Bɔ ni Ooofee Ofĩ Shi Shiŋŋ kɛ́ Obi Tse Atũa

KRISTOFONYO yoo ko ni wɔbaatsɛ́ lɛ Joy bɔ mɔdɛŋ akɛ etsɔse ebinuu koni esɔmɔ Yehowa Nyɔŋmɔ. Shi beni eshwɛ fioo ni ebinuu lɛ baaye afii 20 lɛ, etse atũa ni eshi shĩa. Joy tsɔɔ mli akɛ: “Sane nɛɛ dɔ mi fe nɔ fɛɛ nɔ. Minu he akɛ afee minɔ trumu, ni enɛ kumɔ mitsui ni minijiaŋ je wui. Mifee basaa ni minaaa nɔ ni mifeɔ mihe.”

Ekolɛ, bo hu obɔ mɔdɛŋ akɛ obaatsɔse obii lɛ koni amɛsumɔ Nyɔŋmɔ ni amɛsɔmɔ lɛ, shi sɛɛ mli lɛ, amɛteŋ mɔ kome loo mɛi enyɔ komɛi kpale yɛ esɛɛ. Te ooofee tɛŋŋ odamɔ nijiaŋwujee nifeemɔ ni tamɔ nakai naa? Mɛni baaye abua bo ni ofĩ shi shiŋŋ yɛ Yehowa sɔɔmɔ mli?

Beni Yehowa Bii Komɛi Tse Atũa

Klɛŋklɛŋ nɔ ni baaye abua bo ji ni obaayɔse akɛ Yehowa le bɔ ni onuɔ he ohaa diɛŋtsɛ. Wɔkaneɔ yɛ Yesaia 49:15 lɛ akɛ: “Aso yoo hiɛ aaakpa ebi fufɔoo nɔ, aloo emusuŋ etsɔŋ lɛ yɛ emusuŋ bi hewɔ? Ni kɛ́ mɛnɛɛmɛi ahiɛ aaakpa nɔ tete lɛ, mi lɛ mihiɛ kpaŋ onɔ!” Hɛɛ, Yehowa nuɔ nii ahe tamɔ adesai tsɛmɛi kɛ nyɛmɛi feɔ lɛ. Belɛ, kwɛ miishɛɛ ni ebaaná beni ebii ni ji ŋwɛibɔfoi lɛ fɛɛ jieɔ eyi ni amɛsɔmɔɔ lɛ lɛ. Beni Yehowa jieɔ blematsɛ Hiob naa kɛjɛɔ “ahum mli” lɛ, etsĩ miishɛɛ bei komɛi ni ekɛ ŋwɛibɔfoi ni ji eweku ni efee ekome lɛ ná lɛ tã. Ebi lɛ akɛ: “Beni mito shikpɔŋ lɛ shishi lɛ, nɛgbɛ oyɔɔ? . . . Beni leebi ŋulamii lɛ fɛɛ lá nyamɔ lala shikome ni Nyɔŋmɔ bii lɛ fɛɛ kwa bɔ oshe lɛ?”—Hiob 38:1, 4, 7.

Sɛɛ mli lɛ, anɔkwa Nyɔŋmɔ lɛ ŋwɛibɔfoi ni amɛye emuu lɛ ateŋ mɔ kome tse ehiɛ etũa, ni ebatsɔ Satan, ni eshishi ji “Shitee-kɛwolɔ.” Kɛfata he lɛ, klɛŋklɛŋ adesai ni abɔ ni ji Adam kɛ eŋa Hawa ni eye emuu lɛ hu tse Yehowa hiɛ atũa ni amɛyafata atuatselɔ lɛ he. (1 Mose 3:1-6; Kpojiemɔ 12:9) Sɛɛ mli lɛ, Nyɔŋmɔ bii krokomɛi hu ni ji ŋwɛibɔfoi tse ehiɛ atũa ni “[amɛ]shi amɛ diɛŋtsɛ amɛshihilɛhe lɛ.”—Yuda 6.

Ŋmalɛi lɛ haaa wɔle bɔ ni Yehowa nu he eha beni ebii ni eye emuu lɛ tse ehiɛ atũa lɛ. Kɛlɛ, Biblia lɛ feɔ lɛ faŋŋ akɛ: “Yehowa na akɛ gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ. Kɛkɛ ni Yehowa shwa ehe akɛ efee gbɔmɔ yɛ shikpɔŋ lɛ nɔ, ni edɔ lɛ yɛ  etsui mli.” (1 Mose 6:5, 6) Kɛfata he lɛ, beni Israelbii ni ji maŋ ni Yehowa ehala kɛha ehe lɛ tse ehiɛ atũa lɛ, ‘edɔ’ lɛ ni ‘emli wo la.’—Lala 78:40, 41.

