Bɔ ni Ooofee Oyɔse Anɔkwa Jamɔ

JAMƆI pii wieɔ akɛ nɔ ni amɛkɛɔ lɛ jɛ Nyɔŋmɔ ŋɔɔ. Enɛ hewɔ lɛ, esa akɛ wɔbo Yohane, ni eji Yesu bɔfo lɛ wiemɔi lɛ atoi akɛ: “Suɔmɔmɛi, nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo; ejaakɛ amale gbalɔi pii eje kpo kɛba je lɛ mli.” (1 Yohane 4:1) Te wɔɔfee tɛŋŋ wɔka nɔ ko wɔkwɛ akɛ ejɛ Nyɔŋmɔ mli lɛ?

Nibii fɛɛ ni Nyɔŋmɔ fee lɛ haa anaa esui lɛ faŋŋ, titri lɛ esu ni fe fɛɛ ni ji suɔmɔ lɛ. Ákɛ nɔkwɛmɔnɔ lɛ, wɔgugɔ̃ ni wɔkɛfũɔ nii, ní haa wɔnyaa baai, fɔfɔi, loo bodobodo klakla ŋma he lɛ tsɔɔ akɛ Nyɔŋmɔ yɛ suɔmɔ. Nyɛmɔ ni wɔkɛnaa hulushinyɔɔ, abɛi, loo gbekɛ fioo ko ŋmɔlɔ lɛ tsɔɔ akɛ Nyɔŋmɔ sumɔɔ wɔ. Nakai nɔŋŋ abaanyɛ akɛɛ yɛ nyɛmɔ ni wɔyɔɔ ni wɔkɛboɔ lala ko ni ŋɔɔ toi, wɔkɛnuɔ loofɔlɔ ko lala, loo wɔsuɔlɔ ko gbee lɛ he. Bɔ ni wɔji adesai ni yeee emuu lɛ po jieɔ Nyɔŋmɔ suɔmɔ lɛ kpo. No hewɔ ni bei babaoo lɛ wɔnaa anɔkwale ni Yesu wiemɔi nɛɛ ji, akɛ: “Nɔ hamɔ mli yɛ jɔɔmɔ fe hemɔ.” (Bɔfoi lɛ Asaji 20:35) Eŋɔɔ wɔnaa akɛ wɔɔjie suɔmɔ kpo ejaakɛ “Nyɔŋmɔ subaŋ lɛ nɔ” abɔ wɔ yɛ. (1 Mose 1:27) Eyɛ mli akɛ Yehowa yɛ sui krokomɛi babaoo moŋ, shi suɔmɔ ji esui lɛ ateŋ nɔ ni fe fɛɛ.

Esa akɛ woji ni aŋmala ni jɛ Nyɔŋmɔ ŋɔɔ lɛ ajie esuɔmɔ lɛ kpo. Je lɛŋ jamɔi lɛ yɛ blema woji babaoo. Te woji nɛɛ jieɔ Nyɔŋmɔ suɔmɔ lɛ kpo amɛhaa tɛŋŋ?

Anɔkwa sane ji akɛ, nɔ ko fioo ko pɛ blema jamɔ he woji babaoo tsɔɔ yɛ bɔ ni Nyɔŋmɔ sumɔɔ wɔ loo bɔ ni wɔbaanyɛ wɔsumɔ Nyɔŋmɔ lɛ he. Enɛ eha mɛi akpekpei abɔ naaa hetoo amɛhaaa sane ni amɛbiɔ akɛ, “Mɛni hewɔ piŋmɔ kɛ efɔŋfeemɔ kãhe eeeya nɔ lolo be mli ni nibii ni Nyɔŋmɔ ebɔ lɛ tsɔɔ akɛ eyɛ suɔmɔ lɛ?” Yɛ gbɛ kroko nɔ lɛ, Biblia lɛ pɛ ji Nyɔŋmɔjamɔ he wolo ni aŋma yɛ blema ni tsɔɔ Nyɔŋmɔ suɔmɔ lɛ mli jogbaŋŋ. Etsɔɔ wɔ bɔ ni wɔɔfee wɔjie suɔmɔ kpo hu.

