Yehowa Ŋɔɔ ‘Mumɔ Krɔŋkrɔŋ Ehaa Mɛi Ni Biɔ Lɛ Lɛ’
Yehowa Ŋɔɔ ‘Mumɔ Krɔŋkrɔŋ Ehaa Mɛi Ni Biɔ Lɛ Lɛ’
“Kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.”—LUKA 11:13.
1. Mɛɛ shihilɛi amli mumɔ krɔŋkrɔŋ lɛ yelikɛbuamɔ he hiaa wɔ waa?
‘MINYƐŊ madamɔ kaa nɛɛ naa yɛ minyɛmɔ naa ákɛ ja mumɔ krɔŋkrɔŋ lɛ eye ebua mi!’ Ani wiemɔ ni jɛ mɔ tsuiŋ ni tamɔ nɛkɛ ejɛ onaa pɛŋ? Kristofoi babaoo ewie nakai pɛŋ. Ekolɛ, wiemɔ ni tamɔ nakai jɛ onaa beni oná ole akɛ ooye hela ko ni naa wa waa, aloo ekolɛ ofee nakai beni owu loo oŋa ni okɛhi shi afii babaoo lɛ je mli, aloo ekolɛ gbi ni omiishɛɛ fɛɛ tã yɛ nɔ ko ni ha ohao lɛ nɔ wiemɔ ni tamɔ nakai jɛ onaa. Yɛ amanehulu beaŋ lɛ, ekolɛ onuɔ he akɛ “hewalɛ ni fa kɛteke nɔ” ni Yehowa mumɔ krɔŋkrɔŋ lɛ kɛduroɔ bo lɛ ni haa onyɛɔ ofiɔ shi.—2 Korintobii 4:7-9; Lala 40:2, 3.
2. (a) Mɛɛ kaai anɔkwa Kristofoi kɛkpeɔ? (b) Mɛɛ sanebimɔi wɔbaasusu he yɛ nikasemɔ nɛɛ mli?
2 Esa akɛ anɔkwa Kristofoi adamɔ nɔnyɛɛi babaoo kɛ shitee-kɛwoo ni gbɔmɛi ni yɔɔ ŋmɛnɛ ní amɛsheee Nyɔŋmɔ gbeyei lɛ kɛbaa amɛnɔ lɛ anaa. (1 Yohane 5:19) Kɛfata he lɛ, Satan Abonsam ní kɛ yiwalɛ miiwu eeshi mɛi ni “yeɔ Nyɔŋmɔ kitãi lɛ anɔ ni amɛhiɛ Yesu Kristo odase lɛ” diɛŋtsɛ tutuaa Kristo sɛɛnyiɛlɔi lɛ. (Kpojiemɔ 12:12, 17) No hewɔ lɛ, ebɛ naakpɛɛ akɛ Nyɔŋmɔ mumɔ krɔŋkrɔŋ lɛ yelikɛbuamɔ he miihia wɔ waa amrɔ nɛɛ fe be fɛɛ ni eho. Mɛni ebaabi ni wɔfee bɔni afee ni Nyɔŋmɔ aya nɔ aduro wɔ emumɔ krɔŋkrɔŋ lɛ babaoo? Ni mɛni hewɔ wɔbaanyɛ wɔná nɔmimaa akɛ Yehowa yɛ he miishɛɛ fe nine akɛ ekɛ hewalɛ ni he hiaa wɔ koni wɔnyɛ wɔdamɔ kaa naa lɛ aaaha wɔ lɛ? Sanebimɔi nɛɛ ahetooi jeɔ kpo yɛ Yesu abɛbuai enyɔ komɛi amli.
Yaa Nɔ Osɔle
3, 4. Mɛɛ abɛ Yesu bu, ni te ekɛto sɔlemɔ he eha tɛŋŋ?
3 Be ko lɛ, Yesu kaselɔ ko yakɛɛ lɛ akɛ: “Nuŋtsɔ, tsɔɔmɔ wɔ sɔlemɔ.” (Luka 11:1) Beni Yesu jieɔ lɛ naa lɛ, ebu ekaselɔ lɛ abɛbuai enyɔ komɛi ní fɛɛ kɔɔ sane pɔtɛɛ ko he. Klɛŋklɛŋ nɔ̃ lɛ kɔɔ nuu ko ni ná gbɔ he, ni nɔ ni ji enyɔ lɛ kɔɔ tsɛ ko ni tsu ebi ko nibimɔ he nii eha lɛ lɛ he. Nyɛhaa wɔsusua abɛbuai nɛɛ ahe ekomekome wɔkwɛa.
