Mɛi ni Egbe Gilead Nikasemɔ Naa lɛ Anine Shɛ Gbɛtsɔɔmɔ ni Taa Mɔ Tsui Mli Nɔ

YƐ SEPTEMBER 9, 2006 lɛ, afee Buu-Mɔɔ Biblia Gilead Skul klas ni ji 121 lɛ naagbee nifeemɔ lɛ yɛ Watchtower Educational Center ni yɔɔ Patterson yɛ New York lɛ. Eji nifeemɔ ni woɔ mɔ hewalɛ waa.

Geoffrey Jackson ni eji Yehowa Odasefoi a-Nɔyeli Kuu lɛ mlinyo lɛ here nikaselɔi 56 kɛ toibolɔi 6,366 ni jɛ maji srɔtoi anɔ lɛ atuu ni ekɛgbele nifeemɔ lɛ naa. Ewie Lala 86:11 ni kɛɔ akɛ: “Yehowa, tsɔɔmɔ mi ogbɛ lɛ, manyiɛ onɔkwale lɛ mli; feemɔ mitsui ekome, ní mashe ogbɛi lɛ gbeyei” lɛ he. Nyɛminuu Jackson wie nibii etɛ ni ŋmalɛ nɛɛ maa nɔ mi lɛ ahe. Ekɛɛ akɛ: “Klɛŋklɛŋ nɔ lɛ ji gbɛtsɔɔmɔ; nɔ ni ji enyɔ lɛ ji bɔ ni aaafee akɛ gbɛtsɔɔmɔ lɛ atsu nii; ni nɔ ni ji etɛ lɛ ji hewalɛwoo. Ákɛ maŋsɛɛ sanekpakpa shiɛlɔi lɛ, nibii etɛ nɛɛ ahe miihia nyɛ titri yɛ nitsumɔ ni nyɛbaayatsu lɛ mli.” No sɛɛ lɛ, etsɔɔ wiemɔi ni abaaha kɛ sanegbai srɔtoi ni baaya nɔ, ni baama nibii etsɛ nɛɛ anɔ mi.

Hewalɛwoo Wiemɔi

William Malenfant ni tsuɔ nii yɛ asafo lɛ yitso lɛ wie saneyitso ni ji “Shihilɛ Gbɛ ni Fe Fɛɛ” lɛ he. Egbala jwɛŋmɔ kɛtee nɔkwɛmɔnɔ ni Marta nyɛmi yoo Maria fee lɛ nɔ. Gbi ko beni Yesu yasara amɛ lɛ, Maria yata Yesu naji anaa ni ebo ewiemɔ lɛ toi, ni ekɛ no ye klɛŋklɛŋ gbɛhe. Yesu kɛɛ Marta akɛ: “Nɔ ni hi lɛ, Maria ekɔ lɛ, ni no lɛ ashɔŋ yɛ edɛŋ.” (Luka 10:38-42) Wielɔ lɛ kɛɛ akɛ: “Susumɔ nɔ ni enɛ tsɔɔ lɛ he okwɛ. Maria hiɛ kpaŋ nɔ gbi ko gbi ko akɛ eta Yesu naji anaa ebo anɔkwalei ni kɔɔ Nyɔŋmɔ he lɛ atoi—fɛɛ jɛ nihalamɔ kpakpa ni efee lɛ hewɔ.” Beni nyɛminuu Malenfant jie mɛi ni egbe nikasemɔ lɛ naa lɛ ayi yɛ nitsumɔ kpakpa ni amɛkpɛ amɛyiŋ akɛ amɛbaatsu lɛ hewɔ lɛ sɛɛ lɛ, ekɛɛ akɛ: “Nitsumɔ ni nyɛhala akɛ nyɛbaatsu lɛ eha nyɛkɔ shihilɛ gbɛ ni fe fɛɛ.”

