Wala Shihilɛ He Sane

Yehowa Ye Ebua Mi Ni Midamɔ Shihilɛ Mli Naagbai Anaa

TAAKƐ DALE IRWIN GBA

“BII KPAANYƆ FÁ! BII EJWƐ NI AFƆ́ AMƐ SHIKOME LƐ HA NITSUMƆ BADA.” Enɛ ji saneyitso ni adafitswaa wolo ko ni yɔɔ he ni wɔyɔɔ lɛ kɛtswa bii ejwɛ ni wɔfɔ́ amɛ shikome kɛfata wɔbiyei ejwɛ ni wɔyɔɔ lɛ ahe lɛ he adafi. Beni miji oblanyo lɛ, no mli lɛ ebɛ mijwɛŋmɔ mli kwraa akɛ mabote gbalashihilɛ mli, aahu po ni mafɔ́ bii. Ni kɛlɛ, naa mi ní mibatsɔ bii kpaanyɔ atsɛ!

A FƆ́ mi yɛ Australia maŋ ni ji Mareeba lɛ mli yɛ afi 1934. Afɔ́ wɔyi etɛ, ni miji nakutsoŋbi. Sɛɛ mli lɛ, wɔweku lɛ fã kɛyahi Brisbane, ni mimami yatsɔɔ gbekɛbii ni yaa Methodist sɔlemɔ ni yɔɔ jɛmɛ lɛ nii daa Hɔgbaa.

Mra mli yɛ afi 1938 lɛ, adafitswaa wolo ni yɔɔ jɛmɛ lɛ bɔ amaniɛ akɛ, ekolɛ aŋmɛŋ Joseph F. Rutherford ni jɛ Yehowa Odasefoi lɛ anitsumɔhe yitso lɛ gbɛ ni eba Australia. Mimami bi Odasefonyo ko ni bashiɛ etsɔɔ wɔ yɛ no sɛɛ lɛ akɛ: “Mɛni hewɔ asumɔɔɔ ni aŋmɛ lɛ gbɛ ni eba Australia lɛ?” Odasefonyo lɛ to he eha lɛ akɛ: “Ani Yesu ekɛɛɛ akɛ mɛi baawa esɛɛnyiɛlɔi lɛ ayi?” No sɛɛ lɛ, mimami ŋɔ wolo bibioo ni ji Cure lɛ, ni wolo nɛɛ wieɔ srɔtofeemɔi babaoo ni yɔɔ anɔkwa jamɔ kɛ apasa jamɔ teŋ lɛ ahe. * Akɛni mimami ná wolo bibioo lɛ he miishɛɛ waa hewɔ lɛ, ekɛwɔ tee Yehowa Odasefoi akpee enɔ Hɔgbaa. Yɛ shishijee mli lɛ, Ataa te shi ewo wɔ waa, shi yɛ bei komɛi amli lɛ, eŋmaa sanebimɔi ehaa Awo koni ekɛha nyɛmimɛi hii lɛ ateŋ mɔ kome koni ejɛ Biblia lɛ mli eha lɛ hetoo. Nyɛmi nuu lɛ hu ŋmalaa hetooi ni jɛ Ŋmalɛi lɛ amli lɛ ni ekɛhaa Awo koni ekɛha Ataa.

Gbi ko Hɔgbaa lɛ, Ataa nyiɛ wɔsɛɛ kɛtee kpee lɛ koni eyakɛɛ Odasefoi lɛ akɛ enyaaa amɛhe kwraa. Shi kɛlɛ, beni Ataa kɛ nɔkwɛlɔ gbɛfalɔ ní ebasara  wɔsafo lɛ yɛ nakai beaŋ lɛ gba sane sɛɛ lɛ, Ataa tsake enifeemɔ, ni eŋmɛ gbɛ po koni akɛ wɔshĩa lɛ afee daa otsi Biblia mli nikasemɔhe kɛha mɛi ni yɔɔ wiemɔ lɛ he miishɛɛ ni yɔɔ wɔkutso lɛ mli lɛ.