Wolo ni Wieɔ Suɔmɔ He

Nyɔŋmɔ Wiemɔ ni ji Biblia lɛ wieɔ Yehowa he akɛ eji ‘suɔmɔ Nyɔŋmɔ.’ (2 Korintobii 13:11) Biblia lɛ wieɔ bɔ ni suɔmɔ tsirɛ Yehowa koni eha klɛŋklɛŋ adesai enyɔ lɛ wala ni hela kɛ gbele bɛ mli lɛ he. Shi atua ni atse ashi Nyɔŋmɔ nɔyeli hegbɛ lɛ kɛ piŋmɔ ba adesai anɔ. (5 Mose 32:4, 5; Romabii 5:12) Yehowa tsu saji ahe nii koni ekɛjaje nibii. Nyɔŋmɔ Wiemɔ lɛ kɛɔ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yohane 3:16) Ŋmalɛ Krɔŋkrɔŋ lɛ yaa nɔ etsɔɔ Nyɔŋmɔ suɔmɔ lɛ mli akɛ,  Nyɔŋmɔ eto nɔyeli ni eye emuu ní kɛ toiŋjɔlɛ baaba abahã adesai, ni Yesu ji enɔ maŋtsɛ.—Daniel 7:13, 14; 2 Petro 3:13.

Biblia lɛ mua nɔ ni esa akɛ gbɔmɔ afee lɛ naa yɛ wiemɔi nɛɛ mli akɛ: “‘Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kitai enyɔ nɛɛ mla lɛ . . . fɛɛ tsotsoro.” (Mateo 22:37-40) Ŋmalɛ lɛ diɛŋtsɛ kɛɔ akɛ ajɛ mumɔŋ aŋma Biblia lɛ. Akɛni ejieɔ Nyɔŋmɔ sui lɛ akpo faŋŋ hewɔ lɛ, wɔbaanyɛ wɔná nɔmimaa akɛ ejɛ ‘suɔmɔ Nyɔŋmɔ’ lɛ ŋɔɔ.—2 Timoteo 3:16.

Wɔbaanyɛ wɔdamɔ susumɔ nɛɛ nɔ wɔyɔse blema woji ni jɛ Nyɔŋmɔ ŋɔɔ lɛɛlɛŋ lɛ. Suɔmɔ kadiɔ anɔkwa jálɔi hu, ejaakɛ amɛkaseɔ Nyɔŋmɔ kɛtsɔ suɔmɔ kpo ni amɛjieɔ lɛ nɔ.

Bɔ ni Ooofee Oyɔse Mɛi ni Sumɔɔ Nyɔŋmɔ

Ayɔseɔ mɛi ni sumɔɔ Nyɔŋmɔ diɛŋtsɛ lɛ faŋŋ, titri lɛ amrɔ nɛɛ ni wɔyɔɔ gbii ni Biblia lɛ tsɛɔ lɛ akɛ “naagbee gbii” lɛ amli lɛ. “Hesuɔlɔi, shika suɔlɔi, . . . mɛi ni sumɔɔ shwɛmɔ kɛ ŋɔɔmɔ fe Nyɔŋmɔ” ayi miifá babaoo.—2 Timoteo 3:1-4.