Belɛ ŋwanejee bɛ he akɛ Yehowa nuɔ he ehaa fɔlɔi ni atuatsemɔ gbɛ ni amɛbii ekɔ lɛ haoɔ amɛ lɛ. Ekɛ ŋaawoo kpakpa kɛ hewalɛwoo wiemɔi ni baaye abua fɔlɔi ni tamɔ nakai koni amɛnyɛ amɛdamɔ shihilɛ ni amɛkɛkpe lɛ naa ewo e-Wiemɔ ni ji Biblia lɛ mli. Nyɔŋmɔ woɔ amɛ ŋaa koni amɛŋɔ amɛhaomɔi lɛ amɛfɔ̃ enɔ, ni amɛba amɛhe shi, ni asaŋ amɛte shi amɛwo Satan Abonsam. Ha wɔsusu bɔ ni ŋaawoo nɛɛ kɛ nitsumɔ baanyɛ aye abua bo ni ofĩ shi shiŋŋ kɛ́ obi tse atũa lɛ he wɔkwɛ.

Ŋɔɔ Ohaomɔ lɛ Ofɔ̃ Yehowa Nɔ

Yehowa le akɛ kɛ́ fɔlɔi na akɛ amɛbi ko ekɔ gbɛ ko ni baaha eye ehe awui loo mɔ ko aye lɛ awui lɛ, ehaoɔ amɛ fe nibii babaoo. Bɔfo Petro tsɔɔ gbɛ kome ni aaatsɔ nɔ adamɔ naagba nɛɛ kɛ ekrokomɛi anaa. Eŋma akɛ: “Nyɛŋɔa nyɛhaomɔ fɛɛ nyɛfɔ̃a [Yehowa] enɔ, ejaakɛ lɛ ejwɛŋɔ nyɛnɔ.” (1 Petro 5:7) Mɛni hewɔ ŋaawoo nɛɛ he yɔɔ sɛɛnamɔ titri kɛha fɔlɔi ni bii etse atũa lɛ?

Beni obi lɛ edako lɛ, ohaa ohiɛ hiɔ ehe bɔni afee ni ekapila ehe aloo nɔ ko miiye lɛ awui, ni ekolɛ no mli lɛ, kɛ́ okɛ gbɛtsɔɔmɔ ha lɛ, eboɔ toi. Shi beni edaa lɛ, ekolɛ eyɛ mli akɛ hewalɛ ni oyɔɔ yɛ enɔ lɛ naa bɔi shibaa moŋ, shi suɔmɔ ni oyɔɔ kɛha lɛ ni haa obuɔ ehe koni nɔ ko fɔŋ akafee lɛ lɛ he ejɔɔɔ. Yɛ anɔkwale mli lɛ, ekolɛ suɔmɔ ni oyɔɔ kɛha lɛ lɛ mli yawa moŋ.

No hewɔ lɛ, kɛ́ sɛɛ mli ni obi lɛ tse atũa ni ekɛfite wekukpaa ni kã ekɛ Nyɔŋmɔ teŋ loo no ha egba la ewo emli, aloo no ha eye ehe awui yɛ gbɛ ko nɔ lɛ, ekolɛ no baaha onu he akɛ bo esa akɛ ashwa. Joy ní wɔtsĩ etã kɛtsɔ hiɛ lɛ nu he nakai. Ewie akɛ: “Akɛni daa nɛɛ, mitsui yeɔ akɛ minine enyɛ shi hewɔ lɛ, no ha mitee nɔ misusu nibii ni eho lɛ ahe akɛ mana he ni mitɔ̃ yɛ lɛ lo.” Shihilɛi ni tamɔ nakai amli titri Yehowa sumɔɔ koni ‘oŋɔ ohaomɔ lɛ ofɔ̃ enɔ.’ Kɛ́ ofee nakai lɛ, ebaaye ebua bo. Lalatsɛ lɛ lá akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.” (Lala 55:23)  Ashɛje Joy mii yɛ gbɛ ni tamɔ nakai nɔ. Etsɔɔ mli akɛ: “Mifɔse nibii ni yɔɔ mitsuiŋ lɛ fɛɛ mishwie Yehowa hiɛ. Mikɛ bɔ ni minuɔ he mihaa lɛ eteee lɛ, ni enɛ ha mihe jɔ mi fe nɔ fɛɛ nɔ.”