Abaptisi mifɔlɔi lɛ yɛ September 1938. Yɛ December 1941 lɛ, abaptisi mi kɛ minyɛmimɛi lɛ yɛ maŋ muu fɛɛ kpee wulu ni afee yɛ Hargreave Shwɛmɔhe ni yɔɔ Sydney yɛ New South Wales lɛ shishi. No mli lɛ miye afii kpawo. Yɛ no sɛɛ lɛ, mi kɛ mifɔlɔi lɛ bɔi shiɛmɔyaa daa. Odasefoi lɛ hiɛɔ gramafon bibii kɛyaa shĩa kɛ shĩa ni amɛtswaa Biblia mli wiemɔi ni amɔmɔ awo kpãa nɔ amɛhaa shiatsɛmɛi lɛ yɛ nakai beaŋ.

Odasefonyo ko ní mikaiɔ lɛ jogbaŋŋ ji Bert Horton. Eyɛ lɔle bibioo ko ní tsɔne ni haa wiemɔ gbɛɛɔ waa ma yiteŋ. Akɛni gbekɛ fioo ji mi hewɔ lɛ, mináa miishɛɛ waa kɛ́ mikɛ Bert miitsu nii. Ákɛ nɔkwɛmɔnɔ lɛ, kɛ́ wɔmiitswa Biblia mli wiemɔ kɛmiijɛ gɔŋ ko nɔ lɛ, bei pii lɛ wɔnaa ni polisifoi atsɔne miiba he ni wɔyɔɔ lɛ. Bert kɛ oyaiyeli gbeɔ etsɔne ni haa wiemɔ gbɛɔ lɛ, ni efãa elɔle lɛ kɛyaa shɔŋŋ yɛ gɔŋ kroko nɔ, ni eyatswaa Biblia mli wiemɔ kroko yɛ jɛmɛ. Mikase ekãafeemɔ babaoo kɛ bɔ ni akɛ he fɔ̃ɔ Yehowa nɔ kwraa kɛjɛ Bert kɛ nyɛmimɛi anɔkwafoi krokomɛi ni yɔɔ ekãa tamɔ lɛ nɔŋŋ lɛ adɛŋ.—Mateo 10:16.

Beni miye afii 12 lɛ, mikome too mifɔɔ shiɛmɔyaa kɛ́ mikpa skul. Be ko lɛ, miyashiɛ mitsɔɔ nuu ko ní atsɛɔ lɛ Adshead kɛ eweku lɛ. Sɛɛ mli lɛ, tsɛ lɛ kɛ nyɛ lɛ, kɛ amɛbii kpaanyɔ, kɛ amɛnabii babaoo bale anɔkwale lɛ. Miida Yehowa shi akɛ ekɛ mi ní miji gbekɛ nuu fioo kɛkɛ lɛ tsu nii koni ekɛha weku ni he yɔɔ miishɛɛ nɛɛ ale Biblia mli anɔkwale lɛ.—Mateo 21:16.

Sɔɔmɔ Hegbɛi ni Miná Beni Miji Oblanyo Fioo Lɛ

Beni miye afii 18 lɛ, mibatsɔ daa gbɛgbalɔ, ni aha mi nitsumɔ akɛ miyashiɛ yɛ Maitland yɛ New South Wales. Yɛ afi 1956 lɛ, afɔ̃ mi nine koni miyasɔmɔ yɛ Australia nitsumɔhe nine ni yɔɔ Sydney lɛ. Nitsulɔi 20 ni yɔɔ jɛmɛ lɛ ateŋ mɛi aaafee 7 fata mɛi ni afɔ amɛ mu ní yɔɔ hiɛnɔkamɔ akɛ amɛkɛ Kristo baaye nɔ yɛ eŋwɛi Maŋtsɛyeli lɛ mli lɛ ahe. Mɛɛ hegbɛ po eji nɛkɛ ákɛ akɛ amɛ aaafee ekome kɛtsu nii!—Luka 12:32; Kpojiemɔ 1:6; 5:10.

