Wala Shihilɛ He Sane

Wɔtswa Wɔfai Shi Akɛ Wɔbaagbe Wɔsɔɔmɔ Lɛ Naa

Taakɛ Lena Davison Gba

Wɔkɔɔyɔɔŋ lɛlɛ kudɔlɔ lɛ wie blɛoo akɛ: “Mihiŋmɛi nɔ miiha. Minaaa nii.” Etsɛɛɛ tsɔ kɛkɛ ni nɔ̃ nyɔ enɔ, ni eŋmɛɛ nɔ ni ekɛkudɔɔ kɔɔyɔɔŋ lɛlɛ bibioo ni wɔtara mli lɛ he, ni ekpɔ ekaje yɛ esɛi lɛ mli. Miwu ní kudɔ ko kɔɔyɔŋ lɛlɛ pɛŋ lɛ bɔ mɔdɛŋ waa akɛ etsĩɛ ehiɛ. Dani matsɔɔ bɔ ni fee ni wɔje oshara nɛɛ mli lɛ, ha matsɔɔ nɔ ni ha wɔyaje kɔɔyɔɔŋ lɛlɛ nɛɛ mli yɛ Papua New Guinea, ni ji maŋ ni yɔɔ shɔŋŋ lɛ.

AFƆ́ mi yɛ afi 1929 yɛ Australia, ni mida yɛ Sydney, ni ji New South Wales maŋtiase lɛ mli. Atsɛɔ mitsɛ Bill Muscat, ni eji mɔ ko ni fiɔ Komunist nɔyeli sɛɛ, shi naakpɛɛ sane ji akɛ eheɔ Nyɔŋmɔ nɔ eyeɔ. Yɛ afi 1938 lɛ, ekpɛlɛ nɔ po akɛ ekɛ ewaonaa gbɛi baawo wolo ní akɛmiibi nɔyeli lɛ koni eŋmɛ Joseph F. Rutherford ni jɛ Yehowa Odasefoi anitsumɔhe yitso lɛ gbɛ ni ebaha wiemɔ yɛ Sydney Town Hall lɛ shishi.

Ataa kɛɛ wɔ yɛ nakai beaŋ akɛ: “Ekolɛ [Joseph F. Rutherford] yɛ nɔ ko kpakpa ni ebaawie.” Afii kpaanyɔ sɛɛ lɛ, wɔnu otii ni yɔɔ nakai wiemɔ ni aha lɛ mli lɛ shishi. Ataa fɔ̃ Norman Bellotti, ni eji Yehowa Odasefonyo ni kɛ ebe fɛɛ miisɔmɔ lɛ nine kɛba wɔshĩa lɛ, ni ekɛ wɔ bakase Biblia lɛ. Wɔweku lɛ kpɛlɛ Biblia mli anɔkwalei lɛ anɔ oyayaayai, ni etsɛɛɛ ni wɔkɛ wɔhe wo Kristofoi ashiɛmɔ nitsumɔ lɛ mli kɛ ekãa.

Aaafee afi 1945 mli lɛ, mikpa skulyaa koni mawa mimami ní miiye hela ko ni ehiii tsamɔ lɛ. Mitsu nii hu akɛ nikpɛlɔ koni mikɛkwɛ mihe. Daa Hɔɔ gbɛkɛ lɛ, mi kɛ minyɛmi  yoo Rose fataa gbɛgbalɔi komɛi ahe, ni wɔyayeɔ gbɛjegbɛ nɔ odase yɛ Sydney Town Hall lɛ masɛi. Yɛ afi 1952 lɛ, minyɛmi nukpa John gbe Gilead ni ji maŋsɛɛ sanekpakpa shiɛlɔi askul ni yɔɔ United States lɛ naa, ni aha eyasɔmɔ yɛ Pakistan. Mi hu miyɛ sɔɔmɔ nitsumɔ lɛ he miishɛɛ, ni miisumɔ akɛ makase enɔkwɛmɔnɔ lɛ. No hewɔ lɛ, yɛ afi ni nyiɛ sɛɛ lɛ mli lɛ, mikɛ mihe wo daa gbɛgbamɔ nitsumɔ lɛ mli.

