Mumɔŋ Jwetrii Ataomɔ yɛ Guinea

AFII babaoo nɛ ni mɛi kɛ amɛwala ewo oshara mli kɛmiitao jwetrii kɛ agbɛnɛ hu koni amɛná nii. Amɛteŋ ekãalɔi komɛi ni tee Guinea yɛ Afrika Anaigbɛ lɛ yaná nii yɛ gbɛ̀i srɔtoi enyɔ nɔ—amɛná heloonaa nii kɛ mumɔŋ nii. Atsaa diamente, shika tsuru, kɛ tɛi ni anáa alumi yɛ mli yɛ Guinea, ni emlibii lɛ ayifalɛ fe akpekpei nɛɛhu.

Eyɛ mli akɛ Kristendom sɔlemɔi faaa tsɔ yɛ jɛmɛ moŋ, shi akɛ jamɔ shwɛɛɛ yɛ jɛmɛ, ni mɛi pii buɔ mumɔŋ jwetrii waa. Mɛni ji mumɔŋ jwetrii nɛɛ? Amɛji Yehowa tsuji anɔkwafoi ni awie amɛhe yɛ Hagai 2:7 lɛ akɛ “jeŋmaji lɛ fɛɛ anii ni jara wa lɛ.”

Mumɔŋ Jwetrii

Shi ni atsaa kɛyaa shɔŋŋ kɛtaoɔ ojarawatɛi lɛ ji nitsumɔ ko ni biɔ mɔdɛŋbɔɔ diɛŋtsɛ. Nakai nɔŋŋ Kristofoi anitsumɔ lɛ hu biɔ mɔdɛŋbɔɔ babaoo dani mɔ nine ashɛ mumɔŋ jwetrii anɔ. Afi 1950 afii lɛ ashishijee mli ni aje Maŋtsɛyeli shiɛmɔ nitsumɔ lɛ shishi yɛ Guinea, ni afi 1960 afii lɛ amli dani nitsumɔ lɛ yashɛ emaŋtiase ni ji Conakry. Ŋmɛnɛ lɛ, ayɛ Yehowa Odasefoi aaafee 900 kɛ asafoi kɛ kui 21 yɛ maŋ lɛ mli.

Yɛ afi 1987 lɛ, atsu maŋsɛɛ sanekpakpa shiɛlɔi kɛtee jɛmɛ, ni amɛkɛ asafo kome pɛ ni yɔɔ Conakry yɛ no beaŋ lɛ tsu nii. Ŋmɛnɛ lɛ, ayɛ maŋsɛɛ sanekpakpa shiɛlɔi fe 20 yɛ maŋtiase lɛ kɛ maji krokomɛi ni yɔɔ maŋ lɛ mli lɛ amli. Amɛkɛ ekãa tswaa asafoi lɛ amɛmaa shi, ni amɛfataa nyɛmimɛi ni yɔɔ jɛmɛ lɛ ahe kɛtsuɔ shiɛmɔ nitsumɔ lɛ.

 Luc ní yɔɔ Conakry lɛ mii shɛ ehe jogbaŋŋ ákɛ ekɛ oblanyo datrɛfonyo ko ni atsɛ́ɔ lɛ Albert aaakase Biblia lɛ. Dani akɛ Albert aaaje nikasemɔ shishi lɛ, no mli lɛ ekpa sɔlemɔi srɔtoi amli kɛmiitao anɔkwale lɛ, ni ekɛ ehe wo mumɔi atsɛmɔ hu mli. No mli lɛ, ewoɔ ga ko ni mumɔi atsɛ́lɔ ko kɛha lɛ ákɛ no baaha nibii aya nɔ jogbaŋŋ aha lɛ yɛ shihilɛ mli. Beni Albert etao anɔkwa jamɔ lɛ aahu ni nɔ̃ kpakpa ko eyajɛɛɛ mli kɛbaaa lɛ, eshɛ ga ni aha lɛ lɛ efɔ̃ ni esɔle akɛ: “Nyɔŋmɔ, kɛ́ oyɛ shihilɛ mli lɛ, no lɛ ha male bo koni masɔmɔo. Kɛ́ jeee nakai lɛ, mahi shi bɔ ni misumɔɔ.” Sɔlemɔ nɛɛ sɛɛ etsɛɛɛ tsɔ lɛ, Albert tee enyɛmi yoo ko saramɔ, ni eyɛ jɛmɛ ni enu ni Yehowa Odasefonyo ko kɛ enyɛmi yoo lɛ biyoo miikase Biblia lɛ. Eyeee be ko kwraa ni ato gbɛjianɔ koni Luc kɛ lɛ akase Biblia lɛ.