Mifai shi ni mitswa akɛ mahi shi akɛ oshijafonyo lɛ tsake beni mi kɛ Judy Helberg ni eji nyɛmi yoo gbɛgbalɔ ko ni he yɔɔ fɛo waa ní afɔ̃ lɛ nine koni ekɛ be kukuoo abaye abua mi kɛtsu nitsumɔ wulu ko he nii yɛ nitsumɔhe nine lɛ kpe lɛ. Mikɛ Judy ná suɔmɔ wɔha wɔhe, ni wɔbote gbalashihilɛ mli yɛ afii enyɔ sɛɛ. No sɛɛ lɛ wɔje kpokpaa nɔkwɛmɔ nitsumɔ shishi, ni enɛ bi ni daa otsi lɛ, wɔyasara Yehowa Odasefoi asafo ko, ni wɔwo nyɛmimɛi lɛ hewalɛ.

Yɛ afi 1960 lɛ, Judy fɔ́ wɔ klɛŋklɛŋ biyoo ní atsɛ́ɔ lɛ Kim lɛ. Ŋmɛnɛ, kɛ́ kpokpaa nɔkwɛlɔ ko fɔ́ bi lɛ, no tsɔɔ akɛ ebaakpa kpokpaa nɔkwɛmɔ nitsumɔ lɛ. Shi wɔnaa kpɛ wɔhe waa akɛ afɔ̃ wɔ nine koni wɔyatsa kpokpaa nɔkwɛmɔ nitsumɔ lɛ nɔ. Beni wɔsɔle waa sɛɛ lɛ, wɔkpɛlɛ ninefɔ̃ɔ lɛ nɔ, ni yɛ nɔ ni fa fe nyɔji kpawo ni nyiɛ sɛɛ kɛba lɛ mli lɛ, Kim fata wɔhe ni wɔkɛ lɔle, kɔɔyɔŋ lɛlɛ, kɛ oketeke fã gbɛ kilomitai 13,000 kɛyasɔmɔ asafoi ní yɔɔ shɔŋŋ yɛ Queensland kɛ Kooyigbɛ Kpokpaa lɛ nɔ lɛ. No mli lɛ, wɔbɛ wɔ diɛŋtsɛ wɔlɔle.

Wɔyahiɔ nyɛmimɛi hii kɛ yei ashĩai be fɛɛ be. Akɛni hulu tsoɔ waa yɛ jɛmɛ hewɔ lɛ, atáaa shinaai awooo piai lɛ anaa, shi moŋ akɛ shinaa naabo woɔ shinaai lɛ anaa yɛ nakai beaŋ, ni enɛ haa wɔhaoɔ waa kɛ́ Kim miifó nyɔɔŋ. Yɛ naagbee lɛ, ebafee nɔ ni wa waa kɛha wɔ akɛ wɔɔkwɛ wɔbi lɛ ní wɔtsu wɔnitsumɔ lɛ hu. Enɛ hewɔ lɛ, wɔyahi Brisbane, ni mibɔi nitsumɔ akɛ nitɛŋlɔ. Beni wɔfɔ́  Kim sɛɛ afii enyɔ lɛ, wɔfɔ́ biyoo kroko ni wɔwo lɛ gbɛi akɛ Petina.

Awerɛhoyeli Naadaamɔ

Yɛ afi 1972 beni wɔbiyoo nukpa lɛ eye afii 12 ní esɛɛho lɛ hu eye afii 10 lɛ, kansa ni haa mɔ lá nɔ gbɔɔ gbe Judy. Egbele lɛ ha wɔweku lɛ ye awerɛho aahu. Ni kɛlɛ, Yehowa tsɔ e-Wiemɔ lɛ, emumɔ krɔŋkrɔŋ lɛ, kɛ nyɛmimɛi lɛ anɔ eshɛje wɔmii beni Judy bɛ hewalɛ lɛ, kɛ agbɛnɛ hu beni egbo sɛɛ lɛ. Buu-Mɔɔ wolo tɛtrɛɛ ní ajie lɛ kpo yɛ Judy gbele lɛ sɛɛ nɔŋŋ lɛ hu wo wɔ hewalɛ. Sane ko ni yɔɔ nakai wolo tɛtrɛɛ lɛ mli lɛ wie kaai ni akɛkpeɔ yɛ shihilɛ mli ní suɔlɔ ko gbele fata he lɛ ahe, ni etsɔɔ bɔ ni kaai baanyɛ aye abua wɔ koni wɔná sui kpakpai tamɔ tsuishiŋmɛɛ, hemɔkɛyeli, kɛ anɔkwayeli. *—Yakobo 1:2-4.

