Ha Wɔnyiɛ Paulo Sɛɛ Kɛya Beroia

Sanekpakpashiɛlɔi enyɔ lɛ anitsumɔ shwere ni mɛi pii batsɔmɔ heyelilɔi. Etsɛɛɛ ni gbɔmɛi babaoo ko kɛ mlila te shi wo amɛ. Yɛ asafo hee ni no mli lɛ sanekpakpashiɛlɔi enyɔ lɛ eto kɛ amɛ diɛŋtsɛ hu amɛ shweshweeshwefeemɔ hewɔ lɛ, amɛkpɛ amɛyiŋ ni amɛshi jɛmɛ nyɔɔŋteŋ. Nɛkɛ ji bɔ ni ebalɛ ni Paulo kɛ Sila jo foi kɛjɛ Tesalonika ni ji ŋshɔnaa maŋ ni yɔɔ Makedonia lɛ yɛ afi 50 Ŋ.B. Amɛfã gbɛ kɛtee Beroia ni amɛyatsa amɛshiɛmɔ lɛ nɔ yɛ jɛmɛ.

BEROIA (Véroia) maŋ lɛ kãhe eyɛ Bermios Gɔŋ ni jwɛifɔ ehà nɔ fɛfɛo lɛ bokagbɛ. Beroia yɛ Tesalonika maŋ lɛ wuoyi-anaigbɛ, ni gbɛ ni kã maji enyɔ nɛɛ ateŋ lɛ jɛkɛmɔ aaafee kilomitai 65, ni ekɛ Aegea Ŋshɔ lɛ naa jɛkɛmɔ aaafee kilomitai 40. Olympus Gɔŋ ní blema adesã tsɔɔ akɛ blema Helabii ajeŋmaŋ wɔji lɛ hi nɔ lɛ yɛ maŋ lɛ wuoyigbɛ.

Biblia kaselɔi sumɔɔ koni amɛle Beroia he sane ejaakɛ Paulo yashiɛ yɛ jɛmɛ ni mɛi babaoo batsɔmɔ Kristofoi. (Bɔfoi lɛ Asaji 17:10-15) Nyɛhaa wɔnyiɛa Paulo sɛɛ kɛyaa Beroia, ni wɔpɛi maŋ lɛ yinɔsane mli.

Maŋ lɛ Blema Yinɔsane

Mɔ ko mɔ ko leee be pɔtɛɛ ni ato Beroia maŋ lɛ. Aaafee afi 600 D.Ŋ.B. afii lɛ amli ni Makedoniabii yawo Frigiabii ní etamɔ nɔ ni amɛ klɛŋklɛŋ amɛyahi jɛmɛ lɛ foi kɛshi maŋ lɛ mli. Afii 300 sɛɛ lɛ, kunimii srɔtoi ni Alexander Kpeteŋkpele lɛ ye lɛ ha Makedonia maŋ lɛ ná nii. Amamɔ tsũi wuji kɛ amɛhe gbogboi ni nɔ kwɔlɔ, ni tsũi nɛɛ ekomɛi ji gbatsui ni amamɔ aha Dio, Artemi, Apollo, Athena, kɛ nyɔŋmɔi krokomɛi ni Helabii jáa lɛ.

Yinɔsane wolo ko tsɔɔ mli akɛ, afii babaoo ni eho lɛ, Beroia “ye bua maji ni bɔle lɛ, kɛ ekrokomɛi ni yɔɔ Hela kooyigbɛ lɛ babaoo.” Beni Antigonusbii (306-168 D.Ŋ.B.) ni ji naagbee maŋtsɛmɛi aweku ni ye Makedonia nɔ lɛ yeɔ nɔ lɛ ni maŋ lɛ hé gbɛi waa. Mɛi ni butu amɛnɔyeli lɛ ji Romabii lɛ.

