Nyɛhaa Wɔ Fɛɛ Wɔwóa Yehowa Gbɛi Lɛ Nɔ
Nyɛhaa Wɔ Fɛɛ Wɔwóa Yehowa Gbɛi Lɛ Nɔ
“Nyɛkɛ mi akafoa Yehowa dalɛ lɛ, ni nyɛhaa wɔ fɛɛ wɔwóa egbɛi lɛ nɔ!”—LALA 34:4.
1. Mɛɛ nɔkwɛmɔnɔ kpakpa Yesu fee efɔ̃ shi yɛ eshikpɔŋ nɔ sɔɔmɔ lɛ mli?
YƐ Nisan 14, 33 Ŋ.B. gbɛkɛ lɛ, Yesu kɛ ebɔfoi lɛ fee ekome kɛlá yijiemɔ lalai amɛha Yehowa yɛ ŋwɛitsu ko nɔ yɛ Yerusalem. (Mateo 26:30) No bafee naagbee be ni Yesu kɛ ebɔfoi lɛ lá yijiemɔ lalai. Ni kɛlɛ, esa jogbaŋŋ akɛ etsɔ nakai gbɛ nɔ emu kpee ni ekɛ amɛ fee lɛ naa. Yesu jie e-Tsɛ lɛ yi kɛjɛ beni eje eshikpɔŋ nɔ sɔɔmɔ lɛ shishi kɛyashi egbe naa, ni ekɛ ekãa ha mɛi le Yehowa gbɛi lɛ. (Mateo 4:10; 6:9; 22:37, 38; Yohane 12:28; 17:6) Etsɔ enɛ feemɔ nɔ etsɔɔ akɛ ekɛ lalatsɛ lɛ ninefɔɔ ni yɔɔ miishɛɛ lɛ kpãa gbee akɛ: “Nyɛkɛ mi akafoa Yehowa dalɛ lɛ, ni nyɛhaa wɔ fɛɛ wɔwóa egbɛi lɛ nɔ!” (Lala 34:4) Mɛɛ nɔkwɛmɔnɔ kpakpa ni wɔbaanyɛ wɔkase po enɛ ji nɛkɛ!
2, 3. (a) Te wɔfeɔ tɛŋŋ wɔleɔ akɛ Lala 34 lɛ ji gbalɛ? (b) Mɛni he wɔbaasusu yɛ nikasemɔ nɛɛ kɛ nɔ ni baanyiɛ sɛɛ lɛ mli?
2 Ŋmɛlɛtswai fioo komɛi asɛɛ beni Yohane efata Yesu kɛ bɔfoi krokomɛi lɛ ahe kɛlá yijiemɔ lalai lɛ, ena nifeemɔ kroko. Ena ni asɛŋ e-Nuŋtsɔ lɛ kɛ ojotswalɔi enyɔ komɛi yɛ sɛŋmɔtso nɔ. Roma asraafoi lɛ kumɔ ojotswalɔi enyɔ lɛ anaji koni amɛgboi oya. Shi kɛlɛ, Yohane bɔ amaniɛ akɛ amɛkumɔɔɔ Yesu naji. Beni asraafoi lɛ shɛɔ Yesu nɔ lɛ, no mli lɛ egbo momo. Yɛ Sanekpakpa ni Yohane ŋma lɛ mli lɛ, etsɔɔ akɛ nifeemɔ nɛɛ ha Lala 34 lɛ fã kroko ba mli akɛ: “Akũŋ ewú ko.”—Yohane 19:32-36; Lala 34:21, Septuagint.
3 Nibii krokomɛi babaoo yɛ Lala 34 lɛ mli ní Kristofoi baaná he miishɛɛ waa. No hewɔ lɛ, wɔbaasusu shihilɛi amli ni David yɔɔ beni efo lala nɛɛ, kɛ hewalɛwoo wiemɔi ni yɔɔ lala nɛɛ mli lɛ he yɛ nikasemɔ nɛɛ kɛ nɔ ni baanyiɛ sɛɛ lɛ mli.
