Kooloo He Tsɔi Atade Kɛ Mumɔŋ Shidaamɔ

MAŊTSƐ LOUIS IX ni jɛ France lɛ wo eko. Beni Owula Thomas More ji oblanyo ni kaseɔ mla he nii lɛ, enɔ̃ lɛ ní lɛ hu ewo lɛ ye ebua lɛ ni daa gbi lɛ, ekɛ ŋmɛlɛtswai 19 loo 20 kase nii nyɔji babaoo. Yɛ anɔkwale mli lɛ, ale More akɛ ewo eko yɛ eshihilɛ bei babaoo mli. Ni beni agbe Thomas Becket ni eji Canterbury Osɔfonukpa yɛ Canterbury Sɔlemɔtsu Wulu lɛ mli lɛ, ana akɛ ewo eko yɛ etade lɛ shishi beni akpaaa nɔ ko ni tamɔ nakai gbɛ. Mɛni yinɔsane mli gbɔmɛi nɛɛ yɔɔ ni je amɛhe? Amɛwo atade ni akɛ kooloo he tsɔi fee koni amɛkɛpiŋ amɛheloo ní eha amɛye amɛkɔnɔi anɔ.

Akɛ abotia he tsɔi fee atade nɛɛ, ni awoɔ yɛ hewolo nɔ koni etsurɔ hewolo lɛ ní eshɔɔ hiɛ, ni ehaaa mɔ he ajɔ lɛ kwraa. Ewoɔ ŋmoo hu waa. Atsɔɔ mli akɛ Thomas Becket wo etade ni akɛ kooloo he tsɔi fee lɛ kɛ tswakoto ni no hu akɛ kooloo he tsɔi fee lɛ kɛyashi “ewo ŋmoo waa.” Yɛ afi 1500 afii lɛ asɛɛ lɛ, bei komɛi lɛ, akɛ dade kpãa hwiaa kɛ amɛnaabui piɔpiɔ ni tsurɔɔ gbɔmɔtso lɛ yeɔ abotia he tsɔi lɛ najiaŋ. Atade lɛ ní afee lɛ yɛ nɛkɛ gbɛ nɔ lɛ haaa mɔ ni woɔ lɛ he ajɔ lɛ kwraa fe tsutsu nɔ̃ lɛ.

Wiemɔi komekomei ashishitsɔɔmɔ wolo ko tsɔɔ mli akɛ, tamɔ bɔ ni eji yɛ nibii krokomɛi ni afeɔ kɛwaa heloo lɛ yi lɛ agbɛfaŋ lɛ, nɔ hewɔ ni afee atade ni akɛ abotia he tsɔi fee lɛ ji, “ni aye heloo lɛ eshafeemɔ akɔnɔi lɛ anɔ ni eha aná sui kɛ shihilɛ gbɛ ni saa Nyɔŋmɔ hiɛ jogbaŋŋ.” Jeee jamɔŋ henaatsĩlɔi pɛ wo atade nɛɛ; sɔlemɔyalɔi foji kɛ mɛi ni yɔɔ nɔyeli hegbɛi ni nɔ kwɔlɔ hu wo eko. Ŋmɛnɛ po lɛ, jamɔŋ kui komɛi kɛ amɛhe woɔ nifeemɔ nɛɛ mli.

Ani atade ni akɛ abotia he tsɔi fee ni mɔ ko aaawo loo lɛ diɛŋtsɛ ehe naa ní etsĩɔ kɛjɛɔ eheloonaa hiamɔ nii ahe lɛ haa etsɔɔ mumɔŋ gbɔmɔ? Dabi, jeee nifeemɔi nɛɛ haa mɔ náa mumɔŋ shidaamɔ kpakpa. Yɛ anɔkwale mli lɛ, bɔfo Paulo wie eshi “gbɔmɔtso yiwaa.” (Kolosebii 2:23) * Yɛ no najiaŋ lɛ, Nyɔŋmɔ he nilee ni aaatao kɛtsɔ e-Wiemɔ lɛ ni akɛ hiɛdɔɔ aaakase lɛ nɔ, kɛ nakai nilee lɛ ní akɛaatsu nii yɛ shihilɛ mli lɛ ji nɔ ni haa anáa mumɔŋ shidaamɔ kpakpa.

[Shishigbɛ niŋmaa]

[Hei ni Mfonirii ni yɔɔ baafa 32 lɛ Jɛ]

Maŋtsɛ Louis IX, ŋwɛigbɛ: From the book Great Men and Famous Women; Thomas Becket, teŋgbɛ: From the book Ridpath’s History of the World (Vol. IV); Thomas More, shishigbɛ: From the book Heroes of the Reformation, 1904