No sɛɛ lɛ, Anthony Morris ni eji Nɔyeli Kuu lɛ mlinyo lɛ wie saneyitso ni ji “Nyɛwoa Nuŋtsɔ Yesu Kristo” ni damɔ Romabii 13:14 lɛ nɔ lɛ he. Mɛɛ gbɛ nɔ wɔɔtsɔ wɔfee enɛ? Nyɛminuu Morris tsɔɔ mli akɛ ‘Nuŋtsɔ Yesu Kristo ni wɔɔwo’ lɛ tsɔɔ Yesu nifeemɔi ni wɔɔkase. Enɛ tsɔɔ akɛ esa akɛ wɔkase Yesu sui kɛ nɔkwɛmɔnɔ ni efee efɔ shi lɛ. Wielɔ lɛ kɛɛ akɛ: “Akɛni Yesu yɛ aŋkroaŋkroi ahe miishɛɛ waa hewɔ lɛ, eha mɛi nyɛ amɛbɛŋkɛ lɛ ni amɛnu he akɛ eyɛ amɛhe miishɛɛ.” No sɛɛ lɛ wielɔ lɛ wie bɔ ni Gilead Skul lɛ eha nikaselɔi lɛ ená nilee babaoo lɛ he, taakɛ Efesobii 3:18 lɛ kɛɛ lɛ, ‘koni amɛyoo anɔkwale lɛ lɛɛmɔ kɛ ekɛlɛ kɛ emlikwɔlɛ kɛ enɔkwɔlɛ lɛ.’ Shi ekɛɛ amɛ koni amɛkai kuku 19 lɛ akɛ: “Ni nyɛle Kristo suɔmɔ ni tá nilee fɛɛ nɔ lɛ.” Nyɛminuu Morris wo nikaselɔi lɛ ahewalɛ akɛ: “Kɛ́ nyɛmiifee aŋkro nikasemɔ lɛ, nyɛsusua bɔ ni nyɛaafee nyɛkase Kristo musuŋtsɔlɛ lɛ, ni nyɛkɛ anɔkwayeli ‘awoa Nuŋtsɔ Yesu Kristo.’”

 Naagbee Ŋaawoo ni Gilead Tsɔɔlɔi lɛ Kɛha

Gilead tsɔɔlɔ Wallace Liverance tsa nɔ kɛ saneyitso ni ajie kɛjɛ Abɛi 4:7 lɛ. Ekɛɛ akɛ eyɛ mli akɛ Nyɔŋmɔ he nilee ji nɔ ni he hiaa fe fɛɛ moŋ, shi esa akɛ ‘wɔná sanesɛɛkɔmɔ’ hu, ni tsɔɔ akɛ esa akɛ wɔle anɔkwalei ni kɔɔ sane ko he lɛ fɛɛ ni wɔkwɛ bɔ ni eko kɔɔ eko he ha, bɔni afee ni wɔnu sane tso muu lɛ fɛɛ shishi. Wielɔ lɛ tsɔɔ akɛ sanesɛɛkɔmɔ haa anáa miishɛɛ. Ákɛ nɔkwɛmɔnɔ lɛ, yɛ Nehemia gbii lɛ amli lɛ, Levibii lɛ ‘tsɔɔ mla lɛ shishi koni anu nɔ ni akaneɔ lɛ shishi.’ No sɛɛ lɛ, maŋbii lɛ ná ‘miishɛɛ babaoo; ejaakɛ wiemɔi ní ajaje atsɔɔ amɛ lɛ amɛnu shishi.’ (Nehemia 8:7, 8, 12) Nyɛminuu Liverance mu ewiemɔ lɛ naa akɛ: “Nyɔŋmɔ Wiemɔ ni ajɛ mumɔŋ aŋma lɛ shishi ni aaanu lɛ haa anáa miishɛɛ.”

