Yaa Nɔ Oná Hiɛsɔɔ Be Fɛɛ Be
Yaa Nɔ Oná Hiɛsɔɔ Be Fɛɛ Be
“Mawu, oyiŋtoi lɛ ajara wa yɛ mihiɛ akɛ nɔ ko! amɛyi fa akɛ nɔ ko!”—LALA 139:17.
1, 2. Mɛni hewɔ esa akɛ wɔhiɛ asɔ Nyɔŋmɔ Wiemɔ lɛ, ni te lalatsɛ lɛ jie hiɛsɔɔ ni eyɔɔ lɛ kpo eha tɛŋŋ?
BENI asáa Yehowa sɔlemɔtsu ni yɔɔ Yerusalem lɛ, Osɔfonukpa Hilkia yana “mla wolo ní Yehowa tsɔ Mose nine nɔ eŋɔha lɛ,” ni ekã shi faŋŋ akɛ no ji nɔ ni Mose diɛŋtsɛ ŋma aafee afii 800 kɛtsɔ hiɛ lɛ! Amɛmii shɛ wolo nɛɛ he naakpa. Ani obaanyɛ ofee bɔ ni Maŋtsɛ Yosia ni sheɔ Nyɔŋmɔ gbeyei lɛ nu he eha beni akɛ wolo lɛ baha lɛ lɛ he mfoniri? Yɛ anɔkwale mli lɛ emii shɛ he waa diɛŋtsɛ ni eha Shafan, ni ji woloŋmalɔ lɛ kane eha lɛ.—2 Kronika 34:14-18.
2 Ŋmɛnɛ, mɛi akpekpei abɔ baanyɛ akane Nyɔŋmɔ Wiemɔ muu lɛ fɛɛ loo efã ko. Shi ani enɛ haa Ŋmalɛ lɛ bafeɔ nɔ ni sɛɛnamɔ bɛ he aloo nɔ ni he ehiaaa tsɔ̃? Dabi kwraa! Yɛ anɔkwale mli lɛ, Ofe lɛ diɛŋtsɛ susumɔi ní aŋmala koni wɔná he sɛɛ ji nɔ ni yɔɔ mli. (2 Timoteo 3:16) Lalatsɛ David jie bɔ ni enuɔ he ehaa yɛ Nyɔŋmɔ Wiemɔ lɛ he lɛ kpo ni eŋma akɛ: “Mawu, oyiŋtoi lɛ ajara wa yɛ mihiɛ akɛ nɔ ko! amɛyi fa akɛ nɔ ko!”—Lala 139:17.
3. Mɛni tsɔɔ akɛ David ji mɔ ko ni nuɔ Nyɔŋmɔjamɔ shishi jogbaŋŋ?
3 David hiɛ sɔ Yehowa, e-Wiemɔ lɛ, kɛ anɔkwa jamɔ he gbɛjianɔ ni Nyɔŋmɔ eto lɛ be fɛɛ be. Lalai ŋɔɔmɔŋɔɔmɔi babaoo ni David fo lɛ jie bɔ ni enu he eha lɛ kpo. Ákɛ nɔkwɛmɔnɔ lɛ, eŋma yɛ Lala 27:4 lɛ akɛ: “Nɔ̃ koome mibiɔ yɛ Yehowa dɛŋ, no sɛɛgbɛ mitaoɔ: akɛ mahi shi yɛ Yehowa we lɛ miwala gbii abɔ fɛɛ, ni mana Yehowa mlihilɛ lɛ, ni makwɛ esɔlemɔwe lɛ [kɛ hiɛsɔɔ, NW].” Yɛ blema Hebri wiemɔ mli lɛ, ‘makwɛ kɛ hiɛsɔɔ’ lɛ shishi ji ni ahe be kɛshwie yiŋ, atao nibii amli jogbaŋŋ, akɛ miishɛɛ akwɛ, ní anya he. Eyɛ faŋŋ akɛ David ji mɔ ko ni nuɔ Nyɔŋmɔjamɔ shishi jogbaŋŋ, ni ehiɛ sɔ gbɛjianɔi fɛɛ ni Yehowa to kɛha jamɔ lɛ, ni enya anɔkwalei fɛɛ ni jɛ Nyɔŋmɔ ŋɔɔ lɛ ahe. Esa akɛ wɔkase bɔ ni ejie hiɛsɔɔ kpo eha lɛ.—Lala 19:8-12.
