Adryana Shwelɛ

ADRYANA ni ji gbekɛyoo fioo ko ni eye afii ekpaa ni yɔɔ Tulsa, Oklahoma yɛ U.S.A. lɛ shwe koni afee nɔ ko aha lɛ. Nɔ ni no mli lɛ eshweɔ lɛ tamɔ nɔ ni lalatsɛ David shwe beni elá akɛ: “Nɔ̃ koome mibiɔ yɛ Yehowa dɛŋ, no sɛɛgbɛ mitaoɔ: akɛ mahi shi yɛ Yehowa we lɛ miwala gbii abɔ fɛɛ, ni mana Yehowa mlihilɛ lɛ, ni makwɛ esɔlemɔwe lɛ.”—Lala 27:4.

Beni afɔ́ Adryana ni ená nyɔji ekpaa pɛ kɛkɛ ni ana akɛ eeye hela ko ni hãa loo kwɛ̃ɔ yɛ mɔ fãji amli kɛtsĩmɔɔ fãji lɛ. Hela ni gbeɔ mɔ nɛɛ ha ekumɔ ní enyɛɛɛ enyiɛ. Datrɛfoi fee lɛ opireshɛn srɔtoi babaoo ni amɛha lɛ tsofa ko ni naa wa waa aaafee afi sɔŋŋ.

Adryana kɛ enyɛ yɔɔ jamɔ kome mli, shi esoro jamɔ mli ni etsɛ yɔɔ. Be ko lɛ, etsɛ yana nitsumɔhe ko ni feɔ nibii ni gbekɛbii ni helai ni gbeɔ mɔ emɔmɔ amɛ lɛ shweɔ ni afee aha amɛ lɛ koni amɛto gbɛjianɔ ni amɛkɛ ebiyoo lɛ ayashara shi yɛ gbekɛbii ashwɛmɔhe ko ni ehé gbɛi waa koni emii ashɛ ehe. Shi dani nitsumɔhe lɛ baakpɛlɛ Adryana tsɛ nibimɔ lɛ nɔ lɛ, amɛkɛ Adryana gba sane. Amɛkɛ lɛ sanegbaa mli lɛ, eda amɛ shi akɛ amɛto gbɛjianɔ ni tamɔ nakai amɛha lɛ, shi eha amɛle akɛ ebaasumɔ moŋ akɛ eyashara shi yɛ Betel yɛ New York he ni ajɛɔ akwɛɔ nii ni Yehowa Odasefoi tsuɔ yɛ jeŋ fɛɛ lɛ nɔ lɛ. Beni Adryana nále nibimɔ ni etsɛ kɛyafɔ̃ nitsumɔhe lɛ hiɛ lɛ, esɔle ekpa Yehowa fai koni egbele gbɛ eha lɛ ni eyashara shi yɛ Betel. Eyɛ mli akɛ shishijee lɛ, nitsumɔhe nɔkwɛlɔi lɛ yanu he akɛ Betel jeee he ko ni gbekɛbii amii baashɛ amɛhe yɛ moŋ, shi akɛni Adryana tsɛ ewieee nɔ ko yɛ he hewɔ lɛ, amɛkpɛlɛ nɔ akɛ amɛbaafee nɔ ni ebiyoo lɛ kɛɛ lɛ amɛha lɛ.

Adryana nyɛmi yoo, emami, kɛ enaanyo ko fata ehe kɛfã gbɛ kɛtee New York ni amɛyashara shi yɛ Betel. No ji be klɛŋklɛŋ kwraa ni amɛtee jɛmɛ. Adryana wie akɛ: “Yehowa bo misɔlemɔ lɛ toi. Mile akɛ ebaaha ahere wɔ atuu yɛ Betel. Mina bɔ ni afeɔ woji wuji, woji tɛtrɛbii, kɛ Bibliai lɛ ahaa. Jɛmɛ ni mitee lɛ hi kwraa fe nɔ ni mayashara shi yɛ gbekɛbii ashwɛmɔhe ni anáa miishɛɛ yɛ jɛmɛ.”

Adryana ‘na Yehowa mlihilɛ lɛ’ lɛɛlɛŋ, ni ehiɛ sɔ nii ni atsuɔ yɛ he ni ajɛɔ akwɛɔ Yehowa tsuji ni yɔɔ ŋmɛnɛ lɛ anitsumɔ nɔ lɛ. Bo hu obaanyɛ oyashara shi yɛ Betel. Yɛ Yehowa Odasefoi anitsumɔhe yitso ni yɔɔ New York lɛ sɛɛ lɛ, amɛyɛ nitsumɔhe niji yɛ maji krokomɛi babaoo anɔ.