Sanebimɔi ni Jɛ Kanelɔi Adɛŋ

Te wɔfeɔ tɛŋŋ wɔleɔ akɛ bɔ ni Abɛi 8:22-31 lɛ tsɔɔ nilee mli eha lɛ kɔɔ Yesu Kristo he beni ebatsɔko adesa lɛ?

Bɔ ni ajɛ mumɔŋ atsɔɔ nilee ni anaa yɛ Abɛi awolo lɛ mli aha lɛ kaneɔ akɛ: “Yehowa kɛ mi fee egbɛ lɛ shishijelɔ dani ebɔi eblema nitsumɔi lɛ. . . . Afɔ mi dani aŋɔ gɔji lɛ amamɔ shi, dani gɔŋkpɔi lɛ ba, . . . Beni esaa ŋwɛi lɛ, miyɛ jɛi, . . . no mli lɛ miyɛ emasɛi akɛ ŋaalɔ; ni mimii shɛɔ mihe daa, mishwɛɔ yɛ ehiɛ be fɛɛ be, ni mináa gbɔmɛi abii ahe miishɛɛ.”

Jeee nilee ni Nyɔŋmɔ yɔɔ lɛ loo nilee ni mɔ fɛɛ mɔ yɔɔ eko lɛ he ŋmalɛ nɛɛ wieɔ lɛ. Mɛni hewɔ? Ejaakɛ awie nilee ni atsɔɔ mli yɛ ŋmalɛ nɛɛ mli lɛ he akɛ Yehowa bɔ lɛ loo ekɛ lɛ “fee” egbɛ lɛ shishijelɔ. Yehowa Nyɔŋmɔ yɛ kɛjɛ naanɔi anaanɔ, ni eji nilelɔ hu be fɛɛ be. (Lala 90:1, 2) Enilee lɛ bɛ shishijee; ejeee nɔ ni abɔ loo afee. ‘Afɔɔɔ’ Yehowa nilee lɛ. Kɛfata he lɛ, awie nilee nɛɛ he akɛ ewieɔ ni etsuɔ nii, ni tsɔɔ akɛ edamɔ shi kɛha mɔ ko.—Abɛi 8:1.

Abɛi awolo lɛ wieɔ akɛ nilee nɛɛ yɛ Yehowa, ni ji Bɔlɔ lɛ masɛi jeeŋmɔ akɛ “ŋaalɔ.” Eyɛ faŋŋ akɛ enɛ kɔɔ Yesu he. Akɛni Yesu kɛ Yehowa fee ekome kɛtsu nii jeeŋmɔ dani eba shikpɔŋ lɛ nɔ hewɔ lɛ, Nyɔŋmɔ wiemɔ lɛ kɛɔ akɛ: “Ni lɛ nɔŋŋ eyɔɔ dani nii fiaa yɔɔ, ni nii fiaa lɛ, emli nɔŋŋ emamɔ shi yɛ.”—Kolosebii 1:17; Kpojiemɔ 3:14.

Akɛni Nyɔŋmɔ Bi lɛ ji mɔ ni bajie Yehowa yiŋtoi kɛ ekpɔi ni nilee yɔɔ mli lɛ ashi faŋŋ etsɔɔ hewɔ lɛ, esa jogbaŋŋ akɛ aaawie ehe akɛ nilee. Beni Yesu ebatsɔko adesa lɛ, no mli lɛ, lɛ ji Nyɔŋmɔ Wiemɔ lɛ loo Nyɔŋmɔ Naawielɔ. (Yohane 1:1) Awie ehe akɛ lɛ ji “Nyɔŋmɔ hewalɛ kɛ Nyɔŋmɔ nilee lɛ.” (1 Korintobii 1:24, 30) Mɛɛ wiemɔi ni sa jogbaŋŋ ni tsɔɔ bɔ ni Nyɔŋmɔ Bi lɛ, mɔ ni suɔmɔ ni eyɔɔ kɛha adesai lɛ tsirɛ lɛ ni ekɛ ewala shã afɔle akɛ kpɔmɔnɔ̃ yɛ amɛhewɔ lɛ, yɔɔ ha lɛ po enɛ ji nɛkɛ!—Yohane 3:16.

[Mfoniri ni yɔɔ baafa 31]

“Afɔ mi dani aŋɔ gɔji lɛ amamɔ shi”