Saji Ahetooi ni Ja lɛ Ataomɔ

Te mafee tɛŋŋ maná gbɔmɔtsoŋ hewalɛ kpakpa?

Mɛni manyɛ mafee koni miweku lɛ aná miishɛɛ?

Mɛni manyɛ mafee koni minitsumɔ akaŋmɛɛ mi be ko?

ANI obi saji nɛɛ eko dã? Ani oná hetooi ni ha onyɛ otsu naagbai ahe nii diɛŋtsɛ? Daa afi lɛ, akalaa woji srɔtoi aaashɛ 2,000 ni kɛ ŋaawoo haa yɛ saji nɛɛ kɛ ekrokomɛi ni he hiaa lɛ ahe. Yɛ Britain pɛ lɛ, daa afi lɛ, mɛi ni kaneɔ woji nɛɛ fiteɔ shika ni naa shɛɔ pound akpekpei 80 (aaafee U.S. dɔlai akpekpei 150) yɛ woji ni kɛ ŋaawoo haa yɛ bɔ ni aaafee adamɔ naagbai anaa lɛ he. Yɛ United States lɛ, anyɛɔ ahɔ̃ɔ woji ni yeɔ kɛbuaa mɛi ni kaneɔ lɛ koni amɛkɛtsu amɛnaagbai ahe nii, ni anáa aaafee dɔlai akpekpei 600 daa afi. Eji anɔkwale akɛ jeee bo pɛ ji mɔ ni taoɔ ŋaawoo yɛ bɔ ni aaafee adamɔ shihilɛ mli naagbai anaa.

Woloŋmalɔ ko wie ŋaawoo ni yɔɔ nɛkɛ woji babaoo nɛɛ amli lɛ he akɛ: “Woji heei ni aŋmalaa lɛ ateŋ babaoo tĩɔ saji ni aŋmala momo lɛ amli kɛkɛ.” Yɛ anɔkwale mli lɛ, ajie ŋaawoi ni yɔɔ woji nɛɛ amli lɛ ateŋ babaoo kɛjɛ nilee wiemɔi ni yɔɔ woji ni etsɛ fe fɛɛ yɛ je lɛŋ lɛ ateŋ ekome mli. Ŋwanejee ko kwraa bɛ he akɛ wolo nɛɛ ji wolo ni aja fe fɛɛ yɛ je lɛ mli. Atsɔɔ efã ko loo emuu lɛ fɛɛ shishi kɛtee wiemɔi aaashɛ 2,400 mli. Akala nɔ ni fa fe akpekpei toi akpei 4.6 yɛ jeŋ fɛɛ. Wolo nɛɛ ji Biblia lɛ.

Biblia lɛ kɛɔ faŋŋ akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.” (2 Timoteo 3:16) Eji anɔkwale akɛ Biblia lɛ tamɔɔɔ woji krokomɛi ni mɛi kaneɔ kɛha amɛnaagbai ahe nitsumɔ. Nɔ hewɔ titri ni aŋma ji koni eha ale Nyɔŋmɔ yiŋtoo kɛha adesai. Shi fɛɛ sɛɛ lɛ, Biblia lɛ wieɔ bɔ ni wɔɔfee wɔdamɔ naagbai ni wɔ fɛɛ wɔkɛkpeɔ lɛ anaa lɛ ahe saji babaoo, ni ewoɔ shi akɛ mɛi ni kɛ gbɛtsɔɔmɔi ni yɔɔ mli lɛ tsuɔ nii lɛ baaná he sɛɛ. (Yesaia 48:17, 18) Ekɔɔɔ he eko he ni mɔ ko jɛ, eweku, loo he ni etee skul kɛyashɛ lɛ, kɛ́ ekɛ emli ŋaawoo ni hi jogbaŋŋ lɛ tsu nii lɛ, ebaaye omanye. Mɛni hewɔ okaneee sane ni nyiɛ sɛɛ lɛ koni bo diɛŋtsɛ okwɛ akɛ obaanyɛ okɛ nɔ ni Biblia lɛ kɛɔ yɛ gbɔmɔtsoŋ hewalɛnamɔ, weku, kɛ nitsumɔ he lɛ atsu nii lo?