Wala Shihilɛ He Sane

Nɔ Hewɔ Ni Mináa Kaselɔi Afeemɔ He Miishɛɛ

Taakɛ Pamela Moseley Gba

Yɛ afi 1941 lɛ, mimami kɛ mi tee Yehowa Odasefoi akpokpaa wulu nɔ kpee ko ni afee yɛ Leicester maŋ lɛ mli, ni nakai beaŋ lɛ England kɛ ehe ewo Jeŋ Ta II lɛ mli. Wɔbo maŋshiɛmɔ krɛdɛɛ ko ni kɔɔ gbekɛbii ahe ní Joseph Rutherford hã lɛ toi. Beni abaptisi mi kɛ mimami yɛ nakai kpee lɛ shishi lɛ, miyɔse akɛ mɛi ni kɛ wɔ kase nii lɛ amii shɛ amɛhe waa. No mli lɛ mileee akɛ mɔ ni feɔ mɛi Yesu Kristo kaselɔi lɛ náa miishɛɛ waa.

AKƐ wɔ bɔi nikasemɔ yɛ afi 1940. Mikaiɔ gbi ni yɔɔ gbeyei beni Jeŋ Ta II lɛ fɛ́ yɛ September 1939 lɛ lolo. Mina ni yaafo nui miiho yɛ mimami hiŋmɛiaŋ, ni ebi shii abɔ akɛ, “Mɛɛ hewɔ toiŋjɔlɛ bɛ je lɛŋ lɛ?” Mifɔlɔi ji asraafoi beni awuɔ Jeŋ Ta I lɛ, ni amɛna nibii ni yɔɔ gbeyei ni tee nɔ yɛ nakai beaŋ lɛ. Awo kɛ esanebimɔ lɛ yafɔ̃ Anglican osɔfo ni yɔɔ Bristol lɛ hiɛ. Osɔfo lɛ kɛɛ kɛkɛ akɛ: “Abɔi tawuu kɛjɛ jeeŋmɔ beebe, ni esɛɛ efoŋ gbi ko gbi ko.”

Eyeee be ko tsɔ ni yoo onukpa ko ba wɔŋɔɔ. Eji Yehowa Odasefonyo. Mimami bi lɛ nakai sane lɛ nɔŋŋ akɛ: “Mɛɛ hewɔ toiŋjɔlɛ bɛ je lɛŋ lɛ?” Odasefonyo lɛ tsɔɔ mli akɛ tai ni awuɔ lɛ fata okadi ni tsɔɔ akɛ wɔyɛ yiwalɛ nibii agbɛjianɔtoo nɛɛ naagbee be lɛ mli lɛ he. (Mateo 24:3-14) Etsɛɛɛ tsɔ ni ebiyoo kɛ wɔ bɔi Biblia lɛ kasemɔ. Amɛfata mɛi ni ná miishɛɛ beni abaptisi wɔ lɛ ahe. Mɛni hewɔ kaselɔi afeemɔ haa anáa miishɛɛ waa nakai lɛ? Sɛɛ mli lɛ, miba nu shishi. Ha magba bo nibii ni mikɛ nɔ ni fa fe afii 65 ekase yɛ kaselɔi afeemɔ nitsumɔ lɛ mli lɛ ekomɛi.

