Yehowa Wiemɔ lɛ Hiɛ Kã

Yesaia Wolo lɛ Mli Saji Otii—Fã ni Ji II

YESAIA tee nɔ ekɛ anɔkwayeli tsu nitsumɔ ni akɛwo edɛŋ akɛ gbalɔ lɛ he nii. Nibii ni ewie yɛ Israel akutsei nyɔŋma maŋtsɛyeli lɛ he lɛ ba mli. Kɛlɛ, eyɛ nibii babaoo ni ebaawie yɛ Yerusalem wɔsɛɛ shihilɛ he.

Abaakpata Yerusalem maŋtiase lɛ hiɛ, ni abaaloo emlibii lɛ kɛya nomŋɔɔ mli. Kɛlɛ, maŋ lɛ ehiŋ shi amaŋfɔ kɛyaŋ naanɔ. Yɛ be ko sɛɛ lɛ, abaaku sɛɛ ato anɔkwa jamɔ ama shi yɛ maŋ lɛ mli. Enɛ ji shɛɛ saji titrii ni yɔɔ Yesaia 36:1–66:24 lɛ mli. * Ehe baaba sɛɛnamɔ kɛha wɔ akɛ wɔɔsusu saji ni yɔɔ yitsei nɛɛ amli lɛ ahe ejaakɛ gbalɛi ni yɔɔ mli lɛ ateŋ babaoo miiná amɛmlibaa kwraa yɛ wɔgbii nɛɛ amli, ni ekomɛi hu baaba mli yɛ be fioo ni kã wɔhiɛ lɛ mli. Kɛfata he lɛ, ayɛ gbalɛi ni yɔɔ miishɛɛ ni kɔɔ Mesia lɛ he yɛ Yesaia wolo lɛ mli fã ni ji enyɔ nɛɛ mli.

“NAA, GBII MIIBA”

(Yesaia 36:1–39:8)

Yɛ Maŋtsɛ Hezekia nɔyeli afi ni ji 14 (afi 732 D.Ŋ.B.) lɛ nɔ lɛ, Ashurbii lɛ yatutua Yuda. Yehowa wo shi akɛ ebaafã Yerusalem he. Yehowa ŋwɛibɔfo koome gbe Ashur asraafoi 185,000, ni no kɛ tutuamɔ lɛ ba naagbee.

Hela mɔ Hezekia. Yehowa bo esɔlemɔ toi ni etsá lɛ, ni asaŋ ekɛ afii 15 fata ewala afii lɛ ahe eha lɛ. Beni Babilon maŋtsɛ lɛ tsu koni ayaha Hezekia etiriŋkwã lɛ, Hezekia ŋɔ eshĩa lɛ mli nibii ni jara wa lɛ fɛɛ etsɔɔ tsuji nɛɛ yɛ gbɛ ni nilee bɛ mli nɔ. Yehowa tsu Yesaia ni eyakɛɛ Hezekia akɛ: “Naa, gbii miiba ni aaabaloo nibii fɛɛ ni yɔɔ owe lɛ kɛ nibii ni otsɛmɛi lɛ ebua naa eto kɛbashi ŋmɛnɛ gbi nɛɛ nɔ lɛ kɛaatee Babel.” (Yesaia 39:5, 6) Aaafee enɔ afii 100 sɛɛ lɛ, gbalɛ nɛɛ ba mli.

Ŋmalɛ Naa Sanebimɔi ni Aha Hetoo:

38:8—Mɛni nɔ ahã hulu lɛ ku esɛɛ yɛ lɛ? Akɛni beni shɛɔ afi 700 D.Ŋ.B. afii lɛ amli lɛ, no mli lɛ mɛi ni yɔɔ Mizraim kɛ Babilon lɛ kɛ hulu ŋmɛlɛ tsuɔ nii hewɔ lɛ, eeenyɛ ebalɛ akɛ hulu ŋmɛlɛ ni Hezekia tsɛ Ahab kɛtsu nii lɛ he awieɔ akɛ hulu lɛ ku esɛɛ kɛnyiɛ nɔ lɛ. Kɛfata he lɛ, akɛni Hebri wiemɔ ni atsɔɔ shishi akɛ “hulu ŋmɛlɛ” lɛ shishi diɛŋtsɛ ji “atrakpoi” hewɔ lɛ, ekolɛ hulu ŋmɛlɛ ni atsɔɔ yɛ biɛ lɛ ji atrakpoi komɛi ni yɔɔ maŋtsɛwe lɛ. Ekolɛ, akulashiŋ ko ni ma atrakpoi lɛ masɛi lɛ susuma shwieɔ atrakpoi lɛ anɔ yɛ be kɛ beaŋ, ni akwɛɔ he ni susuma lɛ eshɛ yɛ atrakpoi lɛ anɔ ni akɛleɔ bɔ ni atswa.