Yɛ Judy gbele lɛ sɛɛ lɛ, mibiyei lɛ bɛŋkɛ mi waa. Shi yɛ anɔkwale mli lɛ, mináaa lɛ mlɛo akɛ matsu tsɛ kɛ nyɛ fɛɛ sɔ̃i ní bajwere minɔ lɛ ahe nii. Ni kɛlɛ, mibiyei enyɔ ni bɔɔ mɔdɛŋ waa lɛ ha nitsumɔ lɛ bafee mlɛo fioo kɛha mi.

Mibote Gbalashihilɛ Mli Ekoŋŋ ni Mibaná Weku ni Da

Yɛ sɛɛ mli lɛ, mibote gbalashihilɛ mli ekoŋŋ. Mikɛ miŋa hee ni atsɛɔ lɛ Mary lɛ yɛ nibii babaoo ni je amɛhe. Lɛ hu kansa ni haa mɔ lá nɔ gbɔɔ gbe ewu. Agbɛnɛ hu eyɛ biyei enyɔ ni atsɛɔ amɛ Colleen kɛ Jennifer. Mibiyoo Petina ye Colleen onukpa aaafee afii etɛ. No hewɔ lɛ, wɔweku lɛ baná biyei ejwɛ agbɛnɛ, Kim eye afii 14, Petina eye afii 12, Colleen eye afii 9, ni Jennifer hu eye afii 7.

Yɛ shishijee mli lɛ, Mi kɛ Mary kpɛ wɔyiŋ akɛ wɔteŋ mɔ fɛɛ mɔ atsɔse lɛ diɛŋtsɛ ebii kɛyashi beni ebii lɛ baaná he miishɛɛ akɛ amɛkɛ migbɛtsɔɔmɔ aaatsu nii, ní mi hu mibii lɛ aaafee nakai nɔŋŋ yɛ lɛ hu egbɛfaŋ. Mi kɛ Mary kɛ gbɛtsɔɔmɔi enyɔ komɛi ni he hiaa waa tsu nii yɛ wɔshihilɛ mli ákɛ wu kɛ ŋa. Klɛŋklɛŋ lɛ, wɔtaaa saji anaa yɛ gbekɛbii lɛ ahiɛ kɔkɔɔkɔ, ni nɔ ni ji enyɔ lɛ, yɛ Biblia mli shishitoo mla ni yɔɔ Efesobii 4:26 lɛ kɛ gbeekpamɔ naa lɛ, wɔwieɔ naagbai ahe kɛyashiɔ wɔnaa saji anaa—kɛ́ nakai feemɔ baahe ŋmɛlɛtswai babaoo po!

Naakpɛɛ sane ji akɛ, weku lɛ mli bii lɛ ateŋ mɔ fɛɛ mɔ ná banuma weku shihilɛ mli ni wɔyɔɔ lɛ he miishɛɛ, shi wɔtee nɔ wɔye wɔsuɔlɔi ni egboi lɛ ahe awerɛho lolo be saŋŋ. Ákɛ nɔkwɛmɔnɔ lɛ, Mary tee nɔ efó daa Ju gbɛkɛ. Kɛ́ wɔgbe wɔweku nikasemɔ lɛ naa ní gbekɛbii lɛ yakãmɔ shi lɛ, bei pii lɛ Mary fɔseɔ henumɔi ni etsĩ naa ewo emli lɛ eshwieɔ shi.

