Jamɔ Ni Hi Kɛha Bo

LALATSƐ Asaf jaje akɛ: “Nyɔŋmɔ ŋɔɔ hilɛ hi ha mi.” Kulɛ efee ejwɛŋmɔ akɛ ebaakase mɛi ni susuuu Nyɔŋmɔ he lɛ bɔni afee ni ená ogbɔjɔ shihilɛ. Shi kɛlɛ, Asaf susu sɛɛnamɔi ni yɔɔ Nyɔŋmɔ ni eeetsi ebɛŋkɛ lɛ lɛ he, ni emu sane naa akɛ no hi ha lɛ. (Lala 73:2, 3, 12, 28) Ani anɔkwa jamɔ hi kɛha bo ŋmɛnɛ? Mɛɛ gbɛ nɔ anɔkwa jamɔ he baanyɛ aba sɛɛnamɔ kɛha bo?

Anɔkwa Nyɔŋmɔ lɛ jamɔ baaye abua bo koni okɛ ŋkomeŋfa shihilɛ gbɛ akafee oti ni ma ohiɛ. Yɛ bɔ ni ‘Nyɔŋmɔ ni yɔɔ suɔmɔ lɛ’ bɔ wɔ eha hewɔ lɛ, mɛi ni tiuɔ ŋkomeŋfa nibii asɛɛ lɛ nyɛŋ aná miishɛɛ kɔkɔɔkɔ. (2 Korintobii 13:11) Yesu tsɔɔ anɔkwale ko ni he hiaa waa ni kɔɔ adesai abɔɔ su he beni ekɛɛ akɛ: “Nɔ hamɔ mli yɛ jɔɔmɔ [miishɛɛ, NW] fe hemɔ.” (Bɔfoi lɛ Asaji 20:35) Enɛ hewɔ wɔnáa he miishɛɛ akɛ wɔɔye wɔbua wɔnanemɛi kɛ wɔweku mli bii lɛ. Shi kɛlɛ, Nyɔŋmɔ sɔɔmɔ ji nɔ ni haa anáa miishɛɛ ni fe fɛɛ. Lɛ ji mɔ ni esa akɛ wɔjie suɔmɔ ni fe fɛɛ kpo wɔtsɔɔ. Mɛi akpekpei abɔ ni jɛ shihilɛi srɔtoisrɔtoi amli lɛ ena akɛ Nyɔŋmɔ ní amɛaajá kɛtsɔ nɔ ni ekɛɔ lɛ ni amɛaafee lɛ nɔ lɛ haa amɛtsui nyɔɔ amɛmli waa diɛŋtsɛ.—1 Yohane 5:3.

Ní Aaaná Yiŋtoo yɛ Shihilɛ Mli

Anɔkwa jamɔ hi kɛha bo ejaakɛ ehaa onáa yiŋtoo hu yɛ shihilɛ mli. Ani oyɔse akɛ bei pii lɛ, kɛ́ ofee nɔ ko ni sɛɛnamɔ yɔɔ he lɛ, ehaa onáa miishɛɛ? Mɛi babaoo kɛ shihilɛ mli otii emamɔ amɛhiɛ, ni enɛɛmɛi baanyɛ akɔ amɛweku, amɛnanemɛi, amɛnitsumɔ, loo hiɛtserɛjiemɔ he. Shi akɛni nibii ni akpaaa gbɛ nyɛɔ ebaa shihilɛ mli trukaa hewɔ lɛ, bei pii lɛ shihilɛ mli otii nɛɛ nyɛɛɛ aha amɛná miishɛɛ. (Jajelɔ 9:11) Shi kɛlɛ, anɔkwa jamɔ baaye abua bo koni oná yiŋtoo kpakpa ní baanyɛ aha oya nɔ oná miishɛɛ yɛ shihilɛ mli, kɛ́ okɛ naagbai po kpe yɛ shihilɛ mli nibii krokomɛi amli.