David Jo Foi Kɛjɛ Saul Hiɛ
4. (a) Mɛni hewɔ afɔ David mu akɛ Israel maŋtsɛ ni baaye Saul sɛɛ lɛ? (b) Mɛni hewɔ Saul ‘basumɔ’ David naakpa lɛ?
4 Beni David ji oblanyo fioo lɛ, no mli lɛ Saul ji Israel maŋtsɛ. Shi Saul gbo toi, ni Yehowa kpoo lɛ. No hewɔ lɛ, gbalɔ Samuel kɛɛ lɛ akɛ: “Yehowa egba okɛ Israel maŋtsɛyeli lɛ teŋ ŋmɛnɛ, ni eŋɔha onaanyo ko ni hi feo.” (1 Samuel 15:28) Sɛɛ mli lɛ, Yehowa fã Samuel koni eyafɔ Ishai nakutsoŋ binuu David mu akɛ Israel maŋtsɛ ni baaye nɔ yɛ Saul sɛɛ. Yɛ nakai beaŋ lɛ, Nyɔŋmɔ mumɔ lɛ kpa yɛ Maŋtsɛ Saul sɛɛ, ni efee gblinii. Akɛni David ji lalafolɔ ni he esa waa kɛ saŋkutswaa hewɔ lɛ, akɛ lɛ ba Gibea koni ebasɔmɔ maŋtsɛ lɛ. David lala lɛ haa Saul he jɔɔ lɛ, ni Saul ‘basumɔ lɛ naakpa.’—1 Samuel 16:11, 13, 21, 23.
5. Mɛni hewɔ Saul tsake bɔ ni ekɛ David yeɔ ehaa lɛ, ni mɛni enɛ ha David fee?
5 Beni be shwieɔ mli lɛ, Yehowa ha efee faŋŋ akɛ ekɛ David yɛ. Yehowa ye ebua David ni eye Filistinyo oblaŋ Goliat nɔ kunim, ni efĩ esɛɛ hu ni ebatsɔ tatsɛ ni he esa waa yɛ Israel. Shi kɛlɛ, jɔɔmɔ ni Yehowa jɔɔ David lɛ ha Saul ye awuŋa, ni ehe tsɛ̃ David waa. Saul fɔ̃ akpɔlɔ shii enyɔ sɔŋŋ koni ekɛtsu David beni David tswaa saŋku ehaa lɛ lɛ. Shi yɛ fɛɛ mli lɛ, David bɔ mɔdɛŋ ewii ehe. Beni Saul ka nɔ ni ji shii etɛ nɔ akɛ egbe David lɛ, David yɔse akɛ esa akɛ ejo foi koni ekɛbaa ewala yi. Yɛ naagbee lɛ, akɛni Saul tee nɔ etswa efai shi akɛ ebaamɔ David ni egbe lɛ hewɔ lɛ, David kpɛ eyiŋ akɛ ebaashi Israel kpokpaa lɛ nɔ eyaba abo yɛ he kroko.—1 Samuel 18:11; 19:9, 10.
6. Mɛni hewɔ Saul fã ni agbe Nob maŋ lɛŋ bii lɛ?
6 Beni David nyiɛ gbɛ kɛyaa Israel maŋ lɛ klotia lɛ, eyatsɔ Nob maŋ lɛ mli he ni Yehowa kpeebuu lɛ yɔɔ lɛ. Ekã shi faŋŋ akɛ oblahii komɛi fata David he beni ejoɔ foi lɛ, ni eyatao niyenii eha ekɛ amɛ fɛɛ. Saul ná ele akɛ osɔfonukpa lɛ eha David kɛ ewebii lɛ niyenii, ni ekɛ Goliat klante lɛ hu eha David. Saul kɛ mlifu ha agbe osɔfoi 85 kɛ maŋ lɛŋ bii lɛ fɛɛ.—1 Samuel 21:2, 3; 22:12, 13, 18, 19; Mateo 12:3, 4.