Mary miisumɔ ni mikɛ lɛ afɔ́ wɔ diɛŋtsɛ wɔbi. Dɔlɛ sane ji akɛ, klɛŋklɛŋ musu ní ená lɛ fite. Beni Mary ná musu ekoŋŋ lɛ, asomoaŋ naakpɛɛ sane ko miimɛ wɔ. Akɛ tsɔne shá emusu lɛ mfoniri ni ana akɛ ebaafɔ́ bii ejwɛ, shi jeee bi kome! Minaa kpɛ mihe waa diɛŋtsɛ. Miye afii 47 pɛ, ni kɛlɛ etsɛŋ ni matsɔ bii kpaanyɔ atsɛ! Beni Mary kɛ otsii 32 ehiɛ gbekɛbii ejwɛ lɛ musu sɛɛ lɛ, afee lɛ opireshɛn kɛjie gbekɛbii lɛ yɛ February 14, 1982. Mɔ ni afɔ́ klɛŋklɛŋ ji Clint, ni etsiimɔ ji kilogram 1.6; mɔ ni ji enyɔ nɔ ji Cindy, ni etsiimɔ ji kilogram 1.9; mɔ ni ji etɛ nɔ ji Jeremy, ni etsiimɔ ji kilogram 1.4; ni mɔ ni ji ejwɛ nɔ ji Danette, ni lɛ hu etsiimɔ ji kilogram 1.7. Amɛjeee amɛhe kwraa.

Beni Mary fɔ́ nɔŋŋ lɛ, edatrɛfonyo lɛ batá mimasɛi.

 Ebi mi akɛ: “Ani ohao yɛ gbekɛbii lɛ atsɔsemɔ kɛ amɛkwɛmɔ hewɔ?”

Mikɛɛ lɛ akɛ: “Hɛɛ, mikɛ nɔ ko ni tamɔ nɛkɛ ekpeko yɛ shihilɛ mli pɛŋ.”

Wiemɔi ni ewie kɛnyiɛ sɛɛ lɛ wo mi hewalɛ ni eha minaa kpɛ mihe waa.

Ekɛɛ akɛ: “Osafoŋbii lɛ baaye amɛbua bo. Kɛ́ amɛná amɛle onaagba lɛ nɔŋŋ pɛ lɛ, amɛbaaye amɛbua bo waa fe bɔ ni obaakpa gbɛ!”

Yɛ ŋaalee ni datrɛfonyo ni he esa jogbaŋŋ nɛɛ kɛ datrɛfoi krokomɛi ni fata ehe lɛ kɛtsu nii lɛ hewɔ lɛ, yɛ nyɔji enyɔ pɛ sɛɛ lɛ, wɔkɛ gbekɛbii ejwɛ ni yɔɔ gbɔmɔtsoŋ hewalɛ bɔ ni sa shi helatsamɔhe lɛ kɛtee shĩa.

Bii Ejwɛ ni Afɔ́ Amɛ Shikome lɛ Akwɛmɔ He Naagbai

Bɔni afee ni nɔ fɛɛ nɔ aya nɔ yɛ gbɛjianɔtoo naa lɛ, mi kɛ Mary to be he gbɛjianɔ kɛha nɔ ni wɔbaafee yɛ gbi muu lɛ fɛɛ mli. Wɔbiyei krokomɛi ni edara lɛ ye amɛbua waa kɛkwɛ gbekɛbii lɛ. Datrɛfonyo lɛ wiemɔi lɛ ba mli anɔkwale—kɛ́ asafoŋbii lɛ ná amɛle wɔnaagba bibioo ko po lɛ, amɛbayeɔ amɛbuaa wɔ oya nɔŋŋ. Mra mli lɛ, minaanyo ko ní atsɛɔ lɛ John MacArthur lɛ bua Odasefoi komɛi ni le tsumaa nitsumɔ lɛ anaa ni amɛbagbele wɔshĩa lɛ mli. Beni wɔfɔ́ gbekɛbii lɛ, nyɛmimɛi yei komɛi baye amɛbua wɔ kɛkwɛ gbekɛbii lɛ. Nɛkɛ mlihilɛ nifeemɔi nɛɛ fɛɛ tsɔɔ Kristofoi asuɔmɔ kpojiemɔ.—1 Yohane 3:18.

