Yehowa ‘Baafã Amɛhe’
Yehowa ‘Baafã Amɛhe’
‘Nyɔŋmɔ halamɔbii ni bolɔɔ tsɛ́ɔ lɛ shwane kɛ nyɔɔŋ lɛ, aso ebafaŋ amɛhe?’—LUKA 18:7.
1. Namɛi anifeemɔ woɔ bo hewalɛ, ni mɛni hewɔ?
KRISTOFOI ni ji Yehowa Odasefoi ni yɔɔ jeŋ fɛɛ lɛ ateŋ mɛi komɛi kɛ anɔkwayeli esɔmɔ Yehowa afii babaoo. Ani ole nɛkɛ suɔlɔi nɛɛ ateŋ mɛi komɛi? Ekolɛ mɔ ni eba ojwɛŋmɔ mli ji nyɛmiyoo ko ni eda ní abaptisi lɛ nɛɛ afii babaoo nɛ, ni ja nɔ ni ba wa dani efoɔ kpee mli yɛ Maŋtsɛyeli Asa lɛ nɔ lɛ, aloo ekolɛ mɔ ni ebayi ojwɛŋmɔ mli ji nyɛminuu ko ni egbɔ ní kɛ asafo lɛ yaa shiɛmɔ otsi fɛɛ otsi, ni efee nakai afii babaoo lɛ. Eji anɔkwale akɛ Kristofoi anɔkwafoi nɛɛ ateŋ mɛi babaoo asusumɔ ji kulɛ Harmagedon eba momo. Kɛlɛ, anɔkwale ni eji akɛ nɛkɛ jeŋ ni ayeee jalɛsane yɛ mli nɛɛ kã he eyɛ shihilɛ mli lolo lɛ haaa hemɔkɛyeli ni amɛyɔɔ yɛ Yehowa shiwoi amli lɛ mli agbɔjɔ, ni asaŋ no gbɔjɔɔɔ amɛfai shi ni amɛtswa akɛ ‘amɛbaahiɛ mli kɛyawula shi lɛ.’ (Mateo 24:13) Hemɔkɛyeli ni mli wa ni Yehowa tsuji ni tamɔ nɛkɛ lɛ jieɔ lɛ kpo lɛ woɔ asafo muu lɛ fɛɛ hewalɛ diɛŋtsɛ.—Lala 147:11.
2. Mɛɛ sane ko dɔɔ wɔ waa?
2 Shi bei komɛi lɛ, ekolɛ wɔbaana mɛi komɛi ni amɛnifeemɔ tamɔɔɔ mɛi ni wɔwie amɛhe kɛtsɔ hiɛ lɛ. Odasefoi komɛi kɛ amɛhe woɔ shiɛmɔ nitsumɔ lɛ mli afii saŋŋ, shi sɛɛ mli lɛ, hemɔkɛyeli ni amɛyɔɔ yɛ Yehowa mli lɛ mli gbɔjɔɔ ni amɛkɛ Kristofoi asafo lɛ kpaa bɔɔ. Mɛi ni be ko ni eho lɛ, amɛji wɔnanemɛi shi amɛkpa Yehowa sɔɔmɔ lɛ asane dɔɔ wɔ waa, ni wɔyɛ he miishɛɛ babaoo akɛ wɔbaaya nɔ wɔye wɔbua “too[i] ni elaaje” lɛ koni amɛku sɛɛ kɛba tooku lɛ mli. (Lala 119:176; Romabii 15:1) Kɛlɛ, bɔ ni mɛi komɛi yaa nɔ amɛhiɛɔ amɛhemɔkɛyeli mli, ní yɛ mɛi krokomɛi agbɛfaŋ lɛ amɛhemɔkɛyeli mli gbɔjɔɔ ni amɛshiɔ Kristofoi asafo lɛ teeɔ sanebimɔi komɛi ashi. Mɛni yeɔ buaa Odasefoi babaoo ni hemɔkɛyeli ni amɛyɔɔ yɛ Yehowa shiwoi amli lɛ mli gbɔjɔɔɔ yɛ be mli ni mɛi komɛi anɔ̃ mli gbɔjɔɔ lɛ? Ákɛ aŋkroaŋkroi lɛ, mɛni wɔbaanyɛ wɔfee koni hemɔkɛyeli ni wɔyɔɔ akɛ “Yehowa gbi wulu lɛ” ebɛŋkɛ lɛ mli akagbɔjɔ? (Zefania 1:14) Nyɛhaa wɔsusua abɛbua ko ni yɔɔ Luka Sanekpakpa lɛ mli lɛ he wɔkwɛa.
