Yesu Fɔmɔ Toiŋjɔlɛ ni Ekɛbaa

JEEE sane ni ajaje akɛ “hejɔlɛ ahi gbɔmɛi ni aná amɛhe tsuijurɔ . . . lɛ ateŋ” lɛ pɛ ji gbalɛ ní wieɔ Yesu fɔmɔ he. Yɛ adafitswaa ni ŋwɛibɔfoi lɛ kɛyaha tookwɛlɔi ní hiɛ fee amɛ yaa lɛ sɛɛ lɛ, Nyɔŋmɔ ha ŋwɛibɔfoi kɛ shɛɛ saji ni kɔɔ Yesu fɔmɔ he yaha Maria kɛ ewu Yosef. Shɛɛ saji nɛɛ ahesusumɔ baaha wɔnu saji ni kɔɔ Yesu fɔmɔ he lɛ ashishi jogbaŋŋ, ni ebaaye ebua wɔ hu koni wɔna nɔ ni hejɔlɛ ni ŋwɛibɔfoi lɛ kɛɛ ebaahi gbɔmɛi ateŋ lɛ tsɔɔ diɛŋtsɛ.

Dani Maria baaná musu ni ebaafɔ́ Yesu lɛ, ŋwɛibɔfo ko ni Biblia lɛ tsĩ egbɛi tã akɛ Gabriel lɛ tee eŋɔɔ. Ŋwɛibɔfo lɛ ŋa lɛ akɛ: “Hejɔlɛ ahao, bo mɔ ni aduroo, Nuŋtsɔ [Yehowa] lɛ kɛo yɛ.” Taakɛ ekolɛ osusuɔ lɛ, Maria hiɛ fee lɛ yaa yɛ ŋamɔ lɛ he ni ekolɛ etsui po fã. Te ŋamɔ nɛɛ shishi hu?

Gabriel tsɔɔ mli akɛ: “Naa, obaaná musu ni ooofɔ́ binuu, ni ooowo lɛ gbɛi akɛ Yesu. Eeetsɔ agbo, ni aaatsɛ́ lɛ Ŋwɛinyo lɛ bi, ni Nuŋtsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.” Akɛni Maria ji oblayoo fro ni ekɛ nuu náko bɔlɛ hewɔ lɛ, ebi bɔ ni aaafee ni enɛ aaaba mli. Gabriel ha ele akɛ abaatsɔ Nyɔŋmɔ mumɔ krɔŋkrɔŋ lɛ nɔ aha ená musu. Bi ni ebaafɔ́ lɛ efeŋ adesa folo ko kɛkɛ.—Luka 1:28-35.

Maŋtsɛ ni Agba Ehe Sane Afɔ̃ Shi

Ŋwanejee ko bɛ he akɛ Gabriel wiemɔi ni ekɛ Maria wie lɛ ha eyoo sɛɛ akɛ bi nɛɛ ni ebaafɔ lɛ ji mɔ ni blema gbalɛi ni agba lɛ wieɔ ehe lɛ. Sanejajemɔ akɛ Yehowa aaaŋɔ Maria bi lɛ ‘tsɛ David maŋtsɛsɛi lɛ aha lɛ’ lɛ baaha Maria—kɛ Yudanyo fɛɛ Yudanyo ni le Ŋmalɛi lɛ amli lɛ—asusu shiwoo ni Nyɔŋmɔ kɛha Maŋtsɛ David ni hi shi yɛ Israel lɛ he.

Yehowa tsɔ gbalɔ Natan nɔ ekɛɛ David akɛ: “Shi owe kɛ omaŋtsɛyeli lɛ aaadamɔ shi shiŋŋ yɛ ohiɛ kɛaatee naanɔ: omaŋtsɛsɛi lɛ aaama shi shiŋŋ kɛaatee naanɔ!” (2 Samuel 7:4, 16) Yehowa wie yɛ David he akɛ: “Maha eseshi ahi shi daa, ni emaŋtsɛsɛi lɛ aaatsɛ tamɔ ŋwɛi gbii. Eseshi lɛ aaahi shi daa, ni emaŋtsɛsɛi lɛ hu aaatamɔ hulu yɛ mihiɛ.” (Lala 89:21, 30, 36, 37) No hewɔ lɛ, jeee heniianaa ni ebalɛ akɛ Maria kɛ Yosef fɛɛ jɛ David weku lɛ mli lɛ.