Daa otsi lɛ, Luc kɛ miishɛɛ nyiɛɔ kilomitai 10 yaa-kɛbaa ni ekɛ lɛ yakaseɔ nii. Eyɛ mli akɛ Luc woloŋlee faaa moŋ, shi Albert ni egbe univɛsiti naa lɛ hiɛ sɔɔ hemɔkɛyeli ni mli wa ni Luc yɔɔ yɛ Ŋmalɛi lɛ amli kɛ bɔ ni egbálaa nikasemɔ lɛ mli jogbaŋŋ lɛ waa. Albert mii shɛ ehe jogbaŋŋ akɛ eeele akɛ jeee Nyɔŋmɔ haa adesai naa amanehulu, shi moŋ Yehowa ekpɛ eyiŋ akɛ ebaafo amanehului fɛɛ asɛɛ ni efee shikpɔŋ lɛ paradeiso. (Lala 37:9-11) Biblia mli anɔkwalei lɛ kɛ bɔ ni mɛi ni yɔɔ asafo lɛ mli lɛ baa amɛjeŋ jogbaŋŋ lɛ ta Albert mli.

Shi, taakɛ bɔ ni ehe hiaa ni ŋaalɔ kɛ deŋmegbomɔ afolɔ diamente he bɔni afee ni ekpɛ́lɛ fɛfɛo lɛ, nakai nɔŋŋ ehe bahia koni Albert ajie sui komɛi ni mɛi ni yɔɔ je lɛ mli lɛ jieɔ lɛ kpo ni yɔɔ ehe lɛ ashwie bɔni afee ni enyɛ ehi shi yɛ Nyɔŋmɔ jalɛ shishitoo mlai lɛ anaa. Ekɛ mumɔi atsɛ́lɔi fo tako mli, ni ekpa dãatɔɔ kɛ asɔshwɛmɔ. Ebatsɔ ta kɛha Albert akɛ eeekpa zigarɛt shɛremɔ. Shi beni ekɛ hiɛdɔɔ sɔle ebi Yehowa dɛŋ yelikɛbuamɔ lɛ, enyɛ ekpa. Nyɔji ekpaa sɛɛ lɛ, ekɛ egbalashihilɛ lɛ yawo mla shishi. Eŋa hu bɔi Biblia lɛ kasemɔ. Ŋmɛnɛ lɛ, ekɛ eŋa fɛɛ ebatsɔmɔ Yehowa tsuji ni abaptisi amɛ.

Mɔ kroko ni abaanyɛ akɛɛ akɛ eji mumɔŋ ojarawatɛ ji Martin. Akɛ lɛ bɔi Biblia lɛ kasemɔ  yɛ Guéckédou beni éye afii 15. Efɔlɔi ji Katolikbii, ni amɛŋmɛɛɛ lɛ gbɛ koni ekɛ Yehowa Odasefoi aya kpeei. Amɛtserɛ Biblia kasemɔ wolo ni Martin yɔɔ lɛ, ni amɛyi lɛ ni amɛshwie lɛ kɛjɛ weku lɛ mli. Taakɛ bɔ ni kɛ́ aje la ni naa wa waa awo carbon shishi ni etsakeɔ etsɔɔ ojarawatɛ ni wa fe fɛɛ ni ji diamente lɛ, nakai nɔŋŋ shitee-kɛwoo ha Martin ná Biblia mli anɔkwalei lɛ ahe miishɛɛ babaoo moŋ. Be ko sɛɛ lɛ, efɔlɔi lɛ tsake amɛjwɛŋmɔ ni amɛha eku esɛɛ kɛba weku lɛ mli. Mɛni ha efɔlɔi lɛ tsake amɛjwɛŋmɔ? Amɛyɔse akɛ srɔtofeemɔ agbo yɛ Martin jeŋba kɛ enyɛmimɛi bibii ní amɛtsɔmɔ atuatselɔi kɛ nyenyeŋtswibɔlɔi lɛ ajeŋba teŋ. Martin tsɛ na akɛ jamɔ ni ebi lɛ kɛ ehe eyawo mli lɛ he eba sɛɛnamɔ kɛha lɛ, no hewɔ lɛ, eŋmɛ gbɛ ni asafoŋbii bɔi eshia lɛ mli baa. Martin nyɛ daa nyɛmimɛi lɛ shi babaoo yɛ yelikɛbuamɔ ni amɛkɛha ebi lɛ hewɔ. Abaptisi Martin beni eye afii 18, ni sɛɛ mli lɛ etee Sɔɔlɔi Atsɔsemɔ Skul lɛ eko, ni amrɔ nɛɛ, eesɔmɔ akɛ gbɛgbalɔ krɛdɛɛ.