Gbalashihilɛ kɛ Maŋsɛɛ Sanekpakpa Shiɛmɔ Nitsumɔ Lɛ

No sɛɛ etsɛɛɛ lɛ, mikɛ John Davison, ni tsuɔ nii yɛ Yehowa Odasefoi anitsumɔhe nine ni yɔɔ Australia lɛ kpe. Bɔ ni ebaa ehe shi ehaa, ní ehe jɔ, kɛ jeŋba kpakpa ni eyɔɔ lɛ sa mihiɛ waa. Beni Jeŋ Ta II lɛ yaa nɔ lɛ, awo lɛ tsuŋ shii etɛ sɔŋŋ yɛ ehe ni ekɛwooo maŋ saji amli akɛ Kristofonyo lɛ hewɔ. Wɔkpɛ wɔyiŋ akɛ wɔbaatsu Kristofoi asɔɔmɔ nitsumɔ lɛ wɔwala gbii abɔ fɛɛ.

Mi kɛ John bote gbalashihilɛ mli yɛ June afi 1955. Wɔhé bɔs kɛ jwɛŋmɔ akɛ wɔkɛbaafee tsɔne ni awɔɔ mli. Wɔyiŋtoo ji ni wɔnyɛ wɔkɛyashiɛ yɛ hei ni yɔɔ banee ni yɔɔ Australia lɛ. Enɔ afi lɛ, abi koni Odasefoi ni baasumɔ lɛ ashi kɛya New Guinea, ni yɔɔ ŋshɔkpɔ agbo ko kooyi-bokagbɛ, yɛ Australia kooyigbɛ lɛ koni amɛyashiɛ yɛ jɛmɛ. * No mli lɛ abɔiko Maŋtsɛyeli shɛɛ sane lɛ shiɛmɔ yɛ jɛmɛ. Wɔkɛ wɔhe ha amrɔ nɔŋŋ.

Nakai beaŋ lɛ, John bɔi nitsumɔ taomɔ ejaakɛ mɛi pɛ ni aŋmɛɔ amɛ gbɛ ni amɛya New Guinea ji mɛi ni miiya amɛkɛ amɛbe fɛɛ ayatsu heloonaa nitsumɔ. Etsɛɛɛ ni ena nitsumɔ yɛ tsogbamɔ nitsumɔhe ko yɛ New Britain, ni ji ŋshɔkpɔ bibioo ko ni fata New Guinea he lɛ. Otsii komɛi asɛɛ lɛ, wɔshi koni wɔyatsu wɔnitsumɔ hee lɛ, ni yɛ July afi 1956 lɛ, wɔyashɛ Rabaul, yɛ New Britain. Wɔmɛ yɛ jɛmɛ gbii ekpaa koni wɔwó lɛlɛ kɛya Waterfall Bay.

Beni Wɔshiɛɔ yɛ Waterfall Bay Lɛ

Beni wɔkɛ gbii babaoo efo ŋshɔ ni yɔɔ hamahama sɛɛ lɛ, wɔyashɛ Waterfall Bay, ni ji ŋshɔnine ni yɔɔ Rabaul wuoyigbɛ aaafee kilomitai 240 lɛ. Wɔyana tsogbamɔ nitsumɔhe wulu ko yɛ koo kusuu ni yɔɔ jɛmɛ lɛ mli. Beni nitsulɔi lɛ fɛɛ tara niyeli okpɔlɔ he nakai gbɛkɛ lɛ, nitsumɔhe nɔkwɛlɔ lɛ kɛɛ akɛ, “Owula kɛ Awula Davison, nɔ ni afeɔ yɛ biɛ ji akɛ, nitsulɔ fɛɛ nitsulɔ tsɔɔ jamɔ mli ni eyɔɔ.”

Wɔle jogbaŋŋ akɛ afeee nɔ ko tamɔ nakai, shi akɛni wɔkpoo akɛ wɔɔshɛre tawa hewɔ lɛ, eeenyɛ efee akɛ amɛyiŋ etɛ̃ɛɛ amɛ. Shi fɛɛ sɛɛ lɛ, John jie naa akɛ, “Yehowa Odasefoi ji wɔ.” Jɛmɛ jɔ tiŋkoŋŋ. Nitsulɔi lɛ ji hii ni wu Jeŋ Ta II lɛ eko, ni amɛsumɔɔɔ Odasefoi lɛ asane kwraa yɛ amɛhe ni amɛkɛwooo ta lɛ mli lɛ hewɔ. Kɛjɛ nakai gbi lɛ nɔ kɛyaa lɛ, amɛtao hegbɛ ni amɛaatsɔ nɔ amɛgba wɔnaa.

