Aagbɛ Sanekpakpa Aashwã Haiti Maŋ Fɛfɛo lɛ Mli

HAITI kɛ maŋ ni ji Dominican Republic fɛɛ yɛ Hispaniola ŋshɔkpɔ lɛ nɔ, ni ŋshɔkpɔ nɛɛ nɔ gɔji ní nɔ kwɔlɔ fe fɛɛ yɛ Caribbean lɛ yɔɔ. Gɔji nɛɛ ekomɛi kwɔlɔ fe mitai 2,400. Kɛ́ eshɛ fɛ̃i beaŋ lɛ, ais fɛtɛfɛtɛ nyɛɔ ehàa kpaakpoi bibii ni yɔɔ hei ni yɔɔ gɔji anɔ lɛ ahiɛ.

Koo hayii ehà gɔji ni yɔɔ Haiti wuoyigbɛ lɛ anɔ fɛɛ, ni jɔɔi lɛ hu amli eyi kɛ koo hayii. Kɛ́ otee maŋ lɛ hei krokomɛi lɛ, gɔji ni yɔɔ jɛmɛ lɛ ateŋ babaoo yɛ piɔpiɔ ni amɛmamɔ shi klewii ni tsei bɛ nɔ ejaakɛ afolɔ amɛnɔ tsei lɛ fɛɛ kɛfee lai kɛ nibii krokomɛi. Kɛ́ oofã gbɛ kɛmiiya Haiti kooyigbɛ loo kɛmiiba ewuoyigbɛ ni obaana bɔ ni maŋ lɛ yɔɔ fɛo ha. Kɛ́ onyiɛ gbɛjegbɛi bibii ni lɔgɔɔ shi yɛ gɔji lɛ ekomɛi anɔ lɛ nɔ lɛ, onaa shikpɔŋ lɛ kɛ ŋshɔ lɛ shikamɔ kɛyaa shɔŋŋ, ni kɛ́ ookwɛ lɛ, eyɛ fɛo pam. He fɛɛ he ni obaatsɔ ohiŋmɛi kɛya lɛ, onaa fɔfɔii srɔtoi babaoo kɛ sui fɛfɛji srɔtoi.

Gbɔmɛi akpekpei 8 kɛ akpei 300 ni yɔɔ maŋ fɛfɛo nɛɛ mli lɛ ateŋ mɛi babaoo awekutɔkpãa jɛ Afrika ni amɛhiɔ akrowai amli. Eyɛ mli akɛ amɛteŋ mɛi kpotoo jeee niiatsɛmɛi moŋ, shi amɛmli jɔ ni amɛle gbɔfeemɔ. Aaafee afii 60 nɛ ní Yehowa Odasefoi kɛ miishɛɛ miijaje Nyɔŋmɔ Maŋtsɛyeli lɛ he sanekpakpa lɛ amɛmiitsɔɔ maŋbii nɛɛ, ni amɛhereɔ amɛ hiɛmɛɛ ni amɛboɔ amɛ toi.—Mateo 24:14.

Shiɛmɔyaa yɛ Maji Bibii lɛ Amli

Bɔ ni nibii tee nɔ eha nyɛmiyoo maŋsɛɛ sanekpakpashiɛlɔ ko yɛ gbi klɛŋklɛŋ ni eyashiɛ yɛ maji bibii lɛ eko mli lɛ haa wɔnaa bɔ ni shiɛmɔ yɛ maji bibii lɛ amli yɔɔ ha. Nyɛmiyoo lɛ ŋma akɛ:

“Gbi ko yɛ March afi 2003 lɛ mli lɛ, wɔtee shiɛmɔ yɛ Casale ni ji maŋ bibioo ko ní kɛ́ ota tsɔne mli kɛjɛ jɛmɛ kɛmiiya Cabaret lɛ, eheɔ bo aaafee ŋmɛlɛtswaa fã lɛ. Amrɔ nɛɛ, jɛmɛ ji he ni Cabaret maŋsɛɛ sanekpakpashiɛlɔi lɛ ashĩa yɔɔ, ni eyɛ Port-au-Prince ni ji maŋ lɛ maŋtiase lɛ kooyigbɛ aaafee kilomitai 30. Akɛni afi 1999 ji be ni Odasefoi yashiɛ yɛ Casale ní amɛyako jɛi dɔŋŋ hewɔ lɛ, wɔkɛ miishɛɛ fã yɛ shĩa leebi ŋmɛji 7:00 kɛ gbɛkpamɔ akɛ nibii baaya nɔ jogbaŋŋ. Wɔkɛ bɔs bibii enyɔ tee, ni wɔyi 22 wɔtee, ni shwɛ sharao ni wɔsafo muu lɛ fɛɛ aya. Beni wɔnyiɛ gbɛjegbɛi kɛ amɛnɔ mulu kɛ ŋmɔtɔ lɛ anɔ wɔyaa lɛ, mɔ fɛɛ mɔ kɛ miishɛɛ miigba sane ni eeŋmɔ kɛyashi wɔyashɛ jɔɔ kɛ emli tsei wujiwuji ko mli. Faa ko hoɔ yɛ jɔɔ lɛ mli, ni Casale maŋ lɛ yɛ faa lɛ toi biɛ kɛ biɛ.

“Yɛ afi 1800 afii lɛ ashishijee lɛ, Poland asraafoi komɛi tee Haiti koni amɛyaye amɛbua nyɔji komɛi ni yɔɔ jɛmɛ lɛ koni amɛye amɛhe, ni shikpɔŋ ni baa nii jogbaŋŋ ni yɔɔ nakai jɔɔ lɛ mli lɛ ji he ni amɛ kɛ amɛŋamɛi ni ji Haitibii lɛ yato, ni nakai gbɛ nɔ tsɔ ato Casale maŋ lɛ. Akɛni asraafoi lɛ ji blɔfomɛi, ni amɛŋamɛi lɛ ji mɛi diji hewɔ lɛ, bii ni amɛfɔ́ lɛ ahe yɛ fɛo, ekomɛi dĩɔ ni ekrokomɛi tsuɔ. Kɛ́ okwɛ bɔ ni maŋbii lɛ ateŋ mɛi komɛi tsuɔ, bɔ ni mɛi komɛi ahewolo nɔ kã, kɛ bɔ ni mɛi krokomɛi dĩɔ amɛhaa lɛ, eyɛ fɛo kɛkɛ.

“Mɔ klɛŋklɛŋ ni wɔyatswa eshinaa lɛ booo wɔ toi. Beni wɔtsɔ wɔhe ni wɔyaa lɛ, nuu ko kɛ wɔ  bakpe yɛ gbɛ lɛ nɔ. Eetao ele kɛji wɔheɔ wɔyeɔ akɛ srɔtofeemɔ yɛ Yesu kɛ Nyɔŋmɔ teŋ. Wɔbi lɛ koni eyakɔ e-Biblia kɛba, ni efee nakai, ni saji ni wɔ kɛ lɛ susu he kɛjɛ Ŋmalɛi lɛ amli lɛ ha ehe eye akɛ Yesu ji Nyɔŋmɔ Bi, ni ákɛ Yehowa ji “anɔkwa Nyɔŋmɔ kome lɛ.” (Yohane 17:3) Mɛi babaoo tsɛ́ wɔ ni wɔ kɛ amɛ ta shi wɔkase nii. Amɛteŋ mɛi komɛi bi wɔ akɛ, ‘Mɛɛ be nyɛbaaku sɛɛ nyɛba ni wɔtsa Biblia lɛ kasemɔ nɔ?’