Mumɔŋ Jwetrii ni Jɛ Maŋsɛɛ

Eyɛ mli ákɛ akɛ ojarawatɛi ni atsaa yɛ Guinea lɛ babaoo yaa maŋsɛɛ moŋ, shi mumɔŋ jwetrii ni yɔɔ jɛmɛ lɛ ekomɛi jɛ maŋsɛɛ. Mɛi ni jɛ Afrika maji krokomɛi anɔ eba jɛmɛ kɛmiitao shika. Yɛ amɛteŋ mɛi komɛi agbɛfaŋ lɛ, yiwalɛ tai ni akɛ afii babaoo ewu yɛ amɛmaji lɛ amli lɛ ha amɛjo foi kɛtee jɛmɛ.

Afii 12 nɛ ní Ernestine ni jɛ Cameroon lɛ bahi Guinea. Eha Yehowa Odasefoi kɛ lɛ kase nii, ni etee kpeei afii babaoo shi ehaaa abaptisi lɛ. Beni ekwɛɔ mɛi ni abaptisi yɛ kpokpaa nɔ kpee ko ni Yehowa Odasefoi fee yɛ afi 2003 lɛ mli lɛ, ehiŋmɛi tɔ nu. Akɛni enu he akɛ efeee ni ahi hewɔ lɛ, esɔle eha Yehowa akɛ: “Amrɔ nɛɛ miye afii 51 ni mifeko nɔ̃ kpakpa ko kɛhako bo. Miisumɔ masɔmɔ bo.” No sɛɛ lɛ, Ernestine tsu esɔlemɔ lɛ he nii. Eha nuu ni ji ehemɔ ni ekɛyɔɔ lɛ le akɛ ja amɛbote gbalashihilɛ  mli yɛ mla naa dani amɛbaanyɛ amɛhi shi akɛ wu kɛ ŋa. Nuu lɛ tsu sane ni ekɛfɔ̃ ehiɛ lɛ he nii, ni beni abaptisiɔ Ernestine yɛ November afi 2004 lɛ, miishɛɛ yaafonui kpala yɛ ehiŋmɛiiaŋ.

Kɛjɛ afi 1990 afii lɛ ashishijee mli ni Guineabii ŋmɛ gbɛ koni mɛi ni jɛ Liberia kɛ Sierra Leone ababɔ abo yɛ amɛmaŋ lɛ mli, ni Yehowa tsuji babaoo fata abobalɔi nɛɛ ahe. Nyɛmimɛi lɛ yashɛ abobalɔi ŋsara lɛ mli gbii fioo komɛi asɛɛ kɛkɛ ni amɛbɔi kpeei srɔtoi fɛɛ ni afeɔ lɛ feemɔ, amɛto shiɛmɔyaa he gbɛjianɔ, ni amɛma Maŋtsɛyeli Asa. Mɛi komɛi batsɔmɔ Yehowa tsuji yɛ ŋsara lɛ mli. Amɛteŋ mɔ kome ji Isaac. Beni abaptisi Isaac lɛ, ená hegbɛ akɛ kulɛ eku sɛɛ ekɛ nitsumɔhe wulu ko ni ekɛ amɛ tsuɔ nii yɛ Liberia lɛ ayatsu nii, shi eyaaa. Yɛ no najiaŋ lɛ, etee nɔ ehi Lainé abobalɔi ŋsara lɛ mli ákɛ daa gbɛgbalɔ. Etsɔɔ mli akɛ: “Amrɔ nɛɛ mibiii nitsumɔtsɛ ko gbɛ ni miyaa kpeei kɛ kpokpaa nɔ kpeei. Mɔ ko etsĩii minaa yɛ Yehowa sɔɔmɔ mli.” Yɛ December afi 2003 lɛ, afee kpokpaa wulu nɔ kpee yɛ abobalɔi ŋsara ni yɔɔ shɔŋŋ nɛɛ mli aha Odasefoi 150 ni yɔɔ abobalɔi 30,000 ni yɔɔ jɛmɛ lɛ ateŋ lɛ. Miishɛɛ sane ji akɛ, mɛi 591 tee kpee lɛ, ni mumuii 9 fata he. Atsɔɔ wiemɔi lɛ ashishi aha amɛ yɛ mumuii awiemɔ mli. Abaptisi mɛi 12. Nyɛmimɛi lɛ ahiɛ sɔ mumɔŋ okpɔlɔ ni aŋmɛ amɛ lɛ jogbaŋŋ.

‘Nii ni Jara Wa’ lɛ Feɔ Tsakemɔi ni He Hiaa Lɛ

Mɛi ni tsaa shi kɛtaoɔ shika tsuru kɛ diamente lɛ bɔɔ mɔdɛŋ amɛyeɔ naatsĩi nibii srɔtoi ni amɛkɛkpeɔ lɛ anɔ. Ni eyɛ miishɛɛ akɛ aaana mɛi heei miibɔ mɔdɛŋ koni amɛye naatsĩi nibii fɛɛ ni amɛkɛkpeɔ lɛ anɔ bɔni afee ni amɛnyɛ amɛsɔmɔ Yehowa. Susumɔ Zainab sane lɛ he okwɛ.