4 Yesu kɛɛ akɛ: “Nyɛteŋ namɔ ni yɔɔ shieŋtsɛ ni eeetee eŋɔɔ nyɔɔŋteŋ, ni eyakɛɛ lɛ akɛ: Shieŋtsɛ, faa mi abolooi etɛ, ejaakɛ mishieŋtsɛ ko ejɛ gbɛ ebato mi, ni mibɛ nɔ ko ni mikɛbama ehiɛ; ni mɔ ni yɔɔ tsuŋ lɛ aaahere nɔ akɛ: Kaagba minaa; aŋa shinaa lɛ momo ni mi kɛ mibii jwere saa nɔ, minyɛŋ shi mate ni mahao. Miikɛɛ nyɛ akɛ, kɛ ka eshieŋtsɛ ni ji lɛ lɛ hewɔŋ kulɛ eteŋ shi ni eha lɛ, shi enaagbamɔ lɛ hewɔ lɛ eeete shi kɛ̃ ni eeha lɛ bɔ fɛɛ bɔ ni etaoɔ.” No sɛɛ lɛ, Yesu tsɔɔ bɔ ni abɛbua nɛɛ kɔɔ sɔlemɔ he eha lɛ mli. Ekɛɛ akɛ: “Ni mi hu miikɛɛ nyɛ akɛ: Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele nyɛ. Ejaakɛ mɔ fɛɛ mɔ ni biɔ lɛ, enine shɛɔ nɔ; ni mɔ ni taoɔ lɛ, enaa; ni mɔ ni shiɔ lɛ, aaagbele lɛ.”—Luka 11:5-10.
5. Mɛni abɛbua ni kɔɔ nuu ni tee nɔ ebi nɔ ni etaoɔ lɛ he lɛ kɛɔ wɔ yɛ bɔ ni esa akɛ wɔfee wɔnii wɔha yɛ sɔlemɔ he?
5 Nɛkɛ abɛbua ni shishinumɔ yɔɔ faŋŋ ní kɔɔ nuu ni tee nɔ ebi nɔ ni etaoɔ lɛ haa wɔnaa bɔ ni esa akɛ wɔfee wɔnii wɔha kɛ́ wɔmiisɔle. Kadimɔ akɛ, Yesu kɛɛ nuu lɛ nine shɛ nɔ ni etaoɔ lɛ nɔ yɛ eshieŋtsɛ lɛ ‘naagbamɔ hewɔ.’ (Luka 11:8) Shikome pɛ Hela wiemɔ ni atsɔɔ shishi akɛ ‘naagbamɔ’ lɛ jeɔ kpo yɛ Biblia lɛ mli. Nakai Hela wiemɔ lɛ shishi diɛŋtsɛ ji “hiɛ ni gbooo nɔ̃.” Bei babaoo kɛ́ akɛɛ mɔ ko hiɛ gbooo nɔ̃ lɛ, etsɔɔ akɛ ebɛ jeŋba. Shi kɛlɛ, kɛ́ mɔ yaatsu yiŋtoo kpakpa ko he nii lɛ, akɛɔ lɛ ni ekɛ hiɛgbele afɔ̃ afã. Nakai ji bɔ ni nuu ni awie ehe yɛ abɛbua lɛ mli ákɛ ená gbɔ lɛ fee. Efeee lɛ hiɛgbele akɛ eeeya nɔ ebi nɔ ni etaoɔ lɛ. Akɛni Yesu miisumɔ koni wɔkase nɔ ni nuu nɛɛ fee lɛ hewɔ lɛ, esaaa akɛ wɔfɔ̃ɔ sɔlemɔ. Yehowa miisumɔ koni ‘wɔya nɔ wɔbi, wɔya nɔ wɔtao, ni wɔya nɔ wɔshi.’ ‘Ebaaŋɔ mumɔ krɔŋkrɔŋ eha mɛi ni biɔ lɛ’ yɛ gbɛ ni tamɔ nakai nɔ lɛ.
