Hewalɛ ni Lilɛi Yɔɔ

KOOLOO ni atsɛɔ lɛ giraffe lɛ lilɛi kɛlɛ aaashɛ waotalɔi 18, ni elilɛi lɛ yɛ hewalɛ bɔ ni enyɛɔ ekɛtserɛɔ baai oyayaayai kɛjɛɔ tsei ni kwɔlɔ anɔ. Bonso ni da waa lɛ lilɛi tsiimɔ kɛ shwuɔ kome tsiimɔ yeɔ egbɔ. Susumɔ hewalɛ ni he baahia ni akɛwo elilɛi lɛ nɔ lɛ he okwɛ!

Kɛ́ akɛ adesa lilɛi lɛ dalɛ kɛ etsiimɔ to koolooi nɛɛ anɔ̃ lɛ he lɛ, adesa lilɛi lɛ shɛɛɛ nɔ ko kwraa. Ni kɛlɛ, adesa lilɛi lɛ yɛ hewalɛ kwraa fe kooloi nɛɛ anɔ. Biblia lɛ wie adesa gbɔmɔtso lɛ he nɔ bibioo nɛɛ he akɛ: “Gbele kɛ wala yɛ lilɛi dɛŋ.” (Abɛi 18:21) Yɛ anɔkwale mli lɛ, akɛ hewalɛ ni lilɛi lɛ yɔɔ lɛ etsu nii kɛmale mɛi ahe, ni akɛye amale odasei, ni enɛ efite mɛi ni efeko nɔ ko lɛ ashihilɛ, ni eha agbe amɛteŋ mɛi komɛi po.

Yɛ nakai gbɛ nɔ nɔŋŋ lɛ, wiemɔi ni kumɔɔ mɔ tsui efite nanemɛi ateŋ. Wiemɔi ni mli wawai ekumɔ mɛi atsui. Hiob ni enanemɛi lɛ folɔ enaa waa lɛ wie akɛ: “Mɛɛ beyinɔ nyɛaagba misusuma naa ni nyɛkɛ wiemɔi aaakumɔ mi dukuduku kɛyashi?” (Hiob 19:2) Kaselɔ Yakobo tsɔɔ bɔ ni lilɛi ni awoko lɛ manyoflɛ lɛ nyɛɔ efiteɔ nii ehaa lɛ mli fitsofitso yɛ nɛkɛ gbɛ nɔ akɛ: “Lilɛi hu, henɔ bibioo ni, ni eshwãa nii wuji. Naa, la bibioo hu, nyɛkwɛa koo bɔ sɔŋŋ ni eshãa! Ni lilɛi lɛ hu, la ni.”—Yakobo 3:5, 6.

Yɛ gbɛ kroko nɔ lɛ, lilɛi lɛ baanyɛ abaa mɔ yi. Mɔ hesusumɔ kɛ miishɛjemɔ wiemɔi eye ebua mɛi komɛi ni ehao, ni ejie mɛi komɛi ni kulɛ amɛmiitao amɛgbe amɛhe lɛ kɛjɛ gbele mli. Ŋaawoo kpakpa ni mɛi babaoo ni kɛ tsofai fɔji tsuɔ nii, kɛ ojotswalɔi yiwalɔi komɛi bo toi lɛ ebaa amɛyi kɛjɛ kpatu gbele mli. Eji anɔkwale akɛ jalɔ lilɛi lɛ, “walatso ni,” ni “wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.”—Abɛi 15:4; 25:11.

Gbɛ ni hi fe fɛɛ ni abaanyɛ akɛ lilɛi lɛ atsu nii ji ní akɛjie Yehowa Nyɔŋmɔ yi, ní akɛjaje Nyɔŋmɔ Maŋtsɛyeli lɛ he sanekpakpa lɛ, kɛ agbɛnɛ ní akɛtsɔɔ mɛi krokomɛi anɔkwalei ni jara wa ni yɔɔ Biblia lɛ mli lɛ. Mɛni hewɔ? Yesu kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.”—Yohane 17:3; Mateo 24:14; 28:19, 20.