Eje Kpa Shi Eesumɔ ni Esɔmɔ
Eje Kpa Shi Eesumɔ ni Esɔmɔ
KƐ́ ONA Leonardo klɛŋklɛŋ kwraa lɛ, obuŋ lɛ akɛ mɔ ko ni baanyɛ atsu tsũmaa nitsumɔ. Ekɛ oshara ko kpe yɛ nitsumɔ mli, ni no ha afolɔ eniji enyɔ lɛ fɛɛ. Kɛlɛ, yɛ Leonardo niji ni afɔlɔ lɛ fɛɛ sɛɛ lɛ, eetsu nii dɛŋdɛŋ yɛ tsũmaa nitsumɔhe ko yɛ Acajutla, El Salvador, taakɛ onaa yɛ mfoniri lɛ mli lɛ.
Bɔni afee ni Leonardo anyɛ ekɛ ehe awo tsũmaa lɛ mli lɛ, efee lɛ diɛŋtsɛ enitsumɔ dadei. Eha asɔo dade kokroo ko akpɛtɛ sofi he aha lɛ, ni ekɛ eninejurɔ hɔɔ mli ni ekɛ ŋaa looɔ shia ewoɔ shwiili mli. Eha asɔo dadei komɛi ni ebaanyɛ ekɛ eniji ahɔlɔ mli kɛwo shwiili lɛ nɔ akpɛtɛ shwiili lɛ niji ahe aha lɛ, ni nomɛi amli ekɛ eniji hɔlɔɔ kɛwoɔ shwiili lɛ ni etsiɔ. Mɛni tsirɛ lɛ koni ekɛ ehe awo tsũmaa nɛɛ mli?
Leonardo miisumɔ ni ekɛ ehe awo Maŋtsɛyeli Asa ni ji jamɔhe ni Yehowa Odasefoi ni yɔɔ jɛmɛ lɛ maa lɛ mli. Eyɛ nibii babaoo ni ebaanyɛ ekɛjie enaa kɛ́ ekɛ ehe wooo nitsumɔ lɛ mli. Etsuɔ heloonaa nitsumɔ kɛjɛ leebi kɛyashi gbɛkɛ, ebɛ niji, ni eesɔmɔ hu akɛ asafoŋ sɔɔlɔ yɛ asafo ni eyɔɔ lɛ mli. Kɛlɛ, eesumɔ ni ekɛ ehe awo tsũmaa lɛ mli bɔ ni ebaanyɛ kɛsɔmɔ Nyɔŋmɔ.
Ani ojieɔ su ni tamɔ nakai kpo yɛ Nyɔŋmɔ sɔɔmɔ mli? Leonardo ekɛɛɛ akɛ afolɔ eniji hewɔ lɛ enyɛŋ ekɛ ehe awo nitsumɔ lɛ mli, moŋ lɛ, ekɛ ejwɛŋmɔ tsu nii kɛfee lɛ diɛŋtsɛ enitsumɔ dadei bɔni afee ni enyɛ etsu nitsumɔ ni kulɛ enyɛŋ etsu lɛ. Ekɛ ‘ejwɛŋmɔ muu fɛɛ’ miisɔmɔ Nyɔŋmɔ. (Mateo 22:37) Mɛi fɛɛ ni kɛ amɛhe woɔ Yehowa Odasefoi a-Maŋtsɛyeli Asai ni amamɔɔ yɛ jeŋ fɛɛ lɛ amli lɛ kɛ amɛhe shãa afɔle kɛtsuɔ nii lɛ, ni ekɔɔɔ he eko kɛ́ amɛje kpa aloo amɛjeko kpa. Mɔ fɛɛ mɔ baanyɛ aya amɛkpeei lɛ eko, no hewɔ lɛ aafɔ̃ bo nine ni ofee nakai.