Obaanyɛ Okpee Ahum lɛ Naa

MƐI babaoo kɛ naagbai ni mli wawai ni tamɔ ahum miikpe yɛ jaramɔ bei nɛɛ amli. Shi yɛ Kristofoi agbɛfaŋ lɛ, suɔmɔ ni amɛyɔɔ kɛha Nyɔŋmɔ, kɛ eshishitoo mlai lɛ anɔ ni amɛyeɔ lɛ yeɔ ebuaa amɛ ni amɛkpeɔ naagbai anaa. Yɛ mɛɛ gbɛ? Abaanyɛ ana hetoo lɛ yɛ abɛbua ko ní Yesu Kristo wie he lɛ mli. Ekɛ ekaselɔi ni feɔ toiboo lɛ to ‘ŋaalelɔ ko ni ma etsu yɛ tɛsaa nɔ’ lɛ he. Yesu kɛɛ akɛ: “Nugbɔ tue, ni faai ba, ni kɔɔyɔɔ tswa, ni amɛshimɔ tsũ lɛ, shi ewuleee; ejaakɛ ato shishi yɛ tɛsaa nɔ.”—Mateo 7:24, 25.

Kadimɔ akɛ eyɛ mli akɛ nuu ni awie ehe yɛ abɛbua lɛ mli lɛ ji ŋaalelɔ moŋ, shi ekɛ amanehulu—ni ji nugbɔ ni tue, faai ni ba, kɛ kɔɔyɔɔ ni tswa—kpe. No hewɔ lɛ, Yesu etsɔɔɔ akɛ ekaselɔi lɛ baaje naagbai ni mli wawai fɛɛ amli ní amɛhi shi yɛ toiŋjɔlɛ kɛ miishɛɛ sɔŋŋ mli ni nɔ ko gbaaa amɛnaa. (Lala 34:20; Yakobo 4:13-15) Shi ekɛɛ akɛ Nyɔŋmɔ anɔkwa tsuji baanyɛ amɛsaa amɛhe kɛha jaramɔ bei ni tamɔ nɛkɛ ni amɛdamɔ naa hu.

Yesu je abɛbua lɛ shishi akɛ: ‘Mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, maŋɔ lɛ mato ŋaalelɔ ni ma etsu yɛ tɛsaa nɔ lɛ he.’ Yɛ anɔkwale mli lɛ, Yesu miiwie Kristofoi asui ni esa akɛ aná lɛ ahe shi jeee tsui diɛŋtsɛ amaamɔ he. Mɛi ni boɔ Kristo wiemɔi lɛ atoi lɛ kɛ sanesɛɛkɔmɔ kɛ hiɛshikamɔ tsuɔ nii. Amɛtswaa Kristofoi asui kpakpai kɛ amɛnifeemɔ amɛmaa Kristo tsɔɔmɔi lɛ ni ji tɛsaa lɛ nɔ, kɛtsɔ nibii ni atsɔɔ amɛ lɛ ni amɛkɛtsuɔ nii lɛ nɔ. Nɔ ni yɔɔ miishɛɛ ji akɛ, okadifeemɔŋ tɛsaa nɛɛ bɛ su lɛ hiɛ. Esa akɛ nuu ni awie ehe yɛ abɛbua lɛ mli lɛ atsa shi “kwɔŋkwɔŋ” dani eyanina. (Luka 6:48) Yɛ nakai gbɛ nɔ nɔŋŋ lɛ, Yesu kaselɔi lɛ yaa nɔ amɛkɛ mɔdɛŋbɔɔ babaoo kaseɔ sui ni baaha amɛná tsuishitoo, ni enɛ haa amɛnyɛɔ amɛbɛŋkɛɔ Nyɔŋmɔ.—Mateo 5:5-7; 6:33.

Mɛni Yesu sɛɛnyiɛlɔi lɛ baafee kɛ amɛkɛ naagbai ni tamɔ ahum ní kaa amɛ-Kristofoi ashishitoo nɔ̃ ni atswa ama shi shiŋŋ lɛ kpe? Suɔmɔ mli ni amɛjɛɔ amɛfeɔ toiboo amɛhaa Kristo tsɔɔmɔi lɛ kɛ Kristofoi asui ni amɛyɔɔ lɛ wajeɔ amɛ yɛ nakai fimɔ bei lɛ amli, ni nɔ ni fe fɛɛ lɛ, ebaaye ebua amɛ beni Harmagedon baatswa tamɔ ahum yɛ be ni kã wɔhiɛ lɛ mli. (Mateo 5:10-12; Kpojiemɔ 16:15, 16) Hɛɛ, mɛi ni kɛ Kristo tsɔɔmɔi lɛ tsuɔ nii lɛ kɛ omanyeyeli miiye naagbai ni tswaa tamɔ ahum lɛ anɔ. Bo hu obaanyɛ ofee nakai nɔŋŋ.—1 Petro 2:21-23.