Te ooofee tɛŋŋ oyɔse mɛi ni sumɔɔ Nyɔŋmɔ lɛ? Biblia lɛ kɛɔ akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.” (1 Yohane 5:3) Suɔmɔ ni mɛi yɔɔ kɛha Nyɔŋmɔ lɛ tsirɛɔ amɛ koni amɛye jeŋba he mlai ni yɔɔ Biblia lɛ mli lɛ anɔ. Ákɛ nɔkwɛmɔnɔ lɛ, mlai yɛ Nyɔŋmɔ Wiemɔ lɛ mli ni kɔɔ bɔlɛnamɔ kɛ gbalashihilɛ he. Gbalashihilɛ mli hefatalɔi pɛ baanyɛ amɛkɛ amɛhe aná bɔlɛ, ni esa akɛ gbalashihilɛ lɛ ahi shi daa. (Mateo 19:9; Hebribii 13:4) Yoo ko ni yɔɔ Spain ni kase Nyɔŋmɔjamɔ he nii yɛ skul lɛ tee Yehowa Odasefoi asafoŋ kpee ko shishi, ni no mli lɛ amɛkɛ miishɛɛ miikase jeŋba he mlai ni yɔɔ Biblia lɛ mli lɛ ahe nii. Ekɛɛ akɛ: “Beni mishiɔ jɛmɛ lɛ, miná miishɛɛ waa diɛŋtsɛ, jeee yɛ Ŋmalɛ naa wiemɔi ni tsɔɔ mɔ nii lɛ pɛ kɛkɛ hewɔ, shi yɛ ekomefeemɔ ni yɔɔ amɛteŋ, bɔ ni amɛjeŋba he tse, kɛ bɔ ni amɛbaa amɛjeŋ jogbaŋŋ lɛ hu hewɔ.”

Kɛfata suɔmɔ ni anɔkwa Kristofoi yɔɔ kɛha Nyɔŋmɔ lɛ he lɛ, nɔ ko ni akɛfɔɔ amɛ yɔsemɔ hu ji bɔ ni amɛjieɔ suɔmɔ kpo amɛtsɔɔ amɛkutsoŋbii lɛ. Nitsumɔ titri ni amɛtsuɔ ji ni amɛkɛ mɛi krokomɛi agba adesai ahiɛnɔkamɔ kome pɛ ni yɔɔ, ni ji Nyɔŋmɔ Maŋtsɛyeli lɛ he sane. (Mateo 24:14) Amɛkutsoŋbii lɛ ni amɛaaye amɛbua amɛ ni amɛná Nyɔŋmɔ he nilee lɛ ji nɔ ni sɛɛnamɔ yɔɔ he fe fɛɛ. (Yohane 17:3) Anɔkwa Kristofoi jieɔ suɔmɔ ni amɛyɔɔ lɛ hu kpo yɛ gbɛ̀i krokomɛi anɔ. Amɛyeɔ amɛbuaa mɛi ni naa amanehulu lɛ. Ákɛ nɔkwɛmɔnɔ lɛ, beni shikpɔŋhosomɔ ko fite nibii yɛ Italy lɛ, adafitswaa wolo ko bɔ amaniɛ akɛ Yehowa Odasefoi lɛ “ye amɛbua mɛi, amɛye amɛbua mɛi ni naa amanehulu lɛ ekɔɔɔ he eko jamɔ mli ni mɛi lɛ yɔɔ.”

Kɛfata suɔmɔ ni anɔkwa Kristofoi yɔɔ kɛha Nyɔŋmɔ kɛ amɛkutsoŋbii lɛ he lɛ, amɛsumɔɔ amɛhe. Yesu kɛɛ akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:34, 35.