Shishijee lɛ, eyɛ mli akɛ kulɛ esa akɛ nitsumɔ nɔkwɔlɔ lɛ aha wɔ friji kɛ stof moŋ, shi ekpoo akɛ eeeha wɔ. Wɔniyenii pii fite, ni stof ko ni efite ní wɔyana yɛ koo lɛ mli lɛ ji nɔ ni wɔkɛhoɔ nii. No sɛɛ lɛ, akɛɛ  akrowa lɛ mli bii lɛ akɛ amɛkahɔ̃ɔ ŋmɔshi nibii kpakpai amɛha wɔ, no hewɔ lɛ, wɔye ŋmɔshi nii fɛɛ ŋmɔshi nii ni wɔnine baanyɛ ashɛ nɔ lɛ. Abu wɔ hu akɛ maŋ shikpálɔi, ni akpá wɔ shi akwɛ akɛ wɔkɛ mɔ ko miikase Biblia lɛ lo. Sɛɛ mli lɛ atridii mɔ mi.

Fɛɛ sɛɛ lɛ, wɔtswa wɔfai shi akɛ wɔbaagbe wɔsɔɔmɔ lɛ naa. Enɛ hewɔ lɛ, wɔbi oblahii enyɔ komɛi ni jɛ akrowa lɛ, ní tsuɔ nii yɛ tsogbamɔhe lɛ ní amɛnuɔ Blɔfo lɛ koni amɛtsɔɔ wɔ Melanesia Pidgin, ni ji maŋbii lɛ awiemɔ lɛ. Wɔ hu wɔkɛ amɛ kase Biblia lɛ. Yɛ otsii anaagbee lɛ, wɔyasharaa shi yɛ hei babaoo. Kɛ́ wɔnyiɛ gbɛ kɛmiiya lɛ, wɔtsɔɔ ŋaa gbɛ nɔ wɔyeɔ akrowa lɛ mli bii ni wɔkɛkpeɔ lɛ odase; oblahii enyɔ ni wɔkɛkaseɔ Biblia lɛ tsɔɔ wiemɔ lɛ shishi. Wɔfoɔ faai ní miiyoo waa, ní báa wuji miikakaa amɛhe yɛ toi lɛ. Kooloi awuiyelɔi nɛɛ gbaaa wɔnaa, fe shikome ko pɛ ní shwɛ sharao ni kulɛ efee ablaŋ.

Wɔfee Dɛŋdadei ní Wɔkɛbaatsɔɔ Nii

Beni wɔshiɛmɔ nitsumɔ lɛ bɔi shweremɔ lɛ, wɔkpɛ wɔyiŋ akɛ wɔbaakala Biblia mli shɛɛ saji kukuji wɔwo woji anɔ koni wɔja wɔha mɛi ni yɔɔ wiemɔ lɛ he miishɛɛ lɛ. Hii enyɔ ni wɔkɛkaseɔ Biblia lɛ ní tsuɔ nii yɛ tsogbamɔhe lɛ ye amɛbua wɔ kɛtsɔɔ klɛŋklɛŋ nɔ lɛ shishi. Wɔkɛ gbii pii shi kpe kɛkala dɛhiɛmɔ woji bibii ohai abɔ, ni wɔja wɔha akrowa lɛ mli bii, kɛ amlakui ni batsɔɔ jɛmɛ lɛ.

Yɛ afi 1957 lɛ, John Cutforth, ni eji nɔkwɛlɔ gbɛfalɔ ni he esa waa lɛ basara wɔ ni ewo wɔ hewalɛ. * Ewo wɔ ŋaa akɛ, mfonirii ní wɔkɛaatsu nii lɛ baanyɛ aha Biblia mli anɔkwalei ni wɔtsɔɔ mɛi ni nyɛɛɛ nii akane lɛ amɔ shi waa. Ekɛ miwu fee ekome kɛtɛŋ mfonirii pii ni baaha shishijee Biblia mli anɔkwalei lɛ ashishinumɔ afee mlɛo. Sɛɛ mli lɛ, wɔsaa wɔkɛ be babaoo tɛŋ mfonirii ni atsɔɔ nɔ akɛshiɛɔ nɛɛ yɛ woji ni akɛŋmaa nii yɛ skul lɛ amli. Wɔha Biblia kaselɔ fɛɛ Biblia kaselɔ ekome, ni amɛkɛtsu nii kɛshiɛ amɛha mɛi krokomɛi. Sɛɛ mli lɛ, akɛ nitsɔɔmɔ gbɛ nɛɛ bɔi nitsumɔ yɛ maŋ muu lɛ fɛɛ mli.