Ha Ohiɛ Asɔ Hegbɛ ni Oná akɛ Ole Biblia Mli Anɔkwale Lɛ
4. Mɛni ha Yesu “mli fili lɛ yɛ Mumɔ krɔŋkrɔŋ lɛ mli” lɛ?
4 Nyɔŋmɔ Wiemɔ lɛ mli nilee ni aaaná lɛ damɔɔɔ jwɛŋmɔŋ nyɛmɔ loo je lɛŋ wolo kasemɔ ní haa mɔ woɔ ehe nɔ lɛ nɔ. Yɛ no najiaŋ lɛ, Yehowa mɔbɔnalɛ ni ejieɔ lɛ kpo etsɔɔ heshibalɔi ni hiɛ tsui kpakpa ní amɛhiɛ yɔɔ amɛmumɔŋ hiamɔ nii anɔ lɛ ji nɔ ni haa anáa e-Wiemɔ lɛ mli nilee. (Mateo 5:3; 1 Yohane 5:20) Beni Yesu susu adesai komɛi ni yeee emuu ní aŋmalaa amɛgbɛi yɛ ŋwɛi lɛ he lɛ, ‘emli fili lɛ yɛ Mumɔ krɔŋkrɔŋ lɛ mli ni ekɛɛ: Miijie oyi, Ataa, ŋwɛi kɛ shikpɔŋ Nuŋtsɔ, akɛ oŋɔ nii nɛɛ otee nilelɔi kɛ ŋaalelɔi, ni ojie otsɔɔ abifabii.’—Luka 10:17-21.
5. Mɛni hewɔ esaaa akɛ Yesu kaselɔi lɛ buɔ Maŋtsɛyeli lɛ he anɔkwalei ni ajie kpo atsɔɔ amɛ lɛ akɛ nɔ ko fɛlɛfɛlɛ lɛ?
5 Beni Yesu jɛ etsuiŋ esɔle sɛɛ lɛ, ekwɛ ekaselɔi lɛ ahiɛ ni ekɛɛ amɛ akɛ: “Ajɔɔ hiŋmɛii ni naa nibii ni nyɛnaa lɛ. Ejaakɛ miikɛɛ nyɛ akɛ gbalɔi kɛ maŋtsɛmɛi pii etao akɛ amɛna nii ni nyɛnaa nɛɛ, ni amɛyanaaa, ni asaŋ amɛnu nii ni nyɛnuɔ nɛɛ, ni amɛyanuuu.” Hɛɛ, Yesu wo esɛɛnyiɛlɔi anɔkwafoi lɛ hewalɛ koni amɛkabu Maŋtsɛyeli lɛ he anɔkwalei ni jara wa waa ni ajie kpo atsɔɔ amɛ lɛ akɛ nɔ ko fɛlɛfɛlɛ. Ajieee anɔkwalei nɛɛ akpo atsɔɔɔ Nyɔŋmɔ tsuji ni tsɔ amɛhiɛ lɛ, ni asaŋ agbeleee naa hu atsɔɔɔ “nilelɔi kɛ ŋaalelɔi” ni hi shi yɛ Yesu gbii lɛ amli lɛ!—Luka 10:23, 24.
6, 7. (a) Mɛni hewɔ esa akɛ wɔhiɛ asɔ anɔkwalei ni jɛ Nyɔŋmɔ ŋɔɔ lɛ? (b) Ŋmɛnɛ, mɛɛ srɔtofeemɔ anaa yɛ anɔkwa jamɔ kɛ apasa jamɔ teŋ?
6 Akɛni Yehowa etsɔ “tsulɔ anɔkwafo kɛ nilelɔ” lɛ nɔ eha ewebii lɛ enu e-Wiemɔ lɛ shishi waa yɛ wɔgbii nɛɛ amli hewɔ lɛ, wɔyɛ yiŋtoi babaoo ni wɔɔdamɔ nɔ wɔjie hiɛsɔɔ kpo yɛ Biblia mli anɔkwalei lɛ ahe. (Mateo 24:45; Daniel 12:10) Gbalɔ Daniel ŋma yɛ naagbee be lɛ he akɛ: “Mɛi pii aaakane fitsofitso, ni nilee aaafá.” (Daniel 12:4) Ani okpɛlɛɛɛ nɔ akɛ ŋmɛnɛ, Nyɔŋmɔ he nilee ‘efá babaoo,’ ni akɛ aalɛ Yehowa webii jogbaŋŋ yɛ mumɔŋ?