Gbekɛbii ejwɛ ni wɔfɔ́ amɛ shikome lɛ ji “asafo lɛ bii” yɛ gbɛ ko nɔ. Kɛbashi amrɔ nɛɛ po lɛ, gbekɛbii lɛ naa nyɛmimɛi hii kɛ yei babaoo ni yɔɔ suɔmɔ ni baye amɛbua wɔ lɛ akɛ amɛwekumɛi. Mary ebafee ŋa kɛ nyɛ ni he esa waa, ni ejɛ esuɔmɔ mli ekwɛ gbekɛbii lɛ. Ekɛ nibii ni ekase kɛjɛ Nyɔŋmɔ Wiemɔ lɛ kɛ asafo lɛ mli lɛ tsu nii jogbaŋŋ. Ŋaawoo ko bɛ ni hi fe nɔ ni jɛ Nyɔŋmɔ Wiemɔ lɛ mli lɛ kɛ asafo lɛ ŋɔɔ lɛ!—Lala 1:2, 3; Mateo 24:45.

Eyɛ mli akɛ abifabii ejwɛ akwɛmɔ bɛ mlɛo kwraa moŋ, shi Kristofoi akpeeiyaa kɛ shiɛmɔ nitsumɔ lɛ tee nɔ efee wɔdaa otsi gbɛjianɔtoo lɛ fã ni he hiaa waa. Gbalashihilɛ mli hefatalɔi srɔtoi enyɔ komɛi ní jɛɔ amɛsuɔmɔ mli amɛbaa wɔshĩa koni wɔkɛ amɛ afee Biblia mli nikasemɔ lɛ baafee jɔɔmɔ kɛha wɔ. Eyɛ mli akɛ enɛ ha nibii bafee mlɛo kɛha wɔ moŋ, shi bei komɛi lɛ, Mary hiɛɔ abifabii lɛ ateŋ mɔ kome ní ewɔ beni nikasemɔ lɛ yaa nɔ lɛ, ni lɛ diɛŋtsɛ hu ewɔɔ wɔdɔi akɛni etɔ lɛ waa lɛ hewɔ. Yɛ sɛɛ mli lɛ, gbalashihilɛ mli hefatalɔi srɔtoi enyɔ lɛ fɛɛ batsɔmɔ wɔmumɔŋ nyɛmimɛi.

Wɔkɛ Mumɔŋ Nibii Tsɔse Gbekɛbii lɛ Kɛjɛ Amɛgbekɛbiiashi Tɔ̃ɔ

Dani abifabii lɛ aaale nyiɛmɔ po lɛ, Mi kɛ Mary kɛ wɔbiyei onukpai lɛ hiɛɔ amɛ kɛyaa shiɛmɔ. Beni amɛkaseɔ nyiɛmɔ lɛ, Mary hiɛɔ mɛi enyɔ, ni mi hu mihiɛɔ mɛi enyɔ, ni amɛjeee jatsu kɛha wɔ. Yɛ anɔkwale mli lɛ, bei pii lɛ, amɛbatsɔmɔɔ nɔ ni wɔdamɔɔ nɔ wɔkɛ shiatsɛmɛi ni yɔɔ naanyobɔɔ su lɛ jeɔ sanegbaa shishi. Gbi ko lɛ, mikɛ nuu ko kpe, ni ekɛɛ akɛ kɛ́ afɔ mɔ ko yɛ gbi ni ŋulami pɔtɛɛ ko eje lɛ nɔ lɛ, no baatsɔ bɔ ni mɔ lɛ su kɛ baŋ baaji aha wɔsɛɛ. Mikɛ lɛ ejeee ŋwane, shi mikɛɛ lɛ akɛ kɛ́ eesumɔ lɛ, maku misɛɛ kɛba nakai leebi lɛ nɔŋŋ koni mikɛ lɛ abasusu sane lɛ he. Ekpɛlɛ, ni no hewɔ lɛ, miku misɛɛ ni mikɛ gbekɛbii ejwɛ ni afɔ́ amɛ shikome lɛ tee eŋɔɔ. Beni mito gbekɛbii lɛ anaa kɛjɛ onukpa nɔ kɛyashi gbekɛ nɔ lɛ, ekwɛ amɛ gãa, ni enaa kpɛ ehe. Yɛ no sɛɛ lɛ, mikɛ lɛ gba bɔ ni eyɔɔ faŋŋ akɛ gbekɛbii lɛ yɛ srɔto yɛ gbɔmɔtsoŋ, kɛ agbɛnɛ bɔ ni srɔtofeemɔ agbo yɔɔ amɛsu kɛ baŋ he lɛ hu he sane kɛ miishɛɛ, ni enɛ tsɔɔ akɛ esusumɔ lɛ ejaaa kwraa. Ekɛɛ akɛ: “Nilee bɛ mli akɛ miwie sane nɛɛ he mitsɔɔ bo. Esa akɛ matao nii amli babaoo kɛfata he, aloo jeee nakai?”