Ákɛ fɔlɔ ni yeee emuu lɛ, ekolɛ yɛ obi lɛ tsɔsemɔ mli lɛ, otɔ̃ yɛ nibii komɛi amli. Shi esaaa akɛ ohaa enɛ haoɔ bo fe nine. Yɛ anɔkwale mli lɛ, Yehowa efeee nakai ejaakɛ lalatsɛ lɛ lá akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ, Nuŋtsɔ, namɔ po aaanyɛ shi adamɔ?” (Lala 130:3) Kɛ́ tɔmɔ ko po eyabaaa yɛ ogbɛfaŋ beni otsɔseɔ obi lɛ, loloolo lɛ ebaanyɛ etsɔ atuatselɔ. No hewɔ lɛ, okɛ bɔ ni onuɔ he ohaa lɛ afɔ̃ Yehowa hiɛ yɛ sɔlemɔ mli, ni ebaaye ebua bo koni onyɛ odamɔ shihilɛ ni okɛkpe lɛ naa. Kɛlɛ, kɛ́ obaanyɛ ofĩ shi shiŋŋ yɛ Yehowa sɔɔmɔ mli ní Satan nine akashɛ onɔ lɛ, no lɛ ebaabi ni ofee babaoo.

Ba Ohe Shi

Petro ŋma akɛ: “Nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli.” (1 Petro 5:6) Mɛni hewɔ esa akɛ oba ohe shi kɛ́ obi tse atũa? Kɛ́ obi tse atũa lɛ, edɔɔ bo ni onuɔ he akɛ abaanyɛ ashwa bo yɛ gbɛ ko nɔ, ni kɛfata he lɛ, enifeemɔ woɔ bo hiɛgbele. Ekolɛ, obaahao akɛ obi lɛ nifeemɔi kɛ heguɔgbee eba nyɛweku lɛ nɔ, ni enɛ baahao bo waa titri kɛ́ ashwie lɛ kɛjɛ Kristofoi asafo lɛ mli. Hiɛgbele baanyɛ aje onijiaŋ wui ni okaya Kristofoi akpeei.

Kɛ́ okɛ shihilɛ ni tamɔ nakai kpe lɛ, ebaabi ni okɛ nilee diɛŋtsɛ atsu nii. Abɛi 18:1 bɔɔ kɔkɔ akɛ: “Mɔ ni etse ehe lɛ, akɔnɔ nii etaoɔ, ni etseɔ nɔ ni hi ha lɛ fɛɛ hiɛ atũa.” Kɛ́ yɛ awerɛho ni oyeɔ lɛ fɛɛ sɛɛ ni otee Kristofoi akpeei lɛ, no baaye abua bo koni onine ashɛ gbɛtsɔɔmɔ kɛ hewalɛwoo ni he hiaa waa nɔ. Joy wie akɛ: “Shishijee lɛ, no mli lɛ misumɔɔɔ ni minaa mɔ ko hiɛ, shi mikai akɛ nibii ni mifeɔ kɛsɔmɔɔ Nyɔŋmɔ lɛ he hiaa waa. Kɛfata he lɛ, eji mihi shĩa kulɛ, masusu minaagbai lɛ ahe fe nine. Kpeei ni mitee lɛ ye bua mi ni mikɛ mijwɛŋmɔ ma nifeemɔi ni tswaa mɔ emaa shi yɛ Nyɔŋmɔ sɔɔmɔ mli lɛ anɔ. Midaa shi akɛ mitseee mihe kɛjɛɛɛ minyɛmimɛi hii kɛ yei lɛ ahe, ni no ha amɛkɛ suɔmɔ ye bua mi.”—Hebribii 10:24, 25.

Kaimɔ hu akɛ, oweku lɛ mlibii lɛ ateŋ mɔ fɛɛ mɔ “[b]aatere lɛ diɛŋtsɛ ejatsu” ákɛ Kristofonyo. (Galatabii 6:5) Yehowa miikpa fɔlɔi agbɛ akɛ amɛsumɔ amɛbii ni amɛtsɔse amɛ. Eekpa bii lɛ hu agbɛ akɛ amɛbo amɛfɔlɔi atoi ni amɛbu amɛ. Kɛ́ fɔlɔi bɔ mɔdɛŋ fɛɛ ni amɛaanyɛ koni amɛkɛ “Nuŋtsɔ [Yehowa] lɛ tsɔsemɔ kɛ ŋaawoo” atsɔse amɛbii lɛ, fɔlɔi lɛ diɛŋtsɛ náa Nyɔŋmɔ hiɛ duromɔ. (Efesobii 6:1-4) Kɛ́ gbekɛ ko kɛ tsɔsemɔ ni efɔlɔi jɛɔ suɔmɔ mli amɛkɛhaa lɛ lɛ tsuuu nii ni etse atũa lɛ, lɛ diɛŋtsɛ egbɛi efiteɔ. Abɛi 20:11 kɛɔ akɛ: “Gbekɛ tete haa akɛ enifeemɔ nii yoɔ lɛ, akɛ enitsumɔ lɛ he tse, ni eja lo.” Yɛ anɔkwale mli lɛ, atũa ni Satan tse lɛ hako Yehowa he guɔ agbo yɛ mɛi ni le anɔkwale ni yɔɔ sane lɛ mli lɛ ahiɛ.