 Nibii ni Wɔkaseɔ Kɛjɛɔ Mli:

36:2, 3, 22. Eyɛ mli akɛ ashɔ̃ tsulɔnukpa hegbɛ ni Shebna hiɛ lɛ yɛ edɛŋ moŋ, shi aha lɛ hegbɛ ni esɔmɔ akɛ woloŋmalɔ eha maŋtsɛ lɛ. No mli lɛ, mɔ ni akɛye enajiaŋ lɛ ni hiɛ hegbɛ nɛɛ. (Yesaia 22:15, 19) Kɛ́ nɔ ko ha ahé sɔɔmɔ hegbɛ ni wɔyɔɔ yɛ Yehowa asafo lɛ mli lɛ yɛ wɔdɛŋ lɛ, ani esaaa akɛ wɔmɔɔ hegbɛ fɛɛ hegbɛ ni Nyɔŋmɔ aaaha akɛha wɔ lɛ mli ni wɔya nɔ wɔsɔmɔ lɛ?

37:1, 14, 15; 38:1, 2. Kɛ́ wɔkɛ naagbai kpe lɛ, wɔɔfee jogbaŋŋ akɛ wɔkɛaafɔ̃ Yehowa hiɛ yɛ sɔlemɔ mli, ni wɔkɛ wɔhiɛ afɔ̃ enɔ kwraa.

37:15-20; 38:2, 3. Beni Ashurbii lɛ woɔ Yerusalembii lɛ ahe gbeyei akɛ amɛbaaŋɔ maŋtiase lɛ, no mli lɛ, heguɔgbee ni baaba Yehowa gbɛi lɛ nɔ kɛji amɛŋɔ maŋtiase lɛ ji nɔ̃ titri ni hao Hezekia waa. Beni Hezekia nále akɛ hela ni yeɔ lɛ lɛ baagbe lɛ lɛ, esusuuu ekome ehe, shi moŋ esusu nibii ahe kɛtee shɔŋŋ. Naagba ni kɛ́ egbo akɛ mɔ ni bɛ bi ni baaye esɛɛ lɛ kɛbaaba David weku lɛ mli ní aaajɛ aye maŋtsɛ lɛ nɔ lɛ ji nɔ̃ titri ni hao lɛ waa. Mɔ ni aaanyiɛ maŋ lɛ hiɛ koni amɛkɛ Ashurbii lɛ ayawu lɛ hu hao lɛ. Taakɛ Hezekia fee lɛ, wɔbuɔ Yehowa gbɛi lɛ hetsemɔ kɛ eyiŋtoi lɛ ahe nitsumɔ akɛ amɛhe hiaa kwraa fe wɔ diɛŋtsɛ wɔyiwalaheremɔ.

38:9-20. Hezekia lala nɛɛ haa wɔnaa akɛ, nɔ ni he hiaa fe fɛɛ yɛ mɔ shihilɛ mli ji ní enyɛ ejie Yehowa yi.

“AAAMÃ LƐ!”

(Yesaia 40:1–59:21)

Yesaia gba Yerusalem hiɛkpatamɔ kɛ emlibii lɛ ni abaaloo kɛya nomŋɔɔ mli yɛ Babilon lɛ egbe naa nɔŋŋ kɛkɛ ni egba akɛ, abaaku sɛɛ atswa maŋ lɛ ekoŋŋ. (Yesaia 40:1, 2) Yesaia 44:28 lɛ kɛɔ akɛ: “Aaamã [Yerusalem] lɛ!” Abaaloo Babilonbii amagai lɛ kɛya tamɔ alooɔ “jatsu.” (Yesaia 46:1) Abaakpata Babilon maŋ lɛ hiɛ. Saji nɛɛ fɛɛ ba mli yɛ afii 200 sɛɛ.