6. Te abuɔ gbɔfeemɔ ahaa tɛŋŋ yɛ Yesu gbii lɛ amli?
6 Yesu tsɔɔ wɔ bɔ ni asɔleɔ kɛ agbɛnɛ hu nɔ̃ hewɔ ni esa akɛ wɔfee nakai. Bɔni afee ni wɔnu nɔ ni abɛbua lɛ kɛɔ wɔ lɛ shishi jogbaŋŋ lɛ, nyɛhaa wɔsusua bɔ ni mɛi ni bo Yesu abɛbua ni kɔɔ gbɔfeelɔ ni tee nɔ ebi nɔ ni etaoɔ lɛ he lɛ toi lɛ buɔ gbɔfeemɔ amɛhaa lɛ he wɔkwɛa. Saji babaoo yɛ Ŋmalɛi lɛ amli ni haa wɔnaa akɛ yɛ Biblia beaŋ lɛ, akɛ gbɔfeemɔ shwɛɛɛ kwraa, titri lɛ Nyɔŋmɔ tsuji. (1 Mose 18:2-5; Hebribii 13:2) Eji hiɛshishwiemɔ akɛ mɔ aaayato mɔ ko ŋɔɔ ní enyɛɛɛ efeee lɛ gbɔ. (Luka 7:36-38, 44-46) Ha enɛ ahi ojwɛŋmɔ mli, ní wɔsaa wɔsusu Yesu abɛbua lɛ he ekoŋŋ.
7. Mɛni hewɔ nuu ni Yesu wie ehe yɛ ebɛbua lɛ mli lɛ hiɛ gbooo akɛ eeeyatsĩɛ eshieŋtsɛ lɛ kɛjɛ wɔ̀ mli lɛ?
7 Nuu ni awie ehe yɛ abɛbua lɛ mli lɛ ná gbɔ nyɔɔŋteŋ. Enu he akɛ esa akɛ eha egbɔ lɛ nɔ ko ni eye, shi ‘ebɛ nɔ ko ni ekɛbaama ehiɛ.’ Enu he akɛ eji hiamɔ nii ni esa akɛ etsu he nii amrɔ nɔŋŋ. No hewɔ lɛ, ekɛ hiɛgbele fɔ̃ afã ni eyatsĩɛ eshieŋtsɛ ko kɛjɛ wɔ̀ mli. Ekɛɛ eshieŋtsɛ lɛ akɛ: “Shieŋtsɛ, faa mi abolooi etɛ.” Etee nɔ ebi nɔ ni etaoɔ lɛ kɛyashi enine shɛ nɔ. Kɛ́ enine shɛɛɛ abolooi lɛ anɔ lɛ, enyɛŋ efee mɔ ni ebato eŋɔɔ lɛ gbɔ ni sa.
Kɛ́ Nɔ ko He Miihia Mɔ Waa lɛ, Eyaa Nɔ Ebiɔ
8. Mɛni baakanya wɔ koni wɔya nɔ wɔbi ni ahã wɔ mumɔ krɔŋkrɔŋ lɛ eko?
8 Mɛni ji nɔ ni abɛbua nɛɛ kɛɔ wɔ yɛ nɔ̃ hewɔ ni wɔyaa nɔ wɔsɔleɔ lɛ he? Nuu lɛ tee nɔ ebi koni ahã lɛ abolooi lɛ, ejaakɛ enu he akɛ dani ebaanyɛ etsu sɔ̃ ni kã enɔ akɛ ekwɛ mɔ ni ebato eŋɔɔ lɛ he nii kɛmɔ shi lɛ, ehe miihia koni enine ashɛ abolooi lɛ anɔ. (Yesaia 58:5-7) Kɛ́ enine shɛɛɛ nɔ lɛ, enyɛŋ egbɔ lɛ ekwɛ. Nakai nɔŋŋ akɛni wɔle akɛ kɛ́ wɔbɛ Nyɔŋmɔ mumɔ krɔŋkrɔŋ lɛ eko lɛ, wɔnyɛŋ wɔtsu wɔsɔɔmɔ nitsumɔ lɛ he nii ákɛ anɔkwa Kristofoi hewɔ lɛ, wɔyaa nɔ wɔsɔleɔ wɔbiɔ Nyɔŋmɔ koni eha wɔ emumɔ lɛ eko. (Zakaria 4:6) Kɛ́ wɔnine shɛɛɛ nɔ lɛ, wɔnyɛŋ nitsumɔ ni kã wɔnɔ lɛ he nii wɔtsu. (Mateo 26:41) Ani oona nɔ ko ni he hiaa waa ni wɔkaseɔ kɛjɛɔ abɛbua nɛɛ mli? No ji akɛ, kɛ́ wɔbuɔ Nyɔŋmɔ mumɔ krɔŋkrɔŋ lɛ akɛ nɔ ko ni he hiaa wɔ waa lɛ, no lɛ wɔbaaya nɔ wɔbi koni ahã wɔ eko.