Tee Shi Owo Abonsam

Petro bɔ kɔkɔ akɛ: “Nyɛhiɛ akãa shi, nyɛsaraa; ejaakɛ nyɛhenyɛlɔ, abonsam lɛ, nyiɛ tamɔ jata ni hũuɔ eetao mɔ ni eeemi.” (1 Petro 5:8) Abonsam feɔ enii tamɔ jata, bei pii lɛ, ekɛ ehiɛ kaa mɛi ni darako ní amɛbɛ niiashikpamɔ lɛ. Yɛ blema lɛ, no mli lɛ jatai foɔ  shi yɛ Israel ni amɛmɔmɔɔ shĩa kooloi. Kɛ́ toobi ko kpalaŋ kɛkɛ tooku ni ekɛnyiɛ lɛ he lɛ, no haa efeɔ mlɛo kɛhaa jatai lɛ akɛ amɛaamɔ lɛ. Henumɔ ni too nyɛ yɔɔ kɛha ebi baanyɛ aha ekɛ ehe awo oshara mli kɛbu ebi lɛ he. Kɛlɛ, too nyɛ ni esa jogbaŋŋ lɛ tete nyɛŋ adamɔ jata hiɛ. No hewɔ lɛ, ehe bahia koni aná tookwɛlɔi ni yɔɔ ekãa koni amɛbu tooku lɛ he.—1 Samuel 17:34, 35.

Bɔni afee ni Yehowa abu efonirifeemɔŋ tooku lɛ he kɛjɛ “jata ni hũuɔ” lɛ he lɛ, eto tookwɛlɔi ahe gbɛjianɔ yɛ esafo lɛ mli koni amɛkwɛ etooku lɛ yɛ “tookwɛlɔ nukpa” Yesu Kristo hiɛnyiɛmɔ shishi. (1 Petro 5:4) Petro wo hii ni akɛ hegbɛi ni tamɔ nakai ewo amɛdɛŋ lɛ ŋaa akɛ: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛ̃ɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa.” (1 Petro 5:1, 2) Ákɛ fɔlɔi lɛ, kɛ́ nyɛfi nɔkwɛlɔi nɛɛ asɛɛ lɛ, amɛbaanyɛ amɛye amɛbua gbekɛ ni ekɔ gbɛ fɔŋ lɛ koni esaa ekɛ Nyɔŋmɔ teŋ.

Kɛ́ ehe bahia koni Kristofoi nɔkwɛlɔi atsɔse obi atuatselɔ lɛ, ekolɛ obaafee nibii komɛi kɛtsĩ tsɔsemɔ ni akɛbaaha lɛ lɛ naa. Shi ebaafee tɔmɔ ni yɔɔ hiɛdɔɔ akɛ ooofee nakai. Petro wie akɛ: “Nyɛtsĩa [Abonsam] lɛ gbɛ”—shi jeee nɔkwɛlɔi ni Nyɔŋmɔ ehala lɛ.—1 Petro 5:9.

Kɛ́ Akɛ Tsɔsemɔ ni Mli Wa Ha

Kɛ́ obi lɛ ji Kristofonyo ni abaptisi lɛ ní etsakeee etsui lɛ, no lɛ ekolɛ akɛ tsɔsemɔ ni mli wa fe fɛɛ baaha lɛ—abaashwie lɛ kɛjɛ asafo lɛ mli. Kɛ́ ebalɛ nakai lɛ, afii abɔ ni eye kɛ shihilɛi komɛi ni baatsɔɔ he ni ebaabi ni okɛ lɛ abɔ kɛyashi.