Eje Gbele Mli Ekoŋŋ
7. Mɛni hewɔ ebɛ shweshweeshwe akɛ David yaba abo yɛ Gat lɛ?
7 Beni David shi Nob lɛ, ejo foi kɛtee Filistibii lɛ ashikpɔŋ lɛ nɔ yɛ anaigbɛ aaafee kilomitai 40, ni eyaba Maŋtsɛ Akish abo yɛ Gat, ni ji maŋ ni Goliat jɛ mli lɛ. Ekolɛ David susu akɛ ebaawa akɛ Saul baatiu lɛ yɛ Gat. Ni kɛlɛ, etsɛɛɛ kɛkɛ ni Gat maŋtsɛ lɛ tsuji lɛ yoo David. Beni David nu yɛ amɛnaa akɛ amɛyoo lɛ lɛ, “eshe Gat maŋtsɛ Akish gbeyei naakpa.”—1 Samuel 21:11-13.
8. (a) Mɛni Lala 56 lɛ haa wɔleɔ yɛ shihilɛ ni David kɛkpe yɛ Gat lɛ he? (b) Mɛɛ gbɛ nɔ David tsɔ eje gbele mli?
8 Kɛkɛ ni Filistibii lɛ mɔ David. Ekolɛ nɛkɛ be nɛɛ mli ni David jɛ etsui mli efo Lala 56 lɛ, ni ekpa Yehowa fai akɛ: “Okɛ mihiɛ yaafonui awo otɔ lɛ mli!” (Lala 56:1, 9) Ekɛ wiemɔ nɛɛ tsɔɔ akɛ eyɛ hekɛnɔfɔɔ akɛ Yehowa hiɛ kpaŋ emanehulu lɛ nɔ, shi moŋ ebaajɛ esuɔmɔ mli ekwɛ lɛ ní ebu ehe. David tsɔ̃ ŋaa hu koni ekɛlaka Filistibii amaŋtsɛ lɛ. Efee enii tamɔ mɔ ni yitsoŋ kpãa etse. Beni Maŋtsɛ Akish na enɛ lɛ, ekã etsuji lɛ akɛ amɛyakpala “sɛkɛyelɔ” kɛba ehiɛ. Eyɛ faŋŋ akɛ Yehowa ha David ŋaatsɔɔ lɛ ye omanye. Ashwie David kɛjɛ maŋ lɛŋ, ni enɛ ha eje gbele mli ekoŋŋ.—1 Samuel 21:14-16.
9, 10. Mɛni ha David fo Lala 34 lɛ, ni namɛi ekolɛ amɛyɔɔ David jwɛŋmɔ mli beni efoɔ lala nɛɛ?
9 Biblia lɛ etsɔɔɔ kɛji David webii lɛ fata ehe kɛjo foi kɛtee Gat loo amɛhi Israel akrowai ni bɛŋkɛ lɛ amli koni amɛkwɛ gbɛ amɛha lɛ. Bɔ fɛɛ bɔ ni sane lɛ ji lɛ, amɛná miishɛɛ waa beni David banina amɛ ní ebɔ amɛ bɔ ni Yehowa ejie lɛ kɛjɛ gbele mli ekoŋŋ lɛ. Nifeemɔ nɛɛ nɔ edamɔ efo Lala 34 lɛ, taakɛ kuku 1 lɛ tsɔɔ lɛ. Yɛ kuku 2 kɛyashi 8 lɛ mli lɛ, David jie Nyɔŋmɔ yi yɛ eyiwala ni ehere lɛ hewɔ, ni ewo ewebii lɛ hewalɛ koni amɛfata ehe kɛwó Yehowa nɔ akɛ E-webii lɛ a-Jielɔ Kpeteŋkpele.—Lala 34:4, 5, 8.