Yehowa baaŋɔ etsuji lɛ efee “jeŋmaji lɛ . . . ala.” (Yesaia 49:6) Babilon nɔyelɔi ní awie amɛhe akɛ “ŋwɛi” lɛ “aaalaaje tamɔ lasũ,” ni amɛmaŋbii lɛ “aaagboi tamɔ adɔdɔji”; shi ‘aaafɛne kpãai ni akɛwo Zion biyoo ní aŋɔ lɛ nom lɛ kuɛ lɛ.’ (Yesaia 51:6; 52:2) Yehowa kɛɛ mɛi ni boɔ lɛ toi lɛ akɛ: “Mikɛ nyɛ aaakpaŋ naanɔ kpaŋmɔ ni ji David mɔbɔnalɛi.” (Yesaia 55:3) Kɛ́ amɛhi shi yɛ Nyɔŋmɔ jalɛ taomɔ nii lɛ anaa lɛ, no haa ‘amɛmii shɛɔ Yehowa he.’ (Yesaia 58:14) Nɔ ni tamɔɔɔ nakai lɛ, amɛnishaianii lɛ ‘gbálaa amɛ kɛ amɛ-Nyɔŋmɔ lɛ teŋ.’—Yesaia 59:2.

Ŋmalɛ Naa Sanebimɔi ni Aha Hetoo:

40:27, 28—Mɛni hewɔ Israelbii lɛ kɛɛ: “Aŋɔ migbɛ lɛ atee Yehowa, ni mikojomɔ eho mi-Nyɔŋmɔ lɛ hiɛ lɛ”? Ekolɛ Yudafoi ni hi Babilon lɛ ateŋ mɛi komɛi susu akɛ aŋɔ nibii fɔji ni afeɔ amɛ lɛ atee Yehowa aloo ákɛ enaaa. Akai amɛ akɛ shikpɔŋ Bɔlɔ lɛ gbɔjɔɔɔ ni asaŋ etɔɔɔ lɛ, ni ákɛ nibii fɛɛ ni yaa nɔ yɛ Babilon lɛ jwere ehiɛ.

43:18-21—Mɛni hewɔ akɛɛ nomii ni ku amɛsɛɛ lɛ akɛ ‘amɛkakai tsutsu saji lɛ’? Enɛ etsɔɔɔ akɛ akɛɛ amɛ koni amɛhiɛ akpa nibii srɔtoi ni Yehowa fee kɛhere amɛyiwala yɛ blema lɛ anɔ. No najiaŋ lɛ, Yehowa miitao koni amɛjɛ ‘nibii heei’ ni ebaafee eha amɛ tamɔ amɛhe ni ebaabu yɛ amɛgbɛfãa kɛmiiya Yerusalem, ekolɛ kɛtsɔ gbɛ ni kã shi tɛ̃ɛ yɛ shia ŋa lɛ nɔ lɛ mli amɛjie eyi. “Asafo babaoo” ni baajɛ “amanehulu kpeteŋkpele” lɛ mli lɛ hu baaná nɔ ko hee amɛkɛjie Yehowa yi.—Kpojiemɔ 7:9, 14.

49:6—Akɛni Mesia lɛ tsu esɔɔmɔ nitsumɔ lɛ yɛ Israel maŋ lɛ pɛ mli hewɔ lɛ, mɛɛ gbɛ nɔ eji “jeŋmaji lɛ hu ala”? Ebafeɔ jeŋmaji lɛ hu ala yɛ nɔ ni ba yɛ Yesu gbele sɛɛ lɛ hewɔ. Biblia lɛ tsɔɔ akɛ, Yesaia 49:6 lɛ kɔɔ Yesu kaselɔi lɛ ahe. (Bɔfoi lɛ Asaji 13:46, 47) Ŋmɛnɛ lɛ, Kristofoi ni afɔ amɛ mu ní jálɔi asafo babaoo yeɔ buaa amɛ lɛ ebatsɔ  “jeŋmaji lɛ . . . ala,” ni amɛmiitsɔɔ mɛi anii “kɛyashi shikpɔŋ lɛ naagbeehei lɛ.”—Mateo 24:14; 28:19, 20.

