Samuel Ha Anɔkwa Jamɔ Shwere

GBALƆ Samuel kã enanemɛi Israelbii ni bi koni aha amɛ maŋtsɛ lɛ ahiɛ, ni ewo amɛ hewalɛ koni amɛbo Nyɔŋmɔ toi. Ekpa Yehowa fai koni eha nugbɔ ni naa wa anɛ bɔni afee ni emaŋbii lɛ ana akɛ Yehowa gbalɔ ji lɛ lɛɛlɛŋ. No mli lɛ, eji ŋmaakpamɔ be yɛ Israel, ni nugbɔ ni naa wa efɔɔɔ nɛmɔ yɛ nakai beaŋ. Kɛlɛ, Nyɔŋmɔ ha nugbɔ shimɔ ni enɛ waa. Enɛ ha Yehowa kɛ enajiaŋdamɔlɔ Samuel ahe gbeyei mɔmɔ gbɔmɛi lɛ.—1 Samuel 12:11-19.

Gbalɔ Samuel ji woloŋmalɔ hu. Eyinɔ saji ni eyi tɔ kɛ nifeemɔi ni yɔɔ miishɛɛ lɛ kɔɔ nifeemɔi ni tee nɔ aaafee afii 330 mli lɛ he, ni Israel Kojolɔi lɛ anifeemɔi ni sa kadimɔ waa lɛ hu fata he. Ákɛ nɔkwɛmɔnɔ lɛ, akɛ Samson ni ji gbɔmɔ ni hi shi diɛŋtsɛ ni asaŋ eji gbɔmɔ ni he wa fe fɛɛ ni ehi shi pɛŋ lɛ he sane efee lalafoo wiemɔi kɛ sinii srɔtoi. (Kojolɔi, yitso 13–16) Kɛfata he lɛ, Samuel ŋmala Rut kɛ Rut shaayoo Naomi ní amɛji yei okulafoi kɛ ohiafoi lɛ ahe saji eshwie shi. Yei enyɔ nɛɛ hi shi diɛŋtsɛ, ni amɛshihilɛ yagbe naa yɛ miishɛɛ mli. Amɛ hu amɛsane lɛ yɛ miishɛɛ tamɔ Samson nɔ̃ lɛ.—Rut, yitso 1–4.

Mɛni wɔbaanyɛ wɔkase kɛjɛ Samuel wala shihilɛ kɛ agbɛnɛ hu nibii ni eŋmala eshwie shi lɛ amli? Mɛɛ gbɛ nɔ etsɔ eha anɔkwa jamɔ shwere?

Egbekɛbiiashi

Elkana ni ji Samuel tsɛ lɛ ji Yehowa jálɔ kɛ wu ni yɔɔ suɔmɔ. Elkana ŋa Hana ji yoo ko ni kɛ ekãa sɔmɔɔ Nyɔŋmɔ. Hana ni no mli lɛ eji kene lɛ tee Yehowa we lɛ yɛ Shilo ni ekɛ ekãa sɔle ni ewo shi akɛ: “Yehowa Zebaot! Kɛji oookwɛ oweyoo amanehulu nɛɛ, ni oookai mi, ni ohiɛ kpaŋ oweyoo nɔ, shi moŋ oooha oweyoo binuu lɛ, no lɛ maŋɔ lɛ maha Yehowa ewala gbii fɛɛ, ni asooyi naa esaŋ eyiteŋ.” (1 Samuel 1:1-11) Enɛ tsɔɔ akɛ, ekɛ gbekɛ lɛ baaha koni esɔmɔ Yehowa ewala gbii abɔ fɛɛ.