Jeee enɛɛmɛi pɛ ji gbalɛi ni yɔɔ Hebri Ŋmalɛi lɛ amli ni wieɔ David seshinyo ko ni baaye maŋtsɛ lɛ he. No hewɔ lɛ, eeenyɛ eba akɛ Maria le Yesaia gbalɛ hu ni kɛɔ akɛ: “Afɔ́ bi fufɔoo aha wɔ, aha wɔ binuu hu; ni elumɔyeli lɛ aaakã ekɔŋ nɔ, ni aaatsɛ́ egbɛi akɛ Naakpɛɛ, Ŋaawolɔ, Nyɔŋmɔ hewalɔ, Naanɔ tsɛ kɛ Hejɔlɛ lumɔ. Elumɔyeli lɛ shweremɔ kɛ hejɔlɛ lɛ sɛɛ efoŋ yɛ David maŋtsɛsɛi lɛ nɔ kɛ emaŋtsɛyeli lɛ nɔ, ni ekɛ kojomɔ kɛ jalɛ aaaha ema shi shiŋŋ ni eeewo lɛ hewalɛ kɛjɛ ŋmɛnɛ nɔ aahu kɛyashi naanɔ. Yehowa Zebaot hiɛdɔɔ lɛ aaafee enɛ.”—Yesaia 9:5, 6.

No hewɔ lɛ, nibii babaoo yɛ shɛɛ sane ni Gabriel kɛyaha Maria lɛ mli fe binuu ko ni eeetsɔ naakpɛɛ gbɛ nɔ efɔ́ lɛ. Ebinuu lɛ baatsɔ odehe ni baaye Maŋtsɛ David nii—ebaaye Nyɔŋmɔ Maŋtsɛyeli lɛ nɔ maŋtsɛ kɛaatee naanɔ. Nibii ni Gabriel gba yɛ nii ni Yesu baatsu wɔsɛɛ lɛ he lɛ ahe yɛ sɛɛnamɔ waa kɛha wɔ fɛɛ.

 Beni Yosef na akɛ eŋa ni etsɛ ehe baa lɛ hiɛ musu lɛ, ekpɛ eyiŋ akɛ ekɛ lɛ ehiŋ shi dɔŋŋ. Akɛni ekɛ yoo ni etsɛ ehe baa lɛ náko bɔlɛ pɛŋ hewɔ lɛ, ele akɛ jeee ebi hɔ ahiɛ lɛ. Kwɛ bɔ ni ebaawa kɛha Yosef akɛ eeehé nɔ ni Maria baakɛɛ lɛ yɛ hɔ ni ehiɛ lɛ he lɛ eye. Sanekpakpa lɛ bɔɔ amaniɛ akɛ: “Nuŋtsɔ [Yehowa] lɛ bɔfo jie ehe kpo etsɔɔ lɛ yɛ lamɔ mli, ni ekɛɛ lɛ akɛ: Yosef, David bi, kaashe oŋa Maria lɛ ŋɔɔ gbeyei, shi hɔ ni ehiɛ nɛɛ ejɛ Mumɔ krɔŋkrɔŋ lɛŋ; ebaafɔ́ binuu, ni ooowo lɛ gbɛi akɛ Yesu, ejaakɛ lɛ ebaahere emaŋ lɛ yiwala kɛjɛ amɛhe eshai lɛ amli.”—Mateo 1:20, 21.