Kɔkɔbɔɔ Kɛha Mɛi ni Yɔɔ Wala Mli “Beni Gbɔmɔ Bi lɛ Aaaba Lɛ”
3. Namɛi titri abɛbua ni kɔɔ yoo okulafo kɛ kojolɔ lɛ he lɛ he baaba sɛɛnamɔ aha, ni mɛni hewɔ?
3 Wɔkaneɔ Yesu abɛbua ni kɔɔ yoo okulafo kɛ kojolɔ ko he lɛ he sane yɛ Luka yitso 18 lɛ. Abɛbua nɛɛ tamɔ abɛbua ni kɔɔ gbɔfeelɔ ni tee nɔ ebi nɔ ni etaoɔ lɛ ní wɔsusu he yɛ nikasemɔ ni tsɔ hiɛ lɛ mli lɛ. (Luka 11:5-13) Kɛlɛ, sane he ni awieɔ ní Ŋmalɛ ni kɔɔ yoo okulafo lɛ kɛ kojolɔ lɛ he sane baje mli lɛ he lɛ haa wɔnaa akɛ mɛi titri ahe ni abɛbua nɛɛ kɔɔ ji mɛi ni yɔɔ wala mli “beni gbɔmɔ bi lɛ aaaba” aloo eeebɔi Maŋtsɛyeli lɛ, ni enɛ je shishi yɛ afi 1914.—Luka 18:8. *
4. Mɛni Yesu hã ale dani ebu abɛ ni jeɔ kpo yɛ Luka yitso 18 lɛ?
4 Dani Yesu baabu nakai abɛ lɛ, etsɔɔ mli akɛ kɛ́ ebɔi Maŋtsɛyeli lɛ, ehe okadi baaje kpo faŋŋ taakɛ bɔ ni “srawa gbaa ni ehaa ŋwɛi shishi afã kome tseɔ kɛyaa ŋwɛi shishi afã kroko lɛ.” (Luka 17:24; 21:10, 29-33) Kɛlɛ, gbɔmɛi ni yɔɔ “naagbee be lɛ” mli lɛ ateŋ mɛi kpotoo baaku amɛhiɛ amɛshwie nakai okadi ni yɔɔ faŋŋ lɛ nɔ. (Daniel 12:4) Mɛni hewɔ? Nɔ̃ hewɔ ni mɛi ni hi shi yɛ Noa kɛ Lot gbii lɛ amli lɛ booo kɔkɔbɔɔi ni Yehowa kɛha lɛ toi lɛ, no nɔŋŋ baaha mɛi nɛɛ hu aku amɛhiɛ amɛshwie nakai okadi lɛ nɔ. Yɛ no gbii lɛ amli lɛ, mɛi ‘miiyeyee nii, amɛmiinunuu dãai, amɛmiihehei, amɛmiihɔ̃hɔ̃ɔ nii, amɛmiitɛo tsei ni amɛmiimamɔ tsũi kɛyashi gbi nɔ ni akpata amɛ fɛɛ kwa amɛhiɛ.’ (Luka 17:26-29) Nɔ̃ hewɔ ni amɛhiɛ kpata ji akɛ, amɛha nakai nibii lɛ hé amɛjwɛŋmɔ fɛɛ ni no ha amɛku amɛhiɛ amɛshwie Nyɔŋmɔ suɔmɔnaa nifeemɔ nɔ. (Mateo 24:39) Nakai nɔŋŋ ŋmɛnɛ lɛ, daa gbi nifeemɔi ehé mɛi babaoo ajwɛŋmɔ aahu akɛ amɛkuɔ amɛhiɛ amɛshwieɔ okadii ni tsɔɔ akɛ jeŋ fɔŋ nɛɛ hiɛkpatamɔ ebɛŋkɛ lɛ nɔ.—Luka 17:30.