9, 10. (a) Okɛ nɔkwɛmɔnɔ aha kɛtsɔɔ nɔ̃ hewɔ ni esa akɛ wɔya nɔ wɔbi Nyɔŋmɔ koni ehã wɔ emumɔ krɔŋkrɔŋ lɛ eko. (b) Mɛɛ sane esa akɛ wɔteŋ mɔ fɛɛ mɔ abi ehe, ni mɛni hewɔ?
9 Nyɛhaa wɔkɛ nifeemɔ ko ni yaa nɔ ŋmɛnɛ atsɔa nɔ ni wɔkaseɔ kɛjɛɔ nakai abɛbua lɛ mli lɛ mli. Ŋɔɔ lɛ akɛ, oweku lɛ mlinyo ko he babɔi yee nyɔɔŋteŋ. Ani oyatsĩɛŋ datrɛfonyo kɛjɛŋ wɔ̀ mli koni ebakwɛ lɛ? Kɛ́ jeee nɔ ko tsɔ feɔ lɛ lɛ, ofeŋ nakai. Shi, kɛ́ etsui kpãa heɔ atse lɛ, no lɛ ohiɛ gboŋ akɛ oooyatsĩɛ datrɛfonyo lɛ. Mɛni hewɔ? Ejaakɛ esa akɛ atsu naagba ni eba lɛ he nii amrɔ nɔŋŋ. Onaa akɛ mɔ ko ni he esa yɛ naagba ni eba lɛ he nitsumɔ mli lɛ yelikɛbuamɔ he miihia. Kɛ́ oyabiii mɔ lɛ yelikɛbuamɔ lɛ, ebafee ablaŋ. Nakai nɔŋŋ, kɛ́ wɔɔkɛɛ lɛ, anɔkwa Kristofoi kɛ shihilɛ ko ni sa akɛ atsu he nii amrɔ nɔŋŋ ekpe. No ji akɛ, Satan miifo shi tamɔ “jata ni hũuɔ,” eetao wɔhiɛ ekpata. (1 Petro 5:8) Bɔni afee ni wɔkafite wekukpãa ni kã wɔ kɛ Nyɔŋmɔ teŋ, loo kɛ́ wɔɔkɛɛ lɛ, wɔhiɛ akãmɔ yɛ mumɔŋ lɛ, Nyɔŋmɔ mumɔ krɔŋkrɔŋ lɛ yelikɛbuamɔ he miihia wɔ waa. Kɛ́ wɔbiii Nyɔŋmɔ dɛŋ yelikɛbuamɔ lɛ, ebaafee ablaŋ. No hewɔ lɛ, wɔyaa nɔ wɔbiɔ Nyɔŋmɔ koni ehã wɔ emumɔ krɔŋkrɔŋ lɛ eko. (Efesobii 3:14-16) Ja wɔfee nakai dani wɔbaaya nɔ wɔná hewalɛ ni sa ni baaha ‘wɔhiɛ mli kɛyawula shi.’—Mateo 10:22; 24:13.