Zainab eye afii 13 ni ahɔ̃ɔ lɛ akɛ nyɔŋ. Ahé lɛ kɛjɛ Afrika Anaigbɛ maji lɛ eko mli, ni akɛ lɛ shi emaŋ kɛtee Guinea. Beni enu Biblia mli shɛɛ sane lɛ he lɛ, no mli lɛ eye afii 20. Ekɛ miishɛɛ tsu nibii ni no mli lɛ ekaseɔ lɛ ahe nii.

Zainab náaa lɛ mlɛo akɛ eeeya hei ni Kristofoi buaa amɛhe naa yɛ kɛha jamɔ lɛ. Kɛlɛ, ená kpeei nɛɛ ahe miishɛɛ jogbaŋŋ, ni etswa efai shi akɛ ehaŋ kpeei nɛɛ eko aŋmɛɛ lɛ. (Hebribii 10:24, 25) Ekɛ ewoji lɛ toɔ he ko yɛ agbo lɛ naa, ni eyajieɔ kɛ́ eeya kpee. Bei pii lɛ, “enuŋtsɔmɛi” lɛ yiɔ lɛ mɔbɔmɔbɔ yɛ kpeei ni afeɔ kɛjáa Nyɔŋmɔ lɛ ni eyaa lɛ hewɔ.

Sɛɛ mli lɛ, nibii tsake ni Zainab ye ehe. Oya nɔŋŋ ni ebɔi kpeei ni afeɔ lɛ fɛɛ yaa, ni no ye bua lɛ ni Nyɔŋmɔ he nilee ni eyɔɔ lɛ tee hiɛ. Ená nitsumɔ ko ni kulɛ abaawo lɛ nyɔmɔ babaoo, shi akɛni kɛ́ ebɔi tsumɔ lɛ no haŋ enyɛ eya kpeei ni akɛtsɔseɔ Kristofoi lɛ hewɔ lɛ, ekpoo nakai nitsumɔ lɛ. Ekɛ ehe wo Teokrase Sɔɔmɔ Skul lɛ mli, ni ebatsɔ shiɛlɔ ni abaptisiko lɛ, ni sɛɛ mli lɛ eha abaptisi lɛ kɛma nɔ mi akɛ ejɔɔ ehe nɔ eha Yehowa. Ebaptisimɔ sɛɛ nɔŋŋ ni ekɛ ehe wo gbɛgbalɔi awamɔ nitsumɔ lɛ mli. Nyɔji ekpaa sɛɛ lɛ, eŋma wolo akɛ eesumɔ ni esɔmɔ akɛ daa gbɛgbalɔ.

Beni mɔ ko ni yɔɔ wiemɔ lɛ he miishɛɛ ná hegbɛ etee kpeei fioo komɛi lɛ, ewie akɛ: “Kɛ́ miba kpee lɛ, minuuu he akɛ ohiafo ji mi.” Eyɛ mli akɛ nibii ni mɛi babaoo kɛ amɛhe woɔ etaomɔ mli yɛ Guinea ji heloonaa jwetrii ni ji ojarawatɛi ni yɔɔ jɛmɛ lɛ moŋ, shi mɛi ni sumɔɔ Yehowa lɛ kɛ hiɛdɔɔ miitao mumɔŋ jwetrii. Hɛɛ, “jeŋmaji lɛ fɛɛ anii ni jara wa lɛ” kɛ jamɔ krɔŋŋ miiha Yehowa ŋmɛnɛ!

[Akrabatsa ni yɔɔ baafa 8]

GUINEA-AFI 2005

Odasefoi ayifalɛ ni fe fɛɛ: 883

Biblia mli nikasemɔi ni afee: 1,710

Mɛi ni ba Kaimɔ lɛ: 3,255

[Shikpɔŋ he mfonirii babaoo ni yɔɔ baafa 8]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

GUINEA

Conakry

SIERRA LEONE

LIBERIA

[Mfoniri ni yɔɔ baafa 9]

Albert kɛ Luc

[Mfoniri ni yɔɔ baafa 9]

Maŋtsɛyeli Asa ni yɔɔ Conakry

[Mfoniri ni yɔɔ baafa 10]

Ernestine

[Mfoniri ni yɔɔ baafa 10]

Martin

[Mfoniri ni yɔɔ baafa 10]

Zainab

[He ni Mfoniri ni yɔɔ baafa 8 lɛ Jɛ]

USAID