5. (a) Namɛi Yesu bɔ amɛ kɔkɔ, ni mɛni hewɔ? (b) Mɛni eha mɛi komɛi eŋmɛɛ amɛhemɔkɛyeli lɛ he lɛ?
5 Ekã shi faŋŋ akɛ, egba Yesu naa akɛ nibii ni yaa nɔ yɛ Satan je lɛ mli lɛ baanyɛ agbala esɛɛnyiɛlɔi lɛ hu ajwɛŋmɔ, ni ebaashɛ he ko po ni ekolɛ no baaha ‘amɛku sɛɛ amɛyakɔlɔ nibii ni amɛshi lɛ.’ (Luka 17:22, 31) Yɛ anɔkwale mli lɛ, Kristofoi komɛi ekɔ gbɛ ni tamɔ nakai. Mɛi ni tamɔ nakai lɛ kɛ afii babaoo kpa gbi ni Yehowa baajie jeŋ fɔŋ nɛɛ kɛya lɛ gbɛ. Shi akɛni Harmagedon baaa yɛ be ni amɛyakpa gbɛ lɛ mli hewɔ lɛ, amɛnijiaŋ je wui. Hemɔkɛyeli ni amɛyɔɔ akɛ Yehowa kojomɔ gbi lɛ ebɛŋkɛ lɛ mli bɔi gbɔjɔmɔ. Amɛkɛ amɛhe wooo shiɛmɔ nitsumɔ lɛ mli nɔtonɔto dɔŋŋ, ni fiofio lɛ, shihilɛ mli nifeemɔi hé amɛbe fɛɛ aahu akɛ amɛnáaa eko amɛkɛtsu mumɔŋ nibii ahe nii. (Luka 8:11, 13, 14) Sɛɛ mli lɛ, ‘amɛku sɛɛ amɛyakɔlɔ nibii ni amɛshi lɛ’—kwɛ awerɛho sane ni enɛ ji!
Esa akɛ ‘Wɔsɔle Daa’
6-8. (a) Gbaa abɛbua ni kɔɔ yoo okulafo kɛ kojolɔ lɛ he lɛ. (b) Te Yesu tsɔɔ abɛbua nɛɛ shishi eha tɛŋŋ?
6 Mɛni wɔbaanyɛ wɔfee koni hemɔkɛyeli ni mli wa ni wɔyɔɔ akɛ Yehowa baatsu eshiwoi lɛ ahe nii lɛ mli akagbɔjɔ? (Hebribii 3:14) Yesu ha sanebimɔ nɛɛ hetoo beni ebɔ kaselɔi lɛ kɔkɔ koni amɛkaku sɛɛ kɛmiiya Satan yiwalɛ je lɛŋ dɔŋŋ lɛ sɛɛ.
7 Luka bɔ amaniɛ akɛ, Yesu ‘bu amɛ abɛ ko ekɛtsɔɔ akɛ esa akɛ asɔleɔ daa ni ekaje tsine.’ Yesu kɛɛ akɛ: “Kojolɔ ko yɛ maŋ ko nɔ, ni esheee Nyɔŋmɔ gbeyei ni asaŋ ebuuu gbɔmɔ ko. Ni yoo okulafo ko yɛ nakai maŋ lɛŋ, ni eba eŋɔ ebakɛɛ: Fã mihe yɛ mihenyɛlɔ lɛ dɛŋ! Ni ekpɛlɛɛɛ aahu. Shi fee sɛɛ lɛ ekɛɛ yɛ eyiŋ akɛ: Yɛŋ akɛ misheee Nyɔŋmɔ gbeyei, ni mibuuu gbɔmɔ hu; shi akɛni nɛkɛ yoo okulafo nɛɛ miigba minaa hewɔ lɛ, mafã ehe, koni, beni yi aaayawula shi lɛ, ekaba ni ebashwie mihiɛ ma.”
8 Beni Yesu gbe abɛbua lɛ naa ni etsɔɔ shishi lɛ, ewie akɛ: “Nyɛboa nɔ ni kojolɔ shishitswalɔ lɛ kɛɛ toi! Ni kɛ́ Nyɔŋmɔ aaaku ehiɛ afɔ̃ ehalamɔbii ni bolɔɔ tsɛ́ɔ lɛ shwane kɛ nyɔɔŋ lɛ nɔ aahu tete lɛ, aso ebafaŋ amɛhe? Miikɛɛ nyɛ akɛ, eeefã amɛhe oyá. Shi beni gbɔmɔ bi lɛ aaaba lɛ, ani eeebana hemɔkɛyeli yɛ shikpɔŋ lɛ nɔ?”—Luka 18:1-8.