10 David kɛ ewebii lɛ yaba abo yɛ Adulam tɛkplo lɛ mli, yɛ Israel gɔji lɛ anɔ, ni jɛmɛ kã Gat bokagbɛ aaafee kilomitai 15. Israelbii ni Maŋtsɛ Saul nɔyeli lɛ eha shihilɛ eje amɛtsine lɛ bua amɛhe naa kɛbafata amɛhe yɛ jɛmɛ. (1 Samuel 22:1, 2) Ekolɛ nɛkɛ mɛi nɛɛ yɛ David jwɛŋmɔ mli beni efo Lala 34:9-23 lɛ. Kaimɔi ni yɔɔ nakai kukuji lɛ amli lɛ ahe yɛ sɛɛnamɔ kɛha wɔ hu ŋmɛnɛ, ni wɔbaaná lala ni ŋɔɔ nɛɛ he ni wɔbaasusu fitsofitso lɛ sɛɛ waa diɛŋtsɛ.
Ani Nɔ̃ Titri ni Kã Otsui Nɔ lɛ Tamɔ David Nɔ̃ Lɛ?
11, 12. Mɛni hewɔ esa akɛ wɔjie Yehowa yi daa lɛ?
11 “Majie Yehowa yi daa nɛɛ, eyijiemɔ aaakã midaŋ be fɛɛ be.” (Lala 34:2) Akɛni David hi shi akɛ abobalɔ hewɔ lɛ, heloonaa nibii babaoo ahe bahia lɛ, shi taakɛ wiemɔi nɛɛ tsɔɔ lɛ, ehaaa edaa gbi shihilɛ mli naagbai lɛ agbɔjɔ efai shi ni etswa akɛ ebaajie Yehowa yi lɛ. Mɛɛ nɔkwɛmɔnɔ ni sa jogbaŋŋ po enɛ ji kɛha wɔ nɛkɛ kɛ́ wɔkɛ naagbai kpe! Kɛ́ wɔyɛ skul jio, wɔyɛ nitsumɔhe jio, wɔtee shiɛmɔ jio, loo wɔkɛ wɔnanemɛi Kristofoi lɛ miishara lɛ, esa akɛ Yehowa yijiemɔ afee nɔ̃ titri ni kã wɔtsui nɔ. Susumɔ yiŋtoi babaoo ahewɔ ni esa akɛ wɔfee nakai lɛ he okwɛ! Ákɛ nɔkwɛmɔnɔ lɛ, wɔbaanyɛ wɔkase Yehowa adebɔɔ nibii ni yɔɔ naakpɛɛ lɛ ahe nii ní wɔná amɛhe miishɛɛ be fɛɛ be. Ni susumɔ nɔ ni etsɔ egbɛjianɔtoo lɛ fã ni yɔɔ shikpɔŋ lɛ nɔ lɛ nɔ etsu lɛ he okwɛ! Eyɛ mli akɛ Yehowa tsuji anɔkwafoi lɛ yeee emuu moŋ, shi ekɛ amɛ etsu nii waa yɛ wɔbei nɛɛ amli. Te Yehowa nitsumɔi lɛ anɔ kwɔ ha tɛŋŋ kɛ́ akɛto nɔ ni adesai ni je lɛ buɔ amɛ waa lɛ etsu lɛ he? David ŋma akɛ: “Nuŋtsɔ [Yehowa], mɔ ko mɔ ko bɛ ni tamɔo yɛ nyɔŋmɔi lɛ ateŋ, ni asaŋ nɔ ko nɔ ko bɛ ni tamɔ onitsumɔi lɛ.” Ani okɛ David kpãaa gbee?—Lala 86:8