Hana sɔle yɛ etsui mli. Sane nɛɛ he amaniɛbɔɔ lɛ tsɔɔ akɛ “enaabui kɛkɛ tsɔmɔɔ.” Osɔfonukpa Eli yasusu yɛ gbɛ ni ejaaa nɔ akɛ Hana etɔ dãa, ni ekã ehiɛ. Shi Hana kɛ bulɛ gbála nibii amli etsɔɔ lɛ, ni Eli kɛɛ lɛ akɛ: “Yaa yɛ hejɔlɛ mli, ni Israel Nyɔŋmɔ lɛ aaahao onibimɔnii ni obi lɛ lɛ!” Yehowa fee nakai, ejaakɛ amaniɛbɔɔ lɛ kɛfata he akɛ: “Eba mli akɛ, beni ekɛɛ eshɛɔ afi naakplɔ lɛ, Hana ená musu ni efɔ́ binuu, ni ewo lɛ gbɛi akɛ Samuel; ejaakɛ ekɛɛ: Yehowa ŋɔɔ miba lɛ yɛ.”—1 Samuel 1:12-20.

Akɛ “Nuŋtsɔ [Yehowa] lɛ tsɔsemɔ kɛ ŋaawoo” tsɔse Samuel. (Efesobii 6:4) Beni Hana tse Samuel fufɔ pɛ ni eŋɔ lɛ eyaha Osɔfonukpa Eli yɛ Nyɔŋmɔ we lɛ yɛ Shilo. Eli tsɔse gbekɛ lɛ ni “[e]sɔmɔ Yehowa.” Enɛ ha Hana mii shɛ ehe jogbaŋŋ, ni wɔnaa enɛ yɛ shidaa wiemɔi ni taa mɔ mli ni jɛ enaa ní Samuel diɛŋtsɛ ŋma he sane efɔ̃ shi yɛ sɛɛ mli lɛ mli.—1 Samuel 2:1-11.

Kɛ́ oji fɔlɔ lɛ, ani owoɔ obii lɛ hewalɛ koni amɛkɛ Yehowa sɔɔmɔ afee amɛnitsumɔ? Gbɛ ni fe fɛɛ ni mɔ kɛ nyɛmɔ kɛ hewalɛ ni eyɔɔ lɛ aaatsu nii ji ní ekɛ ehe aaawo anɔkwa jamɔ gbɛɛ-kɛshwãmɔ mli.

Samuel hi shi jogbaŋŋ yɛ sɔlemɔwe lɛ. “[E]da yɛ Yehowa hiɛ” ni “esa Yehowa kɛ gbɔmɛi fɛɛ hiɛ hu.” Eba ejeŋ jogbaŋŋ, ni no ha mɛi ná ehe miishɛɛ.—1 Samuel 2:21, 26.

Shi Eli bihii yakagbɔmɛi ni ji Hofni kɛ Pinehas baaa amɛjeŋ jogbaŋŋ, ni “amɛbuuu Yehowa.” Amɛkɛ amɛhe wo jeŋba shara mli ni amɛhalaa nibii ni mɛi kɛbashãa afɔle yɛ sɔlemɔwe lɛ amli nɔ ni hi fe fɛɛ lɛ amɛhaa amɛhe. Nyɔŋmɔ tsu gbalɔ ko eyakɛɛ Eli akɛ  abaagbala etoi, ni abaagbe ebihii enyɔ lɛ akɛ etoigbalamɔ lɛ fã. (1 Samuel 2:12, 15-17, 22-25, 27, 30-34) Yehowa tsu Samuel hu ni ekɛ fɔbuu kojomɔ kroko yaha Eli.

Samuel Sɔmɔ ákɛ Gbalɔ

Nyɔŋmɔ kɛɛ Samuel akɛ: “Makojo [Eli] ewe lɛ kɛaatee naanɔ, yɛ nɔsha ni ele lɛ hewɔ, ejaakɛ ebihii lɛ eje amɛhe yakagbɔmɛi, ni etutũuu ehiɛ ewooo amɛ.” Ewa kɛha Samuel akɛ eeekɛɛ Eli sane nɛɛ, shi Eli kɛɛ lɛ koni egba lɛ nɔ fɛɛ nɔ ní ekashiu nɔ. No hewɔ lɛ, Samuel gba lɛ nibii fɛɛ ni Yehowa wie lɛ. Enɛ bi ekãafeemɔ diɛŋtsɛ yɛ egbɛfaŋ!—1 Samuel 3:10-18.

