Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Belɛ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ gbɛ nɔ Yesu aaatsɔ ‘ejie ohiafoi lɛ’ taakɛ agba yɛ Lala 72:12 lɛ?

Yɛ enɔyeli lɛ mli lɛ, akɛ mɛi fɛɛ baaye yɛ jalɛ naa, ni ayeŋ mɔ ko juu-kɛfɔ̃ sane. Bei pii lɛ, tai kɛ ohia baa, shi Kristo baaha aná toiŋjɔlɛ diɛŋtsɛ. Enuɔ nii ahe ehaa adesai, ni ebaaha mɛi fɛɛ ahi shi yɛ ekomefeemɔ mli, ni asaŋ ebaakwɛ koni mɛi fɛɛ aná niyenii ni sa. (Lala 72:4-16)—5/1, baafa 7.

• Mɛɛ gbɛ nɔ wɔɔtsɔ ‘wɔwie kɛ ekãa’ akɛ Kristofoi? (1 Timoteo 3:13; Filemon 8; Hebribii 4:16)

Wɔbaanyɛ wɔfee nakai kɛtsɔ ekãa ni wɔkɛaashiɛ wɔtsɔɔ mɛi lɛ nɔ, kɛtsɔ nii ni wɔɔtsɔɔ kɛ ŋaawoo ni mɔɔ shi ni wɔkɛaaha yɛ ebe naa, kɛ agbɛnɛ hu kɛtsɔ wɔtsuiŋ ni wɔɔfɔse wɔshwie Nyɔŋmɔ nɔ yɛ sɔlemɔ mli kɛ nɔmimaa akɛ ebaabo wɔ toi ni eha wɔsɔlemɔi lɛ ahetoo lɛ nɔ.—5/15, baafa 14-16.

• Mɛni hewɔ abu bɔlɛnamɔ mli nifeemɔi komɛi yɛ Mose Mla lɛ mli akɛ amɛhaa mɔ feɔ mɔ ni ‘he tseee’ lɛ?

Mlai ni awo yɛ nibii ni haaa mɔ he atse tamɔ nu ni jɛɔ nuu he, yeianiifeemɔ, kɛ bii afɔmɔ he lɛ ha maŋbii lɛ ná gbɔmɔtsoŋ hewalɛ, ni amɛba amɛjeŋ jogbaŋŋ, ni ema bɔ ni lá yɔɔ krɔŋkrɔŋ ha lɛ nɔ mi, ni eha amɛna bɔ ni eshai ahe kpatamɔ he hiaa ha.—6/1, baafa 31.

• Kɛ́ mɔ ko miisumɔ koni ená miishɛɛ lɛ, mɛni hewɔ ebaafee nɔ ni hi akɛ eeesusu Lalai a-Wolo lɛ he lɛ?

Mɛi ni ŋma Lalai a-Wolo lɛ le akɛ wekukpãa kpakpa ni hiɔ mɔ kɛ Nyɔŋmɔ teŋ lɛ ni haa mɔ lɛ náa miishɛɛ. (Lala 112:1) Amɛma nɔ mi akɛ, nibii tamɔ adesai ni akɛbɔɔ, heloonaa nii ni mɔ yɔɔ, loo nibii ni mɔ enyɛ etsu yɛ eshihilɛ mli lɛ ateŋ eko kwraa nyɛŋ aha mɔ aná miishɛɛ ni “mɛi ni Yehowa ji [amɛ]Nyɔŋmɔ lɛ” yɔɔ lɛ eko. (Lala 144:15)—6/15, baafa 12.

• Mɛɛ wekukpãa krɛdɛɛ hi blema Israelbii lɛ kɛ Yehowa teŋ?

Yɛ afi 1513 D.Ŋ.B. lɛ, Yehowa kɛ Israelbii lɛ fee kpaŋmɔ, ni no ha wekukpãa hee bakã ekɛ amɛ teŋ. (2 Mose 19:5, 6; 24:7) Kɛjɛ no sɛɛ lɛ, bii ni Israelbii lɛ fɔ́ɔ lɛ batsɔmɔɔ maŋ ni Nyɔŋmɔ ehala eha ehe ni amɛjɔɔ amɛhe nɔ amɛha lɛ lɛ mlibii. Kɛlɛ, ehe bahia koni amɛteŋ mɔ fɛɛ mɔ akpɛ lɛ diɛŋtsɛ eyiŋ akɛ ebaasɔmɔ Nyɔŋmɔ loo efeŋ nakai.—7/1, baafa 21-22.

• Mɛni hewɔ esa akɛ ‘wɔfee wɔnii fɛɛ ni huhuuhu wiemɔi akahi mli’ lɛ? (Filipibii 2:14)

Nɔkwɛmɔnii pii ni yɔɔ Ŋmalɛi lɛ amli lɛ haa wɔnaa akɛ huhuuhu wiemɔ ye Nyɔŋmɔ webii lɛ awui babaoo. Esa akɛ wɔkɛ hiɛdɔɔ asusu awui ni huhuuhu wiemɔ baanyɛ aye wɔ ŋmɛnɛ lɛ he. Adesai ni yeee emuu lɛ sumɔɔ nii ahe wiemɔ, ni esa akɛ wɔle wɔhe nɔkwɛmɔ bɔni afee ni wɔtsi wɔhe kɛjɛ su gbonyo nɛɛ he.—7/15, baafa 16-17.

• Te wɔfeɔ tɛŋŋ wɔleɔ akɛ nilee ni awie he yɛ Abɛi 8:22-31 lɛ kɔɔ mɔ pɔtɛɛ ko he lɛ?

Yehowa “fee” loo ebɔ nakai nilee lɛ akɛ egbɛ lɛ shishijelɔ. Yehowa ji nilelɔ ni eyɛ daa; abɔɔɔ nilee ni eyɔɔ lɛ. Nilee ni awie he yɛ Abɛi 8:22-31 lɛ hi Nyɔŋmɔ masɛi akɛ “ŋaalɔ,” ni tsɔɔ akɛ mumɔŋ bɔɔ nɔ ni batsɔ Yesu ní ekɛ Nyɔŋmɔ tsu nii kɛbɔ nibii lɛ ahe awieɔ lɛ. (Kolosebii 1:17; Kpojiemɔ 3:14)—8/1, baafa 31.