Anɔkwa jamɔ biɔ ni ale Yehowa ni akɛ anɔkwayeli asɔmɔ lɛ. Mɛi ni jáa Nyɔŋmɔ yɛ anɔkwale mli lɛ tsiɔ amɛbɛŋkɛɔ lɛ kpaakpa. (Jajelɔ 12:13; Yohane 4:23; Yakobo 4:8) Ekolɛ obaasusu akɛ eeefee nɔ ni wa kɛha bo akɛ ooole Nyɔŋmɔ jogbaŋŋ ni obatsɔ enaanyo. Shi kɛlɛ, kɛ́ osusu saji ni aŋmala ashwie shi ni tsɔɔ bɔ ni ekɛ mɛi ye ha kɛ nibii ni ebɔ lɛ ahe lɛ, yɛ anɔkwale mli lɛ obaanyɛ oyoo sui srɔtoi ni eyɔɔ lɛ. (Romabii 1:20) Kɛfata he lɛ, kɛ́ okane Nyɔŋmɔ Wiemɔ lɛ, obaanyɛ onu nɔ hewɔ ni wɔyɔɔ shihilɛ mli, nɔ hewɔ Nyɔŋmɔ ŋmɛɔ nɔnaa gbɛ, gbɛ nɔ ni ebaatsɔ efo nɔnaa sɛɛ, kɛ ekolɛ nɔ ni yɔɔ miishɛɛ fe fɛɛ lɛ, bɔ ni ooofee otsu gbɛfaŋnɔ ni hiaa he nii yɛ Nyɔŋmɔ yiŋtoi ahe nitsumɔ mli lɛ shishi. (Yesaia 43:10; 1 Korintobii 3:9) Shishinumɔ ni tamɔ nɛkɛ ní oooná lɛ baanyɛ aha oná yiŋtoo kpakpa yɛ shihilɛ mli!

Ní Oootsɔ Gbɔmɔ Kpakpa

Anɔkwa jamɔ hi kɛha bo ejaakɛ ebaaye ebua bo ni otsɔ gbɔmɔ kpakpa. Be mli ni ojáa Nyɔŋmɔ yɛ anɔkwale mli lɛ, obaaná su kpakpa ni baaha okɛ mɛi krokomɛi ahi shi jogbaŋŋ kɛ miishɛɛ. Okaseɔ anɔkwa ní aaaye, mlihilɛ ní akɛaawie, kɛ bɔ ni atsuɔ gbɛnaa nii ahe nii ahaa kɛjɛɔ Nyɔŋmɔ kɛ e-Bi lɛ ŋɔɔ. (Efesobii 4:20–5:5) Kɛ́ oná ole Nyɔŋmɔ jogbaŋŋ ni oná suɔmɔ oha lɛ lɛ, enɛ baatsirɛ bo koni okase lɛ. Biblia lɛ kɛɔ akɛ: “Nyɛfea Nyɔŋmɔ kaselɔi, tamɔ bii ni asumɔɔ, ni nyɛnyiɛa yɛ suɔmɔ mli.”—Efesobii 5:1, 2.

