Tsɔɔmɔ Obii Bɔ ni Ahaa Saji Ahetoo

PERLA ni jɛ Mexico lɛ kaiɔ akɛ beni eji gbekɛ yoo fioo lɛ, enyɛ yeɔ ebuaa lɛ ni ekɛ saji ahetoo ni yɔɔ kukuji saa ehe kɛha Buu-Mɔɔ Nikasemɔ lɛ. Amrɔ nɛɛ Perla yɛ binuu ni eye afii enumɔ. Mɛɛ gbɛ nɔ eyeɔ ebuaa lɛ? Ekɛɛ akɛ: “Klɛŋklɛŋ lɛ, mikaseɔ Buu-Mɔɔ. Kɛ́ miikase lɛ, mitaoɔ kuku lɛ eko ní mibi nuu lɛ baanu shishi, ni asaŋ ebaanyɛ ekɛ lɛ diɛŋtsɛ ewiemɔi atsɔɔ mli. No sɛɛ lɛ, wɔgbalaa wɔjwɛŋmɔ kɛbaa nɔ ni efɔɔ lɛ tsɛmɔ akɛ ‘mikuku’ lɛ nɔ. Mibiɔ lɛ koni ekɛ nibii ni yaa nɔ atsɔɔ sane lɛ mli. No sɛɛ lɛ, wɔfeɔ ekome kɛtĩɔ sane hetoo lɛ mli shii abɔ. Wɔhaa ewieɔ ewoɔ nɔ ko ni dalɛ tamɔ tsɔne ni awieɔ awoɔ mli lɛ mli bɔni afee ni ele bɔ ni ebaamɔ mli eha kɛ́ eeha saji ahetoo. Mimii shɛɔ mihe babaoo akɛ kpee ko kpee ko hooo ni ewooo enine nɔ loo ní ebaaha sane hetoo. Bei babaoo lɛ, dani nikasemɔ lɛ baaje shishi lɛ, etsɔɔ hiɛ ehaa mɔ ni baakwɛ nɔ lɛ leɔ kuku ni ebaasumɔ ni eha hetoo lɛ.”

Jens ji asafoŋ onukpa ko ni miisɔmɔ yɛ kuu ko ni awieɔ Hindi wiemɔ yɛ mli lɛ mli. Eyɛ bihii enyɔ, mɔ kome eye afii enyɔ ni mɔ kroko lɛ hu eye afii ejwɛ. Kɛ́ Jens kɛ eŋa kɛ amɛbii lɛ miikase nii dani amɛya kpeei lɛ, amɛtsɔɔ gbɛ ni Jens fɔlɔi tsɔ nɔ amɛtsɔɔ lɛ nii beni edako lɛ nɔ amɛtsɔɔ amɛbii lɛ anii. Jens kɛɛ akɛ: “Wɔkwɛɔ nikasemɔ lɛ mli hei ni gbekɛbii lɛ baanu shishi. No sɛɛ lɛ wɔbɔɔ mɔdɛŋ wɔhaa amɛnuɔ sane lɛ loo emli otii titri lɛ ashishi yɛ gbɛ kuku nɔ, kɛkɛ lɛ wɔbibii amɛ saji ni wɔtaoɔ akɛ amɛha hetoo yɛ kpeei lɛ shishi lɛ. Bei babaoo lɛ, bɔ ni amɛhaa saji ahetoo yɛ amɛ diɛŋtsɛ amɛwiemɔi amli lɛ haa wɔnaa kpɛɔ wɔhe. Bɔ ni amɛtsɔɔ saji amli amɛhaa lɛ tsɔɔ akɛ amɛnuɔ shishi jogbaŋŋ. Enɛ haa amɛ saji ahetoo lɛ bafeɔ yijiemɔ diɛŋtsɛ kɛhaa Yehowa, ni amɛtsɔɔ no feemɔ nɔ hu amɛjieɔ hemɔkɛyeli ni amɛyɔɔ lɛ kpo.”