Ani Yuda Maŋ Lɛ Tsɔ Amaŋfɔ?

BIBLIA lɛ gba akɛ Babilonbii baakpata Yuda shikpɔŋ lɛ hiɛ ni ákɛ ebaaka shi amaŋfɔ kɛyashi beyinɔ ni Yudafoi nomii lɛ baaku amɛsɛɛ kɛba amɛshikpɔŋ nɔ ekoŋŋ. (Yeremia 25:8-11) Sane ko ni Nyɔŋmɔ tsɔ emumɔ lɛ nɔ eha aŋma lɛ haa wɔheɔ wɔyeɔ akɛ gbalɛ nɛɛ ba mli diɛŋtsɛ. Aŋma nakai sane lɛ aaafee afii 75 beni nomii lɛ ateŋ klɛŋklɛŋbii lɛ eku amɛsɛɛ kɛba amɛshikpɔŋ nɔ lɛ sɛɛ. Nakai sane lɛ tsɔɔ mli akɛ, “mɛi ni je klante dɛŋ lɛ,” Babilon maŋtsɛ lɛ ‘lóo amɛ kɛtee Babel, ni amɛyatsɔmɔ ekɛ ebii lɛ atsuji kɛyashi Persia maŋtsɛyeli be lɛ mli.’ Beni ewieɔ Yuda shikpɔŋ lɛ he lɛ, ekɛɛ akɛ: “Gbii abɔ fɛɛ ni ekã shi amaŋfɔ lɛ eeye hejɔɔmɔ gbii.” (2 Kronika 36:20, 21) Ani blema nibii ni atsa shi ana lɛ maa sane nɛɛ nɔ mi?

Ephraim Stern ni eji blema nibii ni atsaa yɛ Palestina lɛ ahe nilelɔ kpanaa yɛ Hebri Univɛsiti lɛ wie yɛ wolo ko (Biblical Archaeology Review) mli akɛ: “Ashurbii kɛ Babilonbii lɛ fɛɛ kpata blema Israel maŋ lɛ fã kpotoo hiɛ, ni kɛlɛ nibii ní atsa shi ana beni maji nɛɛ ekpata Israel hiɛ sɛɛ lɛ kɛɔ wɔ saji enyɔ ni kɛ amɛhe kpãaa gbee.” Etsɔɔ mli akɛ: “Nibii yɛ ni tsɔɔ akɛ beni Ashurbii lɛ kpata maŋ lɛ hiɛ lɛ amɛhi Palestina shikpɔŋ lɛ nɔ, shi beni Babilonbii lɛ kpata maŋ lɛ hiɛ lɛ, be kplaŋŋ ho ni mɔ ko ehiii mli. . . . Nibii ni wɔna lɛ tsɔɔ akɛ mɔ ko ehiii mli kɛyashi Persiabii lɛ abeaŋ . . . Nɔ ko kwraa bɛ ni tsɔɔ akɛ mɛi hi maŋ lɛ mli. Yɛ no beaŋ fɛɛ lɛ, maŋ ko maŋ ko bɛ ni Babilonbii lɛ kpata hiɛ ni mɛi ku sɛɛ amɛyahi mli.”

Nilelɔ kpanaa Lawrence E. Stager ni tsuɔ nii yɛ Harvard Univɛsiti kɛ Ephraim Stern kpãa gbee. Ewie akɛ: “Kɛ́ Babilonbii amaŋtsɛmɛi lɛ miikpata maŋ ko hiɛ lɛ, amɛshãa maŋ lɛ wɛlɛŋŋ. No hewɔ lɛ, bɔ ni amɛkpata Filistibii amaŋ lɛ kɛ sɛɛ mli lɛ Yuda maŋ lɛ hiɛ lɛ ha shikpɔŋ shwaŋŋ ni yɔɔ Yordan Faa lɛ anaigbɛ lɛ kã shi amaŋfɔ.” Stager kɛfata he akɛ: “Koresh Kpeteŋkpele lɛ ni ji Persia maŋtsɛ ní ye Babilon nɔ kunim lɛ beaŋ pɛ ni ana shitsaa nibii ekoŋŋ . . . yɛ Yerusalem kɛ Yuda he ni Yudafoi nomii ni ku amɛsɛɛ kɛba amɛmaŋ lɛ babaoo hi lɛ.”

Hɛɛ, Yehowa wiemɔ ni kɔɔ Yuda maŋ lɛ amaŋfɔfeemɔ he lɛ ba mli. Nibii fɛɛ ni Yehowa Nyɔŋmɔ gbaa lɛ baa mli. (Yesaia 55: 10, 11) Wɔbaanyɛ wɔkɛ wɔhe afɔ̃ Yehowa kɛ eshiwoi ni yɔɔ e-Wiemɔ ni ji Biblia lɛ mli lɛ nɔ kwraa.—2 Timoteo 3:16.