Biblia lɛ haaa wɔle bɔ ni Yosef nu gbɛ nɔ ni bi ni abaafɔ́ lɛ baatsɔ ‘ehere emaŋ lɛ yiwala kɛjɛ amɛhe eshai lɛ amli’ lɛ shishi eha lɛ he nɔ ko. Kɛlɛ, nɔ ni akɛɛ Yosef lɛ baaha ená nɔmimaa akɛ eŋa lɛ efeko efɔŋ ko. Yosef fee taakɛ ŋwɛibɔfo lɛ fã lɛ lɛ, ni eŋɔ Maria kɛtee shĩa, ni no feemɔ tsɔɔ akɛ ekɛ lɛ ebote gbalashihilɛ mli.

Ŋmalɛi lɛ amli saji krokomɛi yeɔ buaa wɔ ni wɔnuɔ nɔ ni ŋwɛibɔfo lɛ wie lɛ shishi jogbaŋŋ. Adesai ashishijee mli tɔ̃ɔ ni ŋwɛibɔfo atuatselɔ ko wie eshi jeŋ muu fɛɛ maŋtsɛ ni Yehowa ji lɛ. Hebri Ŋmalɛi haa wɔleɔ akɛ nakai atuatselɔ lɛ wie nibii babaoo, ni emli ekome ji akɛ, gbɛ ni Nyɔŋmɔ tsɔɔ nɔ eyeɔ adesai anɔ lɛ ehiii, ni ákɛ kɛ́ mɛi kɛ kaa kpe lɛ, amɛ fɛɛ amɛbaakpa yɛ Yehowa sɛɛ. (1 Mose 3:2-5; Hiob 1:6-12) Adam kpa yɛ Yehowa sɛɛ. Yɛ esha ni Adam fee hewɔ lɛ, afɔ́ adesai fɛɛ akɛ eshafeelɔi, ni nɔ ni nakai esha lɛ kɛbaa ji gbele. (Romabii 5:12; 6:23) Shi kɛlɛ, afɔ́ɔɔ Yesu akɛ eshafeelɔ ejaakɛ jeee adesa tsɛ ko ni fɔ́ lɛ. Yesu tsɔ esuɔmɔ mli ni ejɛ ekɛ ewala ni eye emuu ákɛ adesa ni kɛ nɔ ni Adam kpata hiɛ lɛ yeɔ egbɔ lɛ ŋmɛ shi akɛ kpɔmɔnɔ kɛkpɔ̃ mɛi fɛɛ kɛjɛ amɛhe eshai lɛ amli, ni eha amɛná hegbɛ hu akɛ amɛaahi shi kɛya naanɔ.—1 Timoteo 2:3-6; Tito 3:6, 7; 1 Yohane 2:25.

 Beni Yesu tsuɔ esɔɔmɔ nitsumɔ yɛ shikpɔŋ lɛ nɔ lɛ, efee nibii komɛi kɛtsɔɔ bɔ ni shihilɛ baafee aha kɛ́ afã esha shishi kɛtee. Eha mɛi ye amɛhe kɛjɛ helai srɔtoi fɛɛ ni yeɔ amɛ lɛ ahe, ni etée gbohii po ashi kɛba wala mli. (Mateo 4:23; Yohane 11:1-44) Nakai naakpɛɛ nibii ni efee lɛ haa wɔnaa nibii ni ebaafee wɔsɛɛ. Yesu diɛŋtsɛ wie akɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo.”—Yohane 5:28, 29.

Shiwoo nɛɛ ni kɔɔ gbohiiashitee ni baaba wɔsɛɛ lɛ haa wɔnaa nɔ̃ hewɔ ni Yesu fɔmɔ—kɛ titri lɛ egbele—lɛ he yɔɔ sɛɛnamɔ waa kɛha wɔ lɛ. Yohane 3:17 lɛ kɛɔ akɛ, Nyɔŋmɔ tsu e-Bi lɛ kɛba je nɛŋ “koni atsɔ enɔ ahere je lɛ yiwala.” Miishɛɛ sane nɛɛ haa wɔkaiɔ sane ni akɛɛ tookwɛlɔi ni miikwɛ amɛtooi yɛ gbi gbɛkɛ ni afɔ́ Yesu lɛ.