“Shwane mli lɛ, nyɛmimɛi yei enyɔ komɛi hoo nii amɛha wɔ. Wɔyata tso ko shishi ni wɔye. Eŋɔɔ jogbaŋŋ! Wɔha wɔsɛɛ gbala shi fioo yɛ niyeli lɛ mli, ni beni wɔyeɔ ni wɔgbaa sane lɛ, belɛ wɔmiishiɛ wɔmiiha mɛi ni hoɔ lɛ. Ní wɔshi jɛmɛ lɛ, wɔfo faa lɛ kɛtee maŋbii krokomɛi lɛ aŋɔɔ. Gbɔmɛi nɛɛ sumɔɔ mɔ sane, ni amɛtaraa tsei ni amɛdũ yɛ amɛshĩai ahiɛ lɛ ashishi, ni wɔná wɔ kɛ amɛ sanegbaa lɛ he miishɛɛ jogbaŋŋ. Kɛ́ okwɛ bɔ ni gbekɛbii lɛ shwɛɔ amɛhaa, bɔ ni yei lɛ fɔɔ nii ahe yɛ faa lɛ mli, kɛ bɔ ni yei onukpai lɛ wiɛɔ kɔfe amɛhaa lɛ, eyɛ fɛo jogbaŋŋ!

“Beni wɔhɛleɔ shi lɛ, atswa gbɛkɛ ŋmɛji ejwɛ, kɛkɛ ni wɔ fɛɛ wɔkɛ miishɛɛ yakɔ tsɔnei ni wɔkɛtee lɛ ni wɔku wɔsɛɛ kɛtee Cabaret. Yɛ anɔkwale mli lɛ, mi kɛ miwu ná be klɛŋklɛŋ kwraa ni wɔtee Casale, ní emlibii lɛ le gbɔfeemɔ ní asaŋ amɛsumɔɔ mɔ lɛ he miishɛɛ jogbaŋŋ.”

Klɛŋklɛŋ Odasefoi maŋsɛɛ sanekpakpashiɛlɔi ni atsu kɛtee Haiti lɛ yashɛ jɛmɛ yɛ afi 1945 mli, ni kɛjɛ nakai beaŋ kɛbaa nɛɛ, Maŋtsɛyeli sanekpakpashiɛlɔi ni yɔɔ nakai maŋ lɛ mli lɛ ayifalɛ etee hiɛ aahu akɛ amrɔ nɛɛ ayɛ shiɛlɔi aaafee 14,000 ní kɛ mɛi ni fa fe 22,000 miikase Biblia lɛ. Amɛshiɛmɔ nitsumɔ lɛ ená mɛi 59,372 ni tee Kaimɔ ni afee yɛ March afi 2005 mli lɛ ashihilɛ nɔ hewalɛ kpakpa, ni amɛkã he amɛmiijaje Nyɔŋmɔ Maŋtsɛyeli lɛ he sanekpakpa lɛ amɛmiitsɔɔ maŋbii lɛ fɛɛ. Ha wɔsusu gbɛ̀i srɔtoi anɔ ni Yehowa Odasefoi anitsumɔ lɛ ená mɛi anɔ hewalɛ kpakpa lɛ ahe wɔkwɛ.

Akɛ Nitɛŋmɔ Fɛfɛji Miijaje Sanekpakpa Lɛ

Haitibii babaoo sumɔɔ nibii ni akɛ kɔlai srɔtoi fee. Anaa enɛ yɛ amɛtadewoo, yɛ amɛtsũi ahe shamɔ, yɛ fɔfɔii srɔtoisrɔtoi ni amɛkɛsaa amɛshĩai amli, kɛ agbɛnɛ hu yɛ amɛnitɛŋmɔi amli. Akɛ nibii ni maŋbii lɛ diɛŋtsɛ etɛ̃ŋ yɛ mamai anɔ ní ale lɛ akɛ L’Art Haitien (Haitibii Anitɛŋmɔi) ewo jara yɛ Port-au-Prince gbɛjegbɛi lɛ ahe fɛɛ. Mɛi jɛɔ maji srɔtoi anɔ amɛbaheɔ nitɛŋmɔ nibii nɛɛ.

 Jeee nitɛŋmɔ mamai anɔ kɛkɛ akɛ kɔlai srɔtoi jieɔ samai yɛ. Port-au-Prince gbɛjegbɛi lɛ anɔ eyi kɛ trɔtrɔ ní aje gbɛ atɛ̃ŋ nibii fɛfɛji awo he. Nitɛŋmɔi nɛɛ babaoo ji Biblia mli saji ahe mfonirii.