Beni Samuel daa lɛ, Israel fɛɛ bale lɛ akɛ Nyɔŋmɔ gbalɔ. (1 Samuel 3:19, 20) Nibii ni Samuel wie lɛ bɔi mlibaa beni Filistibii lɛ ye Israelbii lɛ anɔ kunim lɛ. Hofni kɛ Pinehas gboi yɛ nakai ta lɛ mli, ni Filistibii lɛ shɔ̃ Yehowa kpaŋmɔ adeka lɛ. Beni Eli nu akɛ ebihii lɛ egboi ni ashɔ̃ Adeka lɛ, ekpa yɛ esɛi lɛ nɔ eyagbee esɛɛgbɛ ni ekuɛ ku ni egbo.—1 Samuel 4:1-18.

Afii 20 sɛɛ lɛ, Samuel wo Israelbii lɛ hewalɛ koni amɛtsi amɛhe kɛjɛ apasa jamɔ he. Amɛbo lɛ toi ni amɛshɛrɛ wɔji ni amɛyɔɔ lɛ fɛɛ amɛshwie, ni amɛhi ŋmaa ni amɛjaje amɛhe eshai lɛ. Samuel sɔle ni eshã shãa afɔle eha amɛ. Mɛni jɛ mli kɛba? Nɔ ni ba ji akɛ, beni Filistibii lɛ tee Israelbii lɛ tutuamɔ lɛ, Nyɔŋmɔ gbɛ amɛta lɛ ni Israelbii lɛ tiu amɛ, ni amɛye amɛnɔ kunim. Yehowa dɛŋ yelikɛbuamɔ naa lɛ, nibii tee nɔ jogbaŋŋ eha Israelbii lɛ, ni amɛnine shɛ maji ni Filistibii lɛ shɔ̃ yɛ amɛdɛŋ lɛ anɔ ekoŋŋ.—1 Samuel 7:3-14.

Yɛ anɔkwale mli lɛ, Samuel ha anɔkwa jamɔ shwere. Ákɛ nɔkwɛmɔnɔ lɛ, ekwɛ ni akɛ tai amli nihaanii lɛ ekomɛi wula sɔlemɔwe lɛ. Efata he ni ato Hehoo gbijurɔyelii kɛ Levibii agbonaakwɛlɔi lɛ ahe gbɛjianɔ. (1 Kronika 9:22; 26:27, 28; 2 Kronika 35:18) Daa afi lɛ, Samuel shiɔ eshĩa yɛ Rama ni ayakojoɔ yɛ Israel maji srɔtoi amli. Ale lɛ akɛ nuu anɔkwafo ni kwɛɛɛ hiɛaŋ. Akɛni mɛi buɔ Samuel hewɔ lɛ, no ha enyɛ eye ebua amɛ ni amɛsɔmɔ Nyɔŋmɔ. (1 Samuel 7:15-17; 9:6-14; 12:2-5) Ŋwanejee bɛ he akɛ enɔkwayeli kɛ ekãa ni eyɔɔ yɛ Nyɔŋmɔ sɔɔmɔ mli lɛ kanya mɛi babaoo ni amɛkɔ enane. Ani gbɛ ni Samuel kɔ lɛ kanyaa bo hu koni okɔ enane?

Israelbii lɛ Bi Koni Aha Amɛ Maŋtsɛ

Beni Samuel gbɔ lɛ, ewo ebihii Yoel kɛ Abia kojolɔi. “[Amɛ]nyiɛɛɛ egbɛ̀i lɛ anɔ, shi moŋ amɛyadi sɛɛnamɔ sɛɛ, ni amɛheheɔ nyɔɔŋnii, ni amɛtsɔɔ kojomɔ hiɛ amɛbuɔ shi.” Amɛnifeemɔi lɛ ha Israel maŋ onukpai lɛ yabi koni aha amɛ maŋtsɛ. (1 Samuel 8:1-5) Samuel eyanáaa nibimɔ nɛɛ he miishɛɛ. Kɛlɛ, beni esɔle yɛ he lɛ, Yehowa kɛɛ lɛ akɛ: “Jeee bo amɛkwa, shi mi moŋ amɛkwa, akɛ mikaye amɛnɔ maŋtsɛ.” (1 Samuel 8:6, 7) Nyɔŋmɔ kɛɛ Samuel koni efee nɔ ni maŋ lɛ biɔ lɛ eha amɛ, koni ebɔ amɛ kɔkɔ hu akɛ kɛ́ maŋtsɛ bɔi amɛnɔ yeli lɛ, hegbɛi komɛi ni amɛyɔɔ lɛ baaŋmɛɛ amɛ. Beni maŋbii lɛ kɛɛ amɛyaaa amɛbaaa ákɛ ja aha amɛ maŋtsɛ lɛ, Yehowa to gbɛjianɔ ni Samuel yafɔ Saul mu akɛ maŋtsɛ.—1 Samuel 8:6-22; 9:15-17; 10:1.