Miyɔse akɛ Nitsɔɔmɔ Haa Anáa Miishɛɛ

Mibɔi Maŋtsɛyeli lɛ he sanekpakpa lɛ shiɛmɔ yɛ Bristol beni miye afii 11. Nyɛmi nuu  ko ha mi gramafon, ni ji tsɔne ni akɛtswaa wiemɔi ni amɔmɔ awo kpaa nɔ, kɛ wolo ni aŋmala shiɛmɔ wiemɔi yɛ nɔ, ni ekɛɛ mi akɛ: “Agbɛnɛ, yaa shiai fɛɛ ni yɔɔ gbɛjegbɛ nɛɛ sɛɛ lɛ amli.” Kɛkɛ ni tɔ̃ɔ miyi gbɛ kɛtee, ni mikometoo miyabɔi shiɛmɔ. Yɛ anɔkwale mli lɛ, mitsui fã waa. Mikɛ gramafon lɛ tswaa Biblia mli wiemɔ mihaa shiatsɛmɛi lɛ, kɛkɛ lɛ mikɛ wolo ni aŋma shiɛmɔ wiemɔi yɛ nɔ ní akɛfɔ̃ɔ mɛi anine koni amɛŋɔ Biblia he woji lɛ etsɔɔ amɛ.

Yɛ afi 1950 afii lɛ amli lɛ, aje shishi awo wɔ hewalɛ waa ni wɔkane Biblia lɛ wɔtsɔɔ shiatsɛmɛi lɛ kɛ́ wɔmiishiɛ yɛ shia-kɛ-shia. Akɛni mihiɛ gboɔ waa hewɔ lɛ, ebafee nɔ ni wa kɛha mi yɛ shishijee mli akɛ mikɛ gbɔi aaagba sane ní magbála Biblia lɛ mli matsɔɔ amɛ. Shi mibaná ekãa yɛ sɛɛ mli. Mibɔ̃i shiɛmɔ nitsumɔ lɛ he miishɛɛnamɔ diɛŋtsɛ yɛ nakai beaŋ. Mɛi komɛi susuɔ akɛ woji kɛkɛ wɔhɔɔ, shi kɛ́ wɔkane Biblia lɛ ní wɔgbala mli wɔtsɔɔ amɛ lɛ, amɛnaa akɛ wɔ ji Nyɔŋmɔ Wiemɔ lɛ tsɔɔlɔi. Miná enɛ feemɔ he miishɛɛ aahu akɛ mibaná shwelɛ akɛ esa akɛ matsu babaoo. No hewɔ lɛ, mikɛ mihe wo be-fɛɛ sɔɔmɔ nitsumɔ lɛ mli ákɛ gbɛgbalɔ yɛ September 1955.

Shifimɔ Woɔ Yibii

Nibii ni mikase klɛŋklɛŋ lɛ ateŋ ekome ji akɛ shifimɔ nyɛɔ ewoɔ yibii. Be ko lɛ, miha yoo ko ni atsɛɔ lɛ Violet Morice Buu-Mɔɔ wolo tɛtrɛɛ lɛ eko. Beni mikũ misɛɛ kɛtee eŋɔɔ ekoŋŋ lɛ, egbele eshinaa lɛ efɔ̃ ni ekota eniji kɛdamɔ shi, ni beni migbálaa Ŋmalɛi lɛ amli lɛ, eka etoi kɛbo sane lɛ toi jogbaŋŋ. Be fɛɛ ni maya eŋɔɔ lɛ, minaa akɛ etamɔ nɔ ni eyɛ wiemɔ lɛ he miishɛɛ diɛŋtsɛ. Shi kɛlɛ, beni mikɛɛ lɛ akɛ miisumɔ ni mikɛ lɛ akase Biblia lɛ daa lɛ, ekɛɛ akɛ: “Dabi. Kɛ́ mibii lɛ dara lɛ, makase.” Minijiaŋ je wui waa! Biblia lɛ kɛɔ akɛ “taomɔ be yɛ, ni laajemɔ be yɛ.” (Jajelɔ 3:6) Mitswa mifai shi akɛ mikpaŋ eŋɔɔ yaa.

Nyɔŋ komɛ sɛɛ lɛ, miku misɛɛ mikɛ Violet yasusu ŋmalɛi krokomɛi ahe. Etsɛɛɛ tsɔ ni mikɛ lɛ bɔi Biblia lɛ kasemɔ daa otsi yɛ eshinaa lɛ naa. Naagbee lɛ, ekɛɛ mi akɛ: “Masumɔ akɛ oba tsu lɛ mli.” Violet batsɔ heyelilɔ kɛ mi diɛŋtsɛ minaanyo ni misumɔɔ esane waa! Hɛɛ, Violet batsɔ Yehowa Odasefonyo ni abaptisi lɛ.