7 Kwɛ bɔ ni esoro Nyɔŋmɔ webii ni eshwere yɛ mumɔŋ lɛ kwraa yɛ Babilon Kpeteŋkpele lɛ mli bii ní amɛyiŋ efutu amɛ yɛ jamɔŋ saji ahe lɛ he! Enɛ hewɔ lɛ, mɛi babaoo ni apasa jamɔ eha amɛnijiaŋ eje wui loo amɛnyaaa nibii ni yaa nɔ yɛ mli lɛ ahe lɛ miiké yuu kɛmiiba anɔkwa jamɔ mli. Nɛkɛ mɛi nɛɛ ahe jɔ, ni ‘amɛsumɔɔɔ ni amɛkɛ Babilon Kpeteŋkpele lɛ afee ekome yɛ ehe eshai lɛ amli’ loo ‘ní amɛná ehaomɔi lɛ eko.’ Yehowa kɛ etsuji lɛ miifɔ̃ mɛi ni tamɔ nɛkɛ lɛ fɛɛ anine koni amɛba anɔkwa Kristofoi asafo lɛ mli.—Kpojiemɔ 18:2-4; 22:17.
Mɛi ni Hiɛ Sɔɔ Nii lɛ Miiké Kɛmiiba Nyɔŋmɔ Ŋɔɔ
8, 9. Hagai 2:7 lɛ miiná emlibaa ŋmɛnɛ yɛ mɛɛ gbɛ?
8 Yehowa gba yɛ e-mfonirifeemɔŋ sɔlemɔwe lɛ he akɛ: “Mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ.” (Hagai 2:7) Nɛkɛ gbalɛ ni yɔɔ miishɛɛ nɛɛ ná emlibaa yɛ Hagai gbii lɛ amli beni Nyɔŋmɔ webii lɛ ateŋ shwɛɛnii lɛ ku amɛsɛɛ amɛyatswa Yerusalem sɔlemɔtsu lɛ ekoŋŋ lɛ. Ŋmɛnɛ, Hagai gbalɛ lɛ miiná emlibaa kroko yɛ Yehowa mumɔŋ sɔlemɔtsu kpeteŋkpele lɛ gbɛfaŋ.
9 Mɛi akpekpei abɔ eba mfonirifeemɔŋ sɔlemɔwe lɛ momo koni amɛbaja Nyɔŋmɔ “yɛ mumɔ kɛ anɔkwale mli,” ni daa afi lɛ, mɛi akpekpei ohai abɔ ni ji “jeŋmaji lɛ fɛɛ anii ni jara wa lɛ” kéɔ yuu kɛbaa. (Yohane 4:23, 24) Ákɛ nɔkwɛmɔnɔ lɛ, jeŋ muu fɛɛ akɔntaabuu kɛha afi 2006 sɔɔmɔ afi lɛ tsɔɔ akɛ abaptisi mɛi 248,327 kɛma amɛhe nɔ ni amɛjɔɔ amɛha Yehowa lɛ nɔ mi. Kɛ́ aja mli lɛ, abaptisi mɛi heei 680 daa gbi! Bɔ ni amɛsumɔɔ anɔkwale lɛ kɛ shwelɛ ni amɛyɔɔ akɛ amɛbaasɔmɔ Yehowa akɛ Maŋtsɛyeli lɛ he shiɛlɔi lɛ maa nɔ mi akɛ Nyɔŋmɔ egbala amɛ kɛba eŋɔɔ lɛɛlɛŋ.—Yohane 6:44, 65.
10, 11. Gbaa niiashikpamɔ ko ni tsɔɔ bɔ ni mɛi ahiɛ esɔ Biblia mli anɔkwale lɛ.
