“Ŋmɛnɛ lɛ, Mihé Miye akɛ Nyɔŋmɔ Yɛ”

BEKO lɛ, Alexandra ni eji Ukrainenyo shi eyɛ Prague yɛ Czech Republic lɛ jɛ nitsumɔ eeya shĩa. Beni eyashɛ tsɔnei adaamɔhe ko lɛ, ena shika kotoku bibioo ko ní mɛi ni hoɔ lɛ miitswa lɛ kɛmiiya kɛmiiba. Beni ekɔ ni egbele naa lɛ, nɔ ni ena yɛ mli lɛ ha enaa kpɛ ehe. Ena shika koruna 5,000 nɔ̃ lɛ ekomɛi (ekome aaafee sidi 1,430,000) hɔ mli! Mɛi ni yɔɔ jɛi no mli lɛ anifeemɔ etsɔɔɔ akɛ amɛteŋ mɔ ko shika kotoku elaaje. Akɛni Alexandra ji gbɔ yɛ Czech Republic hewɔ lɛ, etɔɔ lɛ dani enáa edaaŋ ŋmaa. Belɛ kɛ́ eto shika tamɔ nɛkɛ ahũ lɛ, mɛni ebaafee?

Beni Alexandra yashɛ shĩa lɛ, ekɛ shika kotoku lɛ tsɔɔ ebiyoo Victoria. Amɛgbɛlɛ kotoku lɛ mli fɛɛ ákɛ amɛaana nɔtsɛ lɛ gbɛi kɛ edrɛs yɛ mli lo, shi fɔɔyi. Kɛlɛ, amɛna wolo bibioo ko yɛ mli ní aŋmala nɔmbai komɛi yɛ mli. Aŋma shikatoohe ko nɔmba yɛ wolo lɛ afã kome, ni efã kroko lɛ, aŋmala nɔmbai srɔtoi babaoo yɛ jɛmɛ. Wolo ko hu yɛ mli ní miitsɔ mɔ gbɛ kɛmiiya shikatoohe ko ni yɔɔ jɛmɛ lɛ, ni aŋma shika “koruny 330,000” (aaafee sidi 91,000,000). Nakai pɛpɛɛpɛ ji shika ni yɔɔ kotoku lɛ mli lɛ naa.

Alexandra tswa nɔmba ko ni esusu akɛ eji shikatoohe lɛ tɛlifon nɔmba, shi eyaaa. No hewɔ lɛ, ekɛ ebiyoo lɛ tee shikatoohe lɛ ni amɛyabɔ amaniɛ. Amɛkɛ nɔmba ni amɛna yɛ kotoku lɛ mli lɛ eko tsɔɔ koni atsɔɔ amɛ mɔ ni shikatoohe nɔmba ni ji, shi nakai nɔmba lɛ bɛ shikatoohe lɛ woji amli. Enɔ jetsɛremɔ lɛ, Alexandra kɛ nɔmbai krokomɛi ni yɔɔ kotoku lɛ mli lɛ tee shikatoohe lɛ. Yɛ anɔkwale mli lɛ, mɔ ko ni kɛ eshika toɔ shikatoohe lɛ nɔmba ni. Alexandra kɛ Victoria tswa yoo ní eshika elaaje lɛ tɛlifon, ni amɛbibii lɛ saji komɛi koni amɛkɛna kɛji lɛ eshika ni lɛɛlɛŋ. No sɛɛ beni amɛ fɛɛ amɛkpe hiɛ kɛ hiɛ lɛ, yoo lɛ da amɛshi ni ebi amɛ akɛ, “Mɛni mifee miha nyɛ dani nyɛkɛ mishika lɛ aha mi?”

Victoria ha lɛ hetoo akɛ: “Wɔhéee bo nɔ ko nɔ ko. Eji wɔmiisumɔ shika lɛ kulɛ, wɔbaakɔ.” Victoria kɛ Czech wiemɔ fioo ni enuɔ lɛ gbala nibii amli etsɔɔ yoo lɛ akɛ: “Yehowa Odasefoi ji wɔ, ni no hewɔ wɔkɛ oshika lɛ baa wɔbahã bo lɛ. Wɔhenilee ni wɔkɛ Biblia etsɔse lɛ eŋmɛɛɛ wɔ gbɛ koni wɔkɔ nɔ ko ni jeee wɔnɔ̃.” (Hebribii 13:18) Yoo lɛ kɛ mlifilimɔ kɛɛ akɛ, “Ŋmɛnɛ lɛ, mihé miye akɛ Nyɔŋmɔ yɛ.”