Beni wɔye afii enyɔ kɛ fã yɛ Waterfall Bay lɛ, wɔnitsumɔ yɛ tsogbamɔ nitsumɔhe lɛ ba naagbee, ni akpɛlɛ wɔnɔ akɛ wɔhi maŋ lɛ mli. No hewɔ lɛ, wɔkpɛlɛ nine ni afɔ̃ wɔ akɛ wɔbasɔmɔ akɛ gbɛgbalɔi krɛdɛɛi lɛ nɔ.

Wɔku Wɔsɛɛ Kɛtee Rabaul

Beni lɛlɛ ni wɔkɛfãa gbɛ lɛ kɛ ehiɛ tsɔɔ kooyigbɛ kɛyaa Rabaul lɛ, wɔyakpeleke yɛ Wide Bay, ni ji maŋ ko ni afee akokooshi kɛ kokoo ŋmɔ̃ kplɛlɛɛ yɛ jɛmɛ lɛ mli, ni wɔyaye jenamɔ lɛ yɛ jɛmɛ. Ŋmɔ̃tsɛmɛi lɛ, ni ji mɔ kɛ ehefatalɔ ni amɛgbɔlɔ, ni miitao ni amɛkpa nitsumɔ koni amɛku amɛsɛɛ kɛya Australia lɛ kɛɛ amɛbaasumɔ ni John akwɛ ŋmɔ lɛ nɔ eha amɛ. Nitsumɔ  nɛɛ bafee kaa agbo kɛha wɔ, shi beni wɔsusu he nakai gbɛkɛ lɛ, wɔba gbeekpamɔ akɛ jeee heloonaa nibii asɛɛtiumɔ hewɔ wɔba New Guinea. Wɔtswa wɔfai shi akɛ, ákɛ gbɛgbalɔi lɛ, wɔbaagbe wɔsɔɔmɔ lɛ naa. No hewɔ lɛ enɔ jetsɛremɔ lɛ, wɔha ŋmɔ̃tsɛmɛi lɛ le wɔyiŋkpɛɛ lɛ, kɛkɛ ni wɔtsa wɔgbɛfaa lɛ nɔ.

Beni wɔyashɛ Rabaul lɛ, wɔyafata Odasefoi akuu fioo ni amɛjɛ maji krokomɛi anɔ kɛba jɛmɛ lɛ ahe. Jɛi bii lɛ nya Maŋtsɛyeli shɛɛ sane lɛ he waa, ni wɔkɛ mɛi pii je Biblia mli nikasemɔ shishi. Nɛkɛ be nɛɛ mli lɛ, wɔfeɔ Kristofoi akpeei yɛ asa ko ni wɔyahai lɛ mli, ni mɛi aaafee 150 baa kpee lɛ. Amɛteŋ mɛi babaoo kpɛlɛ anɔkwale lɛ nɔ, ni amɛye kɛbua kɛgbɛ Nyɔŋmɔ Maŋtsɛyeli lɛ he sanekpakpa lɛ kɛtee maŋ lɛ hei krokomɛi.—Mateo 24:14.

Wɔtee Vunabal, ni ji akrowa ko ni kɛ Rabaul jɛkɛmɔ aaafee kilomitai 50 lɛ, ni jɛi bii lɛ ateŋ mɛi komɛi nya Biblia mli anɔkwale lɛ he. Etsɛɛɛ kɛkɛ ni Katoliknyo ko ni ale lɛ waa ni yɔɔ jɛmɛ lɛ jwɛŋmɔ tee nɛkɛ mɛi nɛɛ anɔ. Nuu nɛɛ kɛ esamaŋfoi komɛi ni ekɛyaa sɔlemɔ lɛ fite daa otsi Biblia mli nikasemɔ ni wɔfeɔ lɛ, ni amɛshwie wɔ kɛjɛ akrowa lɛ. Beni wɔná wɔle akɛ amɛbaafee nibii ni fe nakai yɛ otsi ni nyiɛ sɛɛ lɛ mli lɛ, wɔbi polisifoi lɛ koni amɛbabu wɔhe.