10 Mɛi ni hiɛ tsui kpakpa nɛɛ ateŋ mɛi babaoo kpɛlɛ anɔkwale lɛ nɔ ejaakɛ amɛyɔse “srɔto ni yɔɔ jalɔ kɛ efɔŋfeelɔ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ teŋ.” (Maleaki 3:18) Susumɔ Wayne kɛ eŋa Virginia ni kulɛ amɛyaa Protestant sɔlemɔ ko shi amɛnáaa Nyɔŋmɔjamɔ he sanebimɔi babaoo ni amɛyɔɔ lɛ ahetoo lɛ aniiashikpamɔ lɛ he okwɛ. Akɛni amɛsumɔɔɔ tawuu kwraa hewɔ lɛ, kɛ́ amɛna akɛ osɔfoi miijɔɔ asraafoi kɛ tawuu nibii anɔ lɛ, amɛyiŋ futuɔ amɛ ni egbaa amɛnaa waa. Eyɛ mli akɛ Virginia etsɔɔ gbekɛbii ni yɔɔ amɛsɔlemɔ lɛ mli lɛ anii afii babaoo moŋ, shi beni ekɛ ewu lɛ gbɔlɔ lɛ, amɛna akɛ sɔlemɔ lɛ mli bii lɛ ekpoo amɛ. Amɛkɛɛ akɛ: “Amɛteŋ mɔ kome folo po ebasaraaa wɔ, ni amɛsusuuu wɔmumɔŋ hilɛ-kɛhamɔ he hu. Nɔ̃ pɛ ni sɔlemɔ lɛ taoɔ yɛ wɔdɛŋ ji wɔshika. Wɔfee shwɛm.” Nɔ ni ha amɛnijiaŋ je wui fe fɛɛ ji beni sɔlemɔ lɛ ŋmɛ hii kɛ hii loo yei kɛ yei agbɛ akɛ amɛbaanyɛ amɛbote gbalashihilɛ mli lɛ.
11 Yɛ nakai beaŋ lɛ, Wayne kɛ Virginia nabi ko batsɔ Yehowa Odasefonyo, ni sɛɛ mli lɛ amɛbiyoo hu batsɔ Odasefonyo. Eyɛ mli akɛ shishijee lɛ Wayne kɛ Virginia mli fu yɛ enɛ he moŋ, shi yɛ sɛɛ mli lɛ amɛtsake amɛjwɛŋmɔ ni amɛkpɛlɛ koni akɛ amɛ hu akase Biblia lɛ. Wayne kɛɛ akɛ: “Yɛ nyɔji etɛ pɛ mli lɛ, nibii ni wɔkase kɛjɛ Biblia lɛ mli lɛ fa kwraa fe nibii ni wɔkase yɛ afii 70 ni eho lɛ mli! Wɔlé po akɛ Nyɔŋmɔ gbɛi ji Yehowa, ni wɔlé Maŋtsɛyeli lɛ kɛ shikpɔŋ nɔ Paradeiso lɛ he nɔ ko kwraa.” Etsɛɛɛ tsɔ ni gbalashihilɛ mli hefatalɔi ni hiɛ tsui kpakpa nɛɛ bɔi Kristofoi akpeei yaa, ni amɛkɛ amɛhe wo shiɛmɔ nitsumɔ lɛ mli. Virginia kɛɛ akɛ: “Wɔmiisumɔ ni wɔha mɔ fɛɛ mɔ ale anɔkwale lɛ.” Abaptisi amɛ yɛ afi 2005 beni amɛ fɛɛ amɛye fe afii 80 lɛ. Amɛkɛɛ akɛ: “Wɔna anɔkwa Kristofoi asafo lɛ.”
Ná Hiɛsɔɔ akɛ Aasaa Bo ‘Aaha Nitsumɔ Kpakpa Fɛɛ Nitsumɔ Kpakpa’