Kɛ́ onyiɛ gbɛjegbɛi lɛ ahe lɛ, okɛ mfonirii komɛi ni ole jogbaŋŋ—tamɔ Adam kɛ Hawa yɛ Eden abɔɔ lɛ mli he mfoniri lɛ—baakpe. Hɛɛ, obaana ni atɛ̃ŋ yɛ trɔtrɔ ni hoɔ lɛ ateŋ eko sɛɛ. Tsɔnei nɛɛ babaoo yɛ ni aŋmala Ŋmalɛi loo saji komɛi ni Yehowa gbɛi yɔɔ mli yɛ he, ni Yehowa gbɛi lɛ jieɔ kpo hu yɛ shwapoi kɛ nitsumɔhei komɛi agbɛi amli.

Sanekpakpa lɛ Shiɛmɔ yɛ Skul

Odasefoi oblahii kɛ oblayei bibii ni yɔɔ Haiti lɛ náa hegbɛi ni amɛkɛaaye amɛbua amɛnanemɛi skulbii koni amɛkase Biblia lɛ. Enɛ he nɔkwɛmɔnɔ ji amaniɛbɔɔ ni nine shɛ nɔ kɛjɛ Odasefonyo oblayoo fioo ko ni eye afii 17 lɛ ŋɔɔ lɛ.

Eŋma akɛ: “Gbi ko lɛ, miklasbii hii lɛ ateŋ mɔ kome babi mi koni mitsɔɔ lɛ nɔ ni ji ‘ajwamaŋbɔɔ.’ Akɛni miyasusu akɛ eetao ekɛ mi abɔ akɛ ehemɔ hewɔ lɛ, mifooo edaaŋ. Shi eyabi klasbii hii lɛ ateŋ mɔ kome hu, ni no ha klasbii lɛ fɛɛ ná he miishɛɛ akɛ amɛaale nɔ ni ji. No hewɔ lɛ, miyatao woji amli, ni enɔ otsi sɛɛ lɛ, miyagbála mli mitsɔɔ wɔklasbii lɛ, ni miha amɛle nɔ̃ hewɔ ni Yehowa Odasefoi bɔɔ mɔdɛŋ koni amɛhe atse yɛ jeŋba mli, yɛ Nyɔŋmɔjamɔ mli, kɛ agbɛnɛ hu yɛ gbɔmɔtso mli lɛ.

“Wɔklasbii lɛ bibii mi saji babaoo, ni amɛkpɛlɛ hetooi ni mijɛ Biblia lɛ mli miha amɛ lɛ anɔ. Shishijee lɛ, wɔtsɔɔlɔ nukpa lɛ shashao shi akɛ eeebi sane, shi sɛɛ mli lɛ, lɛ hu ebibii saji babaoo, ni eto gbɛjianɔ po koni mikɛ klas krokomɛi lɛ hu ayasusu sane nɛɛ he. Mikɛ Questions Young People Ask—Answers That Work * wolo lɛ tsɔɔ amɛ, ni amɛteŋ mɛi babaoo kɛɛ amɛmiisumɔ eko. Enɔ jetsɛremɔ lɛ, mija wolo nɛɛ 45 miha wɔskulbii lɛ. Amɛteŋ mɛi pii kane wolo lɛ oya nɔŋŋ, ni amɛteaŋ mɛi komɛi eha Yehowa Odasefoi ni yɔɔ amɛkutsei lɛ amli lɛ kɛ amɛ miikase Biblia lɛ. Amrɔ nɛɛ, wɔskulbii lɛ ateŋ mɔ kome ni yɔɔ wɔkutso lɛ mli lɛ baa asafoŋ kpeei ni afeɔ lɛ fɛɛ.”