Kɛ́ obi lɛ edako ni ekɛ bo yɔɔ shĩa lɛ, no lɛ taakɛ eji lɛ, obaaya nɔ okwɛ lɛ. Kɛfata he lɛ, tsɔsemɔ kpakpa he baahia lɛ, ni nakai sɔ̃ lɛ kã onɔ. (Abɛi 1:8-18; 6:20-22; 29:17) Obaanyɛ okɛ lɛ afee Biblia nikasemɔ, ni okɛ lɛ asusu nibii ahe. Obaanyɛ ogbala ejwɛŋmɔ kɛya ŋmalɛi srɔtoi anɔ, kɛ agbɛnɛ hu woji ni “tsulɔ anɔkwafo kɛ nilelɔ” lɛ feɔ lɛ anɔ. (Mateo 24:45) Obaanyɛ okɛ lɛ aya Kristofoi akpeei hu ni oha eta omasɛi. Obaafee enɛɛmɛi fɛɛ kɛ hiɛnɔkamɔ akɛ ekɛ ŋaawoo ni ajɛɔ Ŋmalɛi lɛ amli akɛhaa lɛ baatsu nii.

Shi kɛ́ obi ni ashwie lɛ kɛjɛ asafo lɛ mli lɛ eda ní lɛ diɛŋtsɛ ekwɛɔ ehe lɛ, no lɛ esoro bɔ ni okɛ lɛ baaye. Bɔfo Paulo wo Kristofoi ni hi Korinto lɛ ŋaa akɛ: “Nyɛkɛ amɛ akabɔ: kɛji mɔ ko ni atsɛ́ɔ lɛ nyɛmi lɛ ji ajwamaŋbɔlɔ loo hiɛjoolɔ loo wɔŋjalɔ loo mɔjɛlɔ loo daatɔlɔ loo amimyelɔ lɛ, lɛ lɛ nyɛkɛ lɛ akayea nii tete.” (1 Korintobii 5:11) Eyɛ mli akɛ nyɛweku lɛ mli saji komɛi ahe nitsumɔ baabi ni okɛ obi ni ashwie lɛ lɛ ashãra yɛ gbɛ ko nɔ moŋ, shi ákɛ Kristofonyo lɛ, esa akɛ omia ohiɛ koni okɛ lɛ akabɔ bɔ ni esaaa.

Kɛ́ obi kɔ gbɛ fɔŋ ni Kristofoi nɔkwɛlɔi jɛ Biblia lɛ mli amɛtsɔse lɛ lɛ, ebafeŋ nɔ ni nilee yɔɔ mli akɛ oookpoo amɛtsɔsemɔ lɛ aloo oooba lɛ shi. Kɛ́ ofi obi atuatselɔ lɛ sɛɛ lɛ, no ebuŋ ehe diɛŋtsɛ kɛjɛŋ Abonsam he. Yɛ anɔkwale mli lɛ, kɛ́ ofee nakai lɛ, obaafite wekukpaa ni yɔɔ okɛ Nyɔŋmɔ teŋ lɛ. Shi kɛ́ okɛ nɔkwɛlɔi lɛ fee ekome lɛ, no baaha ofi “shi shiŋŋ yɛ hemɔkɛyeli lɛ mli” ni obaanyɛ oye obua obi lɛ jogbaŋŋ.—1 Petro 5:9.

Yehowa Baaye Ebua Bo

Kɛ́ obi tse atũa lɛ, kaimɔ akɛ jeee bo pɛ okɛ shihilɛ ni tamɔ nakai ekpe. Fɔlɔi Kristofoi krokomɛi hu kɛ shihilɛ ni tamɔ nakai ekpe. Ekɔɔɔ he eko nɔ̃ kaai ni wɔkɛkpeɔ lɛ, Yehowa baanyɛ eye ebua wɔ.—Lala 68:20.

Tsɔ sɔlemɔ nɔ okɛ ohe afɔ̃ Yehowa nɔ. Okɛ Kristofoi asafo lɛ abɔ daa. Okɛ mɛi ni ahala akɛ nɔkwɛlɔi lɛ afee ekome yɛ tsɔsemɔ ni amɛkɛhaa lɛ mli. Kɛ́ ofee nakai lɛ, obaanyɛ ofi shi shiŋŋ, ni onɔkwɛmɔnɔ kpakpa lɛ baanyɛ aye abua obi lɛ koni ekpɛlɛ nine ni Yehowa fɔ̃ɔ lɛ koni eku esɛɛ kɛba eŋɔɔ lɛ nɔ.—Maleaki 3:6, 7.

[Mfonirii ni yɔɔ baafa 18]

Wajemɔ ohe kɛtsɔ sɔlemɔ kɛ Kristofoi akpeeiyaa nɔ