12 Taakɛ eji yɛ David gbɛfaŋ lɛ, bɔ ni Yehowa nitsumɔi lɛ anɔ kwɔlɔ waa ha lɛ tsirɛɔ wɔ koni wɔjie eyi daa. Kɛfata he lɛ, le ni wɔle akɛ amrɔ nɛɛ akɛ Nyɔŋmɔ Maŋtsɛyeli lɛ ewo Yesu Kristo, ni ji David naanɔ Gboshiniyelɔ lɛ dɛŋ lɛ haa wɔnáa miishɛɛ waa. (Kpojiemɔ 11:15) Enɛ tsɔɔ akɛ je nɛŋ naagbee lɛ ebɛŋkɛ. Adesai akpekpei toi akpei ekpaa awala he ebaje oshara mli. Ehe ebahia fe bei fɛɛ akɛ wɔɔwie Nyɔŋmɔ Maŋtsɛyeli lɛ kɛ nɔ ni etsɛŋ ni ebaafee eha adesai lɛ he wɔtsɔɔ mɛi krokomɛi, ní wɔye wɔbua amɛ ni amɛbafata wɔhe kɛjie Yehowa yi. Ekã shi faŋŋ akɛ, nɔ ni esa akɛ wɔkɛye klɛŋklɛŋ gbɛhe yɛ wɔshihilɛ mli ji ni wɔkɛ hegbɛ fɛɛ hegbɛ ni wɔbaaná lɛ atsu nii kɛwo mɛi krokomɛi hewalɛ koni amɛkpɛlɛ “sanekpakpa” nɛɛ nɔ dani efee nɔ ni ekpe sɛɛ tsɔ.—Mateo 24:14.
13. (a) Namɔ nɔ David shwã efɔ̃, ni namɛi anɔ hewalɛ enɛ ná? (b) Mɛɛ gbɛ nɔ atsɔɔ ahaa humii kɛ amɛhe badɔmɔɔ Kristofoi asafo lɛ ŋmɛnɛ?
13 “Misusuma aaashwã afɔ̃ Yehowa nɔ; amanehulunalɔi aaanu he ni amɛmii aaashɛ amɛhe.” (Lala 34:3) Ŋmalɛ nɛɛ tsɔɔ akɛ David eshwãaa efɔ̃ɔɔ nibii ni enyɛ etsu lɛ anɔ. Ákɛ nɔkwɛmɔnɔ lɛ, ekɛ gbɛ ni etsɔ nɔ elaka Gat maŋtsɛ lɛ pupuuu ehe. Eyɔse akɛ Yehowa ji mɔ ni bu ehe beni eyɔɔ Gat lɛ, ni akɛ Yehowa ji mɔ ni ye kɛbua lɛ ni eje gbele mli lɛ. (Abɛi 21:1) Enɛ hewɔ lɛ, David eshwãaa efɔ̃ɔɔ lɛ diɛŋtsɛ ehe enɔ, shi moŋ eshwã efɔ̃ Yehowa nɔ. Enɛ ha heshibalɔi nyɛ amɛbɛŋkɛ Yehowa. Yesu hu kafo Yehowa gbɛi lɛ, ni enɛ ha heshibalɔi ni sumɔɔ ni atsɔɔ amɛ nii lɛ bɛŋkɛ Yehowa. Ŋmɛnɛ, heshibalɔi ni jɛ jeŋmaji fɛɛ amli lɛ kɛ amɛhe miidɔmɔ Kristofoi ni afɔ amɛ mu lɛ asafo ni yɔɔ jeŋ fɛɛ, ní Yesu Kristo ji e-Yitso lɛ he. (Kolosebii 1:18) Etaa humii nɛɛ atsuiiaŋ waa kɛ́ amɛnu ní Nyɔŋmɔ tsuji heshibalɔi lɛ miiwo Nyɔŋmɔ gbɛi lɛ hiɛnyam. Kɛ́ amɛnu Biblia mli shɛɛ sane lɛ, ni Nyɔŋmɔ mumɔ krɔŋkrɔŋ lɛ ye kɛbua amɛ ni amɛnu shishi lɛ, no hu taa amɛtsui mli waa.—Yohane 6:44; Bɔfoi lɛ Asaji 16:14.