Wolo ko (Encyclopædia Britannica) tsɔɔ mli akɛ, beni Romabii lɛ ye Maŋtsɛ Philip V lɛ nɔ kunim yɛ afi 197 D.Ŋ.B. lɛ, “Romabii lɛ ni bɔi maji ni yɔɔ Mediteranea bokagbɛ lɛ anɔ yeli.” Yɛ afi 168 D.Ŋ.B. lɛ, Roma tatsɛnukpa ko ye Perseus ni ji naagbee maŋtsɛ ni ye blema Makedonia nɔ lɛ nɔ kunim yɛ Pydna ní kɛ Beroia maŋ lɛ jɛkɛɛɛ tsɔ lɛ. Taakɛ Biblia lɛ gba lɛ, Roma baye Hela najiaŋ ákɛ jeŋ hewalɛ. (Daniel 7:6, 7, 23) Beroia fata Makedonia maji ni amɛ tsutsu amɛŋmɛɛ  amɛhe amɛha Romabii lɛ yɛ ta lɛ sɛɛ lɛ ahe.

Yɛ klɛŋklɛŋ afii 100 D.Ŋ.B. lɛ, Pompey kɛ Julius Caesar wu ta yɛ Makedonia. Yɛ anɔkwale mli lɛ, Beroia ji he ni Pompey kɛfee esraafoi lɛ anitsumɔhe yitso, ni eha esraafoi lɛ hi jɛmɛ niiaŋ.

Maŋ lɛ Shwere yɛ Roma Nɔyeli lɛ Mli

Yɛ Pax Romana loo Roma Toiŋjɔlɛ gbii lɛ amli lɛ, mɛi ni fã gbɛ kɛtee Beroia lɛ yana gbɛjegbɛi ni akɛ tɛi etara nɔ ní akulashiŋi ni tsɔɔ mɔ gbɛ jɛkɛmɔ mamɔ he. No mli lɛ, ayɛ nibii tamɔ hejuuhei ni maŋbii yajuɔ amɛhe yɛ jɛmɛ, shwɛmɔhei, wojiatoohei, kɛ hei hu ni mɛi nɔ̃ɔ ni ayakwɛɔ yɛ maŋ lɛ mli. Paipi yɛ jɛi, ni agbala nujɔɔi yɛ shikpɔŋ lɛ shishi awo maŋ lɛ mli. Beroia hé gbɛi waa ákɛ jarayeli maŋ, ni guɔyelɔi, nitɛŋlɔi, kɛ foidalɔi yaa jɛmɛ, ni mɛi komɛi hu yaa jɛmɛ amɛyakwɛɔ foidamɔ akaŋshii kɛ nifeemɔi krokomɛi. Ayɛ jamɔhei ní gbɔi baanyɛ aya jɛmɛ ni amɛyafee kusumii ni amɛjamɔ biɔ ni amɛfee lɛ. Hɛɛ, Beroia ji he ni maji ni no mli lɛ Roma yeɔ amɛnɔ lɛ amlibii ni jáa wɔji lɛ yakpeeɔ yɛ.

Roma maŋtsɛmɛi ni egboi ní abuɔ amɛ akɛ nyɔŋmɔi lɛ fata nyɔŋmɔi srɔtoi ni ajáa yɛ Beroia lɛ ahe. Ekolɛ, enɛ efeee nɔ ko srɔto kɛhaaa Beroiabii lɛ ejaakɛ dani nakai be lɛ baashɛ lɛ, no mli lɛ amɛjáa Alexander Kpeteŋkpele ní amɛbuɔ lɛ akɛ nyɔŋmɔ lɛ. Hela wolo ko tsɔɔ mli akɛ: “Akɛni Helenibii [Helabii] fɔɔ amɛmaŋtsɛmɛi lɛ ahiɛnyam woo yɛ amɛwala beaŋ tamɔ nyɔŋmɔi hewɔ lɛ, amɛteŋ mɛi ni  hi Maŋtsɛyeli lɛ bokagbɛ lɛ já Roma maŋtsɛmɛi lɛ hu kɛwo amɛ . . . Amɛfeɔ maŋtsɛmɛi lɛ ahe mfoniri yɛ amɛkaplɛji anɔ ákɛ nyɔŋmɔi ni fĩ akekre ní miikpɛ́lɛ. Amɛsɔleɔ ni amɛláa yijiemɔ lalai amɛhaa amɛ tamɔ bɔ pɛ ni amɛfeɔ amɛhaa amɛnyɔŋmɔi lɛ.” Amɛmamɔ afɔleshãalatɛi kɛ sɔlemɔtsui ni amɛshã afɔlei yɛ mli amɛha amɛ. Maŋtsɛ ni yeɔ nɔ lɛ po kɛ ehe woɔ maŋtsɛmɛi ajamɔ gbii juji lɛ amli, ni nibii ni afeɔ kɛyeɔ gbii juji lɛ ateŋ ekomɛi ji foidamɔ akaŋshii, nitɛŋmɔ akaŋshii, kɛ woloŋlee akaŋshii.

