Ehe Miihia Kwraa Fe Kɔɔyɔɔŋ Tsakemɔ

ETAMƆ nɔ ni maŋ fɛɛ maŋ yɛ abɛi ni amɛbuɔ kɛkɔɔ kɔɔyɔŋ tsakemɔ he. Abɛi nɛɛ ateŋ eko ji, kɛ́ ŋwɛi tsu gbɛkɛ lɛ, wolɛɛnyo náa miishɛɛ. Shi kɛ́ ŋwɛi tsu leebi lɛ, ehiɛ hiɔ ehe nɔ. Ŋmɛnɛ, mɛi ni kaseɔ kɔɔyɔŋ tsakemɔ he nii lɛ tsɔɔ nɔ hewɔ ni kɔɔyɔɔŋ tsakemɔ baa leebi taakɛ abɛbua lɛ kɛɛ lɛ.

Yɛ Yesu beaŋ hu lɛ, mɛi fɔɔ ŋwɛi kwɛmɔ, ni amɛtsɔɔ kɛji jeŋ baatse loo nugbɔ baanɛ. Yesu kɛɛ Yudafoi komɛi akɛ: “Gbɛkɛ mli lɛ nyɛkɛɔ akɛ: Jeŋ baatse, ejaakɛ ŋwɛi etsu. Ni leebi lɛ nyɛkɛɔ akɛ: Ŋmɛnɛ nugbɔ baanɛ; ejaakɛ ŋwɛi etsu ni ehiɛ ehà. . . . Nyɛle ŋwɛi hiɛ nibii amlibuu, shi . . . “ Shi mɛni? Yesu tsa nɔ kɛ wiemɔ ko ni yɔɔ naakpɛɛ akɛ: “Yinɔi lɛ ahe okadii lɛ nyɛnyɛɛɛ nyɛbu lo?”—Mateo 16:2, 3.

Mɛni ji nɛkɛ “yinɔi lɛ ahe okadii” nɛɛ? No mɛi ji odaseyelii babaoo ni yɔɔ faŋŋ ni tsɔɔ akɛ Yesu ji Mesia diɛŋtsɛ ni Nyɔŋmɔ tsu lɛ lɛ. Anaa enifeemɔi lɛ faŋŋ tamɔ bɔ ni anaa ni ŋwɛi etsu lɛ nɔŋŋ. Shi Yudafoi lɛ ateŋ mɛi babaoo kpoo okadii ni tsɔɔ akɛ Mesia lɛ eba lɛ—nifeemɔ ní eyɛ faŋŋ akɛ ehe miihia kwraa fe kɔɔyɔŋ tsakemɔ.

Ŋmɛnɛ hu lɛ, okadi ko yɛ ní ehe miihia waa ni anu shishi kwraa fe bɔ ni ŋwɛi su ji. Yesu gba akɛ abaakpata jeŋ fɔŋ nɛɛ hiɛ, bɔni afee ni akɛ jeŋ kpakpa abaye najiaŋ. Etsĩ nibii pii atã ni kɛ́ abua naa lɛ, abaana akɛ be ni tsakemɔ nɛɛ baaba lɛ ebɛŋkɛ. Nibii nɛɛ ekomɛi ji tai kɛ hɔmɔ ni baaya nɔ yɛ jeŋ fɛɛ. Yesu tsɔɔ akɛ, kɛ́ abɔi nibii nɛɛ anamɔ lɛ, belɛ be ní Nyɔŋmɔ kɛbaatsu saji ahe nii lɛ ebɛŋkɛ.—Mateo 24:3-21.

Ani oona “yinɔi lɛ ahe okadii lɛ”?