Sanebimɔi ni Jɛ Kanelɔi Adɛŋ
Sanebimɔi ni Jɛ Kanelɔi Adɛŋ
Mɛni hewɔ New World Translation lɛ kɛɔ yɛ 5 Mose 31:2 lɛ akɛ “aŋmɛɛɛ” Mose “gbɛ dɔŋŋ koni eya ni eba” akɛ Israelbii lɛ a-hiɛnyiɛlɔ, yɛ be mli ni Biblia shishitsɔɔmɔi krokomɛi kɛɔ akɛ enyɛɛɛ yaa kɛ baa dɔŋŋ lɛ?
Eyɛ mli akɛ abaanyɛ atsɔɔ Hebri wiemɔ ni akɛ tsu nii lɛ shishi yɛ gbɛi enyɔ lɛ fɛɛ nɔ moŋ, shi bɔni atsɔɔ shishi aha yɛ Bibliai komɛi amli lɛ tsɔɔ akɛ Mose gbɔjɔ yɛ gbɔmɔtsoŋ beni eshwɛ fioo ni ebaagbo lɛ, ni no hewɔ lɛ, ebɛ gbɔmɔtsoŋ hewalɛ bɔni ekɛaanyɛ etsu nii akɛ hiɛnyiɛlɔ. Akɛ nɔkwɛmɔnɔ lɛ, The New English Bible lɛ ŋmã akɛ Mose kɛɛ akɛ: “Miye afii oha kɛ nyɔŋmai enyɔ ni minyɛɛɛ manyiɛ tamɔ bɔ ni mitaoɔ.” Ga Biblia lɛ hu tsɔɔ nakai nɔŋŋ akɛ : “Minyɛɛɛ yaa kɛ baa dɔŋŋ.”
Kɛlɛ, 5 Mose 34:7 lɛ tsɔɔ akɛ eyɛ mli akɛ Mose eda yɛ afii amli moŋ, shi egbɔjɔko. Ekɛɔ akɛ: “Ni Mose eye afii oha kɛ nyɔŋmai-enyɔ, beni egbo lɛ. Ehiŋmɛii anɔ efeko lɛ tuutuu, ni ehewalɛ nɔ gbɔko.” No hewɔ lɛ Mose yɛ gbɔmɔtsoŋ hewalɛ bɔni ebaanyɛ enyiɛ Israelbii lɛ ahiɛ, shi ejeee Yehowa suɔmɔnaa akɛ Mose ayanɔ afee nakai. Nɔ ni Mose tee nɔ ewie lɛ feɔ enɛ faŋŋ akɛ: “Yehowa ekɛɛ mi akɛ, Ofoŋ nɛkɛ Yordan nɛɛ.” Ekã shi faŋŋ akɛ Yehowa miitĩ akpɔ ni ewo yɛ Meriba nu lɛ hewɔ lɛ mli.—4 Mose 20:9-12.
Mose kɛ afii babaoo ni sa kadimɔ waa hi shi, ni abaanyɛ aja bei nɛɛ mli awo bei srɔtoi etɛ mli. Ekɛ afii 40 hi Mizraim, he ni ‘atsɔɔ lɛ Mizraim nilee fɛɛ, ni ená hewalɛ yɛ wiemɔi kɛ nitsumɔi amli’ yɛ lɛ. (Bɔfoi lɛ Asaji 7:20-22) Ekɛ afii 40 kroko yahi Midian. Ekase sui ní kɛ Yehowa shishitoo mlai kpaa gbee, ní he hiaa kɛha Yehowa webii lɛ ahiɛnyiɛmɔ lɛ ahe nii yɛ jɛmɛ. Yɛ naagbee lɛ Mose kɛ afii 40 kudɔ Israelbii lɛ ni enyiɛ amɛhiɛ. Ni kɛlɛ, agbɛnɛ Yehowa kpɛ mli akɛ Yoshua ji mɔ ni baanyiɛ Israelbii lɛ ahiɛ kɛfo Yordan faa lɛ kɛya Shiwoo Shikpɔŋ lɛ nɔ shi jeee Mose. —5 Mose 31:3.
No hewɔ lɛ New World Translation lɛ jieɔ shishinumɔ diɛŋtsɛ ni yɔɔ 5 Mose 31:2 lɛ mli lɛ kpo. Mose nyɛŋ eya nɔ akɛ Israelbii lɛ ahiɛnyiɛlɔ dɔŋŋ, jeee gbɔjɔmɔ ni egbɔjɔ yɛ gbɔmɔtsoŋ hewɔ, shi moŋ Yehowa ji mɔ ni eŋmɛɛɛ lɛ gbɛ akɛ Israelbii lɛ ahiɛnyiɛlɔ.