10 No hewɔ lɛ, ehe miihia waa koni yɛ be kɛ bei amli lɛ, wɔteŋ mɔ fɛɛ mɔ abi ehe akɛ, ‘Ani miyaa nɔ misɔleɔ lɛɛlɛŋ?’ Kaimɔ akɛ, kɛ́ wɔyɔse faŋŋ akɛ Nyɔŋmɔ dɛŋ yelikɛbuamɔ he miihia wɔ lɛ, no lɛ wɔbaaya nɔ wɔsɔle wɔbi lɛ koni ehã wɔ emumɔ krɔŋkrɔŋ lɛ eko.
Mɛni Kanyaa Wɔ ni Wɔsɔleɔ Kɛ Nɔmimaa Lɛ?
11. Te Yesu kɛ abɛbua ni kɔɔ tsɛ ko kɛ ebi he lɛ to sɔlemɔ he eha tɛŋŋ?
11 Yesu abɛbua ni kɔɔ gbɔfeelɔ ni tee nɔ ebi nɔ ni etaoɔ lɛ he lɛ maa bɔ ni mɔ ni sɔleɔ ni ji heyelilɔ lɛ feɔ enii ehaa lɛ nɔ mi. Abɛbua ni ji enyɔ lɛ maa bɔ ni mɔ ni boɔ sɔlemɔi atoi ni ji Yehowa Nyɔŋmɔ feɔ enii ehaa lɛ nɔ mi. Yesu bi akɛ: “Shi [m]ɛɛ tsɛ yɔɔ nyɛteŋ ni kɛji ebi bi lɛ aboloo, ni eeeha lɛ tɛ? aloo kɛji ebi lɛ loo lɛ, ni eeeŋɔ onufu efee loo eha lɛ? Aloo kɛji ebi wuɔ wɔlɔ lɛ, ni eeeha lɛ nyɔŋmɔŋkrakro?” Beni Yesu tsɔɔ bɔ ni abɛbua nɛɛ kɔɔ sɔlemɔ he eha lɛ mli lɛ, ekɛɛ akɛ: “Belɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.”—Luka 11:11-13.
12. Abɛbua ni kɔɔ tsɛ ni ha ebi nɔ ni etaoɔ lɛ he lɛ maa bɔ ni Yehowa yɔɔ he miishɛɛ akɛ eeetsu wɔsɔlemɔi lɛ ahe nii eha wɔ lɛ nɔ mi yɛ mɛɛ gbɛ nɔ?
12 Yesu tsɔ nɔkwɛmɔnɔ ni kɔɔ tsɛ ko ni ha ebi nɔ ni etaoɔ lɛ he lɛ nɔ eha wɔna bɔ ni Yehowa nuɔ he ehaa mɛi ni sɔleɔ amɛhaa lɛ lɛ. (Luka 10:22) Klɛŋklɛŋ lɛ, nyɛhaa wɔsusua srɔtofeemɔ ni yɔɔ abɛbuai enyɔ lɛ ateŋ lɛ he wɔkwɛa. Yehowa efeee enii tamɔ nuu ni awie ehe yɛ klɛŋklɛŋ abɛbua lɛ mli ní shashao shi akɛ eeeye ebua eshieŋtsɛ lɛ. Yehowa tamɔ fɔlɔ ko ni yɔɔ suɔmɔ ní yɛ he miishɛɛ akɛ eeeha ebi nine ashɛ nɔ ni ebiɔ lɛ lɛ nɔ. (Lala 50:15) Yesu tee nɔ eha wɔna akɛ Yehowa yɛ he miishɛɛ akɛ eeeye ebua wɔ. Etsɔɔ mli akɛ, kɛ́ tsɛ ni ji adesa ni ‘yitsoŋ wa’ akɛni afɔ́ lɛ yɛ esha mli hewɔ lɛ kɛ nikeenii kpakpai keɔ ebi lɛ, no lɛ wɔbaanyɛ wɔkpa gbɛ akɛ wɔ-Tsɛ ni yɔɔ ŋwɛi ní mli jɔ lɛ baaha ejálɔi lɛ emumɔ krɔŋkrɔŋ lɛ eko fe nine!—Yakobo 1:17.