“Fã Mihe”
9. Mɛɛ sane oti ni yɔɔ faŋŋ abɛbua ni kɔɔ yoo okulafo kɛ kojolɔ lɛ he lɛ wieɔ he?
9 Sane oti ni abɛbua ni shishinumɔ yɔɔ faŋŋ nɛɛ wieɔ he lɛ yɛ faŋŋ. Mɛi atã ni atsĩ yɛ abɛbua lɛ mli lɛ wie he, ni Yesu hu wie he. Yoo okulafo lɛ kpa fai akɛ: “Fã mihe.” Kojolɔ lɛ kɛɛ akɛ: “Mafã ehe.” Yesu bi akɛ: “Aso [Nyɔŋmɔ] ebafaŋ amɛhe?” Ni beni Yesu wieɔ Yehowa he lɛ, ekɛɛ akɛ: “Eeefã amɛhe oya.” (Luka 18:3, 5, 7, 8) Mɛɛ be diɛŋtsɛ Nyɔŋmɔ ‘baafã amɛhe’?
10. (a) Mɛɛ be atɔ owele yɛ klɛŋklɛŋ afii 100 lɛ mli? (b) Mɛɛ be abaafã Nyɔŋmɔ tsuji ni yɔɔ ŋmɛnɛ lɛ ahe, ni mɛɛ gbɛ nɔ abaatsɔ afee enɛ?
10 Yɛ klɛŋklɛŋ afii 100 lɛ mli lɛ, “oweletɔɔ gbi” lɛ ba yɛ afi 70 Ŋ.B. beni akpata Yerusalem kɛ sɔlemɔwe ni yɔɔ jɛmɛ lɛ hiɛ lɛ. (Luka 21:22) Yɛ Nyɔŋmɔ tsuji ni yɔɔ ŋmɛnɛ lɛ agbɛfaŋ lɛ, abaafã amɛhe yɛ “Yehowa gbi wulu lɛ” nɔ. (Zefania 1:14; Mateo 24:21) Kɛ́ nakai gbi lɛ shɛ lɛ, “mɛi ni haoɔ” Yehowa tsuji lɛ, “eeehao amɛ eto najiaŋ . . . [Yesu Kristo] aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ.”—2 Tesalonikabii 1:6-8; Romabii 12:19.
11. Abaafã Nyɔŋmɔ tsuji ahe “oya” yɛ mɛɛ shishinumɔ naa?
11 Kɛlɛ, te esa akɛ wɔnu shiwoo ni Yesu kɛha akɛ Yehowa baafã etsuji ahe “oya” lɛ shishi wɔha tɛŋŋ? Nyɔŋmɔ Wiemɔ lɛ tsɔɔ akɛ ‘eyɛ mli akɛ Yehowa toɔ etsui shi’ moŋ, shi kɛ́ be shɛ kɛha etsuji lɛ ahe famɔ lɛ, ebaatsu he nii oya. (Luka 18:7, 8; 2 Petro 3:9, 10) Yɛ Noa gbii lɛ amli beni akɛ Nu Afua lɛ ba lɛ, akpata mɛi fɔji lɛ ahiɛ oya. Nakai nɔŋŋ yɛ Lot gbii lɛ amli lɛ, aha la jɛ ŋwɛi ebakpata mɛi fɔji lɛ ahiɛ. Yesu kɛɛ akɛ: “Nakai nɔŋŋ kɛ̃ baaba gbi ni aaajie gbɔmɔbi lɛ kpo lɛ.” (Luka 17:27-30) Shikome ekoŋŋ lɛ, “hiɛkpatamɔ aaabatua” mɛi fɔji lɛ “trukaa.” (1 Tesalonikabii 5:2, 3) Yɛ anɔkwale mli lɛ, wɔbaanyɛ wɔná nɔmimaa akɛ kɛ́ eshɛ be ni Yehowa kɛbaakpata Satan je lɛ hiɛ lɛ, ehaŋ gbi kome po afo mli.
