“Gbekɛ Nuu ni Eye Afii Nɛɛhu lɛ Hewɔ”

BE FƐƐ be ni Yehowa Odasefoi baaya yoo ko ni atsɛ́ɔ lɛ Wiesława ni yɔɔ Poland wuoyigbɛ lɛ ŋɔɔ lɛ, ekɛ bulɛ daa amɛ shi, ni no sɛɛ lɛ eshwieɔ amɛ. Gbi ko lɛ, Samuel ni eye afii nɛɛhu lɛ kɛ emami tee yoo lɛ ŋɔɔ. Yɛ be nɛɛ mli lɛ, Wiesława kpɛ eyiŋ akɛ ebaabo shɛɛ sane lɛ toi, ni eŋɔ wolo tɛtrɛɛ ni akɛha lɛ ni kɔɔ shihilɛ yɛ paradeiso shikpɔŋ nɔ lɛ he lɛ.

Akɛni no mli lɛ, Yesu Kristo gbele lɛ Kaimɔ lɛ miibɛŋkɛ hewɔ lɛ, Samuel miisumɔ ni efɔ̃ Wiesława nine kɛba nifeemɔ krɛdɛɛ nɛɛ shishi. No hewɔ lɛ, emami fata ehe kɛtee ni eyasara yoo lɛ ekoŋŋ, ni yɛ saramɔ nɛɛ mli lɛ, eha lɛ ninefɔ̃ɔ wolo ni akala. Beni Wiesława na akɛ gbekɛ nuu lɛ hesaamɔ yɛ hiŋmɛi nɔ lɛ, ebi amɛ gbɛ sharao, ni lɛ hu etee eyasaa ehe jogbaŋŋ. Beni eku esɛɛ eba lɛ, ebo Samuel toi ni eŋɔ ninefɔ̃ɔ wolo lɛ, ni ebi akɛ: “Ani esa akɛ mikome too pɛ maba, aloo manyɛ mikɛ miwu aba?” Kɛkɛ ni ekɛfata he akɛ: “Kɛ́ miwu lɛ baaa po lɛ, mi lɛ maba. Samuel, matsu he nii maha bo, onu.” Samuel ná miishɛɛ waa akɛ yoo lɛ ye eshiwoo lɛ nɔ.

Beni ahaa Kaimɔ lɛ he wiemɔ lɛ, Samuel tá Wiesława masɛi ni egbele ŋmalɛi ni asusuɔ he lɛ ehã lɛ. Yoo lɛ ná he miishɛɛ waa. Enya Kaimɔ lɛ he waa ni ehiɛ sɔ bɔ ni agbala susumɔi ni mli kwɔlɔ lɛ amli yɛ gbɛ ni yɔɔ mlɛo nɔ lɛ. Bɔ ni asafo lɛ here lɛ hiɛmɛɛ kɛ mlihilɛ kpo ni amɛjie amɛtsɔɔ lɛ lɛ hu ná enɔ hewalɛ waa. Kɛjɛ no sɛɛ kɛbaa nɛɛ, Wiesława etee nɔ ejie hiɛsɔɔ kpo waa kɛha mumɔŋ nibii, ni eje shishi ekɛ Yehowa Odasefoi miibɔ daa. Nyɛsɛɛ nɛɛ, ekɛɛ akɛ: “Edɔɔ mi akɛ be ko ni eho lɛ, kɛ́ nyɛba mishĩa lɛ, mibooo nyɛ toi. Ni eji anɔkwale akɛ, mibo nyɛshɛɛ sane lɛ toi yɛ Samuel, ni ji gbekɛ nuu ni eye afii nɛɛhu lɛ hewɔ.”

Taakɛ Samuel ni yɔɔ Poland lɛ ji lɛ, oblahii kɛ oblayei bibii krokomɛi babaoo ni ji Yehowa Odasefoi lɛ jieɔ Nyɔŋmɔ yi kɛtsɔ amɛwiemɔ kɛ amɛjeŋba kpakpa nɔ. Kɛ́ oji oblanyo loo oblayoo fioo lɛ, no lɛ bo hu obaanyɛ oye obua mɛi ni hiɛ tsui ni ja lɛ koni amɛjie hiɛsɔɔ kpo amɛtsɔɔ Nyɔŋmɔjamɔ nibii ni he yɔɔ sɛɛnamɔ lɛ.