Mɛni Osusuɔ akɛ Ehaa Ayeɔ Omanye?

AKƐNI ale Jesse Livermore akɛ eji mɔ ni jɛɔ nilee mli ekpɛɔ eyiŋ yɛ jarayeli saji amli hewɔ lɛ, mɛi komɛi buɔ lɛ akɛ eji mɔ ni eye omanye fe fɛɛ yɛ Amerika jarayeli gbɛjianɔtoo mli. Enɛ hewɔ lɛ, ená nii kpɔtɔɔ. Ewoɔ atadei fɛfɛji ni lɛ diɛŋtsɛ eha akpɛ, ehi shĩa wulu kɛ emli tsũi 29 mli, ni etaa tsɔne ni jara wa fe fɛɛ yɛ nakai beaŋ lɛ eko mli.

Nuu ko ni atsɛɔ lɛ David * hu bɔ mɔdɛŋ akɛ eeetiu shihilɛ ni tamɔ nakai sɛɛ. Akɛni lɛ ji nitsumɔ he wulu ko nɔkwɛlɔ sɛɛmɔ kɛ mɔ ni kwɛɔ nitsumɔ lɛ nɔ hewɔ lɛ, ebaanyɛ ebatsɔ nitsumɔhe lɛ niji ni yɔɔ nakai kpokpaa lɛ nɔ lɛ fɛɛ nɔkwɛlɔ. Ninamɔ kɛ gbɛihemɔ bafee kaa kɛha lɛ. Shi kɛlɛ, David kpɛ eyiŋ ni eshi nitsumɔ lɛ. David kɛɛ akɛ: “Mile akɛ mináŋ nitsumɔ ni awoɔ mɔ nyɔmɔ babaoo yɛ mli dɔŋŋ.” Ani osusuɔ akɛ David yiŋkpɛɛ lɛ ja?

Mɛi babaoo susuɔ akɛ ninámɔ kɛ gbɛihemɔ ji nɔ ni haa ayeɔ omanye. Shi kɛlɛ, niiatsɛmɛi baanyɛ anu he lolo akɛ amɛfee shwɛm, ni amɛnaaa miishɛɛ yɛ shihilɛ mli. Yɛ anɔkwale mli lɛ, nakai ji bɔ ni ebalɛ yɛ Owula Livermore gbɛfaŋ. Yɛ eninámɔ lɛ fɛɛ sɛɛ lɛ, etsui kumɔ, ekɛ naagbai kpe, ni eye ŋkɔmɔ babaoo yɛ eshihilɛ mli. Ená jwɛŋmɔŋ nɔnyɛɛ, egbãla fite shii abɔ, ni ekɛ ebii ateŋ ejɔɔɔ. Yɛ naagbee lɛ, Owula Livermore nibii babaoo ŋmɛɛ lɛ, ni gbi ko lɛ, eyata dãanumɔhe ni yɔɔ gbɔiatoohe ko, ni ebɔi enibii ni eŋmɛɛ lɛ lɛ ahe  ŋkɔmɔyeli. Ehé dãa, ni no sɛɛ lɛ eŋma wolo koni ekɛ eŋa aye shɛɛ. Beni enu dãa lɛ egbe naa lɛ, etee tsu bibioo ko ni yɔɔ gbɔiatoohe lɛ mli ni eyatswa ehe tu.

Eyɛ mli akɛ anyɛŋ amu sane naa akɛ enii ni eyɔɔ lɛ pɛ hewɔ egbe ehe lɛ moŋ, shi kɛlɛ eniiashikpamɔ lɛ maa anɔkwale ni Biblia mli sane nɛɛ ji lɛ nɔ mi akɛ: “Mɛi ni taoɔ nii pii aná lɛ . . . [kɛ] piŋmɔi babaoo egbulɔ amɛhe.”—1 Timoteo 6:9, 10.

Ani eeenyɛ efee akɛ mɛi ni susuɔ akɛ ninámɔ, hegbɛ, loo gbɛihemɔ haa ayeɔ omanye lɛ miilaka amɛhe? Ani onaa ohe akɛ oye omanye? Mɛni hewɔ? Mɛɛ nibii anɔ odamɔɔ onaa ohe akɛ oye omanye? Mɛni náa bɔ ni obuɔ omanyeyeli ohaa lɛ nɔ hewalɛ? Yɛ sane ni nyiɛ sɛɛ lɛ mli lɛ, wɔbaapɛi ŋaawoo kpakpa ni eye ebua mɛi akpekpei abɔ koni amɛye omanye yɛ shihilɛ mli lɛ mli. Ha wɔkwɛ bɔ ni bo hu obaanyɛ ofee oye omanye.

[Shishigbɛ niŋmaa]