13. Kɛ́ wɔmiisɔle wɔha Yehowa lɛ, mɛɛ nɔmimaa wɔbaanyɛ wɔná?
13 Mɛni wɔkaseɔ yɛ enɛ mli? No ji akɛ, wɔbaanyɛ wɔná nɔmimaa akɛ kɛ́ wɔbi wɔ-Tsɛ ni yɔɔ ŋwɛi lɛ koni eha wɔ emumɔ krɔŋkrɔŋ lɛ eko lɛ, ekɛ miishɛɛ baafee nakai eha wɔ aahu. (1 Yohane 5:14) Kɛ́ wɔɔkɛɛ lɛ, kɛ́ wɔsɔle wɔha Yehowa shii abɔ lɛ, ekɛɛŋ wɔ kɔkɔɔkɔ akɛ: ‘Nyɛkagbaa minaa, aŋa shinaa lɛ momo.’ (Luka 11:7) Nɔ ni tamɔɔɔ nakai lɛ, Yesu wie akɛ: “Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele nyɛ.” (Luka 11:9, 10) Hɛɛ, Yehowa ‘baahere wɔ nɔ beni wɔbolɔɔ lɛ.’—Lala 20:9; 145:18.
14. (a) Mɛɛ susumɔ ni ejaaa haoɔ mɛi ni kɛ kaai kpeɔ lɛ ateŋ mɛi komɛi? (b) Kɛ́ wɔkɛ kaai kpe lɛ, mɛni hewɔ wɔbaanyɛ wɔkɛ nɔmimaa asɔle aha Yehowa lɛ?
14 Kɛfata he lɛ, Yesu abɛbua ni kɔɔ tsɛ ni yɔɔ suɔmɔ lɛ he lɛ maa nɔ mi akɛ Yehowa feɔ ejurɔ babaoo fe fɔlɔi ni ji adesai. No hewɔ lɛ, esaaa akɛ wɔteŋ mɔ ko nuɔ he akɛ kaai ni wɔkɛkpeɔ lɛ tsɔɔ akɛ Nyɔŋmɔ náaa wɔhe miishɛɛ. Satan ni ji wɔhenyɛlɔ fe fɛɛ lɛ ni sumɔɔ akɛ wɔnu he nakai. (Hiob 4:1, 7, 8; Yohane 8:44) Nɔ ko kwraa bɛ Ŋmalɛi lɛ amli ni tsɔɔ akɛ esa akɛ mɔ abu ehe fɔ́ yɛ gbɛ ni tamɔ nakai nɔ. Yehowa ekaaa wɔ “yɛ nifɔji agbɛfaŋ.” (Yakobo 1:13) Ekɛ kaa ni baanyɛ aye wɔ awui tamɔ onufu loo nyɔŋmɔŋkakro baaa wɔnɔ. Wɔ-Tsɛ ni yɔɔ ŋwɛi lɛ ‘ŋɔɔ nii kpakpai ehaa mɛi ni biɔ lɛ lɛ.’ (Mateo 7:11; Luka 11:13) Yɛ anɔkwale mli lɛ, babaoo ni wɔnuɔ ejuji ni Yehowa feɔ ehaa wɔ kɛ bɔ ni eyɔɔ he miishɛɛ akɛ eeeye ebua wɔ lɛ shishi lɛ, babaoo ni no kanyaa wɔ koni wɔkɛ nɔmimaa asɔle. Kɛ́ wɔfee nakai lɛ, no lɛ wɔ hu wɔbaanyɛ wɔjaje taakɛ lalatsɛ ni ŋma akɛ: “Shi lɛɛlɛŋ, Nyɔŋmɔ ebo mi toi, efee toi eha misɔlemɔ gbee lɛ” jaje lɛ.—Lala 10:17; 66:19.
Bɔ ni Mumɔ Krɔŋkrɔŋ lɛ Yeɔ Buaa Wɔ
15. (a) Mɛɛ shiwoo Yesu kɛha yɛ mumɔ krɔŋkrɔŋ lɛ he? (b) Mɛni ji gbɛ̀i srɔtoi anɔ ni mumɔ krɔŋkrɔŋ lɛ yeɔ buaa wɔ lɛ ateŋ ekome?