Gbi ko lɛ, Violet wu hɔ̃ɔ amɛshia lɛ ni ejo foi eshi lɛ ní eleee he nɔ ko. Beni Violet ná elè enɛ lɛ, egba enaa waa. Miishɛɛ sane ji akɛ wɔnaanyo Odasefonyo ko ye ebua Violet ni ená tsu kroko nakai gbi lɛ shwane lɛ nɔŋŋ. Ehiɛ sɔ Yehowa aahu akɛ ekpɛ eyiŋ akɛ ekɛ ewala gbii abɔ ni eshwɛ lɛ baasɔmɔ akɛ gbɛgbalɔ. Beni mina bɔ ni Yehowa mumɔ lɛ eha ená ekãa eha anɔkwa jamɔ lɛ, mibanu nɔ hewɔ ni kaselɔi afeemɔ haa anaa miishɛɛ lɛ shishi. Hɛɛ, matsu enɛ daa!

Yɛ afi 1957 lɛ, aha mi kɛ Mary Robinson yasɔmɔ akɛ gbɛgbalɔi yɛ Rutherglen shikpɔŋkuku ni nitsumɔhei fa yɛ jɛmɛ, ni yɔɔ Glasgow yɛ Scotland lɛ mli. Wɔshiɛɔ kɛ́ jeŋ eshi oblɔtu jio, ahum miitswa jio, nugbɔ miinɛ jio, snoo miinɛ jio, ni wɔdeŋmegbomɔ lɛ efeee yaka. Gbi ko lɛ mikɛ yoo ko ní atsɛɔ lɛ Jessie kpe. Miná Biblia lɛ ni mikɛ lɛ kase lɛ he miishɛɛ. Shishijee lɛ, ewu ní atsɛɔ lɛ Wally, ni eji mɔ ko ni fĩɔ Komunist nɔyeli sɛɛ lɛ sumɔɔɔ akɛ ebɛŋkɛ mi. Beni ekase Biblia lɛ ni ebanu shishi akɛ Nyɔŋmɔ Maŋtsɛyeli lɛ pɛ ji nɔ ni baaha adesai ahe ajɔ amɛ lɛ, emii shɛ ehe waa. Sɛɛ mli lɛ amɛ fɛɛ amɛkɛ amɛhe wo shiɛmɔ nitsumɔ lɛ mli.

Bɔ ni Mɛi Feɔ Amɛnii Amɛhaa Klɛŋklɛŋ Kwraa lɛ Baanyɛ Alaka Mɔ

Sɛɛ mli lɛ, aha wɔyasɔmɔ yɛ Paisley, yɛ Scotland. Gbi ko beni miishiɛ yɛ jɛmɛ lɛ,  mitee yoo ko ni atsɛɔ lɛ Pearl ŋɔɔ, shi akɛni esumɔɔɔ ni ebo mi toi hewɔ lɛ, ekɛ mlifu ŋa eshinaa lɛ. Shi etsɛɛɛ ni ebɔi mi taomɔ koni ekpa mi fai. Beni miku misɛɛ kɛtee eŋɔɔ enɔ otsi lɛ, ekɛɛ mi akɛ: “Beni mikɛ mlifu ŋa shinaa lɛ yɛ ohewɔ lɛ, minu he tamɔ nɔ ni Nyɔŋmɔ ji mɔ ni mifee lɛ nakai lɛ. Enɛ hewɔ lɛ, mitee miyatao bo.” Ekɛɛ mi akɛ enanemɛi kɛ ewekumɛi eha enijiaŋ eje wui, ni ákɛ esɔle koni Nyɔŋmɔ aha ená naanyo kpakpa. Ekɛɛ akɛ: “Kɛkɛ ni oba miŋɔɔ. Agbɛnɛ mina akɛ bo ji nakai naanyo kpakpa lɛ.”