Eyɛ mli akɛ Samuel náaa maŋtsɛ womɔ lɛ he miishɛɛ moŋ, shi ekɛ ehe wo mli. Beni Israelbii lɛ ye Amonbii lɛ anɔ kunim yɛ ta ko ni amɛwu lɛ mli lɛ, eha maŋ lɛ bua amɛhe  naa yɛ Gilgal ni ema nɔ mi eha amɛ akɛ awo Saul maŋtsɛ. (1 Samuel 10:17-24; 11:11-15) Samuel tĩ Israel yinɔsane mli eha maŋ lɛ, ni ewo maŋtsɛ lɛ kɛ emaŋbii lɛ ŋaa koni amɛbo Yehowa toi. No beaŋ ni Samuel sɔle ni Nyɔŋmɔ ha nugbɔ ni naa wa ni akpaaa gbɛ ní awie he yɛ sane nɛɛ shishijee lɛ nɛ kɛtsɔɔ akɛ E-bo esɔlemɔ lɛ toi lɛ. Nakai nugbɔ ni naa wa ni nɛ lɛ ha maŋ lɛ kpɛlɛ nɔ akɛ amɛfeee jogbaŋŋ akɛ amɛkpoo Yehowa. Beni amɛbi Samuel koni esɔle eha amɛ lɛ, ekɛɛ amɛ akɛ: “Enɛ akagbale mi fɔ̃ɔŋfɔ̃ akɛ mafee esha mashi Yehowa ni mafɔ̃ɔ faikpamɔ kɛ nyɛ hamɔ, shi moŋ matsɔɔ nyɛ gbɛ kpakpa kɛ jalɛ gbɛ.” Kwɛ anɔkwa suɔmɔ ni anáa ahaa Yehowa kɛ ewebii he nɔkwɛmɔnɔ kpakpa ni enɛ ji! (1 Samuel 12:6-24) Ani bo hu okɛ miishɛɛ fiɔ teokrase gbɛjianɔtoi asɛɛ ni asaŋ osɔleɔ ohaa onanemɛi heyelilɔi lɛ?

Klɛŋklɛŋ Maŋtsɛmɛi Enyɔ ní Ye Israel Nɔ

Kulɛ Saul ji mɔ ko ni baa ehe shi ní Nyɔŋmɔ sumɔɔ esane. (1 Samuel 9:21; 11:6) Shi sɛɛ mli lɛ, efɔ̃ɔ Nyɔŋmɔ gbɛtsɔɔmɔ kɛ nitsumɔ. Ákɛ nɔkwɛmɔnɔ lɛ, Samuel kã ehiɛ akɛni etooo etsui shi emɛɛɛ lɛ koni ebashã afɔle lɛ taakɛ ekɛɛ lɛ lɛ, shi moŋ lɛ diɛŋtsɛ eyashã lɛ hewɔ. (1 Samuel 13:10-14) Beni Saul gbo toi ni ebáa Amalek Maŋtsɛ Agag yi lɛ, Samuel kɛɛ lɛ akɛ: “Yehowa egba okɛ Israel maŋtsɛyeli lɛ teŋ ŋmɛnɛ, ni eŋɔha onaanyo ko ni hi feɔ.” Samuel diɛŋtsɛ gbe Agag, ni no sɛɛ lɛ, eyaye Saul he ŋkɔmɔ.—1 Samuel 15:1-35.