12. Mɛni Yehowa feɔ ehaa etsuji be fɛɛ be, ni mɛni esa akɛ wɔfee bɔni afee ni wɔná he sɛɛ?
12 Yehowa yeɔ ebuaa etsuji lɛ be fɛɛ be koni amɛfee esuɔmɔnaa nii. Ákɛ nɔkwɛmɔnɔ lɛ, ekɛ gbɛtsɔɔmɔi pɔtɛɛi ni yɔɔ faŋŋ ha Noa ni tsɔɔ bɔ ni esa akɛ ekpɛ adeka lɛ eha—nɔ ko ni etsuko eko pɛŋ, ni kɛlɛ esa akɛ etsu lɛ pɛpɛɛpɛ! Ni nakai etsu lɛ. Mɛni hewɔ? Ejaakɛ Noa “fee nakai; bɔ ni Nyɔŋmɔ fã lɛ lɛ, nakai pɛpɛɛpɛ efee.” (1 Mose 6:14-22) Ŋmɛnɛ hu lɛ, Yehowa saa etsuji jogbaŋŋ koni amɛfee esuɔmɔnaa nii. Eji anɔkwale akɛ wɔnitsumɔ titri ji ni wɔshiɛ Nyɔŋmɔ Maŋtsɛyeli ni ato ama shi lɛ he sanekpakpa lɛ, ni wɔye wɔbua mɛi ni sa lɛ koni amɛbatsɔmɔ Yesu Kristo kaselɔi. Ni taakɛ ebalɛ yɛ Noa gbɛfaŋ lɛ, toiboo ni wɔɔfee lɛ baaha wɔye omanye. Esa akɛ wɔkɛ gbɛtsɔɔmɔ ni Yehowa kɛhaa kɛtsɔ e-Wiemɔ lɛ kɛ esafo lɛ nɔ lɛ atsu nii.—Mateo 24:14; 28:19, 20.
13. Mɛɛ gbɛ nɔ Yehowa tsɔɔ etsɔseɔ wɔ?
13 Kɛ́ wɔɔye omanye yɛ nakai nitsumɔ lɛ mli lɛ, esa akɛ wɔkase bɔ ni ‘ajaa’ Nyɔŋmɔ Wiemɔ ni ji wɔdɛŋdade titri lɛ “mli pɛpɛɛpɛ,” ejaakɛ “ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 2:15; 3:16, 17) Taakɛ eji yɛ klɛŋklɛŋ afii 100 lɛ mli lɛ, Yehowa tsɔɔ Kristofoi asafo lɛ nɔ etsɔseɔ wɔ jogbaŋŋ. Ŋmɛnɛ, afeɔ Teokrase Sɔɔmɔ Skul lɛ kɛ Sɔɔmɔ Kpee lɛ daa otsi yɛ asafoi 99,770 ni yɔɔ jeŋ fɛɛ lɛ amli koni akɛye abua wɔ yɛ sɔɔmɔ nitsumɔ lɛ mli. Ani oyaa kpeei nɛɛ daa, ni okɛ nibii ni okaseɔ lɛ tsuɔ nii kɛtsɔɔ akɛ oojie hiɛsɔɔ kpo ootsɔɔ kpeei ni he hiaa nɛɛ?—Hebribii 10:24, 25.
14. Mɛɛ gbɛ nɔ Yehowa tsuji tsɔɔ yɛ akɛ amɛhiɛ sɔɔ hegbɛ ni amɛná akɛ amɛmiisɔmɔ Nyɔŋmɔ lɛ? (Wiemɔ akɔntaabuu ni yɔɔ baafa 27-30 lɛ he ofata he.)
14 Nyɔŋmɔ webii akpekpei abɔ ni yɔɔ je lɛŋ fɛɛ lɛ kɛ amɛhe woɔ shiɛmɔ nitsumɔ lɛ mli kɛ ekãa kɛtsɔɔ akɛ amɛhiɛ sɔɔ tsɔsemɔ ni akɛhaa amɛ lɛ. Ákɛ nɔkwɛmɔnɔ lɛ, yɛ afi 2006 sɔɔmɔ afi lɛ mli lɛ, Maŋtsɛyeli shiɛlɔi 6,741,444 kɛ ŋmɛlɛtswai 1,333,966,199 tsu nii yɛ shiɛmɔ nitsumɔ lɛ fãi srɔtoi lɛ fɛɛ amli, ni amɛfee shĩa Biblia mli nikasemɔi 6,286,618. Jeŋ muu fɛɛ akɔntaabuu ni woɔ mɔ hewalɛ lɛ mli fãi komɛi pɛ kɛkɛ nɛ. Taakɛ bɔ ni shiɛmɔ nitsumɔ lɛ shweremɔ he amaniɛbɔɔ wo wɔnyɛmimɛi ni hi shi yɛ klɛŋklɛŋ afii 100 lɛ mli lɛ hewalɛ lɛ, ofainɛ, kwɛmɔ akɛ mɛɛ hewalɛwoo obaanyɛ oná kɛjɛ amaniɛbɔɔ nɛɛ mli.—Bɔfoi lɛ Asaji 1:15; 2:5-11, 41, 47; 4:4; 6:7.