Aashiɛ yɛ Creole Wiemɔ Mli

Bɔ ni Haiti maŋbii lɛ ahe yɔɔ miishɛɛ ha lɛ, nakai nɔŋŋ ji Creole wiemɔ ni amɛwieɔ lɛ. Eji wiemɔ ko ni akɛ French kɛ Afrika Anaigbɛ bii awiemɔi efutu. No ji wiemɔ ni akɛfo Haitibii alaŋmɔ, ni amɛsumɔɔ jogbaŋŋ. Creole ni Haitibii wieɔ lɛ ji wiemɔ titri ni Yehowa Odasefoi lɛ kɛshiɛɔ, ni amɛmiito gbɛjianɔ koni amɛkala Biblia kasemɔ woji babaoo yɛ nakai wiemɔ lɛ mli.

Yɛ afi 1987 lɛ, atsɔɔ wolo bibioo ni ji Na Wala Mli Ŋɔɔmɔ yɛ Shikpɔŋ Nɔ Kɛya Naanɔ! lɛ shishi kɛtee Creole ni Haitibii wieɔ lɛ mli, ni wolo ni atsɔɔ shishi kɛnyiɛ enɛ sɛɛ ji Nilee Ni Kɛ Mɔ Yaa Naanɔ Wala Mli kɛ agbɛnɛ hu wolo bibioo ni ji Mɛni Nyɔŋmɔ Taoɔ yɛ Wɔdɛŋ? Woji nɛɛ eye ebua mɛi ni kpaako akɛ amɛ kaseɔ Biblia lɛ ní amɛmiisumɔ koni amɛnu saji otii ni yɔɔ Nyɔŋmɔ Wiemɔ lɛ mli ashishi lɛ babaoo. Kɛjɛ September 1, afi 2002 ni abɔi Buu-Mɔɔ lɛ hu shishitsɔɔmɔ yɛ nakai Creole wiemɔ lɛ mli. Eyɛ mli akɛ akã he akɛ woji ni akala yɛ French wiemɔ mli lɛ miitsu nii lolo moŋ, shi maŋbii lɛ ateŋ mɛi pii sumɔɔ woji ní akala yɛ amɛ diɛŋtsɛ amɛmaŋ wiemɔ mli lɛ kanemɔ.

Aashiɛ Sanekpakpa lɛ Aatsɔɔ Gboklɛfoi

Sɛɛkpee nɛɛ, Yehowa Odasefoi miishiɛ sanekpakpa lɛ amɛmiitsɔɔ hii kɛ yei ni awo amɛ tsuŋ yɛ Maŋ lɛ tsuŋwoohei lɛ. Odasefoi ni yashiɛɔ yɛ jɛmɛ lɛ náa miishɛɛ akɛ amɛkɛ miishɛjemɔ wiemɔi yahaa mɛi ni eyaje shihilɛ ni yɔɔ mɔbɔ tamɔ nakai mli lɛ.

Nyɛminuu ko bɔ amaniɛ akɛ: “Gbi klɛŋklɛŋ ni wɔtee tsuŋwoohei nɛɛ ateŋ eko mli lɛ, aha mɛi ni awo amɛ tsuŋ lɛ fɛɛ yabua amɛhe naa yɛ tsũ agbo ko mli koni amɛbo wɔ toi. Wɔbɔi bɔ ni amɛbaafee amɛnii amɛha lɛ hesusumɔ yɛ wɔjwɛŋmɔ mli. Beni wɔha amɛle akɛ wɔba koni wɔbaye wɔbua  amɛ kɛkase Biblia lɛ, amɛyi 50 lɛ fɛɛ kɛ miishɛɛ here wɔ. Wɔkɛ woji bibii ni ji Kasemɔ Nikanemɔ kɛ Niŋmaa kɛ Na Wala Mli Ŋɔɔmɔ yɛ Shikpɔŋ Nɔ Kɛya Naanɔ! ni yɔɔ Creole wiemɔ mli lɛ tsɔɔ amɛ, ni wɔkɛ amɛteŋ mɛi 26 je Biblia mli nikasemɔ shishi. No mli lɛ, amɛteŋ mɛi nyɔŋma leee woloŋ, shi wɔtsɔɔ amɛ akɛ amɛbaanyɛ amɛtsɔ woji bibii lɛ amli mfonirii lɛ anɔ amɛnu saji ni yɔɔ mli lɛ ashishi, ni amɛná he miishɛɛ akɛ amɛbaakase.”