Kristofoi Akpeei Wajeɔ Wɔhemɔkɛyeli Lɛ
14. (a) Ani teemɔŋ pɛ kɛkɛ David ná he tsui akɛ eeejie Yehowa yi yɛ? (b) Mɛɛ nɔkwɛmɔnɔ Yesu fee efɔ̃ shi yɛ he naa ní abuaa koni ajá Nyɔŋmɔ lɛ gbɛfaŋ?
14 “Nyɛkɛ mi akafoa Yehowa dalɛ lɛ, ni nyɛhaa wɔ fɛɛ wɔwóa egbɛi lɛ nɔ!” (Lala 34:4) Jeee teemɔŋ pɛ kɛkɛ David ná he tsui akɛ eeejie Yehowa yi yɛ. Ekɛ miishɛɛ fɔ̃ enanemɛi lɛ anine koni amɛfata ehe kɛwó Nyɔŋmɔ gbɛi lɛ nɔ. Nakai nɔŋŋ hu Yesu Kristo, ni ji David Kpeteŋkpele lɛ ná he miishɛɛ akɛ eeejie Yehowa yi yɛ faŋŋ—yɛ amɛmaŋ kpeehei lɛ, beni ayeɔ gbii juji yɛ Nyɔŋmɔ we ni yɔɔ Yerusalem lɛ, kɛ beni ekɛ esɛɛnyiɛlɔi lɛ yɔɔ lɛ. (Luka 2:49; 4:16-19; 10:21; Yohane 18:20) Mɛɛ hegbɛ ni yɔɔ miishɛɛ po wɔná nɛkɛ akɛ wɔɔkase Yesu nɔkwɛmɔnɔ lɛ, ní wɔkɛ wɔnanemɛi heyelilɔi lɛ afee ekome kɛjie Yehowa yi yɛ shihilɛ fɛɛ shihilɛ mli, titri lɛ amrɔ nɛɛ ni wɔnaa akɛ “gbi lɛ miibɛŋkɛ nɛɛ”!—Hebribii 10:24, 25.
15. (a) Mɛɛ hewalɛ David shihilɛ mli niiashikpamɔ lɛ ná yɛ ewebii lɛ anɔ? (b) Wɔnáa Kristofoi akpeei ni wɔyaa lɛ he sɛɛ yɛ mɛɛ gbɛ nɔ?
15 “Mitao Yehowa sɛɛgbɛ ni ehere mi nɔ, ni ejie mi kɛjɛ migbeyeishemɔi fɛɛ mli.” (Lala 34:5) David bu shihilɛ mli niiashikpamɔ ni ená nɛɛ akɛ nɔ ni he hiaa waa. Enɛ hewɔ lɛ, etee nɔ ekɛɛ akɛ: “Nɔ̃nalɔ nɛɛ bolɔ ni Yehowa bo toi, ni ehere lɛ kɛjɛ efimɔi fɛɛ mli.” (Lala 34:7) Kɛ́ wɔkɛ wɔnanemɛi heyelilɔi lɛ tee kpeei lɛ, wɔnáa hegbɛi babaoo ní wɔkɛaagba niiashikpamɔi ni woɔ mɔ hewalɛ ni tsɔɔ bɔ ni Yehowa eye ebua wɔ kɛdamɔ naagbai anaa lɛ wɔtsɔɔ. Enɛ wajeɔ wɔnanemɛi heyelilɔi lɛ ahemɔkɛyeli, tamɔ bɔ ni David wiemɔi lɛ waje ewebii lɛ ahemɔkɛyeli lɛ. David webii lɛ ‘ŋɔ amɛhiɛ amɛfɔ Yehowa nɔ, ni amɛhe tse amɛ, ni amɛhiɛ eshwieee shi.’ (Lala 34:6) Eyɛ mli akɛ amɛmiijo Maŋtsɛ Saul naa foi moŋ, shi amɛhiɛ eshwieee shi. Amɛyɛ hekɛnɔfɔɔ akɛ Nyɔŋmɔ miifĩ David sɛɛ, ni amɛhe tse amɛ. Yɛ nakai gbɛ nɔ nɔŋŋ lɛ, mɛi heei ni yɔɔ wiemɔ lɛ he miishɛɛ lɛ, kɛ mɛi ni ehi shi akɛ anɔkwa Kristofoi afii babaoo lɛ fɛɛ kɛ amɛhiɛ fɔ̃ɔ Yehowa nɔ. Akɛni Yehowa eye ebua amɛ hewɔ lɛ, amɛhe ni tseɔ amɛ lɛ haa anaa akɛ amɛtswa amɛfai shi akɛ amɛbaaya nɔ amɛye anɔkwa.
