Kristo Baa Lɛ Ani Esa akɛ Wɔshe He Gbeyei?

TE OSUSUƆ akɛ Yesu Kristo baa lɛ baatamɔ aha tɛŋŋ? Ani osusuɔ akɛ no kɛ adesai atoigbalamɔ kɛ hiɛkpatamɔ baaba, aloo ookpa gbɛ akɛ no baafo wɔnaagbai lɛ fɛɛ asɛɛ? Ani esa akɛ wɔshe Kristo baa lɛ gbeyei aloo esa akɛ wɔkɛ miishɛɛ akpa lɛ gbɛ?

Beni Biblia lɛ wieɔ Kristo baa lɛ he lɛ, ekɛɛ akɛ: “Naa, eeba kɛ atatui lɛ, ni hiŋmɛi fɛɛ hiŋmɛi aaana lɛ . . . ni shikpɔŋ lɛ nɔ akutsei lɛ fɛɛ aaawo yara yɛ ehewɔ.” (Kpojiemɔ 1:7) Yesu baa ni awieɔ he nɛɛ kɔɔ ba ni ebaaba wɔsɛɛ koni ebajɔɔ jalɔi lɛ ní ekpata mɛi fɔji lɛ ahiɛ lɛ he.

Bɔfo Yohane sheee Kristo baa lɛ gbeyei, shi moŋ ekɛ miishɛɛ kpa lɛ gbɛ. Beni ajie Kristo baa lɛ kɛ bɔ ni ebaasa shikpɔŋ lɛ he aha lɛ he ninaa kpo atsɔɔ Yohane sɛɛ lɛ, ejɛ etsuiŋ esɔle akɛ: “Ba, Nuŋtsɔ Yesu!” (Kpojiemɔ 22:20) Mɛni hewɔ mɔ ni “shikpɔŋ lɛ nɔ akutsei lɛ fɛɛ aaawo yara yɛ ehewɔ” lɛ? “Hiŋmɛi fɛɛ hiŋmɛi” aaana lɛ yɛ mɛɛ shishinumɔ naa? Mɛni he nii Kristo baatsu kɛ́ eba? Hemɔkɛyeli ni wɔbaaná yɛ ebaa lɛ mli lɛ he baaba sɛɛnamɔ aha wɔ amrɔ nɛɛ yɛ mɛɛ gbɛ nɔ? Abaaha sanebimɔi nɛɛ ahetoo yɛ sane ni nyiɛ sɛɛ lɛ mli.