15 Beni eshwɛ fioo ni Yesu baagbo lɛ, etĩ shiwoo ni ekɛha yɛ ebɛbuai lɛ amli lɛ mli. Beni ewieɔ mumɔ krɔŋkrɔŋ lɛ he lɛ, ekɛɛ ebɔfoi lɛ akɛ: “Mi lɛ mabi tsɛ lɛ, ni eeeha nyɛ hefatalɔ [loo, “yelikɛbualɔ,” NW] kroko, koni ekɛ nyɛ ahi shi kɛya naanɔ.” (Yohane 14:16) No hewɔ lɛ, Yesu wo esɛɛnyiɛlɔi lɛ ashi akɛ, yelikɛbualɔ ni ji mumɔ krɔŋkrɔŋ lɛ kɛ amɛ baahi shi yɛ be ni kã amɛhiɛ lɛ mli, ni be ni wɔyɔɔ mli nɛɛ hu fata he. Mɛni ji gbɛ ko ni sa kadimɔ waa ni mumɔ krɔŋkrɔŋ lɛ yeɔ buaa wɔ ŋmɛnɛ? Mumɔ krɔŋkrɔŋ lɛ yeɔ buaa wɔ kɛkpeɔ kaai srɔtoi anaa. Yɛ mɛɛ gbɛ nɔ? Bɔfo Paulo ní lɛ diɛŋtsɛ hu ekɛ kaai kpe lɛ wie bɔ ni Nyɔŋmɔ mumɔ lɛ ye bua lɛ lɛ he yɛ wolo ko ni eŋma eyaha Kristofoi ni hi shi yɛ Korinto lɛ mli. Nyɛhaa wɔsusua nɔ ni eŋma lɛ he kuku wɔkwɛa.
16. Wɔnaagba lɛ baanyɛ afee tamɔ nɔ ni Paulo kɛkpe lɛ yɛ mɛɛ gbɛ nɔ?
16 Klɛŋklɛŋ lɛ, Paulo kɛ anɔkwayeli ha enanemɛi heyelilɔi lɛ le akɛ ekɛ kaa ko ni ebafee tamɔ ‘ŋmei yɛ eheloo mli’ miikpe. No sɛɛ lɛ, ewie akɛ: “Mikpa Nuŋtsɔ [Yehowa] lɛ fai shii etɛ sɔŋŋ, koni eje minɔ.” (2 Korintobii 12:7, 8) Eyɛ mli akɛ, Paulo kpa Nyɔŋmɔ fai koni ejie ehaomɔ lɛ kɛya moŋ, shi ebaaa lɛ nakai. Ekolɛ, bo hu okɛ shihilɛ ni tamɔ nakai miikpe ŋmɛnɛ. Taakɛ bɔ ni Paulo fee lɛ, ekolɛ bo hu otee nɔ okɛ nɔmimaa esɔle shii abɔ oha Yehowa koni efo kaa ni okɛkpe lɛ sɛɛ. Ni eyɛ mli akɛ otee nɔ okpa lɛ fai shii abɔ moŋ, shi naagba lɛ ma he ni ema. Ani no tsɔɔ akɛ Yehowa booo osɔlemɔi lɛ atoi, ni ákɛ emumɔ krɔŋkrɔŋ lɛ yeee ebuaaa bo? Kɔkɔɔkɔ! (Lala 10:1, 17) Susumɔ nɔ ni bɔfo Paulo wie kɛtsa nɔ lɛ he okwɛ.
17. Mɛɛ gbɛ nɔ Yehowa tsɔ eha Paulo sɔlemɔi lɛ ahetoo?
17 Beni Nyɔŋmɔ haa Paulo sɔlemɔi lɛ ahetoo lɛ, E-kɛɛ lɛ akɛ: “Miduromɔ lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.” Paulo kɛɛ akɛ: “No hewɔ lɛ misumɔɔ titri akɛ mashwã mafɔ̃ migbedeefeemɔi lɛ anɔ moŋ, koni Kristo hewalɛ lɛ abu mihe [“tamɔ buu,” NW].” (2 Korintobii 12:9; Lala 147:5) No hewɔ lɛ, Paulo yɔse akɛ Nyɔŋmɔ tsɔɔ Kristo nɔ ekɛ ehewalɛ kpele lɛ buɔ ehe tamɔ buu ni alɛɛ mli yɛ enɔ. Ŋmɛnɛ lɛ, Yehowa haa wɔsɔlemɔi lɛ ahetoo yɛ gbɛ ni tamɔ nakai nɔ. Ebuɔ etsuji ahe oookɛɛ nɔ ni elɛɛ buu mli yɛ amɛnɔ.