Ani efeŋ nɔ ni yɔɔ miishɛɛ akɛ aaahi gbɔmɛi ni kaseɔ Nyɔŋmɔ suɔmɔ lɛ ateŋ? Miishɛɛ sane ji akɛ, anɔkwa Nyɔŋmɔ lɛ jamɔ jeee nifeemɔ ni yɔɔ kɛha okome too pɛ. Ehaa okɛ mɛi krokomɛi ni sumɔɔ jalɛ kɛ ekpakpafeemɔ lɛ bɔɔ. Eji  anɔkwale akɛ, ekolɛ osumɔŋ ni okɛ jamɔ kuu ko ni ato he gbɛjianɔ lɛ abɔ. Shi kɛlɛ, taakɛ wɔna yɛ sane ni tsɔ hiɛ lɛ mli lɛ, jeee akɛ atoko jamɔi lɛ ateŋ babaoo ahe gbɛjianɔ, shi naagba lɛ ji akɛ, atooo amɛhe gbɛjianɔ yɛ gbɛ ni ja nɔ, ni amɛtsuuu yiŋtoi ni ja hu ahe nii. Jamɔ kui babaoo ni ato amɛhe gbɛjianɔ lɛ feɔ nibii ni esaaa akɛ Kristofoi feɔ. Yehowa diɛŋtsɛ ji mɔ ni to ewebii lɛ ahe gbɛjianɔ koni amɛtsu yiŋtoo kpakpa ko he nii. Biblia lɛ kɛɔ akɛ: “Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni.” (1 Korintobii 14:33) Ekolɛ obaana akɛ Kristofoi akuu ni ato amɛhe gbɛjianɔ jogbaŋŋ ní okɛaabɔ lɛ baaná oshihilɛ nɔ hewalɛ yɛ gbɛ kpakpa nɔ, tamɔ bɔ ni eji yɛ mɛi akpekpei abɔ agbɛfaŋ lɛ.

Wɔsɛɛ Be He Hiɛnɔkamɔ

Ŋmalɛ Krɔŋkrɔŋ lɛ tsɔɔ akɛ Nyɔŋmɔ miito anɔkwa jálɔi ahe gbɛjianɔ bɔni afee ni abaa amɛyi yɛ ŋmɛnɛŋmɛnɛ nibii agbɛjianɔtoo lɛ naagbee lɛ mli koni amɛhi shikpɔŋ hee ni “jalɛ hiɔ mli lɛ” nɔ. (2 Petro 3:13; Kpojiemɔ 7:9-17) No hewɔ lɛ, jamɔ ni hi kɛha bo lɛ haa onáa hiɛnɔkamɔ, ni enɛ ji nɔ titri ni haa anáa miishɛɛ. Nɔyelii ni yɔɔ shweshweeshwe, jarayeli nitsumɔi ni shwereɔ, loo gbɛkpamɔi ni ayɔɔ akɛ aaaná gbɔmɔtsoŋ hewalɛ kpakpa kɛ nitsumɔ mli hejɔɔmɔ ni haa mɔ tsui nyɔɔ emli lɛ ji nibii ni haa mɛi komɛi náa wɔsɛɛ be he hiɛnɔkamɔ. Shi kɛ́ nibii nɛɛ ateŋ eko haa anáa wɔsɛɛ be he hiɛnɔkamɔ po lɛ, fioo pɛ haa anáa wɔsɛɛ be he hiɛnɔkamɔ kpakpa ni yɔɔ miishɛɛ. Yɛ gbɛ kroko nɔ lɛ, bɔfo Paulo ŋma akɛ: “Wɔŋɔ wɔhiɛ wɔfɔ̃ Nyɔŋmɔ hiɛkãlɔ lɛ nɔ.”—1 Timoteo 4:10.

Kɛ́ otao nii amli jogbaŋŋ lɛ, obaanyɛ ona mɛi ni ji anɔkwa jálɔi lɛ. Suɔmɔ kɛ ekomefeemɔ haa esoroɔ Yehowa Odasefoi lɛ kwraa yɛ ŋmɛnɛŋmɛnɛ jeŋ ni mli egbála nɛɛ mli. Amɛjɛ maji srɔtoi babaoo kɛ shihilɛi srɔtoi amli; ni kɛlɛ, suɔmɔ ni amɛyɔɔ kɛha amɛhe kɛ agbɛnɛ hu suɔmɔ ni amɛyɔɔ kɛha Yehowa lɛ feɔ amɛ ekome. (Yohane 13:35) Amɛmiifɔ̃ bo nine koni bo hu obaná amɛniiashikpamɔi lɛ amli gbɛfaŋnɔ. Asaf ŋma akɛ: “Nyɔŋmɔ ŋɔɔ hilɛ hi ha mi.”—Lala 73:28.

[Mfoniri ni yɔɔ baafa 7]

Obaanyɛ obatsɔ Nyɔŋmɔ naanyo