Nakai gbi lɛ, Katolikbii to srɛnɛɛ yɛ gbɛ lɛ he ní amɛmiiwɔ wɔyi. Amɛteŋ mɛi babaoo efee klalo akɛ amɛbaatswia wɔ tɛi. Nakai beaŋ nɔŋŋ lɛ, osɔfo ko hu eyabua akrowa lɛŋ hii ohai abɔ komɛi anaa. Polisifoi lɛ ha wɔnu shishi akɛ wɔyɛ hegbɛ akɛ wɔfeɔ kpee lɛ, no hewɔ lɛ amɛgba gbɛ kɛtsɔ gbɔmɛi lɛ ateŋ. Shi beni wɔje kpee lɛ shishi nɔŋŋ kɛkɛ ni osɔfo lɛ yawo emɛi lɛ ayiŋ koni amɛbafee wɔ soisoi. Polisifoi lɛ nyɛɛɛ amɛtsĩ amɛnaa; no hewɔ lɛ, polisi nukpa lɛ kɛɛ wɔ ni wɔshi jɛmɛ, kɛkɛ ni enyiɛ wɔhiɛ kɛtee wɔtsɔne lɛ he.

Asafo yuu lɛ ku kɛbɔle wɔ, ni beni amɛteŋ mɛi komɛi miilomɔ wɔ lɛ, mɛi komɛi hu miifɛ̃ lajɔ̃, ni mɛi krokomɛi hu efimɔ atswɛrɛ kɛdamɔ shi, belɛ nɛkɛ osɔfo lɛ ekota eniji, ni edamɔ shi eeeŋmɔ. Beni wɔshi jɛmɛ lɛ, polisi onukpa lɛ kpɛlɛ nɔ akɛ enako basabasafeemɔ ni tamɔ nɛkɛ pɛŋ. Eyɛ mli akɛ basabasafeemɔ lɛ wo Vunabalbii lɛ pii ahe gbeyei moŋ, shi mɛi ni wɔkɛkaseɔ Biblia lɛ ateŋ mɔ kome mia ehiɛ ekpɛlɛ Maŋtsɛyeli anɔkwale lɛ nɔ. Kɛjɛ nakai beaŋ kɛbaa nɛɛ, mɛi ohai abɔ ni yɔɔ New Britain lɛ ebamɔ anɔkwale lɛ mli.

Gbɛ Ba New Guinea

Yɛ November 1960 lɛ, aha wɔyasɔmɔ yɛ ŋshɔnaa maŋ ni atsɛɔ lɛ Madang, ni eji maŋ wulu ko ni yɔɔ New Guinea ŋshɔkpɔ lɛ kooyigbɛ lɛ mli. Mɛi babaoo fɔ̃ wɔ nine ni wɔkɛ wɔhe abawo heloonaa nitsumɔ ni akɛ be fɛɛ tsuɔ lɛ mli. Nitsumɔhe ko kɛɛ mibakwɛ amɛshwapo ni ahɔ̃ɔ atade yɛ mli lɛ nɔ. Nitsumɔhe kroko hu kɛɛ mibasaa atadei ahe ni mikpɛ miha amɛ. Yei komɛi ni amɛjɛɛɛ nakai maŋ lɛ nɔ lɛ po kɛɛ amɛbaaha mi shika ni mikɛje nikpɛɛ shishi. Akɛni wɔhiɛ kpako oti ni wɔkɛ ma wɔhiɛ lɛ nɔ hewɔ lɛ, wɔjɛ bulɛ mli wɔkpoo hegbɛi nɛɛ kɛ ekrokomɛi fɛɛ.—2 Timoteo 2:4.

Shikpɔŋkuku ni yɔɔ Madang lɛ wo yibii waa, ni etsɛɛɛ kwraa ni ato asafo shishi yɛ jɛmɛ. Wɔkɛ moto fãa gbɛ kɛyashiɛɔ yɛ akrowai ni yɔɔ shɔŋŋ lɛ amli gbii babaoo, ni kɛ́ wɔshɛ hei komɛi lɛ wɔnyiɛɔ. Bei komɛi lɛ, wɔwɔɔ kpɛtɛŋkpɛi ní awɔɔɔ mli dɔŋŋ lɛ amli, ni wɔkamɔɔ tsatsai anɔ. Nibii ni wɔhiɛɔ yɛ wɔhe pɛ ji tsɛŋsi mli niyenii, akpaanɔɔ, kɛ tɔŋtɔŋ buu.