Ha Ohiɛ Asɔ Yelikɛbuamɔ ni Ŋwɛibɔfoi lɛ Kɛhaa Lɛ
16. Mɛɛ gbɛ nɔ Yehowa kɛ ebɔfoi lɛ tsuɔ nii koni amɛbaye amɛbua wɔ?
16 “Yehowa bɔfo lɛ bɔɔ nsara yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.” (Lala 34:8) Beni Yehowa jie David kɛjɛ oshara lɛ mli lɛ, ebuuu akɛ lɛ pɛ ji mɔ ni Yehowa baanyɛ afee nakai aha. Eji anɔkwale akɛ David ji mɔ ni Yehowa efɔ lɛ mu koni eye Israel nɔ maŋtsɛ; Shi ele akɛ Yehowa kɛ ebɔfoi lɛ tsuɔ nii koni amɛbu ejálɔi anɔkwafoi lɛ fɛɛ ahe, ekɔɔɔ he eko kɛ́ amɛji mɛi wuji loo mɛi bibii. Yehowa buɔ anɔkwa jálɔi ahe yɛ wɔbei nɛɛ amli hu. Taakɛ Nazi nɔyeli lɛ tswa efai shi akɛ ebaabule Yehowa Odasefoi ashishi yɛ Germany lɛ, nakai nɔŋŋ Angola, Malawi, Mozambique, kɛ shikpɔji krokomɛi babaoo anɔ nɔyelii hu tswa amɛfai shi akɛ amɛbaabule Yehowa Odasefoi ashishi yɛ amɛmaji lɛ amli. Shi amɛnine enyɛ shi. Nɔ ni tamɔɔɔ nakai lɛ, ekome ní Yehowa tsuji efee kɛmiiwó egbɛi lɛ nɔ lɛ eha amɛmiiya nɔ amɛmiifrɔke yɛ maji nɛɛ anɔ. Mɛni hewɔ? Ejaakɛ Yehowa kɛ ebɔfoi krɔŋkrɔŋi lɛ tsuɔ nii kɛbuɔ ewebii lɛ ahe ni amɛtsɔɔ amɛgbɛ.—Hebribii 1:14.
