“Misumɔɔ Omla Lɛ Ákɛ Nɔ Ko!”

LALA 119 lɛ haa anaa bɔ ni mɔ ni fo lala lɛ buɔ shɛɛ sane loo wiemɔ ni atsɔ Nyɔŋmɔ mumɔ lɛ nɔ aŋma lɛ eha. Lalatsɛ lɛ lá akɛ: ‘Mikɛ owiemɔ lɛ eto mitsui mli.’ ‘Ogbɛnaai lɛ ahe mimii shɛɔ.’ ‘Misusuma efee butuu kɛ shwe ni eshweɔ okojomɔi lɛ be fɛɛ be lɛ.’ ‘Okaimɔi lɛ ji nii ni mimii shɛɔ he.’ ‘Miishwe okpɔi lɛ.’ ‘Okitãi lɛ ahe mimii shɛɔ, ejaakɛ nomɛi misumɔɔ.’ ‘Majwɛŋ ogbɛtsɔɔmɔi lɛ ahe.’ ‘Misumɔɔ omla lɛ ákɛ nɔ ko! Jenamɔ fɛɛ lɛ no he mijwɛŋɔ.’—Lala 119:11, 16, 20, 24, 40, 47, 48, 97.

Kwɛ hiɛsɔɔ ni mli kwɔ ni lalatsɛ lɛ yɔɔ kɛha Nyɔŋmɔ wiemɔ lɛ! Ani bo hu ohiɛ sɔɔ shɛɛ sane ni yɔɔ Nyɔŋmɔ Wiemɔ ni ji Biblia lɛ mli lɛ? Ani obaasumɔ koni bo hu omii ashɛ he yɛ gbɛ ni tamɔ nakai nɔ? Kɛ́ nakai ni lɛ, no lɛ klɛŋklɛŋ lɛ, esa akɛ okɛfee osu akɛ obaakane Biblia lɛ be fɛɛ be, kɛ́ aaahi lɛ, daa gbi. Yesu Kristo kɛɛ akɛ: “Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.” (Mateo 4:4) Nɔ ni ji enyɔ lɛ, esa akɛ ojwɛŋ nɔ ni okaneɔ lɛ nɔ. Kɛ́ ojwɛŋ anɔkwalei ni kɔɔ Nyɔŋmɔ he, sui ni eyɔɔ, esuɔmɔnaa nii, kɛ eyiŋtoi ahe lɛ he lɛ, no baaha oná hiɛsɔɔ ni mli kwɔ oha Biblia lɛ. (Lala143:5) Ni bɔɔ mɔdɛŋ koni okɛ emli ŋaawoi kpakpai lɛ atsu nii daa yɛ oshihilɛ mli.—Luka 11:28; Yohane 13:17.

Mɛɛ sɛɛ oooná yɛ nɔ ni Biblia lɛ kɛɔ lɛ ni omii aaashɛ he lɛ he? Lala 119:2 lɛ kɛɔ akɛ: ‘Ajɔɔ mɛi ni kɛ Nyɔŋmɔ kaimɔi lɛ tsuɔ nii lɛ.’ Kaimɔi ni yɔɔ Biblia lɛ mli lɛ baaye abua bo koni onyɛ otsu naagbai ni okɛkpeɔ yɛ shihilɛ mli lɛ ahe nii yɛ omanyeyeli mli. (Lala 1:1-3) Obaaná nilee, sanesɛɛkɔmɔ, kɛ niiashishinumɔ, ni enɛɛmɛi baaye abua bo koni ‘okɔ onane kɛjɛ gbɛ fɔŋ fɛɛ gbɛ fɔŋ nɔ.’ (Lala 119:98-101) Anɔkwale ni kɔɔ Nyɔŋmɔ kɛ yiŋtoo ni ekɛbɔ shikpɔŋ lɛ ní ooole lɛ haŋ ofee mɔ ko ni hiɔ shi kɛkɛ, ni ebaawo hiɛnɔkamɔ ni oyɔɔ kɛha wɔsɛɛ be lɛ hu mli hewalɛ.—Yesaia 45:18; Yohane 17:3; Kpojiemɔ 21:3, 4.

Yehowa Odasefoi yɛ he miishɛɛ babaoo akɛ amɛaaye amɛbua mɛi koni amɛle Biblia lɛ mli jogbaŋŋ ni amɛmii ashɛ emli shɛɛ saji lɛ ahe. Wɔmii baashɛ wɔhe jogbaŋŋ ákɛ oootsu sane ni nyiɛ sɛɛ nɛɛ he nii.