 Beni gbekɛbii lɛ kaseɔ nyiɛmɔ lɛ, kɛ́ amɛfee nɔ ko ni ehiii ni wɔtsɔse amɛ fɛɛ kutuu lɛ, amɛmli fuɔ, ni no hewɔ lɛ, wɔtsɔseɔ amɛ akɛ aŋkroaŋkroi. Ni kɛlɛ, amɛkase akɛ esa akɛ amɛ fɛɛ amɛkɛ mlai kome too lɛ nɔŋŋ atsu nii. Kɛ́ amɛkɛ saji ni ebiɔ ni amɛkɛ amɛhenilee atsu he nii lɛ kpe yɛ skul lɛ, amɛkɛ Biblia mli shishitoo mlai tsuɔ nii yɛ shiŋŋfeemɔ mli be fɛɛ be, ni amɛyeɔ amɛbuaa amɛhe, ni Cindy ji amɛnaawielɔ. Etsɛɛɛ ni mɛi bayɔse akɛ bii ejwɛ ni afɔ́ amɛ shikome lɛ ji mɛi ni kɛ ekomefeemɔ yeɔ kɛbuaa amɛhe waa!

Taakɛ efɔɔ kaa lɛ, beni gbekɛbii lɛ batsɔmɔ oblahii kɛ oblayei bibii lɛ, ebafee nɔ ni bɛ mlɛo kɛha mi kɛ Mary fɛɛ akɛ wɔɔye wɔbua amɛ ni amɛya nɔ amɛye Yehowa anɔkwa. Kɛ́ jeee yelikɛbuamɔ ni wɔná kɛjɛ nyɛmimɛi ni yɔɔ suɔmɔ ni yɔɔ asafo lɛ mli lɛ adɛŋ kɛ mumɔŋ niyenii babaoo ni wɔná kɛjɛ Yehowa gbɛjianɔtoo lɛ fã ni anaa lɛ dɛŋ kulɛ, gbekɛbii lɛ atsɔsemɔ baafee nɔ ni wa waa. Wɔbɔ mɔdɛŋ akɛ wɔfee weku Biblia mli nikasemɔ daa ní wɔya nɔ wɔkɛ gbekɛbii lɛ agba sane, eyɛ mli akɛ jeee be fɛɛ be enɛ feemɔ yɔɔ mlɛo. Ni kɛlɛ, wɔmɔdɛŋbɔɔ lɛ efeee efolo ejaakɛ wɔbii kpaanyɔ lɛ fɛɛ ehala akɛ amɛbaasɔmɔ Yehowa.