53:10—Esa Yehowa hiɛ ákɛ eeetswa e-Bi lɛ nɔ̃ yɛ mɛɛ shishinumɔ naa? Beni Yehowa ni ji Nyɔŋmɔ ni naa mɔbɔ ni emusuŋ tsɔ̃ɔ lɛ lɛ na ni e-Bi lɛ piŋɔ lɛ, edɔ lɛ waa. Ni kɛlɛ, suɔmɔ mli ni Yesu jɛ ebo lɛ toi kɛ nibii ni ejɛ Yesu amanehulu kɛ egbele lɛ mli kɛba lɛ sa E-hiɛ.—Abɛi 27:11; Yesaia 63:9.

53:11—Mɛɛ nilee Mesia lɛ “[kɛ]aaná jalɛ aha mɛi pii” lɛ? Nilee nɛɛ kɔɔ nibii ni Yesu kase kɛjɛ nibii fɔji ni afee lɛ aahu kɛtee gbele mli lɛ mli beni ebahi shikpɔŋ nɔ akɛ adesa lɛ he. (Hebribii 4:15) Etsɔ egbele lɛ nɔ ekɛ kpɔmɔnɔ ni baaye abua Kristofoi ni afɔ amɛ mu lɛ kɛ asafo babaoo lɛ koni amɛná jalɛ shidaamɔ yɛ Nyɔŋmɔ hiɛ lɛ hã.—Romabii 5:19; Yakobo 2:23, 25.

56:6—Namɛi ji “gbɔi” lɛ, ni mɛɛ gbɛ nɔ “[amɛ]mɔɔ [Yehowa] kpaŋmɔ lɛ mli”? “Gbɔi” lɛ ji Yesu “tooi krokomɛi” lɛ. (Yohane 10:16) Amɛmɔɔ kpaŋmɔ hee lɛ mli kɛ shishinumɔ akɛ amɛkɛ mlai ni kɔɔ nakai kpaŋmɔ lɛ he lɛ tsuɔ nii, ni amɛfiɔ gbɛjianɔ ni atsɔ kpaŋmɔ lɛ nɔ ato lɛ sɛɛ. Kɛfata he lɛ, amɛkɛ Kristofoi ni afɔ amɛ mu lɛ fɛɛ kaseɔ Nyɔŋmɔ he nii kometoo, ni asaŋ amɛyeɔ amɛbuaa amɛ yɛ Maŋtsɛyeli shiɛmɔ kɛ kaselɔfeemɔ nitsumɔ lɛ mli.

Nibii ni Wɔkaseɔ Kɛjɛɔ Mli:

40:10-14, 26, 28. Yehowa yɛ hewalɛ ni emli jɔ hu. Eyɛ hewalɛ fe mɔ fɛɛ mɔ ni asaŋ ele nii fe mɛi fɛɛ, ni ekɔɔ sane sɛɛ hu fe bɔ ni wɔbaanyɛ wɔnu shishi.

40:17, 23; 41:29; 44:9; 59:4. Maŋkwramɔŋ kpaŋmɔi kɛ amagai jeee “fɛifɛi.” Sɛɛnamɔ bɛ he akɛ mɔ kɛ ehe aaafɔ̃ amɛnɔ.

42:18, 19; 43:8. Kɛ́ mɔ ku ehiɛ eshwie Nyɔŋmɔ Wiemɔ lɛ nɔ ní etsĩmɔ etoi yɛ gbɛtsɔɔmɔi ni etsɔɔ “tsulɔ anɔkwafo kɛ nilelɔ” lɛ nɔ ekɛhaa lɛ he lɛ, mɔ lɛ batsɔɔ shwilafo kɛ toimulɔ yɛ Nyɔŋmɔ he nilee gbɛfaŋ.—Mateo 24:45.

43:25. Yehowa gbeɔ nɔtɔmɔi yɛ lɛ diɛŋtsɛ ehewɔ. Kɛ́ akɛ Yehowa gbɛi lɛ hetsemɔ to wɔhe ni ahaa wɔyeɔ kɛjɛɔ esha kɛ gbele nyɔŋyeli lɛ mli lɛ he lɛ, egbɛi lɛ hetsemɔ baa klɛŋklɛŋ gbɛhe.

44:8. Yehowa yɛ hewalɛ tamɔ tɛsaa, ni efĩɔ wɔsɛɛ. No hewɔ lɛ, esaaa akɛ wɔsheɔ gbeyei akɛ wɔɔye ehe odase akɛ lɛ ji Nyɔŋmɔ diɛŋtsɛ!—2 Samuel 22:31, 32.