Mɛni hewɔ Beroia batsɔ maŋ ni wɔŋjamɔ hé shi yɛ mli lɛ? Ejaakɛ jɛmɛ Makedoniabii feɔ amɛkpee ni ji Koinon lɛ yɛ. Eji kpee ko ni mɛi jɛɔ Makedonia maji lɛ amli fɛɛ amɛbafeɔ. Mɛi ni baa kpee lɛ bakpeɔ daa yɛ Beroia kɛsusuɔ maŋ saji ahe, ni Romabii lɛ kwɛɔ ni atsuɔ saji lɛ ahe nii. Nibii titrii ni mɛi ni baa Koinon kpee lɛ tsuɔ he nii lɛ ateŋ ekome ji akɛ amɛkwɛɔ ni ayeɔ maŋtsɛ jamɔ gbii juji lɛ.

Nɛkɛ ji bɔ ni Beroia maŋ lɛ yɔɔ beni Paulo kɛ Sila jo foi kɛjɛ Tesalonika kɛtee jɛmɛ lɛ. No mli lɛ, Roma eye maŋ lɛ nɔ afii 200.

Sanekpakpa lɛ Yashɛ Beroia

Beni Paulo yashɛ Beroia lɛ, eje eshiɛmɔ lɛ shishi yɛ maŋ lɛ kpeehe lɛ. Te ahere lɛ aha tɛŋŋ? Sane ni atsɔ Nyɔŋmɔ mumɔ nɔ aŋma lɛ haa wɔleɔ akɛ, Yudafoi ni yɔɔ jɛmɛ lɛ “asu hi fe mɛi ni yɔɔ Tesalonika lɛ, ni amɛ lɛ amɛjie amɛyitsoŋ amɛmɔ wiemɔ lɛ mli, ni daa amɛkpaa ŋmalɛi lɛ amli amɛkwɛɔ akɛ nibii nɛɛ yɛ mli nakai lo.” (Bɔfoi lɛ Asaji 17:10, 11) Akɛni “a[mɛ]su hi” hewɔ lɛ, amɛkɛ tsuisalɛ efeee amɛnii akɛ amɛŋmɛŋ amɛblema saji lɛ ahe. Eyɛ mli akɛ no mli lɛ sane ni amɛnuɔ lɛ ji nɔ ko hee moŋ, shi no haaa amɛyiŋ afeee amɛ kɔshikɔshi loo amɛmli afu. Amɛtsĩmɔɔɔ amɛtoi yɛ Paulo shɛɛ sane lɛ he, moŋ lɛ, amɛbo toi jogbaŋŋ ni amɛhalaaa mli.

Te nakai Yudafoi lɛ fee tɛŋŋ amɛna akɛ nɔ ni Paulo tsɔɔ lɛ ji anɔkwale? Amɛkɛ nɔ ni amɛnu lɛ to Ŋmalɛ lɛ mli saji ni ji saji ni anyɛɔ amuɔ afɔ̃ɔ nɔ fe fɛɛ lɛ ahe. Amɛkɛ tsuishitoo kɛ mɔdɛŋbɔɔ pɛi Ŋmalɛ lɛ mli. Biblia he nilelɔ Matthew Henry mu sane naa akɛ: “Akɛni Paulo jɛ ŋmalɛi lɛ amli ekɛ amɛ susu saji ahe, ni eha amɛle akɛ nibii ni ekɛɛ amɛ lɛ fɛɛ yɛ Kpaŋmɔ Momo lɛ mli hewɔ lɛ, amɛgbele amɛ-Bibliai lɛ ni amɛkane ŋmalɛi ni etsɛ́ yisɛɛ lɛ ni amɛsusu nɔ ni nakai ŋmalɛi lɛ tsɔɔ lɛ he,  ni amɛkɛto ŋmalɛi krokomɛi ahe amɛkwɛ, ni amɛkɛ nakai feemɔ pɛi nibii ni Paulo wie yɛ nakai ŋmalɛi lɛ ahe lɛ amli amɛkwɛ akɛ amɛyɛ mli lo, ni ákɛ esane naatsɔɔmɔ lɛ hu ja lo, ni no sɛɛ ni amɛkpɛ amɛyiŋ.”