Beni Odasefoi lɛ ku amɛsɛɛ kɛtee tsuŋwoohe lɛ, gboklɛfonyo nuu ko kɛɛ amɛ akɛ: “Mikane wolo bibioo lɛ shii abɔ. Misusuɔ emli saji lɛ ahe be fɛɛ be, ni mikpa nyɛ gbɛ aahu.” Nuu ko ni hiɛ tu yɛ edɛŋ kɛyaju ní abawo lɛ tsuŋ lɛ kɛɛ eesumɔ koni etsake, ni ebi koni aha mɔ ko kɛ eŋa ayakase Biblia lɛ. Nuu ko ni yɔɔ bii enyɔ ní abawo lɛ tsuŋ lɛ hu bi koni akɛ eŋa ayakase nii bɔni afee ni eŋa lɛ ana srɔtofeemɔ ni yɔɔ anɔkwa jamɔ kɛ apasa jamɔ teŋ. Protestant osɔfo ko ni abawo lɛ tsuŋ yɛ ojo ni etswa esɔlemɔ bii kɛhé amɛshika babaoo lɛ kɛɛ kpaako ena anɔkwale lɛ, ni ákɛ kɛ́ ajie lɛ lɛ, ebaaye ebua esɔlemɔ bii lɛ koni amɛbatsɔmɔ Yehowa Odasefoi.

Gboklɛfonyo ko hu ní bɛ Taoɔ wolo bibioo ni akala yɛ Creole wiemɔ mli lɛ eko lɛ hé enaanyo ko nɔ̃ ni eŋmala emli saji lɛ fɛɛ ni ekase ewo eyitsoŋ. Gboklɛfonyo yoo ko bɔi enanemɛi yei gboklɛfoi nɛɛhu nibii ni ekaseɔ lɛ gbaa, ni ekɛ amɛ bɔi nikasemɔ po. Beni akɛ gboklɛfonyo nuu ko kase wolo bibioo lɛ agbe naa ní akɛ lɛ je Nilee wolo lɛ kasemɔ shishi lɛ, ebɔi shiɛmɔ kɛ gboklɛfoi krokomɛi lɛ hamɔ. Yeee be ko lɛ, ekɛ mɛi ejwɛ bɔi Biblia lɛ kasemɔ.

Kulɛ akɛ Mercony * kaseɔ Biblia lɛ, ni ewekumɛi lɛ ateŋ mɛi komɛi ji Yehowa Odasefoi. Ewo gboklɛfoi krokomɛi lɛ hewalɛ koni amɛkane Biblia kasemɔ woji ni ewekumɛi lɛ kɛbahaa lɛ lɛ. Ewie akɛ: “Kɛ́ miijie woji lɛ ayi miiha amɛ lɛ, amɛtsɛ́ɔ mi Yehowa Odasefonyo. Mikɛɔ amɛ akɛ jeee eko ji mi, ejaakɛ mile mɔ ni Odasefonyo ji. Amrɔ nɛɛ, miisumɔ ni mikɛ hiɛdɔɔ akase Biblia lɛ koni abaptisi mi. Beni miji oblanyo lɛ, eji mikɔ gbɛ ni minyɛmimɛi hii lɛ kɔ lɛ kulɛ, mibajeŋ tsuŋwoohe nɛɛ.”

Gboklɛfoi ni hé woji ni Mercony kɛha amɛ lɛ eko lɛ ateŋ mɔ kome kɛɛ Odasefonyo ni ba eŋɔɔ lɛ akɛ: “Nyɛsɛɛ Ju lɛ dani oba biɛ lɛ, no mli lɛ mihao waa ni miitao ni miyawo misɛ̃ kpãa. Shi beni mikane woji tɛtrɛbii lɛ, misɔle mikpa Nyɔŋmɔ fai akɛ ekɛ mihe eshai ake mi koni etsu mɔ ko ni ebatsɔɔ mi jalɛ gbɛ lɛ. Mimii shɛ mihe jogbaŋŋ beni oba biɛ enɔ jetsɛremɔ akɛ okɛ gboklɛfoi lɛ baakase Biblia lɛ! Miisumɔ koni otsɔɔ mi bɔ ni asɔmɔɔ Yehowa ahaa.”

