Egbɔ Shi Ehe Efeee Shoo

MƐI babaoo yɛ ni kɛ́ gbɔlɛ ta amɛhe lɛ, amɛkumɔɔ, ni amɛkaa tsũ mli. Shi jeee nakai ebalɛ yɛ Fernand Rivarol ni gbo yɛ Geneva, Switzerland beni eye afii 95 lɛ gbɛfaŋ. Dani ebaagbo lɛ, no mli lɛ ekome eyɔɔ akɛni eŋa etsɔ hiɛ egbo ni ebiyoo ni ebote gbalashihilɛ mli lɛ hu eyahi lɛ diɛŋtsɛ eshĩa lɛ hewɔ. Eyɛ mli akɛ no mli lɛ ehiɔ shĩa be babaoo moŋ, shi ehe efeee shoo. Efɔɔ shitamɔ yɛ esa lɛ nɔ, ni etswaa mɛi tɛlifon ni ekɛ amɛ susuɔ Biblia mli saji ahe.

Yɛ Fernand shihilɛ ni yɔɔ miishɛɛ lɛ mli lɛ, be ko shɛ ni eka tsũ mli diɛŋtsɛ. Mɛni ha ebalɛ nakai? Beni Fernand kɛ eŋa batsɔ Yehowa Odasefoi ni yɔɔ ekãa yɛ afi 1939 etsɛɛɛ ni Jeŋ Ta II lɛ fɛ yɛ Europa. Biblia lɛ ni Fernand kase lɛ ha eŋmɔ eyiŋ kpɔ akɛ eyeŋ mɔ ko awui, ni ehaaa nɔ ko atsake ejwɛŋmɔ. Enɛ ha enitsumɔ je edɛŋ, ni awo lɛ tsuŋ afii saŋŋ—fɛɛ naa yakpaa afii enumɔ kɛ fã—ni ahaaa eŋa loo ebiyoo fioo lɛ ateŋ mɔ ko ayasara lɛ.

Beni Fernand yɔɔ wala mli ni esusuɔ nibii ni ekɛkpe yɛ eshihilɛ mli lɛ he lɛ, ekɛɛ akɛ: “Mɛi babaoo susuɔ akɛ mikpa nitsumɔ kpakpa ni mitsuɔ lɛ ni mishi miweku lɛ ni mikwɛɛɛ amɛtsiabo. Mɛi bɔ mi ahora, ni amɛkɛ mi ye tamɔ awuiyelɔ. Kɛlɛ, kɛ́ misusu nakai afii kɛ emli amane lɛ ahe lɛ, nɔ ni mikaiɔ jogbaŋŋ ji bɔ ni Yehowa fĩ wɔsɛɛ ni eye ebua wɔ lɛ. Eyɛ mli akɛ afii babaoo eho moŋ, shi hemɔkɛyeli ni miyɔɔ yɛ Yehowa mli lɛ mli wa kpɛŋŋ taakɛ eji yɛ no beaŋ lɛ.”

Hemɔkɛyeli nɛɛ ji nɔ ni tsirɛ Fernand ni ekɛ mɛi krokomɛi susu Ŋmalɛi lɛ amli hiɛnɔkamɔ lɛ he lɛ. Bɔ ni efeɔ ji akɛ, kɛ́ ekɛ mɔ ko gba sane ni mɔ lɛ ná wiemɔ lɛ he miishɛɛ lɛ, emajeɔ lɛ Biblia kasemɔ wolo. Sɛɛ mli lɛ, etswaa mɔ lɛ tɛlifon kɛkwɛɔ kɛji ená wolo lɛ kanemɔ he miishɛɛ. Bei komɛi lɛ, mɛi ni emajeɔ amɛ woji lɛ ateŋ mɛi komɛi ŋmalaa lɛ woji kɛdaa lɛ shi, ni no haa emii shɛɔ ehe jogbaŋŋ.

Ekolɛ mɔ ko baatswa bo tɛlifon ni ekɛ bo agba sane taakɛ no mli lɛ Fernand feɔ lɛ. Mɛni hewɔ obooo lɛ toi ni okɛle nibii ni eheɔ eyeɔ? Yehowa Odasefoi yɛ he miishɛɛ akɛ amɛ kɛ bo aaasusu nibii ni amɛheɔ amɛyeɔ lɛ ahe be fɛɛ be.