“Miishɛɛ Sane Kpele”

“Walaherelɔ ni ji Kristo, Nuŋtsɔ lɛ” fɔmɔ he adafi ni ŋwɛibɔfoi lɛ tswa lɛ ji “miishɛɛ sane kpele” lɛɛlɛŋ kɛha adesai fɛɛ. (Luka 2:10, 11) Binuu ni abaafɔ́ lɛ baafee Mesia, Gbalɔ kpeteŋkpele kɛ Nɔyelɔ ni Nyɔŋmɔ webii ekpa lɛ gbɛ aahu lɛ. (5 Mose 18:18; Mika 5:1) Akɛni eshihilɛ kɛ egbele yɛ shikpɔŋ lɛ nɔ lɛ baafee gbɛ titri ni abaatsɔ nɔ abu jeŋ muu fɛɛ maŋtsɛ ni Yehowa ji lɛ bem hewɔ ni ŋwɛibɔfoi lɛ kɛɛ akɛ: “Anunyam aha Nyɔŋmɔ yɛ ŋwɛi flooflo” lɛ.—Luka 2:14.

Yesu ní Biblia lɛ tsɛ́ɔ lɛ akɛ “naagbee Adam lɛ” ha ana akɛ kɛ́ adesai yaje kaa ni mli wa po mli lɛ, amɛbaanyɛ amɛye Yehowa anɔkwa. (1 Korintobii 15:45) Yesu tsɔ anɔkwa ni eye Yehowa lɛ nɔ eha ana akɛ Satan ji amalelɔ ni yitsoŋ wa. Enɛ ni ha ŋwɛibɔfoi anɔkwafoi ni yɔɔ ŋwɛi lɛ amli fili amɛ lɛ.

Shi agbɛnɛ, nyɛhaa wɔbia ekoŋŋ akɛ, “Ani hiɛnɔkamɔ yɛ diɛŋtsɛ akɛ sane ni ŋwɛibɔfo lɛ jaje yɛ gbi gbɛkɛ ni afɔ́ Yesu lɛ baaba mli?” Hetoo lɛ ji hɛɛ! Ehe baahia ni aná toiŋjɔlɛ yɛ shihilɛ mli bɔni afee ni Nyɔŋmɔ yiŋtoo kɛha shikpɔŋ lɛ ní emli ekome ji shikpɔŋ lɛ ni abaaku sɛɛ afee lɛ paradeiso lɛ anyɛ aba mli. Kɛ́ atsu enɛ he nii lɛ, no lɛ gbɔmɛi ni yɔɔ jeŋ fɛɛ lɛ kɛ suɔmɔ kɛ anɔkwayeli baahi shi. No hewɔ lɛ, kɛ́ Yehowa yiŋtoo lɛ aaaná emlibaa lɛ ebaabi ni akpata mɛi fɛɛ ni teɔ shi woɔ jeŋ muu fɛɛ maŋtsɛ ni eji lɛ ahiɛ. Enɛ jeee sanekpakpa kɛha mɛi ní fĩɔ Satan sɛɛ kɛkɛɔ akɛ tɛi ni Yehowa efolɔ eshwie shi lɛ ehiii lɛ. Yɛ amɛgbɛfaŋ lɛ, Yehowa yiŋtoo lɛ mlibaa baafee hiɛkpatamɔ kɛha amɛ.—Lala 37:11; Abɛi 2:21, 22.

