Sanebimɔi ni Jɛ Kanelɔi Adɛŋ

Te esa akɛ wɔnu Paulo wiemɔ akɛ dani Kristofoi asafo lɛ baaye abua yoo okulafo ko lɛ ja eji “mɔ ni gbã nuu kome” lɛ shishi wɔha tɛŋŋ?—1 Timoteo 5:9.

Akɛni bɔfo Paulo miiwie yoo okulafo he hewɔ lɛ, ekã shi faŋŋ akɛ wiemɔ “mɔ ni gbã nuu kome” lɛ kɔɔ mɔ lɛ shihilɛ dani ebatsɔ okulafo lɛ he. Ani enɛ baanyɛ atsɔɔ akɛ esa akɛ yoo okulafo lɛ afee mɔ ni bote gbalashihilɛ mli shikome pɛ? Aloo eeenyɛ efee akɛ Paulo wiemɔi lɛ miitsɔɔ nɔ kroko? *

Mɛi komɛi susuɔ akɛ Paulo miiwie yei okulafoi ni bote gbalashihilɛ mli shikome pɛ lɛ ahe. Eji anɔkwale akɛ yɛ hei pii kɛ maji komɛi anɔ lɛ, abuɔ yoo okulafo ni boteee gbalashihilɛ mli dɔŋŋ lɛ akɛ mɔ ni yɔɔ jeŋba kpakpa. Shi kɛlɛ, susumɔ nɛɛ kɛ Paulo wiemɔi krokomɛi kpãaa gbee. Ákɛ nɔkwɛmɔnɔ lɛ, eha efee faŋŋ eha Kristofoi ni yɔɔ Korinto lɛ akɛ, eyɛ mli akɛ esusuɔ akɛ yoo okulafo baaná miishɛɛ kɛ́ ehi shi ni egbãaa nuu ko moŋ, shi “eyɛ hegbɛ akɛ eeegbã mɔ ni esumɔɔ, shi ja afee yɛ Nuŋtsɔ lɛ mli.” (1 Korintobii 7:39, 40; Romabii 7:2, 3) Kɛfata he lɛ, Paulo wie yɛ wolo ni eŋma eyaha Timoteo lɛ mli akɛ: “Miisumɔ akɛ yei okulafoi ni darako lɛ agbã.” (1 Timoteo 5:14) Enɛ hewɔ lɛ, agbeee yoo okulafo he guɔ kɛ́ egbã ekoŋŋ.

Belɛ, te esa akɛ wɔnu nɔ ni Paulo ŋma eyaha Timoteo lɛ shishi wɔha tɛŋŋ? Ŋmalɛ nɛɛ mli pɛ wiemɔ ni ji “mɔ ni gbã nuu kome” lɛ je kpo yɛ. Yɛ Hela wiemɔ mli lɛ, eshishi ji “yoo ni egbã nuu kome.” Miishɛɛ sane ji akɛ, wiemɔ nɛɛ tamɔ nɔ ni Paulo kɛtsu nii shii abɔ yɛ woji ni eŋmala lɛ amli lɛ pɛpɛɛpɛ, ni ji “mɔ ni yɔɔ ŋa kome,” loo yɛ Hela wiemɔ mli lɛ, “nuu ni kɛ yoo kome hiɔ shi.” (1 Timoteo 3:2, 12; Tito 1:6) Paulo kɛ naagbee wiemɔ nɛɛ tsu nii beni etsĩɔ taomɔ nibii ni esa akɛ Kristofoi nɔkwɛlɔi kɛ asafo mli sɔɔlɔi ashɛ he lɛ tã lɛ. Yɛ nɔ ni eŋma lɛ naa lɛ, nɔ tuuŋtu ni nakai wiemɔ lɛ tsɔɔ ji akɛ dani nuu ko ni ebote gbalashihilɛ mli lɛ he aaasa kɛha sɔɔmɔ hegbɛ ko yɛ asafo lɛ mli lɛ, esa akɛ efee mɔ ni yeɔ eŋa anɔkwa ní ejeee eŋa sɛɛ, ní anaŋ ehe sane ko hu atã. * Kɛ́ nakai ji sane lɛ, eeenyɛ efee akɛ 1 Timoteo 5:9 lɛ miigbala jwɛŋmɔ kɛmiiya nakai oti lɛ nɔŋŋ nɔ akɛ: Kɛ́ asafo lɛ baanyɛ aye kɛbua yoo okulafo ko lɛ, esa akɛ efee ŋa kpakpa ni ye ewu lɛ anɔkwa beni ewu lɛ yɔɔ wala mli lɛ, ní anáaa ehe sane ko hu atã. Nibii krokomɛi fɛɛ ni Paulo tsĩ tã efata he lɛ kɔɔ yoo okulafo ni tamɔ nakai lɛ he.—1 Timoteo 5:10.

[Shishigbɛ niŋmai]