Awake! Wolo Tɛtrɛɛ lɛ Eha Mɛi Babaoo Miinu Sanekpakpa Lɛ

Awake! ni je kpo yɛ November 8 afi 2000 lɛ wie helatsɛmɛi akwɛlɔi ahe. Yoo ko ha ahã lɛ woji tɛtrɛbii nɛɛ 2,000 ni eyaja eha helatsɛmɛi akwɛlɔi komɛi ní fee kpee ko yɛ Port-au-Prince lɛ. Aja Awake! ni je kpo yɛ July 8 afi 2002 ní wieɔ polisifoi kɛ amɛnitsumɔ he lɛ babaoo aha polisifoi ni yɔɔ Port-au-Prince lɛ. Amɛná he miishɛɛ jogbaŋŋ, ni kɛbashi amrɔ nɛɛ lɛ, amɛteŋ mɛi komɛi biɔ Odasefoi ni amɛkɛkpeɔ yɛ gbɛjegbɛi lɛ anɔ wolo tɛtrɛɛ nɛɛ eko.

Nyɛsɛɛ nɛɛ, yoo ko ni fata Jeŋ Hewalɛnamɔ Gbɛjianɔtoo lɛ nitsumɔ onukpai lɛ ahe lɛ to gbɛjianɔ koni etsɔse mɛi yɛ naagbai ni AIDS hela lɛ kɛbaa lɛ he. Afɔ̃ yoo nɛɛ nine kɛtee Yehowa Odasefoi anitsumɔhe nine lɛ, ni akɛ hela nɛɛ he saji ni akala yɛ Awake! wolo tɛtrɛɛ lɛ mli lɛ tsɔɔ lɛ. Emii shɛ ehe jogbaŋŋ yɛ saji ni ajɛ Biblia lɛ mli aŋmala kɛtsɔɔ gbɛ ni hi fe fɛɛ ni aaatsɔ nɔ atsĩ AIDS naa, kɛ agbɛnɛ hu bɔ ni aaafee aye abua mɛi ni hela nɛɛ eko emɔ amɛ lɛ he. Ewie akɛ, Awake! wolo tɛtrɛɛ lɛ nyiɛ woji krokomɛi ni wieɔ hela nɛɛ he lɛ ahiɛ kwraa.

Hɛɛ, Yehowa Odasefoi miigbɛ Maŋtsɛyeli lɛ he sanekpakpa lɛ amɛmiishwã Haiti maŋ fɛfɛo lɛ mli yɛ gbɛ̀i srɔtoi anɔ, taakɛ amɛfeɔ yɛ maji krokomɛi 234 ni yɔɔ jeŋ fɛɛ lɛ amli lɛ. Mɛi babaoo miibo hiɛnɔkamɔ shɛɛ saji nɛɛ toi, ni aaye aabua amɛ koni amɛkaha naagbai ni yaa nɔ amrɔ nɛɛ miihé amɛjwɛŋmɔ, shi moŋ amɛkɛ amɛjwɛŋmɔ ama jeŋ hee ni baa, nɔ̃ mli ni Yehowa ni ji anɔkwa Nyɔŋmɔ lɛ jálɔi fɛɛ baahi shi yɛ shihilɛi kpakpai ni yɔɔ miishɛɛ diɛŋtsɛ amli lɛ nɔ.—Kpojiemɔ 21:4.

[Shishigbɛ niŋmai]

[He ni Mfoniri ni yɔɔ baafa 9 lɛ Jɛ]

Ŋshɔnaa mfoniri: ©Adalberto Rios Szalay/photodisc/age fotostock