Nɔ ni Beroiabii lɛ fee lɛ jeee hiɛaŋhiɛaŋ niiamlipɛimɔ. Amɛhé be kɛkase nii, ni amɛkɛ mɔdɛŋbɔɔ tee nɔ amɛfee nakai daa, ni jeee yɛ Hejɔɔmɔ Gbi nɔ kɛkɛ.

Kwɛ nɔ ni jɛ mli kɛba. Yudafoi ni yɔɔ Beroia lɛ ateŋ mɛi babaoo tsu shɛɛ sane lɛ he nii ni amɛbatsɔmɔ heyelilɔi. Helabii kɛ ekolɛ mɛi ni tsake kɛba Yuda jamɔ mli lɛ hu ateŋ mɛi saŋŋ batsɔmɔ heyelilɔi. Anu enɛ he yɛ hei krokomɛi. Beni Yudafoi ni yɔɔ Tesalonika lɛ nu he lɛ, amɛshá shi kɛtee Beroia “amɛ[y]awo mɛi lɛ ayiŋ, ni amɛjijaa amɛ.”—Bɔfoi lɛ Asaji 17:4, 12, 13.

Enɛ ha Paulo shi Beroia, ni eyatsa eshiɛmɔ lɛ nɔ yɛ he kroko. Ewo lɛlɛ kɛtee Ateene. (Bɔfoi lɛ Asaji 17:14, 15) Kɛlɛ, ená miishɛɛ akɛ kɛtsɔ shiɛmɔ ni eyashiɛ yɛ Beroia lɛ nɔ lɛ, ato Kristofoi ajamɔ ama shi yɛ jɛi, ni ŋmɛnɛ lɛ, eeshwere.

Hɛɛ, mɛi yɛ Beroia (Véroia) lolo ní kpaa Ŋmalɛ lɛ amli jogbaŋŋ koni ‘amɛkɛka nibii fɛɛ amɛkwɛ’ ni ‘amɛmɔ’ emli nɔ ni ji anɔkwale diɛŋtsɛ lɛ “mli.” (1 Tesalonikabii 5:21) Yehowa Odasefoi asafoi enyɔ ni miishwere waa ní yɔɔ maŋ lɛ mli lɛ shiɛɔ taakɛ Paulo fee lɛ, ni amɛjajeɔ Biblia mli shɛɛ saji lɛ amɛtsɔɔ mɛi. Amɛtaoɔ mɛi ni hiɛ tsuijurɔ lɛ, ni amɛkɛ amɛ susuɔ saji ahe kɛjɛɔ Ŋmalɛ lɛ mli bɔni afee ni hewalɛ ni Biblia lɛ yɔɔ lɛ akanya amɛteŋ mɛi fɛɛ ni miisumɔ koni amɛbale Yehowa ni ji anɔkwa Nyɔŋmɔ lɛ ni amɛkase ehe nii.—Hebribii 4:12.

[Shikpɔŋ he mfoniri ni yɔɔ baafa 13]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Maji komɛi ni Paulo tee jɛmɛ beni enyiɛ emaŋsɛɛ shiɛmɔ nitsumɔ ni ji enyɔ lɛ nɔ

MISIA

Troia

Neapoli

Filipi

MAKEDONIA

Amfipoli

Tesalonika

Beroia

HELA

Ateene

Korinto

AKAIA

ASIA

Efeso

RODO

[Mfoniri ni yɔɔ baafa 13]

Jwiɛtɛi kaplɛ ni afee Alexander Kpeteŋkpele lɛ he mfoniri yɛ nɔ ákɛ Hela nyɔŋmɔ

[He ni Sane lɛ Jɛ]

Kaplɛ: Pictorial Archive (Near Eastern History) Est.

[Mfoniri ni yɔɔ baafa 14]

Agbó ko ni atsɔɔ mli kɛyaa Yudafoi ashihilɛhe lɛ yɛ Beroia (Véroia)

[Mfoniri ni yɔɔ baafa 15]

Blema kpeehe ko ni kãhe eyɛ Beroia (Véroia) ŋmɛnɛ