Nuu kɛ Yoo Abɔ Amɛ ní Amɛye Amɛbua Amɛhe

NUU kɛ yoo shwelɛ ji amɛfee ekome kɛhi shi be fɛɛ be. Nyɔŋmɔ ni bɔ amɛ nakai. Yehowa na akɛ ehiii akɛ klɛŋklɛŋ nuu ni abɔ ni ji Adam aaahi shi ekometoo. No hewɔ lɛ, Nyɔŋmɔ fee ‘yelikɛbualɔ ko ni sa eha nuu lɛ ákɛ ehefatalɔ.’

Yehowa ha wɔ̀ ni tsii nyɔ Adam nɔ, kɛkɛ ni ejie eŋmawui lɛ ekome ni “eŋɔ ŋmawu ni ejie lɛ . . . efee yoo ni ekɛ lɛ ba nuu lɛ ŋɔɔ.” Beni Yehowa kɛ bɔɔ nɔ̃ ni he yɔɔ fɛo nɛɛ yaha Adam lɛ, Adam kɛ miishɛɛ jaje akɛ: “Agbɛnɛ enɛ ji wu ní jɛ miwui lɛ amli kɛ loo ní jɛ miheloo lɛ mli.” Yei asui ni akɛbɔ Hawa ni eye emuu lɛ ha ebafee mɔ ni asumɔɔ diɛŋtsɛ. Nakai nɔŋŋ hii asui ni akɛbɔ Adam ni eye emuu lɛ ha ebafee mɔ ni sa bulɛ. Abɔ amɛ koni amɛye amɛbua amɛhe. Biblia lɛ kɛɔ akɛ: “No hewɔ lɛ nuu aaashĩ etsɛ kɛ enyɛ, ni eeekpɛtɛ eŋa he, ni amɛaatsɔ̃ heloo kome.”—1 Mose 2:18-24.

Shi kɛlɛ, ŋmɛnɛ, wekui amli miigbala, ni bei pii lɛ nibii tamɔ yii kɛ ahorabɔɔ fiteɔ wekukpãa ni kã nuu kɛ yoo teŋ lɛ loo amɛhiɔ shi akɛ pɛsɛmkunyatsɛmɛi. Nɔ ni ejɛ akaŋ ni yei kɛ hii shĩɔ lɛ mli kɛba ji béi kɛ naagbai. Enɛɛmɛi fɛɛ kɛ yiŋtoo ni Nyɔŋmɔ kɛbɔ nuu kɛ yoo lɛ kpãaa gbee. Abɔ nuu koni ebatsu nitsumɔ ko ni yɔɔ miishɛɛ he nii yɛ shikpɔŋ lɛ nɔ. Abɔ yoo ni aha lɛ hegbɛ krɛdɛɛ ni yɔɔ nyam akɛ eye ebua ewu. Abɔ amɛ koni amɛfee ekome kɛtsu nii. Kɛjɛ adesai abɔɔ mli tɔ̃ɔ lɛ, hii kɛ yei ni sheɔ Nyɔŋmɔ gbeyei lɛ kɛ anɔkwayeli ebɔ mɔdɛŋ akɛ amɛaatsu hegbɛi ni Yehowa kɛha amɛ lɛ ahe nii, ni enɛ haa amɛmii shɛɔ amɛhe babaoo ni amɛtsui hu nyɔɔ amɛmli. Mɛɛ hegbɛi atsɔɔ ní akɛha hii kɛ yei, ni te wɔɔfee tɛŋŋ wɔtsu amɛhe nii?

[Mfoniri ni yɔɔ baafa 3]

Abɔ nuu kɛ yoo koni amɛtsu hegbɛi komɛi ni yɔɔ nyam ahe nii yɛ Nyɔŋmɔ gbɛjianɔtoo mli