Blonyayeli Mɛni Etsɔ Ŋmɛnɛ?

NYƆŊ nɛɛ ji afii nyɔŋma ní saneyitso ni ji “Aatao Blonyayeli Mli” lɛ je kpo yɛ wolo tɛtrɛɛ (U.S.News & World Report) ko mli. Nɔ̃ he ni asusu yɛ nakai saneyitso lɛ mli lɛ kɔɔ kɛji akɛ “aaba jara ni akɛ” Blonya “yeɔ lɛ shi ni akɛ he miiwo Nyɔŋmɔjamɔ mli babaoo” lɛ he. Ani nakai sane lɛ ji?

Atsɔɔ nɔ̃ hewɔ ni esaaa akɛ wɔkpaa gbɛ akɛ ebaabalɛ nakai lɛ mli yɛ saneyitso lɛ mli. Atsɔɔ mli akɛ: “Nɔ ko kwraa bɛ ni tsɔɔ akɛ aye Kristo fɔmɔ gbi dani Konstantino . . . batsɔ amralo yɛ Roma yɛ afi 300 afii lɛ amli.” Enɛ tsɔɔ akɛ “kɛ hooo lɛ, ayɛ odaseyeli ni tsɔɔ akɛ mɔ ko leee be pɔtɛɛ ni afɔ́ Yesu.” Wolo lɛ wie akɛ “sanekpakpai lɛ etsɔɔɔ afi pɔtɛɛ po nɔ ni afɔ́ Yesu, aahu ni eeetsɔɔ nyɔŋ loo gbi nɔ ni afɔ́ lɛ.” Yinɔsaneŋmalɔ ko ni yɔɔ Texas Univɛsiti lɛ tsɔɔ mli akɛ, “nɔ ko tsirɛɛɛ mra be mli Kristofoi lɛ akɛ amɛye Yesu fɔmɔ gbi.”

Wolo lɛ tsɔɔ “bɔ ni fee ni sɔlemɔ lɛ hala December 25” lɛ akɛ Blonya gbi lɛ mli yɛ saneyitso bibioo ni ji “Sane ni Aka Yiŋ Awie” lɛ mli. Etsɔɔ mli akɛ: “Mɛi babaoo kpɛlɛɔ nɔ akɛ [Blonya] gbijurɔ lɛ ji wɔŋjalɔi agbijuji komɛi kɛ gbijurɔ ko ni no mli lɛ ayeɔ ahaa wɔŋ ni ji Saturn lɛ ni atsake hiɛ yɛ maji srɔtoi amli afee lɛ ‘Kristofoi agbijurɔ.’” “Akɛni no mli lɛ, mɛi pii yeɔ gbii juji srɔtoi yɛ December mli hewɔ lɛ, osɔfoi lɛ kɛ Blonyayeli lɛ yawo nakai nyɔŋ lɛ naagbee gbɛ bɔni afee ni mɛi babaoo kɛ amɛhe awo Yiwalaherelɔ lɛ fɔmɔ he gbijurɔyeli lɛ mli.” Aaafee afi 1850 afii lɛ amli lɛ, gbijurɔyeli lɛ batsɔ nihemɔ kɛ nikee. “Nihemɔ kɛ nikee ni yaa nɔ yɛ Blonya beaŋ lɛ ha mɛi ná nii, ni etsɛɛɛ ni guɔyelɔi kɛ mɛi ni tswaa guɔyeli nibii ahe adafi kɛbɔi jarayeli.”

No hewɔ lɛ, nɔ ko bɛ ni tsɔɔ akɛ abaakpa Blonya kɛ jarayeli ni akɛhe awo Nyɔŋmɔjamɔ mli babaoo. Eyɛ mli akɛ ŋmɛnɛ lɛ, Blonyayeli ebatsɔ “jarayeli nifeemɔ wulu” moŋ, shi sane lɛ ji akɛ, akpaaa anɔkwa Kristofoi agbɛ akɛ amɛye Yesu fɔmɔ gbi. Yɛ no najiaŋ lɛ, Biblia lɛ maa kpɔ̃mɔnɔ ni Kristo tsɔ egbele kɛ shi ni atée lɛ kɛtee ŋwɛi lɛ nɔ ekɛha lɛ nɔ mi. (Mateo 20:28) Ebaakã he efee nɔ ni he hiaa kɛyashi naanɔ.