Anɔkwale Namɛi Esa akɛ Amɛwie?

OBLAYOO ko ni eye afii 16 lɛ kɛɛ akɛ: “Miihi amale, ni misumɔɔɔ ni mɔ ko ato mi abla!” Wɔteŋ mɛi pii nuɔ he nakai nɔŋŋ. Wɔsumɔɔ akɛ saji ni wɔbaanu kɛjɛ mɛi anaa loo nɔ ni wɔbaakane lɛ afee anɔkwale. Shi ani wɔwieɔ anɔkwale kɛ́ wɔmiibɔ mɛi krokomɛi amaniɛ?

Yɛ niiamlipɛimɔ ko ni afee yɛ Germany lɛ mli lɛ, mɛi ni abi amɛ saji lɛ ateŋ mɛi babaoo susuɔ akɛ “naagba ko bɛ he kɛ́ mɔ ko to abla yɛ saji bibii komɛi ahe bɔni afee ni ekɛbu lɛ diɛŋtsɛ loo mɛi krokomɛi ahe, ni ákɛ nakai feemɔ he miihia po bɔni afee ni anyɛ akɛ mɛi krokomɛi ahi shi jogbaŋŋ.” Adafitswaa woloŋmalɔ ko hu ŋma akɛ: “Eyɛ mli akɛ esa jogbaŋŋ akɛ aaawie anɔkwale ŋmiiŋmi be fɛɛ be moŋ, shi ehaa shihilɛ feɔ ahuntoo.”

Ani eeenyɛ efee akɛ wɔsumɔɔ ni mɛi krokomɛi awie anɔkwale, shi wɔ lɛ wɔnuɔ he akɛ bei komɛi lɛ wɔbaanyɛ wɔmale yɛ yiŋtoi kpakpai komɛi ahewɔ? Ani ehe miihia ni wɔwie anɔkwale aloo ehe ehiaaa? Mɛni jɛɔ malemɔ mli kɛbaa?

Awui ni Malemɔ Yeɔ

Susumɔ awui ni malemɔ baanyɛ aye lɛ he okwɛ. Malemɔ haaa gbalashihilɛ mli hefatalɔi loo weku mli bii ahe amɛhe amɛye. Sane ni afoɔ atãa yɛ mɔ ko he lɛ baanyɛ afite gbɛi kpakpa ni mɔ lɛ yɔɔ lɛ. Juu ni nitsulɔi juɔ lɛ haa nitsumɔhei bɔɔ nyɔmɔ, ni enɛ haa nibii ajara yaa ŋwɛi. Kɛ́ awooo too bɔ ni akpaa gbɛ lɛ, nɔyeli lɛ nine shɛɛɛ shika ni he hiaa kɛha maŋ lɛ he nitsumɔ lɛ nɔ. Kɛ́ mɛi ni taoɔ saji amli amɛhaa nitsumɔhei ní ale waa lɛ to abla lɛ, nɛkɛ mɛi nɛɛ fiteɔ amɛgbɛi, ni amɛfiteɔ gbɛi kpakpa ni nakai nitsumɔhe lɛ hu yɔɔ lɛ. Ojo ni atswaa mɛi ni kɛ amɛshika woɔ nitsumɔ ko tsumɔ mli lɛ haa nibii ni amɛbua naa lɛ fɛɛ ahiɛ kpatãa, loo ehaa amɛfeɔ shwɛm. Ebɛ naakpɛɛ mɔ akɛ Biblia lɛ kɛɔ wɔ akɛ nibii ni Yehowa Nyɔŋmɔ hiɔ lɛ ekomɛi ji “apasa lilɛi” kɛ “amale odaseyelɔ ni foɔ sane tãa”!—Abɛi 6:16-19.

Amale ni aaagbɛ ashwã lɛ baanyɛ aye aŋkroaŋkroi loo maŋ muu fɛɛ awui. Ewa akɛ mɔ ko aaaje sane nɛɛ he ŋwane. Belɛ, mɛni hewɔ mɔ ni mɛi jeɔ gbɛ amɛmaleɔ lɛ? Ani nɔ fɛɛ nɔ ni aaawie ni ejeee anɔkwale lɛ ji amale? Wɔbaasusu sanebimɔi nɛɛ kɛ ekrokomɛi ni tamɔ nakai lɛ ahe yɛ sane ni nyiɛ sɛɛ lɛ mli.

[Mfoniri ni yɔɔ baafa 3]

Malemɔ haaa gbalashihilɛ mli hefatalɔi ahe amɛhe amɛye