Ebɛ mlɛo akɛ mikɛ Pearl aaabɔ naanyo. Pearl shĩa yɛ gɔŋ somromoo ko nɔ, ni esa akɛ manyiɛ kɛkwɔ. Beni mitee eshĩa koni mayatsɛ́ lɛ kɛya Kristofoi akpee klɛŋklɛŋ kwraa lɛ, shwɛ sharao ni nugbɔ ko ni nɛ kɛ emli ahum lɛ atsi mi agbee shi. Ahum lɛ fite mikataŋwia lɛ, no hewɔ lɛ mishɛ mifɔ̃. Nyɔji ekpaa sɛɛ beni Pearl kɛ mlifu ŋa eshinaa lɛ ewo mi lɛ, abaptisi lɛ ni ekɛfee ehe nɔ ni ejɔɔ eha Nyɔŋmɔ lɛ he okadi.

Etsɛɛɛ tsɔ ni ewu kpɛ eyiŋ akɛ ebaakase Biblia lɛ, ni eyeee be ko tsɔ ni mikɛ lɛ tee shiɛmɔ yɛ shia-kɛ-shia. Nugbɔ miinɛ nakai gbi lɛ hu. Ekɛɛ mi akɛ: “Enɛ akagba onaa kwraa. Midamɔɔ nugbɔ nɔ ŋmɛlɛtswai abɔ mikwɛɔ bɔɔl, no hewɔ lɛ manyɛ madamɔ nugbɔ lɛ nɔ maha Yehowa.” Minyãa ekãa ni Scotlandbii yɔɔ lɛ he waa.

Afii babaoo sɛɛ beni miku misɛɛ kɛtee Scotland lɛ, mɛɛ jɔɔmɔ po eji kɛha mi nɛkɛ akɛ mina akɛ mɛi ni mikɛkase nii lɛ ateŋ mɛi pii hiɛ hemɔkɛyeli lɛ mli lolo! No ji miishɛɛ ní anaa yɛ kaselɔi afeemɔ mli. (1 Tesalonikabii 2:17-20) Yɛ afi 1966 beni mikɛ nɔ ni fa fe afii kpaanyɔ etsu nii akɛ gbɛgbalɔ yɛ Scotland lɛ, afɔ̃ mi nine kɛtee Buu-Mɔɔ Biblia Gilead Skul lɛ koni ayatsɔsemi akɛ maŋsɛɛ sanekpakpa shiɛlɔ.

Miyashiɛ yɛ Maŋsɛɛ

Akɛmi tee Bolivia, ni miyahi Santa Cruz maŋ ni hulu tsoɔ waa yɛ mli lɛ mli, ni no mli lɛ ayɛ asafo kome kɛ emlibii aaafee 50 yɛ jɛmɛ. Nakai maŋ lɛ ha mikai Amerika Anaigbɛ mra be mli shihilɛ ni ajieɔ yɛ sinii komɛi amli lɛ. Kɛ́ misusu bei ni eho yɛ miwala shihilɛ mli lɛ he lɛ, minaa akɛ maŋsɛɛ sanekpakpa shiɛlɔ kɛkɛ ji mi. Báa tutua ko mi pɛŋ, mɛi ni feɔ mɛi basabasa yeko mi awui dã, milajeko pɛŋ yɛ shia ŋa nɔ, ni mikɛ lɛlɛ hu eyashako shi dã. Ni kɛlɛ, mimii shɛɔ kaselɔi afeemɔ he waa diɛŋtsɛ.