17. Nyɔŋmɔ bɔfoi lɛ yeɔ amɛbuaa wɔ yɛ mɛɛ gbɛ̀i anɔ?
17 Agbɛnɛ hu, Yehowa bɔfoi lɛ baanyɛ amɛkɛ ŋaalee akudɔ saji koni akɛjie mɔ fɛɛ mɔ ni haa mɛi krokomɛi anaji tɔ̃tɔ̃ɔ lɛ kɛjɛ Yehowa webii ateŋ. (Mateo 13:41; 18:6, 10) Ŋwɛibɔfoi lɛ jieɔ nibii ni baanyɛ atsĩ sɔɔmɔ ni wɔkɛhaa Nyɔŋmɔ lɛ naa, ni amɛbuɔ wɔhe kɛjɛɔ nibii ni baanyɛ afite wekukpãa ni kã wɔ kɛ Yehowa teŋ lɛ ahe, eyɛ mli akɛ ekolɛ be mli ni nibii nɛɛ yaa nɔ lɛ wɔyɔseee moŋ. Nɔ ni fe fɛɛ lɛ amɛtsɔɔ wɔ gbɛ ni wɔjajeɔ “naanɔ sanekpakpa” lɛ wɔtsɔɔ adesai fɛɛ, ni hei ni jɛmɛ yɔɔ oshara lɛ hu fata he. (Kpojiemɔ 14:6) Afɔɔ odaseyeli ni tsɔɔ akɛ ŋwɛibɔfoi lɛ yeɔ kɛbuaa mɛi lɛ he wiemɔ yɛ Biblia he woji ni Yehowa Odasefoi kalaa lɛ amli. * Bɔ ni niiashikpamɔi nɛɛ fa waa ha lɛ hewɔ lɛ, anyɛŋ akɛɛ akɛ amɛba trukaa.
18. (a) Mɛni ehe hiaa ni wɔfee koni wɔnine ashɛ ŋwɛibɔfoi lɛ ayelikɛbuamɔ nɔ? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?
18 Bɔni afee ni ŋwɛibɔfoi lɛ aya nɔ atsɔɔ wɔ gbɛ ni amɛbu wɔhe lɛ, esa akɛ wɔya nɔ wɔwó Yehowa gbɛi lɛ nɔ kɛ́ wɔkɛ shitee-kɛwoo miikpe po. Kaimɔ akɛ Nyɔŋmɔ bɔfo lɛ bɔɔ nsara yɛ ‘mɛi ni sheɔ Yehowa gbeyei’ lɛ pɛ ahe. Mɛni no tsɔɔ? Mɛni ji Nyɔŋmɔ gbeyeishemɔ, ni te wɔɔfee tɛŋŋ wɔná eko? Mɛni hewɔ Nyɔŋmɔ ni yɔɔ suɔmɔ lɛ taoɔ akɛ wɔshe lɛ gbeyei lɛ? Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
[Shishigbɛ niŋmaa]
^ kk. 17 Kwɛmɔ Jehovah’s Witnesses—Proclaimers of God’s Kingdom, baafã 550; 2005 Yearbook of Jehovah’s Witnesses, baafã 53-54; March 1, 2000 Buu-Mɔɔ lɛ, baafã 5-6; The Watchtower, January 1, 1991, baafa 27; kɛ February 15, 1991, baafa 26.
Te Obaaha Hetoo Oha Tɛŋŋ?
• Mɛɛ kaai David kɛkpe beni eji oblanyo fioo lɛ?
• Taakɛ David ji lɛ, mɛni ji nɔ̃ titri ní kã wɔtsui nɔ?
• Te wɔbuɔ Kristofoi akpeei wɔhaa tɛŋŋ?
• Mɛɛ gbɛ nɔ Yehowa tsɔɔ ekɛ ebɔfoi lɛ yeɔ ebuaa wɔ?
[Nikasemɔ lɛ he Sanebimɔi]
[Shikpɔŋ he mfoniri ni yɔɔ baafa 21]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Rama
Gat
Ziklag
Gibea
Nob
Yerusalem
Betlehem
Adulam
Keila
Hebron
Zif
Koo
Karmel
Maon
En-Gedi
Ŋoo Nshɔ
[He ni Sane lɛ Jɛ]
Shikpɔŋ he mfoniri: Based on maps copyrighted by Pictorial Archive (Near Eastern History) Est. and Survey of Israel
[Mfoniri ni yɔɔ baafa 21]
David wó Yehowa gbɛi lɛ nɔ beni eji abobalɔ po
[Mfoniri ni yɔɔ baafa 23]
Mɛi aniiashikpamɔi atoi ni wɔboɔ yɛ Kristofoi akpeei ashishi lɛ wajeɔ wɔhemɔkɛyeli lɛ