44:18-20. Kɛ́ mɔ kɛ ehe wo wɔŋjamɔ mli lɛ, no tsɔɔ akɛ nibii gbohii ebote etsui mli. Esa akɛ Yehowa sɔɔmɔ afee nɔ ni kã wɔtsui nɔ, ni esaaa akɛ wɔkɛ nɔ ko yeɔ najiaŋ.

46:10, 11. Nyɛmɔ ni Yehowa yɔɔ ni ekɛhaa ‘eyiŋtoo baa mli’ lɛ ji odaseyeli ni tsɔɔ faŋŋ akɛ lɛ ji Nyɔŋmɔ diɛŋtsɛ.

48:17, 18; 57:19-21. Kɛ́ wɔkɛ wɔhiɛ fɔ̃ Yehowa nɔ kɛha wɔyiwalaheremɔ, ní wɔtsi wɔbɛŋkɛ lɛ, ní asaŋ wɔye ekitãi lɛ anɔ lɛ, no lɛ wɔhejɔlɛ aaafa tamɔ faa ni wɔjalɛ nifeemɔi hu aaafa tamɔ ŋshɔkei. Mɛi ni kɛ Nyɔŋmɔ Wiemɔ lɛ tsuuu nii lɛ tamɔ “ŋshɔ ni efee hamahama.” Amɛbɛ hejɔlɛ.

52:5, 6. Babilonbii lɛ mu sane naa yɛ gbɛ ni ejaaa nɔ akɛ anɔkwa Nyɔŋmɔ lɛ egbɔjɔ. Amɛyɔseee akɛ Yehowa mli ni fũ ewebii ni ji Israelbii lɛ hewɔ eha aŋɔ amɛ kɛtee nyɔŋyeli mli lɛ. Kɛ́ mɛi kɛ amanehulu kpe lɛ, wɔɔfee jogbaŋŋ akɛ wɔkɛ oyaiyeli akamu sane naa akɛ enɛ kɛ enɛ ha ebalɛ nakai.

52:7-9; 55:12, 13. Kɛ́ hooo lɛ, wɔyɛ yiŋtoi etɛ ahewɔ ni esa akɛ wɔkɛ wɔhe awo Maŋtsɛyeli shiɛmɔ kɛ kaselɔfeemɔ nitsumɔ lɛ mli kɛ miishɛɛ. Wɔnaji yɛ fɛo yɛ heshibalɔi ni taoɔ akase Nyɔŋmɔ he nii lɛ ahiɛ. Wɔnaa Yehowa “hiɛ kɛ hiɛ,” ni tsɔɔ akɛ wekukpãa kpakpa yɛ wɔ kɛ lɛ teŋ. Kɛfata he lɛ, wɔyɛ ehe nilee babaoo.

52:11, 12. Dani wɔɔfee mɛi ni sa akɛ wɔtereɔ “Yehowa nibii” ni ji gbɛjianɔ ni eto kɛha  esɔɔmɔ lɛ, esa akɛ wɔhe atse yɛ ejamɔ mli kɛ agbɛnɛ hu yɛ jeŋba gbɛfaŋ.

58:1-14. Sɛɛnamɔ bɛ he akɛ mɔ kɛ osato feɔ enii akɛ etu ehe eha Nyɔŋmɔ ni ákɛ efeɔ jalɛ nii. Esa akɛ anɔkwa jálɔi ayimɔ kɛ nyɛmimɛi asuɔmɔ kɛ nifeemɔi diɛŋtsɛ ni tsɔɔ akɛ amɛtu amɛhe amɛha Nyɔŋmɔ.—Yohane 13:35; 2 Petro 3:11.

59:15b-19. Yehowa kwɛɔ adesai anifeemɔi, ni ekɛ ehe woɔ mli yɛ lɛ diɛŋtsɛ ebe naa.

‘EEETSƆ AKEKRE FƐFƐO’

(Yesaia 60:1–66:24)

Beni Yesaia 60:1 lɛ wieɔ anɔkwa jamɔ ni aaato ama shi ekoŋŋ yɛ blema kɛ agbɛnɛ hu yɛ wɔgbii nɛɛ amli lɛ he lɛ, ekɛɛ akɛ: “Tee shi ni otso, shi ola lɛ miiba, ni Yehowa anunyam lɛ miikpɛ́ yɛ onɔ!” Zion “[baa]tsɔ akekre fɛfɛo yɛ Yehowa dɛŋ.”—Yesaia 62:3.