Gbɔlɛ Naadaamɔ

Miná sɔɔmɔ hegbɛi srɔtoi yɛ afii ni eho lɛ amli: misɔmɔ akɛ asafoŋ onukpa, maŋtiase nɔkwɛlɔ, kɛ kpokpaa nɔkwɛlɔ sɛɛmɔ. Misɔmɔ hu akɛ Hospital Liaison Committee (Ajinafoi Akuu ni Kɛ Helatsamɔhei Shãraa) lɛ mli nyo, ni amɛnitsumɔ ji akɛ amɛye amɛbua datrɛfoi koni amɛkɛ helatsɛmɛi ni ji Odasefoi lɛ akpã gbee kɛ́ saji ni kɔɔ lá ni agbalaa awoɔ mɔ mli lɛ he lɛ he saji te shi lɛ. Mikɛ afii 34 hu ená hegbɛ yɛ mla naa akɛ mikɛ mɛi agbalashihilɛ awo mla shishi. Mikɛ gbalashihilɛi srɔtoi aaafee 350 ní mibiyei ekpaa lɛ fata he lɛ ewo mla shishi.

Midaa Yehowa shi daa yɛ anɔkwayeli mli ní Judy jɛ efĩ misɛɛ, kɛ agbɛnɛ sɛɛfimɔ ni Mary kɛhaa mi amrɔ nɛɛ lɛ hewɔ. (Abɛi 31:10, 30) Amɛfĩ misɛɛ yɛ nitsumɔ ni mitsu akɛ asafoŋ onukpa lɛ mli, amɛfee nɔkwɛmɔnɔ kpakpa hu yɛ shiɛmɔ nitsumɔ lɛ mli, ni amɛye amɛbua kɛdu mumɔŋ sui kɛwo gbekɛbii lɛ amli.

Yɛ afi 1996 lɛ, ana akɛ miiye aŋsɔ mli hela ko ni haa mɔ nine kpokpoɔ, ni enɛ haaa manyɛ madamɔ shi jogbaŋŋ. Enɛ hewɔ lɛ, minyɛɛɛ matsu minitɛŋmɔ nitsumɔ lɛ dɔŋŋ. Shi kɛlɛ, miyaa nɔ mináa miishɛɛ lolo yɛ Yehowa sɔɔmɔ mli eyɛ mli moŋ akɛ minyɛɛɛ matsu tamɔ tsutsu ko lɛ. Nɔ ni hi ji akɛ, enɛ eha minuɔ he waa mihaa mɛi krokomɛi ni egbɔlɔ lɛ.

Kɛ́ misusu mishihilɛ he lɛ, midaa Yehowa shi akɛ eyeɔ ebuaa mi kɛ miweku lɛ be fɛɛ be koni wɔkɛ miishɛɛ adamɔ wɔnaagbai babaoo lɛ anaa. (Yesaia 41:10) Mi kɛ Mary kɛ wɔbii kpaanyɔ lɛ fɛɛ hiɛ sɔɔ wɔmumɔŋ nyɛmimɛi hii kɛ yei kpakpai ni fĩɔ wɔsɛɛ lɛ waa. Amɛ fɛɛ amɛjie suɔmɔ ni amɛyɔɔ lɛ kpo amɛtsɔɔ wɔ yɛ gbɛ̀i babaoo anɔ fe bɔ ni wɔɔnyɛ wɔwie he po.—Yohane 13:34, 35.

[Shishigbɛ niŋmai]

[Mfoniri ni yɔɔ baafa 12]

Wɔfee klalo akɛ wɔɔya kpokpaa wulu nɔ kpee ni afee yɛ Sydney yɛ 1941 lɛ, mi kɛ Awo kɛ minyɛmi nuu onukpa ni atsɛɔ lɛ Garth kɛ minyɛmi yoo ni atsɛɔ lɛ Dawn lɛ

[Mfoniri ni yɔɔ baafa 13]

Mi kɛ Judy kɛ abifao Kim beni mitsuɔ kpokpaa nɔkwɛmɔ nitsumɔ lɛ yɛ Queensland

[Mfoniri ni yɔɔ baafa 15]

Beni wɔfɔ́ bii ejwɛ lɛ shikome lɛ, wɔbiyei onukpai ejwɛ lɛ kɛ asafo lɛ ye amɛbua wɔ