɛ São Paulo State.

Yɛ be ni tamɔ nɛkɛ mli lɛ, Odasefoi ni yɔɔ Birigüi lɛ kɛɛ amɛbaasumɔ ni amɛkɛ kar awo mi kɛyana datrɛfonyo ko yɛ Goiânia, aaafee kilomitai 500 kɛjɛ jɛmɛ kɛyaa. Beni mishihilɛ lɛ bahi bɔ ni sa lɛ, afee mi opireshɛn ni akɛ tsɔne ko ni baaha mitsui lɛ atsu nii jogbaŋŋ lɛ wo mimli. Enɛ ba aaafee afii 20 ni ho nɛɛ lɛ. Yɛ tsui he opireshɛn krokomɛi enyɔ hu ni afee mi lɛ fɛɛ sɛɛ lɛ, mikã he mikɛ ekãa miitsu kaselɔ feemɔ nitsumɔ lɛ. Taakɛ ŋamɛi Kristofoi anɔkwafoi krokomɛi babaoo ji lɛ, Júlia etee nɔ efee mɔ ni woɔ mi hewalɛ babaoo diɛŋtsɛ.

Eyɛ mli akɛ helai haaa manyɛ matsu babaoo ni bei komɛi lɛ ehaa mijiaŋ jeɔ wui moŋ, shi minyɛɔ mitsuɔ gbɛgbamɔ nitsumɔ lɛ lolo. Mihaa ehiɔ mijwɛŋmɔ mli daa akɛ Yehowa wooo wɔ shi akɛ shihilɛ baafee miishɛɛ sɔŋŋ yɛ gbɛjianɔtoo momo nɛɛ mli. Kɛ́ ehe bahia ni bɔfo Paulo kɛ anɔkwa Kristofoi krokomɛi ni hi shi yɛ blema lɛ aŋmɛ amɛtsui shi lɛ, ani wɔ hu esaaa akɛ wɔfeɔ nakai nɔŋŋ?—Bɔfoi lɛ Asaji 14:22.

Nyɛsɛɛ nɛɛ, mibana klɛŋklɛŋ Biblia ni mihé yɛ afi 1930 afii lɛ amli lɛ. Yɛ ehehaanɔ lɛ mligbɛ lɛ, míŋma yibɔ ni ji 350—ni ji Maŋtsɛyeli jajelɔi abɔ ni yɔɔ Brazil beni mibɔi Kristofoi akpeei yaa yɛ afi 1943 lɛ. Eyɛ naakpɛɛ waa akɛ amrɔ nɛɛ Odasefoi ni fa fe 600,000 yɔɔ Brazil. Kwɛ miishɛɛ ni eji akɛ miná nɔyaa nɛɛ mli gbɛfaŋnɔ fioo ko! Yehowa ejɔɔ mi babaoo diɛŋtsɛ yɛ mitsuishiŋmɛɛ lɛ hewɔ. Manyɛ makɛɛ taakɛ lalatsɛ lɛ kɛɛ lɛ, akɛ: “Yehowa efee nibii wuji eha wɔ; no hewɔ wɔmii eshɛ wɔhe nɛɛ.”—Lala 126:3.

[Shishigbɛ niŋmai]

[Mfoniri ni yɔɔ baafa 9]

Odasefoi ni miitswa maŋshiɛmɔ ni aha yɛ klɛŋklɛŋ kpee ni afee yɛ Salvador maŋtiase lɛ mli lɛ yɛ afi 1943 lɛ he adafi

[Mfoniri ni yɔɔ baafa 10]

Odasefoi ni eba São Paulo kɛha Maji ni Yɔɔ Miishɛɛ Kpee lɛ, yɛ afi 1946

[Mfonirii ni yɔɔ baafa 10, 11]

Yɛ gbɛfaa nitsumɔ lɛ mli yɛ afi 1950 naagbee afii lɛ amli

[Mfoniri ni yɔɔ baafa 12]

Mikɛ miŋa Júlia