18. Mɛni haa wɔnyɛɔ wɔdamɔɔ kaai anaa lɛ?
18 Eyɛ mli akɛ eji anɔkwale akɛ, buu nyɛɛɛ atsĩ nugbɔnɛmɔ naa aloo eha kɔɔyɔɔ akpa tswaa moŋ, shi ehaa mɔ náa he ko eteeɔ kɛ́ nugbɔ miinɛ loo kɔɔyɔɔ miitswa. Nakai nɔŋŋ wɔhe ni “Kristo hewalɛ lɛ” buɔ lɛ etsĩii kaai ni wɔkɛkpeɔ aloo naagbai ni akɛbaa wɔnɔ lɛ anaa. Kɛlɛ, ákɛ Yehowa jálɔi lɛ, nakai hewalɛ lɛ buɔ wɔhe kɛjɛɔ je lɛŋ nibii ni baanyɛ aye wɔ awui kɛ Satan ni ji enɔyelɔ lɛ tutuamɔi lɛ ahe. (Kpojiemɔ 7:9, 15, 16) No hewɔ lɛ, kɛ́ okɛ kaa ko ni ‘sɛɛ efooo’ miikpe lɛ, obaanyɛ oná nɔmimaa akɛ Yehowa le shi ni otswiaa lɛ, ni ákɛ enu “obolɔmɔ gbee lɛ.” (Yesaia 30:19; 2 Korintobii 1:3, 4) Paulo ŋma akɛ: “Anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.”—1 Korintobii 10:13; Filipibii 4:6, 7.
19. Mɛni otswa ofai shi akɛ obaafee, ni mɛni hewɔ?
19 Eji anɔkwale akɛ, “jaramɔ bei” ekadi “naagbee gbii” nɛɛ ní mɛi sheee Nyɔŋmɔ gbeyei lɛ. (2 Timoteo 3:1) Kɛlɛ, Nyɔŋmɔ tsuji baanyɛ bei nɛɛ anaa amɛdamɔ. Mɛni hewɔ? Ejaakɛ Nyɔŋmɔ mumɔ krɔŋkrɔŋ lɛ ní Yehowa jɛɔ esuɔmɔ mli eŋɔɔ ehaa mɛi fɛɛ ni yaa nɔ amɛkɛ nɔmimaa sɔleɔ amɛbiɔ lɛ lɛ yeɔ buaa amɛ ni ebuɔ amɛhe. Belɛ, nyɛhaa wɔtswaa wɔfai shi akɛ wɔbaaya nɔ wɔsɔle daa koni aha wɔ mumɔ krɔŋkrɔŋ lɛ eko.—Lala 34:6; 1 Yohane 5:14, 15.
Te Obaaha Hetoo Oha Tɛŋŋ?
• Mɛni esa akɛ wɔfee koni Nyɔŋmɔ aha wɔ emumɔ krɔŋkrɔŋ lɛ eko?
• Mɛni hewɔ wɔbaanyɛ wɔná nɔmimaa akɛ Yehowa baabo sɔlemɔi ni wɔsɔleɔ koni eha wɔ emumɔ krɔŋkrɔŋ lɛ eko lɛ toi?
• Mumɔ krɔŋkrɔŋ lɛ yeɔ buaa wɔ ni wɔnyɛɔ wɔdamɔɔ kaai anaa yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 21]
Mɛni wɔkaseɔ kɛjɛɔ Yesu abɛbua ni kɔɔ shieŋtsɛ ko ni tee nɔ ebi nɔ ni etao lɛ kɛyashi enine shɛ nɔ lɛ he lɛ mli?
[Mfoniri ni yɔɔ baafa 22]
Ani oyaa nɔ osɔleɔ koni aduro bo Nyɔŋmɔ mumɔ krɔŋkrɔŋ lɛ eko?
[Mfoniri ni yɔɔ baafa 23]
Mɛni abɛbua ni kɔɔ tsɛ ni susuɔ mɔ he lɛ kɛɔ wɔ yɛ Yehowa he?