15. Mɛni hewɔ esaaa akɛ mɔ ko nijiaŋ jeɔ wui kɛ́ ekɛ esusuma muu fɛɛ miisɔmɔ Yehowa lɛ?
15 Yijiemɔ ni jijeɔ waa ni akɛhaa Nyɔŋmɔ daa afi lɛ tsɔɔ akɛ Yehowa tsuji ahiɛ sɔɔ waa akɛ amɛná hegbɛ ni amɛbale Yehowa ni amɛmiiye ehe odase. (Yesaia 43:10) Eji anɔkwale akɛ abaanyɛ akɛ yijiemɔ afɔle ni wɔnyɛmimɛi lɛ ekomɛi ni egbɔlɔ, amɛbɛ hewalɛ, loo amɛgbɔjɔ lɛ shãa lɛ ato onia ni yoo okulafo lɛ tsu lɛ he. Shi nyɛkahaa wɔhiɛ kpaa nɔ akɛ Yehowa kɛ e-Bi lɛ hiɛ sɔɔ mɛi fɛɛ ni kɛ susuma muu fɛɛ sɔmɔɔ Nyɔŋmɔ lɛ bei abɔ ni amɛkɛ amɛnyɛmɔ fɛɛ tsuɔ lɛ.—Luka 21:1-4; Galatabii 6:4.
16. Mɛɛ nitsɔɔmɔ dɛŋdadei Nyɔŋmɔ kɛha yɛ nyɛsɛɛ afii nɛɛ amli?
16 Kɛfata tsɔsemɔ ni Yehowa kɛhaa wɔ koni wɔnyɛ wɔshiɛ lɛ he lɛ, etsɔɔ esafo lɛ nɔ ekɛ nitsɔɔmɔ dɛŋdadei ni sa jogbaŋŋ hu haa wɔ. Dɛŋdadei nɛɛ ekomɛi ni wɔnine eshɛ nɔ yɛ afii ni eho lɛ amli lɛ ji Anɔkwale ni Kɛ Mɔ Yaa Naanɔ Wala Mli Lɛ, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ, Nilee Ni Kɛ Mɔ Yaa Naanɔ Wala Mli, kɛ amrɔ nɛɛ Mɛni Biblia lɛ Tsɔɔ Diɛŋtsɛ? wolo lɛ. Mɛi ni hiɛ sɔɔ woji nɛɛ waa lɛ kɛtsuɔ nii jogbaŋŋ yɛ shiɛmɔ nitsumɔ lɛ mli.
Okɛ Biblia lɛ Tsɔɔ Wolo lɛ Atsu Nii Jogbaŋŋ
17, 18. (a) Mɛɛ Biblia lɛ Tsɔɔ wolo lɛ mli fãi komɛi osumɔɔ ni okɛtsu nii yɛ shiɛmɔ nitsumɔ lɛ mli? (b) Mɛni kpokpaa nɔkwɛlɔ ko yɔse yɛ Biblia lɛ Tsɔɔ wolo lɛ he?
17 Mɛni Biblia lɛ Tsɔɔ Diɛŋtsɛ? wolo lɛ hiɛ yitsei 19 kɛ saji krokomɛi ni fata he ní atsɔɔ mli fitsofitso, emli wiemɔi lɛ ashishinumɔ waaa ni amɛyɛ faŋŋ. Wolo nɛɛ kɛ nitsumɔ miiwo yibii waa yɛ shiɛmɔ nitsumɔ lɛ mli. Ákɛ nɔkwɛmɔnɔ lɛ, yitso 12 lɛ wieɔ saneyitso ni ji “Ní Aaahi Shi yɛ Gbɛ ni Saa Nyɔŋmɔ Hiɛ lɛ Nɔ” lɛ he. Yitso nɛɛ haa nikaselɔ lɛ leɔ bɔ ni eeefee etsɔ Nyɔŋmɔ naanyo, ni enɛ ji sane ko ni mɛi babaoo susuko he pɛŋ loo amɛsusuuu akɛ ebaanyɛ eba lɛ nakai. (Yakobo 2:23) Ani mɛi nyaa Biblia kasemɔ wolo nɛɛ he?