 Gilead tsɔɔlɔ kroko ni atsɛɔ lɛ Mark Noumair wie saneyitso ni ji “Namɔ Diɛŋtsɛ Ji Ohenyɛlɔ?” lɛ he. Kɛ́ aawu ta lɛ, tui ni asraafoi lɛ tswiaa lɛ gbeɔ amɛ diɛŋtsɛ amɛ webii lɛ ateŋ mɛi komɛi. Ebi akɛ: “Ni mumɔŋ ta ni wɔwuɔ lɛ hu?” Kɛkɛ ni etsa nɔ akɛ: “Kɛ́ wɔkwɛɛɛ ni ahi lɛ, wɔyɔseŋ mɔ tuuŋtu ni ji henyɛlɔ lɛ, ni wɔbaaye wɔ diɛŋtsɛ wɔwebii lɛ awui.” Ekolɛ awuŋayeli haŋ mɛi komɛi ayoo mɔ tuuŋtu ni ji amɛhenyɛlɔ. Awuŋayeli ha Maŋtsɛ Saul shi ehenyɛlɔi ni ji Filistibii lɛ moŋ, ni eka akɛ egbe David ni ekɛlɛ fɛɛ jaa Nyɔŋmɔ kome lɛ. (1 Samuel 18:7-9; 23:27, 28) No sɛɛ lɛ wielɔ lɛ tsa nɔ akɛ: “Ni kɛ́ ebalɛ akɛ okɛ maŋsɛɛ sanekpakpa shiɛlɔ ko ni bɔɔ mɔdɛŋ fe bo yɛ gbɛi pii anɔ lɛ miitsu nii hu? Ani obaawie oshi onaanyo asraafonyo lɛ ni okɛye lɛ awui, aloo okɛ miishɛɛ baakpɛlɛ nɔ akɛ mɛi krokomɛi baanyɛ abɔ mɔdɛŋ fe bo yɛ gbɛi srɔtoi anɔ? Wɔjwɛŋmɔ ni wɔɔgbala kɛya emuu ni mɛi krokomɛi yeee lɛ nɔ lɛ haŋ wɔyoo mɔ tuuŋtu ni ji wɔhenyɛlɔ lɛ. Nyɛwua nyɛshia Satan, mɔ tuuŋtu ni ji henyɛlɔ lɛ.”

Niiashikpamɔi ni Yɔɔ Miishɛɛ kɛ Sanebimɔi ni Tsɔɔ Mɔ Nii

Gilead tsɔɔlɔ Lawrence Bowen ji mɔ ni tsu nifeemɔ ni nyiɛ sɛɛ ni hiɛ saneyitso akɛ “Tsu Sanekpakpa Jajelɔ Nitsumɔ Lɛ” he nii, ni sanebimɔi kɛ niiashikpamɔi fata he. Wielɔ lɛ kɛɛ akɛ: “Maŋsɛɛ sanekpakpa jajelɔ ni atsɔse lɛ yɛ Gilead lɛ nitsumɔ titri ji ni egbɛ sanekpakpa lɛ eshwã, ni klas nɛɛ mli bii lɛ fee nakai yɛ he fɛɛ he ni amɛna mɛi yɛ.” Afee niiashikpamɔi ni yɔɔ miishɛɛ lɛ ekomɛi ahe nɔkwɛmɔnɔ.

Michael Burnett kɛ Scott Shoffner ni amɛ fɛɛ amɛji Betel weku lɛ mli bii lɛ tsu nifeemɔi ni nyiɛ sɛɛ lɛ ahe nii. Amɛbibii Nitsumɔhe Niji Ajinafoi Akuu mli bii ni jɛ Australia, Barbados, Korea, kɛ Uganda lɛ saji. Nibii ni ajinafoi akuu lɛ mli bii lɛ wie lɛ tsɔɔ mɔdɛŋ ni amɛbɔɔ koni amɛkwɛ maŋsɛɛ sanekpakpa jajelɔi lɛ, ní amɛha amɛná wɔɔhe ni sa kɛ helatsamɔ. Ajinafoi akuu lɛ mli bii lɛ ma nɔ mi akɛ maŋsɛɛ sanekpakpa jajelɔi ni yeɔ omanye lɛ sumɔɔ akɛ amɛkase hei ni akɛ amɛyaa lɛ shihilɛ.

Naamuu ni Kanyãa Mɔ

John E. Barr ni kɛ afii babaoo esɔmɔ akɛ nɔyeli kuu lɛ mlinyo lɛ ji mɔ ni ha wiemɔ krɛdɛɛ ni yitso ji “Nyɛshea Nyɔŋmɔ Gbeyei ni Nyɛkɛ Anunyam Ahaa Lɛ” lɛ. Ewie Kpojiemɔ 14:6,7 lɛ he, ni jɛmɛ kɛɔ akɛ: “Mina bɔfo kroko miifiliki yɛ ŋwɛi teŋ, ni ehiɛ naanɔ sanekpakpa ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ, ni ekɛ gbee wulu kɛɛ: Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.”