Yei ni mikɛkase Biblia lɛ klɛŋklɛŋ kwraa yɛ Santa Cruz lɛ ateŋ mɔ komɛ ji Antonia. No mli lɛ ewa kɛha mi akɛ matsɔɔ mɛi anii yɛ Spain wiemɔ mli. Be ko lɛ, Antonia bi nuu fioo lɛ bi emami akɛ: “Mama, ani yoo lɛ jeɔ gbɛ ewieɔ Spain wiemɔ lɛ sɛɛsɛɛ koni ekɛ wo wɔ naa ŋmɔlɔ?” Sɛɛ mli lɛ Antonia kɛ ebi yoo Yolanda fɛɛ batsɔmɔ kaselɔi. Yolanda naanyo ko ní afɔɔ lɛ tsɛmɔ akɛ Dito ni miikase mla he nii yɛ skul lɛ hu bɔi Biblia lɛ kasemɔ ni ekɛ wɔ bɔi kpeei yaa. Dito ha mikase nɔ kroko hu yɛ Biblia mli anɔkwale lɛ tsɔɔmɔ mli: Bei komɛi lɛ, hewalɛwoo he hiaa mɛi.

Beni Dito bɔi enikasemɔ lɛ mli folɔmɔ lɛ, mikɛɛ lɛ akɛ: “Dito, Yehowa enyɛɛ onɔ ni ofi e-Maŋtsɛyeli lɛ sɛɛ. Esa akɛ bo diɛŋtsɛ okpɛ oyiŋ yɛ he.” Beni eto he ehã mi akɛ eesumɔ ni esɔmɔ Nyɔŋmɔ lɛ, mikɛɛ lɛ akɛ: “Oyɛ nɔyeli hiɛ atuatselɔi akuu ko hiɛnyiɛlɔ he mfonirii yɛ biɛ. Aso kɛ́ mɔ ko bana mfonirii nɛɛ, ebaamu sane naa akɛ ofĩɔ Nyɔŋmɔ Maŋtsɛyeli lɛ sɛɛ?” Enɛ kwraa ji hewalɛwoo ni he hiaa lɛ lɛ.

Otsii enyɔ sɛɛ lɛ, nɔyeli hiɛ atuatsemɔ ko bate shi, ni univɛsiti skul nikaselɔi lɛ kɛ polisifoi lɛ bɔi amɛhe tu tswiamɔ. Dito kɛ bolɔmɔ kɛɛ enaanyo ko akɛ: “Hã wɔje biɛ oya.” Shi enaanyo lɛ kɛɛ lɛ akɛ, “Dabi, wɔmɛ gbi wulu nɛɛ aahu,” kɛkɛ ni ekɔ tũ ni ejo foi kɛtee Univɛsiti tsu lɛ yiteŋ gbɛ. Efata Dito nanemɛi kpaanyɔ ni gboi yɛ nakai gbi lɛ nɔ lɛ ahe. Dito yiŋ ni ekpɛ akɛ ebaatsɔ anɔkwa Kristofonyo lɛ jie lɛ kɛjɛ gbele mli, ni enɛ ha miná miishɛɛ waa.

Mina akɛ Yehowa Mumɔ lɛ Miitsu Nii

Be ko lɛ miitsɔ shinaa ko ni efee mi akɛ wɔtee jɛmɛ momo lɛ naa kɛmiiho kɛkɛ ni yoo ko ni yɔɔ jɛmɛ lɛ tsɛ miyisɛɛ. Atsɛɔ lɛ Ignacia. Eyɛ Yehowa Odasefoi ahe miishɛɛ, shi akɛni ewu  ni atsɛɔ lɛ Adalberto, ni eji polisifonyo ni eje oblaŋ lɛ teɔ shi ewoɔ lɛ waa hewɔ lɛ, enyɛɛɛ eya ehiɛ yɛ mumɔŋ. Eyiŋ efutu lɛ yɛ Biblia shishijee tsɔɔmɔi babaoo ahe, no hewɔ lɛ mikɛ lɛ bɔi Biblia lɛ kasemɔ. Eyɛ mli akɛ Adalberto tswa efai shi akɛ ebaafite Biblia mli nikasemɔ nɛɛ moŋ, shi minyɛ mikɛ lɛ gba nibii krokomɛi ahe sane be kpalaŋŋ. Enɛ gbele gbɛ ni wɔbatsɔmɔ nanemɛi.