Yesaia sɔle eha Yehowa yɛ emaŋbii ni etee nomŋɔɔ mli yɛ Babilon ni baatsake amɛtsui lɛ agbɛfaŋ. (Yesaia 63:15–64:12) Beni gbalɔ lɛ etsɔɔ srɔtofeemɔ ni yɔɔ anɔkwa tsuji kɛ apasa tsuji lɛ ateŋ egbe naa lɛ, ewie jɔɔmɔi ni Yehowa baafɔse eshwie mɛi ni jáa Lɛ lɛ anɔ lɛ he.—Yesaia 65:1–66:24.

Ŋmalɛ Naa Sanebimɔi ni Aha Hetoo:

61:8, 9—Mɛni ji “naanɔ kpaŋmɔ” lɛ, ni namɛi ji “seshi” lɛ? No ji kpaŋmɔ hee ni Yehowa kɛ Kristofoi ni afɔ amɛ mu lɛ efee lɛ. “Seshi” lɛ ji “tooi krokomɛi” ni ji mɛi akpekpei abɔ ni boɔ amɛshɛɛ sane lɛ toi lɛ.—Yohane 10:16.

63:5—Nyɔŋmɔ mlila lɛ yeɔ buaa lɛ yɛ mɛɛ gbɛ nɔ? Nyɔŋmɔ mlila lɛ ji jalɛ mlifu ni enyɛɔ ekudɔɔ. Emlila lɛ yeɔ buaa lɛ ni ewoɔ lɛ hewalɛ koni ekɛ jalɛ kojomɔ aba.

Nibii ni Wɔkaseɔ Kɛjɛɔ Mli:

64:6. Adesai ni yeee emuu nyɛŋ ahere amɛ diɛŋtsɛ amɛyiwala. Kɛ́ amɛkɛɛ amɛaakpata kɛha amɛhe eshai lɛ, no lɛ jalɛ nibii ni amɛaafee lɛ fɛɛ baafee tamɔ atade ni abule.—Romabii 3:23, 24.

65:13, 14. Yehowa jɔɔ etsuji ni yeɔ lɛ anɔkwa lɛ, ni eduroɔ amɛ ehenilee babaoo.

66:3-5. Yehowa miihi osatofeemɔ.

“Nyɛnyaa”

Kwɛ bɔ ni gbalɛi ni kɔɔ Yudafoi lɛ asɛɛkuu kɛmiiba amɛshikpɔŋ nɔ ekoŋŋ lɛ he lɛ baashɛje amɛteŋ anɔkwafoi ni akɛ amɛ tee nomŋɔɔ mli yɛ Babilon lɛ amii aha! Yehowa kɛɛ amɛ akɛ: “Nyɛnyaa ní nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ; ejaakɛ naa, miibɔ Yerusalem ní etsɔ mlifilimɔ, kɛ emli bii lɛ hu ní amɛtsɔ nyamɔ!”—Yesaia 65:18.

Duŋ hà shikpɔŋ lɛ nɔ, ni duŋ kpii hà majimaji lɛ anɔ yɛ be ni wɔyɔɔ mli nɛɛ hu mli. (Yesaia 60:2) Wɔyɛ “jaramɔ bei” amli. (2 Timoteo 3:1) No hewɔ lɛ, yiwalaheremɔ shɛɛ sane ni Yehowa kɛha yɛ Biblia mli wolo ni ji Yesaia lɛ mli lɛ woɔ wɔ hewalɛ diɛŋtsɛ.—Hebribii 4:12.

[Shishigbɛ niŋmaa]

[Mfoniri ni yɔɔ baafa 8]

Ani ole nɔ̃ titri hewɔ ni Hezekia sɔle koni ahere eyiwala kɛjɛ Ashurbii lɛ adɛŋ?

[Mfoniri ni yɔɔ baafa 11]

“Kwɛ bɔ ni sanekpakpa jajelɔ . . . lɛ naji yɔɔ fɛo yɛ gɔji lɛ anɔ!”