Yɛ wɔgbɛfãa lɛ ekome mli lɛ, wɔtee akrowa ko ni atsɛɔ lɛ Talidig ni yɔɔ Madang kooyigbɛ aaafee kilomitai 50 lɛ mli ni wɔyasara mɛi  komɛi ni yɔɔ wiemɔ lɛ he miishɛɛ lɛ. Beni kuu nɛɛ yaa amɛhiɛ yɛ anɔkwale lɛ mli lɛ, skul ko ni yɔɔ nakai akrowa lɛ mli lɛ tsɔɔlɔ nukpa lɛ gu amɛ akɛ amɛkakase Biblia lɛ yɛ maŋ lɛ mli. Sɛɛ mli lɛ eyawo polisifoi lɛ ayiŋ koni amɛfite mɛi ní yɔɔ wiemɔ lɛ he miishɛɛ lɛ ashĩai ní ashwie amɛ awo koo lɛ mli. Shi maŋtsɛ ni yɔɔ akrowa ko ni bɛŋkɛ jɛmɛ lɛ ha mɛi ni yɔɔ wiemɔ lɛ he miishɛɛ lɛ bahi ekrowa lɛ. Sɛɛ mli lɛ, maŋtsɛ mlihilɔ nɛɛ kpɛlɛ Biblia mli anɔkwale lɛ nɔ, ni amã Maŋtsɛyeli Asa hee yɛ jɛmɛ.

Wiemɔ Shishitsɔɔmɔ kɛ Gbɛfãa Nitsumɔ Lɛ

Yɛ 1956 beni wɔye afii enyɔ pɛ yɛ New Britain lɛ, afɔ̃ mi kɛ John nine koni wɔbatsɔɔ Biblia kasemɔ woji ashishi kɛya Melanesia Pidgin wiemɔ mli. Wɔtee nɔ wɔtsu nitsumɔ nɛɛ afii abɔ. Kɛkɛ ni afɔ̃ wɔ nine yɛ afi 1970 kɛtee nitsumɔhe nine ni yɔɔ Port Moresby, yɛ Papua New Guinea maŋtiase lɛ mli lɛ, koni wɔkɛ wɔbe fɛɛ atsɔɔ wiemɔ shishi. Wɔtsɔɔ mɛi ni miitao akase wiemɔ lɛ hu anii.

Yɛ afi 1975 lɛ, wɔku wɔsɛɛ kɛtee New Britain ni wɔyasɔmɔ yɛ gbɛfaa nitsumɔ lɛ mli. Yɛ afii 13 ni nyiɛ sɛɛ kɛba lɛ mli lɛ, etamɔ nɔ ni wɔkpa maŋ lɛŋ fɛɛ, bei komɛi lɛ wɔtaa kɔɔyɔɔŋ lɛlɛ mli, bei komɛi hu lɛ wɔtaa lɛlɛ mli, ni yɛ bei krokomɛi amli hu lɛ wɔtaa lɔle mli loo wɔnyiɛɔ. Wɔje osharai amli shii abɔ yɛ wɔgbɛfãi lɛ amli, ni nɔ̃ ni miwie he kɛjɛ shishijee lɛ hu fata he. Nakai gbi lɛ, kɔɔyɔɔŋ lɛlɛ kudɔlɔ lɛ musu mɔ lɛ waa, ni eha nɔ̃ nyɔ enɔ beni eshwɛ fioo ni wɔbaashɛ Kandrian kɔɔyɔɔŋ lɛji adaamɔhe ni yɔɔ New Britain lɛ. Kɔɔyɔɔŋ lɛlɛ lɛ bɔle shi yɛ kɔɔyɔɔ lɛ mli yɛ koo lɛ yiteŋ kɛtee kɛba shii abɔ, ni yɛ nakai beaŋ fɛɛ lɛ John bɔ mɔdɛŋ waa akɛ etsĩɛ kɔɔyɔɔŋ lɛlɛ kudɔlɔ ni nɔ̃ enyɔ enɔ lɛ hiɛ. Naagbee lɛ ehiɛ tserɛ lɛ, ni ebɔi ninamɔ bɔ ni sa, ni emia ehiɛ ekudɔ kɔɔyɔɔŋ lɛlɛ lɛ kɛba shikpɔŋ ni eba mã shi. Kɛkɛ ni nɔ̃ nyɔ enɔ ekoŋŋ.

