“Mɛni Hewɔ Wɔyɔɔ Biɛ?”

ELIE WIESEL ni ná Nobel Jweremɔ Nɔ̃ ní asaŋ eje Yudafoi aseshi ni Nazibii ka bulemɔ lɛ mli lɛ wie sanebimɔ ko he akɛ eji “sanebimɔ ni he hiaa fe fɛɛ ni ebaabi ni mɔ asusu he.” Mɛɛ sanebimɔ ni? No ji, “Mɛni hewɔ wɔyɔɔ biɛ?”

Ani osusu sanebimɔ nɛɛ he pɛŋ? Eyɛ mli akɛ mɛi babaoo efee nakai moŋ, shi amɛleee ehetoo. Beni Britain yinɔsaneŋmalɔ Arnold Toynbee bɔɔ mɔdɛŋ akɛ etsɔɔ nɔ̃ hewɔ ni wɔyɔɔ wala mli lɛ, eŋma akɛ: “Nɔ̃ titri hewɔ ni adesai yɔɔ shihilɛ mli ji ní amɛwo Nyɔŋmɔ hiɛ nyam ní E-shɛje amɛmii kɛya naanɔ.”

Naakpɛɛ sane ji akɛ, nɔ ni fe afii akpei etɛ nɛ ní nuu ko ni ale lɛ akɛ epɛiɔ nɔ hewɔ ni adesai yɔɔ shihilɛ mli lɛ ha nakai sanebimɔ lɛ hetoo. Nilelɔ Maŋtsɛ Salomo wie akɛ: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitãi lɛ anɔ! shi enɛ ji gbɔmɛi fɛɛ agbɛnaa.”—Jajelɔ 12:13.

Yesu Kristo ni ji Nyɔŋmɔ Bi lɛ ma anɔkwa sane nɛɛ nɔ mi. Beni Yesu yɔɔ shikpɔŋ lɛ nɔ lɛ, ebɔ mɔdɛŋ fɛɛ ni eeenyɛ kɛwo e-Tsɛ ni yɔɔ ŋwɛi lɛ hiɛ nyam. Sɔɔmɔ ni Yesu sɔmɔ e-Bɔlɔ lɛ ha ená miishɛɛ babaoo yɛ shihilɛ mli. No ni wo lɛ hewalɛ ni eha efi shi. No hewɔ ewie akɛ: “Miŋmaa ji akɛ mafee mɔ ni tsu mi lɛ suɔmɔnaa nii” lɛ. —Yohane 4:34.

Belɛ, mɛni hewɔ ni wɔyɔɔ biɛ? Taakɛ ebalɛ yɛ Yesu, Salomo, kɛ Nyɔŋmɔ tsuji babaoo agbɛfaŋ lɛ, kɛ́ wɔfee Nyɔŋmɔ suɔmɔnaa nii lɛ, wɔ hu wɔbaanu nɔ hewɔ ni wɔyɔɔ wala mli lɛ shishi ni wɔmii baashɛ wɔhe daa. Ani obaasumɔ ni ole babaoo yɛ bɔ ni ooofee ojá Nyɔŋmɔ “yɛ mumɔ kɛ anɔkwale mli”? (Yohane 4:24) Yehowa Odasefoi ni yɔɔ he ni oyɔɔ lɛ baaná he miishɛɛ akɛ amɛaaye abua bo kɛha sanebimɔ ni ji “Mɛni hewɔ wɔyɔɔ biɛ?” lɛ hetoo.