18 Kpokpaa nɔkwɛlɔ ko ni yɔɔ Australia lɛ tsɔɔ akɛ “shiatsɛmɛi lɛ nyaa” Biblia lɛ Tsɔɔ wolo lɛ “he amrɔ nɔŋŋ, ni anyɛɔ akɛ amɛ gbaa sane.” Ekɛfata he akɛ, akɛni wolo lɛ kɛ nitsumɔ waa kwraa hewɔ lɛ, “eha Maŋtsɛyeli shiɛlɔi babaoo ená ekãa ni amɛmiishiɛ kɛ miishɛɛ. Ebɛ naakpɛɛ akɛ mɛi komɛi tsɛɔ wolo nɛɛ akɛ Shika Tsuru!”
19-21. Gbaa niiashikpamɔi komɛi ni tsɔɔ akɛ Biblia lɛ Tsɔɔ wolo lɛ he yɛ sɛɛnamɔ waa.
19 Yoo ko ni yɔɔ Guyana lɛ kɛɛ gbɛgbalɔ ko ni yatswa eshinaa lɛ akɛ: “Nyɔŋmɔ diɛŋtsɛ tsu bo kɛba miŋɔɔ.” Yoo lɛ wu ejo foi eshi ekɛ amɛbii bibii enyɔ etsɛko. Gbɛgbalɔ lɛ gbele Biblia lɛ Tsɔɔ wolo lɛ yitso 1 lɛ, ni ekane kuku 11 ni yɔɔ saneyitso bibioo ni ji “Te Nyɔŋmɔ Nuɔ Jalɛ Sane ni Ayeee ni Wɔkɛkpeɔ lɛ He Ehaa Tɛŋŋ?” lɛ shishi lɛ eha lɛ. Gbɛgbalɔ lɛ kɛɛ akɛ: “Sane lɛ ta etsuiŋ waa. Ete shi etee eshwapo lɛ sɛɛ ni eyafó aahu.” Yoo nɛɛ kpɛlɛ koni nyɛmiyoo ko ni yɔɔ jɛmɛ lɛ kɛ lɛ akase Biblia lɛ daa, ni eeya ehiɛ yɛ nikasemɔ lɛ mli.
20 José ni yɔɔ Spain lɛ ŋa gbo yɛ tsɔne oshara mli. Ekɛ tsofai bɔi nitsumɔ akɛ no aaashɛje emii lo, ni eyana jwɛŋmɔ he datrɛfonyo ko koni eye ebua lɛ. Shi kɛlɛ datrɛfonyo lɛ nyɛɛɛ eha sanebimɔ ni gbaa José naa waa, ni ji: “Mɛni hewɔ Nyɔŋmɔ ŋmɛ gbɛ koni miŋa lɛ agbo?” lɛ hetoo. Gbi ko lɛ José kɛ Francesc ní ekɛ lɛ fɛɛ tsuɔ nii yɛ nitsumɔ kome mli lɛ kpe. Francesc kɛɛ lɛ akɛ eha amɛsusu Biblia lɛ Tsɔɔ wolo lɛ yitso 11 ní hiɛ saneyitso akɛ “Mɛni Hewɔ Nyɔŋmɔ Ŋmɛɔ Piŋmɔ Gbɛ?” lɛ he. José nyá Ŋmalɛ mli naatsɔɔmɔ kɛ nɔkwɛmɔnɔ ni kɔɔ tsɔɔlɔ kɛ nikaselɔ ko lɛ he lɛ he waa diɛŋtsɛ. Ekɛ miishɛɛ bɔi Biblia lɛ kasemɔ, etee kpokpaa nɔ kpee ko, ni amrɔ nɛɛ eyaa kpeei yɛ Maŋtsɛyeli Asa lɛ nɔ.