Ani esoro suɔmɔ ni anɔkwa Kristofoi jieɔ lɛ kpo amɛtsɔɔ amɛhe lɛ yɛ mɛi krokomɛi anɔ he? Abaawa ko ni atsɛɔ lɛ Ema na akɛ nakai eji. Etsuɔ nii yɛ La Paz, yɛ Bolivia, he ni bei pii lɛ weku mligbalamɔ haa anaa srɔtofeemɔ ni yɔɔ niiatsɛmɛi kɛ ohiafoi ateŋ lɛ. Ekɛɛ akɛ: “Beni miitee Yehowa Odasefoi akpee klɛŋklɛŋ kwraa lɛ, mina oblanyo ko ni esaa ehe jogbaŋŋ ni ekɛ Indian yoo ko ta shi amɛmiigba sane. Minako enɛ eko dã. Miyɔse amrɔ nɔŋŋ akɛ Nyɔŋmɔ webii lɛ nɛ.” Oblayoo ko ni atsɛɔ lɛ Miriam ni jɛ Brazil lɛ hu kɛɛ akɛ: “Mileee bɔ ni afeɔ anáa miishɛɛ, ni mináaa miishɛɛ yɛ miweku lɛ tete po mli. Yehowa Odasefoi lɛ ateŋ ji he klɛŋklɛŋ  ni mina ni aajie suɔmɔ kpo yɛ.” Onukpa ni kwɛɔ adafitswaa nɔ yɛ tɛlivishiŋ nitsumɔhe ko ni yɔɔ United States lɛ ŋma akɛ: “Eji mɛi pii hiɔ shi taakɛ nyɛjamɔ lɛ tsɔɔ lɛ kulɛ, maŋ nɛɛ mli shihilɛ fiteŋ nɛkɛ. Ákɛ adafitswalɔ lɛ, mile akɛ ato nyɛjamɔ lɛ shishi yɛ suɔmɔ kɛ hemɔkɛyeli ni mli wa yɛ Bɔlɔ lɛ mli lɛ nɔ.”

Taomɔ Anɔkwa Jamɔ

Suɔmɔ haa anɔkwa jamɔ feɔ srɔto. Yesu kɛ anɔkwa jamɔ yɔsemɔ to gbɛ ni ji ja ní aaayɔse kɛ yiŋ ni aaakpɛ akɛ aaanyiɛ nɔ lɛ he. No pɛ ji gbɛ ni kɛ mɔ yaa naanɔ wala mli. Yesu kɛɛ akɛ: “Nyɛbotea agbó fintɔ̃ɔ lɛ mli! Ejaakɛ agbó ni lɛɛ kɛ gbɛ tɛtɛrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ní boteɔ mli lɛ fá pii. Shi agbó fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” (Mateo 7:13, 14) Anɔkwa jamɔ kuu kome pɛ mli bii kɛ Nyɔŋmɔ efee ekome kɛmiinyiɛ anɔkwa jamɔ gbɛ lɛ nɔ. No hewɔ lɛ, ehe miihia ni osusu jamɔ ni ohalaa lɛ he. Kɛ́ ona nakai gbɛ lɛ ni okpɛ oyiŋ akɛ obaanyiɛ nɔ lɛ, no lɛ ona shihilɛ gbɛ ni hi fe fɛɛ lɛ, ejaakɛ eji suɔmɔ gbɛ.—Efesobii 4:1-4.

Kwɛ miishɛɛ ni obaana be mli ni onyiɛɔ anɔkwa jamɔ gbɛ lɛ nɔ lɛ! Etamɔ nɔ ni okɛ Nyɔŋmɔ miinyiɛ. Nyɔŋmɔ baanyɛ aha oná nilee kɛ suɔmɔ bɔni afee ni oná okɛ mɛi krokomɛi ateŋ wekukpaa kpakpa. Nyɔŋmɔ baanyɛ eha ole yiŋtoo ni yɔɔ wala sɛɛ lɛ, ni obaanu eshiwoi lɛ ashishi, ni obaaná hiɛnɔkamɔ kɛha wɔsɛɛ. Kɛ́ otao anɔkwa jamɔ lɛ, oshwaŋ ohe kɔkɔɔkɔ.

[Mfoniri ni yɔɔ baafa 5]

Yɛ blema woji ni aŋmala lɛ fɛɛ ateŋ lɛ, Biblia lɛ pɛ hãa aleɔ Nyɔŋmɔ suɔmɔ lɛ

[Mfonirii ni yɔɔ baafa 7]

Ayɔseɔ anɔkwa Kristofoi ejaakɛ amɛjieɔ suɔmɔ kpo