Mina miishɛɛ waa beni mina akɛ Ignacia ebatsɔ Odasefonyo ni he yɔɔ miishɛɛ, ní yeɔ ebuaa mɛi babaoo ni miishɛjemɔ he hiaa amɛ yɛ mumɔŋ kɛ gbɔmɔtsoŋ fɛɛ lɛ. Sɛɛ mli lɛ, ewu kɛ amɛbii etɛ batsɔmɔ Odasefoi. No ji akɛ, beni Adalberto banu sanekpakpa lɛ shishi jogbaŋŋ lɛ, eku esɛɛ kɛtee polisifoi anitsumɔhe lɛ, ni ekɛ miishɛɛ ko wie aahu akɛ polisifoi lɛ bɔi Buu-Mɔɔ kɛ Awake! 200 shɛɛ.

Yehowa Haa Eshwereɔ

Beni mikɛ afii ekpaa esɔmɔ yɛ Santa Cruz sɛɛ lɛ, ajie mi kɛtee Bolivia maŋtiase ni ji La Paz lɛ mli, ni miye afii 25 yɛ jɛmɛ. Yɛ afi 1970 shishijee gbɛ lɛ, mɛi 12 pɛ tsuɔ nii yɛ Yehowa Odasefoi anitsumɔhe nine ni yɔɔ La Paz lɛ. Beni shiɛmɔ nitsumɔ lɛ shwereɔ ní no ha ehe bahia ni alɛɛ nitsumɔhe nine lɛ mli lɛ, amã nitsumɔhe nine hee yɛ Santa Cruz ni ji maŋ ni miishwere oyayaayai lɛ mli. Ajie nitsumɔhe nine lɛ kɛtee jɛmɛ yɛ afi 1998, ni afɔ̃ mi nine akɛ miyafata mɛi ni agbɛnɛ amɛyi fa fe 50 ni tsuɔ nii yɛ jɛmɛ lɛ ahe.

Yɛ afi 1966 lɛ, no mli lɛ asafo kome pɛ yɔɔ Santa Cruz, shi amrɔ nɛɛ asafoi ni fa fe 50 yɛ jɛmɛ. Odasefoi 640 ni yɔɔ Bolivia yɛ nakai beaŋ lɛ etee nɔ eshwere kɛbashɛ mɛi afee 18,000 ŋmɛnɛ!

Miishɛɛ sane ji akɛ, nitsumɔ ni miyatsu yɛ Bolivia lɛ wo yibii. Shi kɛlɛ, anɔkwa ni minanemɛi Kristofoi ni yɔɔ je lɛŋ fɛɛ lɛ yeɔ lɛ woɔ mi hewalɛ be fɛɛ be. Wɔ fɛɛ wɔnáa miishɛɛ waa kɛ́ wɔna bɔ ni Yehowa jɔɔ Maŋtsɛyeli shiɛmɔ nitsumɔ lɛ nɔ lɛ. Lɛɛlɛŋ, kɛ́ okɛ ohe wo kaselɔi afeemɔ nitsumɔ lɛ mli lɛ, obaaná miishɛɛ waa.—Mateo 28:19, 20.

[Mfoniri ni yɔɔ baafa 13]

Beni mitsuɔ gbɛgbamɔ nitsumɔ lɛ yɛ Scotland

[Mfonirii ni yɔɔ baafa 15]

Miisɔmɔ yɛ Bolivia nitsumɔhe nine lɛ; (nɔ ni hɔ mli) Gilead klas ni ji 42 lɛ naagbee nifeemɔ