Sanebimɔi ni Jɛ Kanelɔi Adɛŋ

Mɛni ji naasoɔmɔ ni awie he yɛ Kpojiemɔ 7:3 lɛ?

Kpojiemɔ 7:1-3 lɛ kɛɔ akɛ: ‘Mina ŋwɛibɔfoi ejwɛ damɔ shikpɔŋ koji ejwɛ lɛ nɔ, ni amɛhiɛ shikpɔŋ lɛ nɔ kɔɔyɔi ejwɛ lɛ mli, koni kɔɔyɔɔ ko akatswa yɛ shikpɔŋ lɛ nɔ loo ŋshɔ nɔ loo tso ko nɔ. Ni mina bɔfo kroko miikwɔ kɛmiijɛ hulu shiteehe kɛmiiba, ni ehiɛ Nyɔŋmɔ hiɛkalɔ lɛ naasɔomɔ nɔ̃; ni ebolɔ kɛ gbee waa ekɛɛ bɔfoi ejwɛ lɛ ni aha amɛ hegbɛ akɛ amɛfee shikpɔŋ lɛ kɛ ŋshɔ lɛ efɔŋ lɛ akɛ: Nyɛkafea shikpɔŋ lɛ loo ŋshɔ lɛ loo tsei lɛ efɔŋ ko kɛyashi beyinɔ ní wɔkɛ naasɔomɔ nɔ̃ aaakadi wɔ-Nyɔŋmɔ lɛ tsuji lɛ ahiɛŋtsei anɔ dã.’

Kɛ́ aŋmɛɛ “kɔɔyɔi ejwɛ lɛ” ahe lɛ, no kɛ “amanehulu kpeteŋkpele lɛ” baaba, ni abaakpata apasa jamɔ kɛ jeŋ fɔŋ nɛɛ hiɛ. (Kpojiemɔ 7:14) “Wɔ-Nyɔŋmɔ lɛ tsuji lɛ” ji Kristo nyɛmimɛi ni afɔ amɛ mu ni yɔɔ shikpɔŋ lɛ nɔ lɛ. (1 Petro 2:9, 16) No hewɔ lɛ, gbalɛ nɛɛ tsɔɔ akɛ beni amanehulu kpeteŋkpele lɛ aaafɛ lɛ, no mli lɛ agbe Kristo nyɛmimɛi lɛ anaasɔomɔ lɛ naa. Shi kɛlɛ, Biblia mli ŋmalɛi krokomɛi tsɔɔ akɛ atsɔɔ hiɛ asɔoɔ mɛi ni afɔ amɛ mu lɛ anaa. Enɛ hewɔ lɛ, bei komɛi lɛ wɔwieɔ klɛŋklɛŋ naasɔomɔ kɛ naagbee naasoɔmɔ he. Mɛni ji srɔtofeemɔ ni yɔɔ naasɔomɔi enyɔ nɛɛ ateŋ?

Nyɛhaa wɔsusua nɔ ni wiemɔ ni ji “naasɔomɔ” lɛ tsɔɔ lɛ he wɔkwɛa. Yɛ blema beaŋ lɛ, akɛ naasɔomɔ nɔ̃ tsuɔ nii kɛkadiɔ woji. Wiemɔ ni ji “naasɔomɔ” lɛ hu baanyɛ akɔ kadimɔ nii ni yɔɔ woji lɛ amli lɛ he. Yɛ nakai gbii lɛ amli lɛ, akɛ naasɔomɔ nɔ̃ fɔɔ woji loo nibii krokomɛi anaa sɔomɔ kɛtsɔɔ akɛ amɛja, loo akɛtsɔɔ mɔ ni ji nɔtsɛ.—1 Maŋtsɛmɛi 21:8; Hiob 14:17.

 Paulo kɛ mumɔ krɔŋkrɔŋ lɛ to naasɔomɔ nɔ̃ he, ni ekɛɛ akɛ: ‘Nyɔŋmɔ ji mɔ ni haa wɔ kɛ nyɛ fɛɛ fiɔ shi yɛ Kristo mli [loo wɔbatsɔmɔɔ Kristo nii] ni efɔ wɔ mu, lɛ nɔŋŋ ni esɔo wɔnaa, ni ekɛ Mumɔ lɛ yibaafoo nɔ̃ eha wɔ yɛ wɔtsuii amli hu.’ (2 Korintobii 1:21, 22) No hewɔ lɛ, Yehowa kɛ emumɔ krɔŋkrɔŋ lɛ efɔ nɛkɛ Kristofoi nɛɛ amu koni ekɛtsɔɔ akɛ enii ji amɛ.

Shi kɛlɛ, mɛi ni afɔ amɛ mu lɛ anaasɔomɔ lɛ hiɛ fãi srɔtoi enyɔ. Esoro klɛŋklɛŋ naasɔomɔ lɛ yɛ naagbee nɔ̃ lɛ he yɛ (1) yiŋtoo kɛ (2) be gbɛfaŋ. Klɛŋklɛŋ naasɔomɔ lɛ ji nɔ ni akɛhalaa mɔ hee koni ebafata Kristofoi ni afɔ amɛ mu lɛ ahe. Akɛ naagbee naasɔomɔ lɛ maa nɔ aduatsɔ akɛ mɔ ni ahala lɛ ní asɔo enaa nɛɛ eye anɔkwa kwraa kɛmɔ shi. Kɛ́ mɔ ni afɔ lɛ mu lɛ ná naagbee naasɔomɔ lɛ, no dani akɛ naasɔomɔ nɔ̃ lɛ baakadi ‘ehiɛtso nɔ’ ní no aha ayɔse lɛ akɛ eji ‘wɔ-Nyɔŋmɔ lɛ tsulɔ’ ní aka lɛ akwɛ ni eye anɔkwa diɛŋtsɛ. Naasɔomɔ ni atsĩ tã yɛ Kpojiemɔ yitso 7 lɛ miiwie naagbee naasɔomɔ nɛɛ he.—Kpojiemɔ 7:3.

