Sanebimɔi ni Jɛ Kanelɔi Adɛŋ

Ani Abɛi 22:6 lɛ maa nɔ mi doo akɛ kɛ́ Kristofoi tsɔse amɛbii jogbaŋŋ lɛ, gbekɛbii lɛ ejeŋ Yehowa gbɛ lɛ nɔ?

Abɛi 22:6 lɛ kɛɔ akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.” Bɔ ni aaakudɔ tso fɔ́ aha lɛ, nakai tso lɛ daa ebatsɔɔ. Nakai nɔŋŋ hu ewaaa kwraa akɛ kɛ́ atsɔse gbekɛbii jogbaŋŋ lɛ, amɛbaaya nɔ amɛsɔmɔ Yehowa kɛ́ amɛdara. Taakɛ fɔlɔi fɛɛ le lɛ, tsɔsemɔ ni tamɔ nɛkɛ lɛ heɔ be, ni ebiɔ mɔdɛŋbɔɔ hu. Kɛ́ fɔlɔi aaaha amɛbii atsɔmɔ Kristofoi kaselɔi lɛ, ebaabi ni amɛtsɔɔ amɛ nii jogbaŋŋ, amɛkã amɛ, amɛwo amɛ hewalɛ, amɛtsɔse amɛ jogbaŋŋ, ní amɛfee nɔkwɛmɔnɔ kpakpa hu amɛha amɛ. Esa akɛ amɛjɛ suɔmɔ mli amɛkɛ afii pii akã he afee nakai.

Belɛ, ani kɛ́ gbekɛ ko kpa Yehowa sɔɔmɔ lɛ, no tsɔɔ akɛ efɔlɔi tsɔseee lɛ jogbaŋŋ? Bei komɛi lɛ, ebaanyɛ eba akɛ fɔlɔi komɛi tsɔseee amɛbii lɛ jogbaŋŋ yɛ Yehowa tsɔsemɔ kɛ ŋaawoo lɛ mli. (Efesobii 6:4) Yɛ gbɛ kroko nɔ lɛ, Abɛi 22:6 lɛ emaaa nɔ mi doo akɛ bɔ fɛɛ bɔ ni ji lɛ, tsɔsemɔ kpakpa baaha gbekɛbii aye Nyɔŋmɔ anɔkwa. Fɔlɔi nyɛŋ amɛha amɛbii atsɔmɔ onukpai ni baafee nɔ ni fɔlɔi lɛ sumɔɔ. Taakɛ bɔ ni onukpai ji lɛ, gbekɛbii hu yɛ hegbɛ ni amɛhalaa nɔ ni amɛsumɔɔ, ni esa akɛ amɛkɔ amɛ diɛŋtsɛ amɛshihilɛ gbɛ kɛ́ amɛdara. (5 Mose 30:15, 16, 19) Yɛ mɔdɛŋ fɛɛ ni fɔlɔi bɔɔ lɛ sɛɛ lɛ, gbekɛbii lɛ ekomɛi yeee anɔkwa, tamɔ bɔ ni Salomo ni ŋma ŋmalɛ ni wɔsusuɔ he lɛ fee lɛ. Yehowa bii lɛ ekomɛi po yeee anɔkwa.

No hewɔ lɛ, ŋmalɛ nɛɛ etsɔɔɔ akɛ bɔ fɛɛ bɔ ni fee lɛ, gbekɛ ko “ejeŋ” gbɛ ni sa lɛ “nɔ,” shi moŋ etsɔɔ akɛ efɔɔ kaa akɛ gbekɛ lɛ ejeee nɔ. Mɛɛ hewalɛwoo po enɛ ji kɛha fɔlɔi nɛkɛ! Esa akɛ fɔlɔi ana ale akɛ mɔdɛŋ ni amɛbɔɔ kɛtsɔseɔ amɛbii lɛ yɛ Yehowa gbɛ̀i anɔ lɛ baawo yibii kpakpai. Akɛni fɔlɔi náa amɛbii lɛ anɔ hewalɛ waa ni amɛtsuɔ gbɛnaa nii ni he hiaa he nii hewɔ lɛ, aawo amɛ hewalɛ ni amɛkɛ hiɛdɔɔ atsu amɛgbɛnaa nii lɛ ahe nii.—5 Mose 6:6, 7.

Kɛ́ gbekɛbii lɛ kpa Yehowa sɔɔmɔ po lɛ, fɔlɔi ni etsɔse amɛbii lɛ jogbaŋŋ lɛ baanyɛ aná hiɛnɔkamɔ akɛ gbekɛbii lɛ ahiɛ baaba amɛhe nɔ, ni amɛbaaba amɛbasɔmɔ Yehowa ekoŋŋ. Biblia mli anɔkwale lɛ yɛ hewalɛ, ni ewaa dani bii ahiɛ kpaa tsɔsemɔ ni amɛfɔlɔi kɛha amɛ lɛ nɔ.—Lala 19:8.