Ofainɛ, kadimɔ akɛ ŋwɛibɔfoi lɛ ekɛɛɛ tookwɛlɔi lɛ akɛ hejɔlɛ aba koni aná gbɔmɛi fɛɛ ahe tsuijurɔ taakɛ atsɔɔ shishi yɛ Bibliai babaoo amli lɛ, shi moŋ, amɛkɛɛ “hejɔlɛ ahi gbɔmɛi ni aná amɛhe tsuijurɔ . . . lɛ ateŋ.” Ni tsɔɔ akɛ mɛi ateŋ ni hejɔlɛ aaahi ji mɛi ni Nyɔŋmɔ kpɛlɛɔ amɛnɔ ni asaŋ eyɔɔ amɛhe tsuijurɔ lɛ. Mɛi ni yɔɔ hemɔkɛyeli diɛŋtsɛ yɛ Yehowa mli lɛ batsɔmɔɔ Yesu kaselɔi kɛ esɛɛnyiɛlɔi anɔkwafoi. Hii kɛ yei ni tamɔ nɛkɛ lɛ jieɔ mlihilɛ kpo amɛtsɔɔ mɛi ni amɛnuɔ nii ahe hu amɛhaa amɛ daa gbi, shi jeee yɛ gbii fioo komɛi pɛ amli.

Ani Mɛi ni Kaseɔ Kristo lɛ Hiɔ Shi yɛ Hejɔlɛ Mli Daa?

Sanekpakpa ni Yesu shiɛ lɛ yɛ hewalɛ, ni enɛ ená mɛi pii ashihilɛ nɔ hewalɛ kpakpa. Mɛi babaoo kɛ Kristofoi ashishitoo mlai miitsu nii yɛ amɛnifeemɔi fɛɛ amli. Ŋmɛnɛ lɛ, kɛ́ mɛi komɛi ni kulɛ amɛyeɔ amɛtsui naa sane lɛ kɛ shihilɛ ko kpe lɛ, amɛbiɔ nɔ ni kɛ́ Yesu ni lɛ ebaafee yɛ he. Mɛi krokomɛi hu ni tsutsu ko lɛ amɛtiuɔ ninámɔ kɛ ŋɔɔmɔyeli sɛɛ lɛ ebayoo akɛ ehe miihia ni amɛkɛ Nyɔŋmɔ sɔɔmɔ he otii amamɔ amɛhiɛ ni asaŋ amɛtsɔɔ mɛi krokomɛi hu ni amɛfee nakai. Mɛi ni feɔ nakai lɛ bɔɔ mɔdɛŋ koni amɛdɛŋ akpɔ ni amɛjie mlihilɛ kpo amɛtsɔɔ mɛi daa. Ani jeee nakai okpaa gbɛ akɛ anɔkwa Kristofoi baafee?

 Eji aŋkroaŋkroi fɛɛ ni hiɛ tsuijurɔ lɛ aaahé be kɛsusu nɔ ni ŋwɛibɔfo lɛ shɛɛ sane lɛ tsɔɔ lɛ he ní amɛhi shi yɛ naa kulɛ, ŋwanejee ko bɛ he akɛ shihilɛ baaŋɔɔ jogbaŋŋ.

Gbalɛi ni kɔɔ Yesu fɔmɔ lɛ he lɛ haa mɛi fɛɛ ni Nyɔŋmɔ yɔɔ amɛhe tsuijurɔ lɛ náa nɔmimaa akɛ amɛbaanyɛ amɛhi shi yɛ toiŋjɔlɛ diɛŋtsɛ mli kɛya naanɔ. Ani jeee enɛ otaoɔ? Wɔbaanyɛ wɔná nɔmimaa akɛ toiŋjɔlɛ he gbalɛ ni yɔɔ miishɛɛ ni ŋwɛibɔfoi lɛ tswa he adafi beni afɔ́ Yesu lɛ baaba mli kɛ̃. Toiŋjɔlɛ efeŋ wiemɔ folo ko kɛkɛ ni jɛɔ mɛi anaa yɛ Blonya beaŋ, shi moŋ abaahi shi yɛ toiŋjɔlɛ mli diɛŋtsɛ kɛya naanɔ.

[Mfonirii ni yɔɔ baafa 7]

Abaanyɛ ahi shi yɛ toiŋjɔlɛ mli taakɛ mɛi ni kaseɔ Kristo lɛ feɔ lɛ, ni esa akɛ afee nakai daa