Bɔfo Paulo ŋma eyaha Kristofoi ni afɔ amɛ mu lɛ, ni ewie be ni klɛŋklɛŋ naasɔomɔ lɛ jeɔ shishi lɛ he akɛ: ‘Lɛ nɔŋŋ enɔ nyɛ hu nyɛkɛ nyɛhiɛ fɔ̃ beni nyɛnu anɔkwale lɛ wiemɔ lɛ ni ji nyɛ yiwalaheremɔ lɛ sanekpakpa lɛ; lɛ nɔŋŋ emli akɛ shiwoo lɛ Mumɔ krɔŋkrɔŋ lɛ sɔo nyɛnaa yɛ, beni nyɛhe nyɛye lɛ.’ (Efesobii 1:13, 14) Biblia lɛ tsɔɔ akɛ yɛ shihilɛi babaoo amli lɛ, asɔo Kristofoi ni hi shi yɛ klɛŋklɛŋ afii 100 lɛ mli lɛ anaa beni amɛnu sanekpakpa lɛ ní amɛhe Kristo amɛye lɛ sɛɛ nɔŋŋ. (Bɔfoi lɛ Asaji 8:15-17; 10:44) Nakai naasɔomɔ lɛ tsɔɔ akɛ Nyɔŋmɔ ekpɛlɛ amɛnɔ. Shi kɛlɛ, no etsɔɔɔ akɛ Nyɔŋmɔ ekpɛlɛ amɛ nɔ kwraa. Mɛni hewɔ?

Paulo tsɔɔ akɛ “asɔo” Kristofoi ni akɛ mumɔ efɔ amɛ mu lɛ ‘anaa ato kpɔmɔ gbi lɛ.’ (Efesobii 4:30) Enɛ tsɔɔ akɛ bei pii lɛ, afii babaoo nyiɛɔ klɛŋklɛŋ naasoɔmɔ lɛ sɛɛ. Esa akɛ mɛi ni afɔ amɛ mu lɛ aya nɔ amɛye anɔkwa kɛjɛ gbi nɔ ni akɛ mumɔ krɔŋkrɔŋ lɛ sɔo amɛnaa lɛ aahu kɛyashi ‘gbi ni aaakpɔ̃’ amɛ kɛjɛ amɛheloo gbɔmɔtsei lɛ amli—kɛyashi beni amɛbaagboi. (Romabii 8:23; Filipibii 1:23; 2 Petro 1:10) No hewɔ lɛ, Paulo nyɛ ekɛɛ beni eshwɛ fioo ni ebaagbo lɛ akɛ: “Foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni kã shi ha mi ji jalɛ akekre lɛ.” (2 Timoteo 4:6-8) Agbɛnɛ hu Yesu kɛɛ Kristofoi akuu ko ni afɔ amɛ mu lɛ akɛ: “Feemɔ anɔkwafo kɛyashi gbele mli, ni mahao wala akekre lɛ.”—Kpojiemɔ 2:10; 17:14.

Wiemɔ ni ji “akekre” lɛ hu kɛ odaseyeli kroko haa akɛ be bakãa klɛŋklɛŋ naasɔomɔ lɛ kɛ naagbee nɔ lɛ teŋ. Mɛni hewɔ? Nɔ ni afɔɔ feemɔ yɛ blema beaŋ kɛ́ foidalɔ ko ye klɛŋklɛŋ gbɛhe ji akɛ, ahaa lɛ akekre. Bɔni afee ni foidalɔ lɛ nine ashɛ akekre lɛ nɔ lɛ, esa akɛ efee babaoo fe ehe ni ekɛaawo foidamɔ lɛ mli kɛkɛ. Esa akɛ egbe foidamɔ lɛ naa. Yɛ nakai gbɛ nɔŋŋ nɔ lɛ, ja Kristofoi ni afɔ amɛ mu lɛ eŋmɛ amɛtsui shi kɛyashi gbele mli—kɛjɛ klɛŋklɛŋ naasɔomɔ lɛ mli kɛyashi naagbee nɔ̃ lɛ nɔ—dani amɛnine baashɛ akekre ni ji naanɔ shihilɛ ni gbele bɛ mli lɛ nɔ yɛ ŋwɛi.—Mateo 10:22; Yakobo 1:12.

Mɛɛ be Kristofoi shwɛɛnii ni afɔ amɛ mu ní ná klɛŋklɛŋ naasɔomɔ lɛ anine baashɛ naagbee naasɔomɔ lɛ nɔ? Akɛ naasɔomɔ nɔ̃ baakadi amɛteŋ mɛi ni yɔɔ shikpɔŋ lɛ nɔ lolo lɛ “ahiɛŋtsei anɔ” dani amanehulu kpeteŋkpele lɛ baafɛ́. Beni abaaŋmɛɛ kɔɔyɔi ejwɛ ni kɛ amanehulu baaba lɛ he lɛ, no mli lɛ asɔo mumɔŋ Israel lɛ naa agbe naa momo, eyɛ mli akɛ amɛteŋ mɛi fioo baahi wala mli lolo akɛ adesai ní kpaako amɛbaagbe amɛshikpɔŋ nɔ sɔɔmɔ lɛ naa.