Nyɛminuu Barr wo skulbii lɛ hewalɛ ni amɛkai nibii etɛ ni nakai ŋwɛibɔfo lɛ feɔ lɛ. Klɛŋklɛŋ lɛ, esa akɛ ejaje naanɔ sanekpakpa lɛ etsɔɔ—akɛ, amrɔ nɛɛ Kristo miiye nɔ akɛ Maŋtsɛ. Wielɔ lɛ kɛɛ akɛ: “Wɔle jogbaŋŋ akɛ awó Kristo maŋtsɛ yɛ afi 1914. No hewɔ lɛ esa akɛ ajaje sanekpakpa nɛɛ yɛ je lɛŋ fɛɛ.” Nɔ ni ji enyɔ lɛ, ŋwɛibɔfo lɛ jaje akɛ: “Nyɛshea Nyɔŋmɔ gbeyei.” Wielɔ lɛ tsɔɔ mli akɛ esa akɛ mɛi ni gbeɔ skul lɛ naa lɛ aye amɛbua amɛ-Biblia kaselɔi koni amɛná woo amɛha Nyɔŋmɔ, bɔni afee ni amɛkafee nibii ni esaaa Nyɔŋmɔ hiɛ. Nɔ ni ji etɛ lɛ, ŋwɛibɔfo lɛ fã akɛ: ‘Nyɛkɛ anunyam ahaa Nyɔŋmɔ.’ Ewo skulbii lɛ hewalɛ akɛ: “Nyɛhiɛ akakpaa nɔ kɔkɔɔkɔ akɛ, wɔmiisɔmɔ ní wɔkɛwo Nyɔŋmɔ hiɛnyam, shi jeee wɔ diɛŋtsɛ.” No sɛɛ beni Nyɛminuu Barr wieɔ ‘kojomɔ ŋmɛlɛtswaa lɛ’ he lɛ, ekɛɛ akɛ: “Be ní akɛbaajaje naagbee kojomɔ lɛ eshɛ etã. Mɛi babaoo yɛ wɔshikpɔŋkuku lɛ mli lolo ni esa akɛ amɛnu sanekpakpa lɛ dani efee nɔ ni ekpe sɛɛ tsɔ̃.”

Beni nɛkɛ wiemɔi nɛɛ gbɛɔ yɛ mɛi 56 ni gbeɔ skul lɛ naa lɛ atoiaŋ lolo lɛ, aha amɛteŋ mɔ fɛɛ mɔ yijiemɔ wolo ni atsu amɛ kɛtee shikpɔŋ lɛ naagbeehei lɛ. Ŋaawoo ni kanyaa mɔ ni akɛha yɛ nakai gbi lɛ nɔ lɛ ta mɛi ni egbe skul lɛ naa lɛ kɛ mɛi krokomɛi fɛɛ ni yɔɔ nifeemɔ lɛ shishi lɛ atsuiaŋ waa diɛŋtsɛ.

[Akrabatsa ni yɔɔ baafa 17]

KLASBII LƐ AHE SAJI

Maji srɔtoi anɔ ni amɛjɛ kɛba: 6

Maji srɔtoi anɔ ni aha amɛ nitsumɔ yɛ mli: 25

Nikaselɔi lɛ ayifalɛ: 56

Afii abɔ ni amɛye lɛ mlijaa: 35.1

Afii abɔ ni amɛkɛhi anɔkwale lɛ mli lɛ mlijaa: 18.3

Afii abɔ ni amɛkɛhi be-fɛɛ sɔɔmɔ nitsumɔ lɛ mli lɛ mlijaa: 13.9

[Mfoniri ni yɔɔ baafa 18]

Buu-Mɔɔ Biblia Gilead Skul Klasbii ni Ji 121 ni Gbe Nikasemɔ Naa

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.