“Eeefã Amɛhe”
12, 13. (a) Mɛni wɔkaseɔ kɛjɛɔ Yesu abɛbua ni kɔɔ yoo okulafo kɛ kojolɔ lɛ he lɛ mli? (b) Mɛni hewɔ wɔbaanyɛ wɔná nɔmimaa akɛ Yehowa baabo wɔsɔlemɔi lɛ atoi ni efã wɔhe?
12 Yesu abɛbua ni kɔɔ yoo okulafo kɛ kojolɔ lɛ he lɛ jieɔ anɔkwalei krokomɛi hu ni he hiaa akpo. Beni Yesu tsɔɔ abɛbua lɛ shishi lɛ, ekɛɛ akɛ: ‘Nyɛboa nɔ ni kojolɔ shishitswalɔ lɛ kɛɛ toi! Nyɔŋmɔ halamɔbii ni bolɔɔ tsɛ́ɔ lɛ shwane kɛ nyɔɔŋ lɛ, aso ebafaŋ amɛhe?’ Yɛ anɔkwale mli lɛ, Yehowa he ni Yesu kɛto kojolɔ lɛ he lɛ etsɔɔɔ akɛ eetao ekɛɛ akɛ bɔ ni kojolɔ lɛ fee enii eha lɛ, nakai pɛpɛɛpɛ Nyɔŋmɔ kɛ heyelilɔi lɛ baaye eha. Yɛ no najiaŋ lɛ, Yesu ha srɔtofeemɔ ni yɔɔ Yehowa kɛ nakai kojolɔ lɛ teŋ lɛ je shi faŋŋ, ni etsɔ nakai feemɔ nɔ eha ekaselɔi lɛ kase nɔ ko yɛ Nyɔŋmɔ he. Mɛni ji srɔtofeemɔ ni yɔɔ amɛteŋ lɛ ekomɛi?
13 Kojolɔ ni Yesu wie ehe yɛ ebɛbua lɛ mli lɛ yeee jalɛsane loo eji “shishitswalɔ” shi “Nyɔŋmɔ ji Kojolɔ ni yeɔ jalɛsane.” (Lala 7:11, NW; 33:5) Kojolɔ lɛ bɛ yoo okulafo lɛ he miishɛɛ ko kwraa, shi Yehowa yɛ wɔteŋ mɔ fɛɛ mɔ he miishɛɛ. (2 Kronika 6:29, 30) Kojolɔ lɛ sumɔɔɔ akɛ eye ebua yoo okulafo lɛ, shi Yehowa miisumɔ—hɛɛ, eyɛ he miishɛɛ—akɛ eye ebua mɛi ni sɔmɔɔ Lɛ lɛ. (Yesaia 30:18, 19) Mɛni enɛ tsɔɔ wɔ? Enɛ haa wɔnaa akɛ, kɛ́ kojolɔ ni yeee jalɛsane lɛ bo okulafo lɛ toi ni efã ehe lɛ, belɛ Yehowa baabo ewebii lɛ asɔlemɔ toi fe nine, ni ebaafã amɛhe!—Abɛi 15:29.
14. Mɛni hewɔ esaaa akɛ wɔŋmɛɔ hemɔkɛyeli ni wɔyɔɔ yɛ Nyɔŋmɔ kojomɔ gbi ni baa lɛ mli lɛ he lɛ?
14 No hewɔ lɛ, mɛi ni eyaaa nɔ amɛnáaa hemɔkɛyeli yɛ Nyɔŋmɔ kojomɔ gbi ni baa lɛ mli lɛ miitɔ̃ tɔmɔ ko ni yɔɔ hiɛdɔɔ. Mɛni hewɔ? Kɛ́ amɛŋmɛɛ hemɔkɛyeli ni mli wa ni amɛyɔɔ akɛ “Yehowa gbi wulu lɛ” ebɛŋkɛ lɛ he lɛ, amɛkɛ nakai feemɔ tsɔɔ akɛ amɛheee amɛyeee akɛ Yehowa yeɔ eshiwoi anɔ. Kɛlɛ, mɔ ko mɔ ko bɛ ni baanyɛ aje anɔkwafo ni Nyɔŋmɔ ji lɛ he ŋwane yɛ gbɛ ni ja nɔ. (Hiob 9:12) Sane ko ni he hiaa waa ni esa akɛ wɔbi wɔhe ji akɛ, Ákɛ aŋkroaŋkroi lɛ, ani wɔbaaya nɔ wɔye anɔkwa? Enɛ ji sane tuuntu ni Yesu bi beni emu abɛbua ni kɔɔ yoo okulafo kɛ kojolɔ lɛ he lɛ naa lɛ.
