Efɔŋfeemɔ—Ani Anyɛɛɛ Amɔ Naa?

Gbekɛ nuu fioo ko ni yɔɔ kpɛlɛkpɛlɛ lɛ na nɔ ko kã shikpɔŋ ni ekɔ koni ekwɛ nɔ ni ji—asomoaŋ okpɛlɛmi ni—okpɛlɛmi lɛ fɛ́ ni eshwila lɛ, ni eto lɛ kpa. Yoofɔyoo ko yashɛ́ ebi ŋmɔŋ efɔ̃ tumo nɔ yɛ gbɛjegbɛ ko toi. Nuu ko ni ashwie lɛ yɛ nitsumɔ mli lɛ tee nakai nitsumɔhe lɛ nɔŋŋ ni eyatswia mɛi fɛɛ ni ena yɛ jɛmɛ lɛ tu, kɛkɛ ni lɛ hu egbe ehe. Nuu ko ní abuɔ lɛ waa lɛ to gbekɛbii komɛi kabonaa.

DƆLƐSANE ji akɛ, nibii fɔ̃ji tamɔ enɛɛmɛi ahe amaniɛbɔi ebu waa yɛ wɔbei nɛɛ amli. Nɔ ni fata amaniɛbɔi nɛɛ ahe ni ehiii fe fɛɛ ji weku shishibulemɔ, kɛ awuiyeli ni yaa nɔ lɛ. Sane ko ni aŋma yɛ adafitswaa wolo ko mli yɛ afi 1995 lɛ kɛɛ akɛ: “Nibii fɔji ni yaa nɔ lɛ tsɔɔ akɛ Satan yinɔ nɛ. Yinɔ ko bako ní mɛi ahe esa kɛ gbɔmɔgbee, ní amɛyɛ he suɔmɔ akɛ amɛaagbe mɛi akpekpei abɔ yɛ hewolonɔ su, jamɔ, loo kuu mli ni mɛi lɛ jɛ lɛ hewɔ tamɔ nɛkɛ dã.”

Yɛ nakai beaŋ nɔŋŋ lɛ, adesai miiwo kɔɔyɔɔ lɛ mli muji, amɛmiifite shikpɔŋ lɛ kɛ enɔ nibii lɛ, ni amɛkpata kooloi srɔtoi babaoo ahiɛ aahu ákɛ amɛshishi miihe abule. Ani adesai baanyɛ amɔ nibii fɔji nɛɛ fɛɛ anaa ní amɛha shikpɔŋ nɔ hilɛ afee nɔ ni yɔɔ miishɛɛ kɛ shweshweeshwe? Aloo mɔdɛŋ tamɔ nɛkɛ ni aaabɔ lɛ baafee tamɔ nɔ ni aaya faaŋ aawo kɛntɛŋ mli? Nilelɔ kpanaa ko ni eŋmala saji babaoo yɛ efɔŋfeemɔ he lɛ kɛɛ akɛ: “Mishwe waa akɛ maha tsakemɔ aba je lɛŋ ní emli shihilɛ aŋɔɔ. Shi kɛlɛ afu ma he ni ema.” Ekolɛ bo hu onuɔ he nakai nɔŋŋ.

Abaanyɛ akɛ he ni je lɛ ema eyi shi kɛyaa lɛ ato meele ko ni nyiɛ ŋshɔ hiɛ ní miibote he ni ŋshɔ lɛ miiya nɔ eefee hamahama waa be fɛɛ be lɛ he. Eyɛ mli akɛ amlakui lɛ ateŋ mɔ ko sumɔɔɔ ni eyajeɔ he ko ni tamɔ nɛkɛ moŋ, shi mɔdɛŋ fɛɛ ni amɛbɔɔ koni amɛku amɛ sɛɛ lɛ efee efolo. Meele lɛ miitsɛ̃ kɛfoi moŋ kɛmiiya he ni efee hamahama waa lɛ.

Emuu ni adesai yeee lɛ fata he ni shihilɛ lɛ mli woɔ wu be fɛɛ be lɛ. (Romabii 3:23) Shi akɛni efɔŋfeemɔ egbɛ eshwã he fɛɛ he, ní emli miiwo wu daa hewɔ lɛ, etamɔ nɔ ni jeee adesai pɛ ahe yɔɔ sane nɛɛ mli. Ani eeenyɛ efee akɛ hewalɛ fɔŋ ko ní anaaa miikudɔ adesai? Kɛ́ nakai ni lɛ, mɛni ji nakai hewalɛ fɔŋ lɛ, ni te wɔɔfee tɛŋŋ wɔbu wɔhe kɛjɛ he lɛ? Abaaha sanebimɔi nɛɛ ahetoo yɛ sane ni nyiɛ sɛɛ lɛ mli.

[He ni Mfoniri ni yɔɔ baafa 3 lɛ Jɛ]

© Heldur Netocny/Panos Pictures