Nitsumɔ Kroko Naa Gbele Kɛha Wɔ

Yɛ 1988 lɛ, aha wɔtee nitsumɔhe nine ni yɔɔ Port Moresby lɛ koni wɔyaye kɛbua kɛha wiemɔ shishitsɔɔmɔ. Wɔyi aaafee 50 wɔyɔɔ nitsumɔhe nine lɛ ni wɔtsuɔ nii yɛ jɛmɛ, ni mi kɛ miwu tsɔse mɛi heei kɛha wiemɔ shishitsɔɔmɔ hu. Aha mɔ fɛɛ mɔ tsũ. Mi kɛ John kpɛ wɔyiŋ akɛ wɔbaagbele wɔshinaa lɛ wɔfɔ̃ bɔni afee ni mɛi ni wɔkɛ yɔɔ lɛ kɛ gbɔi anyɛ amɛbasara wɔ koni wɔkɛle amɛ jogbaŋŋ. No hewɔ lɛ, wɔkɛ mɛi ni wɔkɛ yɔɔ lɛ bɔ gbagbalii, ni wɔnyɛ wɔye kɛbua wɔhe ni wɔjiejiee suɔmɔ kpo wɔtsɔɔ wɔhe.

Kɛkɛ ni yɛ afi 1993 lɛ, tsui hela gbe John. Minu he tamɔ nɔ ni migbɔmɔtso lɛ fã ko egbo. Wɔkɛ afii 38 hi shi akɛ gbalashihilɛ mli hefatalɔi, ni wɔkɛ nakai be lɛ fɛɛ tsu sɔɔmɔ nitsumɔ lɛ. Fɛɛ sɛɛ lɛ, mitswa mifai shi akɛ matsa nɔ yɛ Yehowa hewalɛ naa. (2 Korintobii 4:7) Migbeleɔ mishinaa lɛ mifɔ̃ɔ lolo, ni oblahii kɛ oblayei lɛ hu kpako mi saramɔ. Naanyobɔɔ kpakpa ni tamɔ nɛkɛ lɛ eye ebua mi ni minijiaŋ ejeko wui.

Akɛni miigbɔjɔ yɛ gbɔmɔtsoŋ hewɔ lɛ, yɛ afi 2003 lɛ, akɛ mi tee Australia nitsumɔhe nine ni yɔɔ Sydney lɛ koni miyasɔmɔ yɛ jɛmɛ. Amrɔ nɛɛ, miye afii 77, ni mikã he mikɛ mibe fɛɛ miitsu nii akɛ wiemɔ shishitsɔɔlɔ, ni mikɛ shiɛmɔ nitsumɔ lɛ hu shwɛɛɛ kwraa. Minanemɛi kɛ mimumɔŋ bii kɛ nabii lɛ haa mináa miishɛɛ daa.

Migbeleɔ mishinaa lɛ mifɔ̃ɔ lolo yɛ Bethel, ni mɛi fɔɔ mi saramɔ. Kɛ́ mishinaa lɛ ŋa lɛ, mɛi tswaa shinaa lɛ koni amɛkwɛ nɔ ni eba. Mitswa mifai shi lolo akɛ gbii abɔ ni mihiɛ kã nɛɛ, magbe misɔɔmɔ lɛ naa, ni masɔmɔ Yehowa mi-Nyɔŋmɔ lɛ.—2 Timoteo 4:5.

[Shishigbɛ niŋmai]

[Shikpɔŋ he mfonirii babaoo ni yɔɔ baafa 18]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

NEW GUINEA

AUSTRALIA

Sydney

INDONESIA

PAPUA NEW GUINEA

Talidig

Madang

PORT MORESBY

NEW BRITAIN

Rabaul

Vunabal

Wide Bay

Waterfall Bay

[He ni Sane lɛ Jɛ]

Map and globe: Based on NASA/Visible Earth imagery

[Mfoniri ni yɔɔ baafa 17]

Mi kɛ John yɛ kpee shishi yɛ Lae, New Guinea, yɛ afi 1973

[Mfoniri ni yɔɔ baafa 20]

Yɛ nitsumɔhe nine ni yɔɔ Papua New Guinea lɛ, yɛ afi 2002