“Ani Eeebana Hemɔkɛyeli lɛ yɛ Shikpɔŋ lɛ Nɔ?”
15. (a) Mɛɛ sane Yesu bi, ni mɛni hewɔ ebi sane ni tamɔ nakai? (b) Mɛɛ sane esa akɛ wɔteŋ mɔ fɛɛ mɔ abi ehe?
15 Yesu bi sane ko ni yɔɔ miishɛɛ akɛ: “Beni gbɔmɔ bi lɛ aaaba lɛ, ani eeebana hemɔkɛyeli lɛ yɛ shikpɔŋ lɛ nɔ?” (Luka 18:8, NW) Wiemɔ ni ji “hemɔkɛyeli lɛ” tsɔɔ akɛ jeee hemɔkɛyeli ko kɛkɛ he Yesu wieɔ lɛ, shi eetsɔɔ hemɔkɛyeli pɔtɛɛ ko—hemɔkɛyeli ni tamɔ yoo okulafo lɛ nɔ̃ lɛ. Yesu haaa sane ni ebi lɛ hetoo. Ebi nakai sane lɛ bɔni afee ni ekaselɔi lɛ kɛpɛi amɛ diɛŋtsɛ amɛhemɔkɛyeli lɛ mli amɛkwɛ. Ani amɛhemɔkɛyeli lɛ miigbɔjɔ fiofio ní no baanyɛ aha amɛku sɛɛ amɛyakɔlɔ nibii ni amɛshi lɛ, aloo amɛhemɔkɛyeli lɛ tamɔ yoo okulafo lɛ nɔ̃ lɛ? Esa akɛ wɔ mɛi ni wɔyɔɔ ŋmɛnɛ lɛ hu ateŋ mɔ fɛɛ mɔ abi ehe akɛ, ‘Mɛɛ hemɔkɛyeli nɛkɛ “gbɔmɔ bi lɛ” naa yɛ mimli?’
16. Mɛɛ hemɔkɛyeli yoo okulafo lɛ jie lɛ kpo?
16 Kɛ́ wɔɔfata mɛi ni Yehowa baafã amɛhe lɛ ahe lɛ, no lɛ ebaabi ni wɔfee wɔnii tamɔ yoo okulafo lɛ. Mɛɛ hemɔkɛyeli ejie lɛ kpo? Ejie hemɔkɛyeli ni eyɔɔ lɛ kpo kɛtsɔ ‘kojolɔ lɛ ŋɔɔ ni etee nɔtonɔto eyakɛɛ lɛ akɛ: Fã mihe’ lɛ nɔ. Yoo okulafo lɛ tee nɔ ebi nuu ni yeee jalɛsane lɛ koni efã ehe. Nakai nɔŋŋ, Nyɔŋmɔ tsuji ni yɔɔ ŋmɛnɛ lɛ hu baanyɛ aná nɔmimaa akɛ Yehowa baafã amɛhe ekɔɔɔ he eko kɛ́ enɛ sɛɛ yagbala shi fe bɔ ni amɛkpaa gbɛ. Kɛfata he lɛ, amɛtsɔɔ ‘bolɔmɔ ni amɛbolɔɔ kɛtsɛ́ɔ Nyɔŋmɔ shwane kɛ nyɔɔŋ’ ni ji sɔlemɔ ni amɛyaa nɔ amɛsɔleɔ lɛ nɔ amɛtsɔɔ akɛ amɛyɛ hemɔkɛyeli yɛ Yehowa shiwoi lɛ amli. (Luka 18:7) Yɛ anɔkwale mli lɛ, kɛ́ Kristofonyo kpa sɔlemɔ kɛha jalɛsaneyeli lɛ, ekɛ no feemɔ tsɔɔ akɛ eheee eyeee dɔŋŋ akɛ Yehowa baafã etsuji lɛ ahe.