21 Guɔyelɔ ko ni atsɛɔ lɛ Roman ni eye afii 40 ni yɔɔ Poland lɛ yɛ bulɛ kɛha Nyɔŋmɔ Wiemɔ lɛ waa. Shi akɛni enitsumɔ lɛ haaa ená dekã hewɔ lɛ, enyɛɛɛ eya ehiɛ yɛ Biblia lɛ kasemɔ mli. Shi kɛlɛ, etee kpokpaa wulu nɔ kpee ko, ni enine shɛ Biblia lɛ Tsɔɔ wolo lɛ eko nɔ. No sɛɛ lɛ efee tsakemɔ. Ekɛɛ akɛ: “Wolo nɛɛ haa anuɔ Biblia mli shishijee tsɔɔmɔi lɛ fɛɛ ashishi jogbaŋŋ.” Amrɔ nɛɛ Roman kaseɔ Biblia lɛ daa ni eeya ehiɛ waa.
Yaa nɔ Ojie Hiɛsɔɔ Kpo
22, 23. Mɛɛ gbɛ nɔ wɔɔtsɔ wɔtsɔɔ akɛ wɔhiɛ sɔɔ wɔhiɛnɔkamɔ lɛ be fɛɛ be?
22 Taakɛ atsɔɔ mli yɛ “Kpɔ̃mɔ Ebɛŋkɛ!” Kpokpaa Wulu nɔ Kpee ni yɔɔ miishɛɛ lɛ shishi lɛ, anɔkwa Kristofoi miishwe “naanɔ kpɔmɔ” ni Nyɔŋmɔ ewo he shi ni abaatsɔ Yesu Kristo lá ni efɔse eshwie shi lɛ nɔ akɛba lɛ. Ya ni wɔɔya nɔ wɔtsuu wɔhe ‘kɛjɛ nitsumɔi gbohii amli, koni wɔsɔmɔ Nyɔŋmɔ hiɛkãlɔ lɛ’ ji gbɛ ni hi fe fɛɛ ni wɔɔtsɔ nɔ wɔjie tsuiŋ hiɛsɔɔ ni wɔyɔɔ kɛha hiɛnɔkamɔ ni jara wa nɛɛ kpo.—Hebribii 9:12, 14.
23 Eyɛ naakpɛɛ diɛŋtsɛ akɛ bɔ ni ŋkomeŋfa shihilɛ egbɛ eshwa waa eha lɛ fɛɛ sɛɛ lɛ, Maŋtsɛyeli jajelɔi anɔkwafoi ni fa fe akpekpei ekpaa miiŋmɛ amɛtsui shi yɛ Nyɔŋmɔ sɔɔmɔ mli. Enɛ hu ji odaseyeli ni tsɔɔ akɛ Yehowa tsuji ahiɛ sɔɔ hegbɛ ni amɛná akɛ amɛmiisɔmɔ Nyɔŋmɔ lɛ waa diɛŋtsɛ, ni amɛle akɛ ‘amɛmɔdɛŋbɔɔ lɛ efeee yaka yɛ Nuŋtsɔ lɛ mli.’ Eba akɛ wɔɔya nɔ wɔná hiɛsɔɔ ni tamɔ nɛkɛ lɛ be fɛɛ be!—1 Korintobii 15:58; Lala 110:3.
Te Obaaha Hetoo Oha Tɛŋŋ?
• Mɛni wɔkaseɔ kɛjɛɔ lalatsɛ lɛ dɛŋ yɛ bɔni esa akɛ ajie hiɛsɔɔ kpo aha Nyɔŋmɔ kɛ gbɛjianɔi fɛɛ ni etoɔ kɛha jamɔ lɛ?
• Hagai 2:7 lɛ miiná emlibaa ŋmɛnɛ yɛ mɛɛ gbɛ nɔ?
• Yehowa esaa etsuji koni amɛsɔmɔ lɛ jogbaŋŋ yɛ mɛɛ gbɛ nɔ?
• Mɛni obaanyɛ ofee kɛtsɔɔ akɛ ohiɛ sɔɔ Yehowa mlihilɛ lɛ?
[Nikasemɔ lɛ he Sanebimɔi]
[Akrabatsa ni yɔɔ baafa 27-30]
2006 YEHOWA ODASEFOI NI YƆƆ JEŊ FEE SƆƆMƆ AKƆNTAABUU
(Kwɛmɔ “bound volume”)
[Mfonirii ni yɔɔ baafa 25]
Yehowa saa wɔ jogbaŋŋ koni wɔfee esuɔmɔnaa nii