Sɛɛ mli lɛ, Yehowa bi Samuel akɛ: “Mɛɛ beyinɔ nɔŋŋ oooye Saul he ŋkɔmɔ kɛyashi, ejaakɛ ona akɛ mikwa lɛ Israel nɔ maŋtsɛ lɛ yeli?” Kɛkɛ ni Yehowa tsu Samuel Betlehem koni eyafɔ Ishai bihii lɛ ateŋ mɔ kome mu akɛ maŋtsɛ. Bɔni afee ni Samuel ana Ishai bihii lɛ ateŋ mɔ ni Yehowa ehala lɛ lɛ, eha amɛbaho yɛ ehiɛ ekomekome, ni Yehowa hala David ni ji amɛteŋ gbekɛ lɛ ni E-ha afɔ lɛ mu. Nakai gbi lɛ, Samuel kase nɔ ko ni he hiaa waa, ni no ji akɛ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!”—1 Samuel 16:1-13.

Akɛni Saul toigbele lɛ dɔ Samuel waa hewɔ lɛ, kwɛ bɔ ni Saul he ni tsɛ̃ David kɛ mɔdɛŋ ni ebɔ koni egbe lɛ lɛ baawo Samuel mli la aha! Yɛ kaai ni tamɔ nɛkɛ ni Samuel kɛkpe lɛ fɛɛ sɛɛ lɛ, etee nɔ ekɛ enyɛmɔ fɛɛ sɔmɔ Yehowa yɛ egbɔlɛ beaŋ.—1 Samuel 19:18-20.

Nɔ ni Akɛkaiɔ Samuel

Beni Samuel ni ji gbalɔ heshibalɔ ni yɔɔ ekãa ní nifeemɔ ná mɛi pii ashihilɛ nɔ hewalɛ kpakpa lɛ gbo lɛ, Israelbii lɛ fó lɛ jogbaŋŋ. (1 Samuel 25:1) Samuel yeee emuu, ni etɔ̃ yɛ eniiahesusumɔ mli yɛ bei komɛi amli. Yɛ Samuel fatɔɔi lɛ fɛɛ asɛɛ lɛ, etu ehe eha Yehowa pɛ sɔɔmɔ, ni ebɔ mɔdɛŋ waa ni eye ebua mɛi krokomɛi ni amɛfee nakai.

Eyɛ mli akɛ nibii babaoo etsake kɛjɛ Samuel gbii lɛ amli kɛbashi amrɔ nɛɛ moŋ, shi wɔbaanyɛ wɔkase nibii ni he hiaa yɛ ewala shihilɛ he saji ni aŋmala ashwie shi lɛ amli. Nɔ ni fe fɛɛ lɛ, Samuel kɛ ehe wo anɔkwa jamɔ ni akɛhaa Yehowa mli, ni eha eshwere hu. Ani bo hu oofee nakai?

[Akrabatsa ni yɔɔ baafa 16]

SUSUMƆ SAMUEL WALA SHIHILƐ HE

• Taakɛ bɔ ni Samuel fɔlɔi tsɔɔ lɛ Nyɔŋmɔ wiemɔ lɛ, bo hu okɛ “Nuŋtsɔ [Yehowa] lɛ tsɔsemɔ kɛ ŋaawoo” atsɔse obii lɛ.—Efesobii 6:4.

• Wó obii lɛ hewalɛ koni amɛkase Samuel ni amɛkɛ Yehowa sɔɔmɔ afee amɛnitsumɔ.

• Sui kpakpai ni Samuel jie lɛ kpo lɛ ha mɛi ná ehe miishɛɛ, ni eji nɔkwɛmɔnɔ kpakpa ni esa akɛ wɔkase.

• Samuel kɛ enyɛmɔ fɛɛ gbɛ anɔkwa jamɔ eshwã, ni nakai nɔŋŋ esa akɛ wɔ hu wɔfee.

[Mfoniri ni yɔɔ baafa 15]

Samuel ha anɔkwa jamɔ shwere ni ejɛ esuɔmɔ mli eye ebua mɛi krokomɛi ni amɛsɔmɔ Nyɔŋmɔ