17. Mɛni hewɔ esa akɛ wɔya nɔ wɔsɔle ni asaŋ wɔhiɛ hemɔkɛyeli ni wɔyɔɔ yɛ Yehowa kojomɔ gbi ni baaba kɛ̃ lɛ mli kpɛŋŋ lɛ?
17 Shihilɛ mli ni no mli lɛ yoo okulafo lɛ yɔɔ lɛ hu haa wɔnaa akɛ esa akɛ wɔya nɔ wɔsɔle. Nyɛhaa wɔsusua srɔtofeemɔ ni yɔɔ shihilɛ mli ni no mli lɛ eyɔɔ lɛ kɛ wɔnɔ̃ lɛ teŋ lɛ ekomɛi ahe wɔkwɛa. Yoo okulafo lɛ kpaaa kojolɔ lɛ ŋɔɔ yaa eyɛ mli akɛ mɔ ko wooo lɛ hewalɛ koni efee nakai, shi wɔ lɛ, Nyɔŋmɔ Wiemɔ lɛ woɔ wɔ hewalɛ babaoo koni ‘wɔhiɛ sɔlemɔ mli daa.’ (Romabii 12:12) Yoo okulafo lɛ bɛ nɔ ko ni tsɔɔ akɛ abaatsu enibimɔ lɛ he nii aha lɛ, shi wɔ lɛ, Yehowa ema nɔ mi kɛha wɔ akɛ ebaafã wɔhe. Yehowa tsɔ egbalɔ lɛ nɔ ewie akɛ: “Kɛ́ eshashao shi hu jiŋŋ, mɛɛ lɛ kɛ̃; ejaakɛ ebaaba lɛɛlɛŋ, ekpeŋ sɛɛ!” (Habakuk 2:3; Lala 97:10) Yoo okulafo lɛ náaa mɔ ko adamɔ mli aha lɛ koni atsu enibimɔ lɛ he nii aha lɛ, shi wɔ lɛ, wɔyɛ yelikɛbualɔ ko ni yɔɔ hewalɛ waa ni ji Yesu “ní eyɔɔ Nyɔŋmɔ ninejurɔ nɔ, ni esaa edamɔɔ mli ehaa wɔ lɛ.” (Romabii 8:34; Hebribii 7:25) No hewɔ lɛ, kɛ́ yɛ yoo okulafo lɛ shihilɛ ni mli wa lɛ fɛɛ sɛɛ lɛ, etee nɔ ekpa kojolɔ lɛ fai kɛ hiɛnɔkamɔ akɛ ebaafã ehe lɛ, enyiɛ nɔŋŋ esaaa akɛ wɔhiɛɔ hemɔkɛyeli ni wɔyɔɔ yɛ Yehowa kojomɔ gbi ni baaba kɛ̃ lɛ mli kpɛŋŋ!
18. Sɔlemɔ baanyɛ awaje wɔhemɔkɛyeli lɛ ni eye ebua wɔ koni afã wɔhe yɛ mɛɛ gbɛ nɔ?
18 Abɛbua ni kɔɔ yoo okulafo kɛ kojolɔ lɛ he lɛ haa wɔnaa akɛ sɔlemɔ kɛ hemɔkɛyeli yɛ tsakpãa kpaakpa, ni ákɛ sɔlemɔ ni wɔɔya nɔ wɔsɔle lɛ baanyɛ aye abua wɔ koni wɔnyɛ wɔkpee nifeemɔi ni baanyɛ agbɔjɔ wɔhemɔkɛyeli lɛ anaa. Yɛ anɔkwale mli lɛ, enɛ etsɔɔɔ akɛ sɔlemɔ ni wɔɔsɔle koni mɛi fɛɛ ana akɛ wɔle sɔlemɔ lɛ baaha wɔya nɔ wɔhiɛ wɔhemɔkɛyeli lɛ mli. (Mateo 6:7, 8) Kɛ́ wɔsɔleɔ akɛni wɔnuɔ he akɛ wɔnyɛŋ wɔfee nɔ ko ni Nyɔŋmɔ yelikɛbuamɔ bɛ mli lɛ, no lɛ sɔlemɔ gbalaa wɔ kɛbɛŋkɛɔ Nyɔŋmɔ, ni ewajeɔ wɔhemɔkɛyeli lɛ. Ni akɛni ebiɔ ni mɔ aná hemɔkɛyeli dani ahere eyiwala hewɔ lɛ, Yesu na akɛ ehe miihia ni ewo ekaselɔi lɛ hewalɛ koni ‘amɛsɔle daa ni ekaje amɛtsine’! (Luka 18:1; 2 Tesalonikabii 3:13) Yɛ anɔkwale mli lɛ, jeee sɔlemɔ ni wɔsɔleɔ lɛ ni baaha “Yehowa gbi wulu lɛ” aba—kɛ́ wɔsɔleɔ koni eba jio, wɔsɔleee yɛ he jio, ebaaba. Shi kɛlɛ, hemɔkɛyeli ni wɔyɔɔ kɛ sɔlemɔ ni wɔsɔleɔ koni wɔnyiɛ jalɛ gbɛ nɔ lɛ ni baatsɔɔ kɛji Nyɔŋmɔ baafã wɔhe ákɛ aŋkroaŋkroi ni ehere wɔyiwala yɛ eta lɛ mli aloo efeŋ nakai.
19. Mɛɛ gbɛ nɔ wɔɔtsɔ wɔtsɔɔ akɛ wɔheɔ wɔyeɔ diɛŋtsɛ akɛ Nyɔŋmɔ ‘baafã wɔhe’?
19 Kɛ́ wɔbaakai lɛ, Yesu bi akɛ: “Beni gbɔmɔ bi lɛ aaaba lɛ, ani eeebana hemɔkɛyeli lɛ yɛ shikpɔŋ lɛ nɔ?” Mɛni ji Yesu sanebimɔ ni yɔɔ miishɛɛ nɛɛ hetoo? Kwɛ miishɛɛ sane ni eji akɛ Yehowa tsuji anɔkwafoi akpekpei abɔ ni yɔɔ jeŋ fɛɛ ŋmɛnɛ lɛ kɛ amɛsɔlemɔi, amɛtsuishitoo, kɛ amɛhiɛmiamɔ etsɔɔ akɛ amɛyɛ hemɔkɛyeli nɛɛ eko! No hewɔ lɛ, abaanyɛ aha Yesu sanebimɔ lɛ hetoo akɛ hɛɛ! Hɛɛ, yɛ jalɛsane ni amrɔ nɛɛ Satan je lɛ kɛ wɔ yeee lɛ fɛɛ sɛɛ lɛ, wɔheɔ wɔyeɔ diɛŋtsɛ akɛ Nyɔŋmɔ ‘baafã ehalamɔbii lɛ ahe.’
[Shishigbɛ niŋmaa]
^ kk. 3 Bɔni afee ni onu abɛbua nɛɛ shishi jogbaŋŋ lɛ, kanemɔ Luka 17:22-33. Kadimɔ bɔ ni “gbɔmɔ bi” ni atsĩ tã yɛ Luka 17:22, 24, 30 lɛ yeɔ buaa wɔ kɛhaa sane ni abi yɛ Luka 18:8 lɛ hetoo.
Ani Okaiɔ?
• Mɛni eha Kristofoi komɛi eŋmɛɛ amɛhemɔkɛyeli lɛ he lɛ?
• Mɛni hewɔ wɔbaanyɛ wɔhe wɔye diɛŋtsɛ akɛ Yehowa kojomɔ gbi lɛ miiba?
• Mɛni hewɔ esa akɛ wɔya nɔ wɔsɔle lɛ?
• Sɔlemɔ ni wɔɔya nɔ wɔsɔle lɛ baaye abua wɔ koni wɔhemɔkɛyeli lɛ mli akagbɔjɔ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 26]
Mɛni abɛbua ni kɔɔ yoo okulafo kɛ kojolɔ lɛ he lɛ maa nɔ mi?
[Mfonirii ni yɔɔ baafa 29]
Gbɔmɛi akpekpei abɔ ni yɔɔ ŋmɛnɛ lɛ heɔ amɛyeɔ diɛŋtsɛ akɛ Nyɔŋmɔ ‘baafã amɛhe’